عالمی یوم ذیابیطس کے موقع پر، مرکزی وزیر ڈاکٹر جتیندر سنگھ، جو ایک مشہور ذیابیطس ماہر ہیں، نے بھارت میں ذیابیطس کی وبا کو روکنے کے لیے مشترکہ کوششوں کی ضرورت پر زور دیا۔

ڈاکٹر جتیندر سنگھ نے ذیابیطس کے شعبے کی کچھ بہترین اور سب سے نامور شخصیات، بشمول انٹرنیشنل ڈائبٹیز فیڈریشن کے صدر ڈاکٹر پیٹر شوارتز، پر مشتمل حاضرین سے خطاب کرتے ہوئے اس سال کا موضوع "بریکنگ بیریرس، بریجنگ گیپس" (رکاوٹوں کو توڑنا، خلا کو ختم کرنا) اجاگر کیا۔ انہوں نے ایک متحدہ نقطہ نظر پر زور دیا تاکہ ہر شخص کو سستی اور معیاری ذیابیطس کی دیکھ بھال تک رسائی حاصل ہو سکے۔

بھارت میں لاکھوں کیسز کے ساتھ، ڈاکٹر جتیندر سنگھ نے اس بات پر زور دیا کہ ذیابیطس کا چیلنج محض علاج تک محدود نہیں ہے۔ انہوں نے صحت کی دیکھ بھال کی رسائی، آگاہی، اور علاج کی پابندی میں موجود خامیوں کی نشاندہی کی، یہ بتاتے ہوئے کہ تقریباً نصف مریض یا تو اپنی حالت سے لاعلم ہیں یا مالی یا معلوماتی رکاوٹوں کے باعث باقاعدہ علاج جاری رکھنے میں مشکلات کا سامنا کرتے ہیں۔ انہوں نے اس کو ایک "نظامی خلا"(سسٹمٹک گیپ)  قرار دیا جس پر عوامی اور نجی شعبے دونوں سے توجہ اور کارروائی کی ضرورت ہے۔

اپنے خطاب کے دوران، وزیر نے ایک تصور پیش کیا جسے انہوں نے "پی پی پی پلس پی پی پی" قرار دیا، یعنی "ملکی سطح پر عوامی-نجی شراکت داری، بین الاقوامی سطح پر عوامی-نجی شراکت داری کے ساتھ تعاون۔" انہوں نے اس ماڈل کو دو سطحی تعاون کے طور پر بیان کیا، جہاں بھارت کے عوامی اور نجی شعبے اندرون ملک صحت کی دیکھ بھال کے بنیادی ڈھانچے کو مضبوط بنانے کے لیے متحد ہوں، جبکہ بین الاقوامی شراکت داروں کے ساتھ بھی منسلک رہیں۔ وزیر نے زور دیا کہ اس لیرڈ پارٹنرشپ ماڈل کے ذریعے بھارت صحت کی جدت کو تیز کر سکتا ہے، صحت کی دیکھ بھال تک رسائی بہتر بنا سکتا ہے، اور ذیابیطس کی دیکھ بھال کے لیے پائیدار اور قابلِ پیمائش حل پیدا کر سکتا ہے۔ انہوں نے اس مشترکہ فریم ورک کو ایسی بڑی صحت کی دیکھ بھال کی مشکلات سے نمٹنے اور مقامی فائدے کے لیے عالمی مہارت کا فائدہ اٹھانے کی کلید قرار دیا۔

وزیر نے انٹرنیشنل ڈائبٹیز فیڈریشن کے سربراہ ڈاکٹر پیٹر شوارتز کی موجودگی کا بھی اعتراف کیا، عالمی ذیابیطس بحران کے حل میں ان کی قیادت کو سراہا۔ انہوں نے ڈاکٹر پیٹر اور فیڈریشن کے ساتھ قریبی تعاون کرنے کے عزم کا اظہار کیا تاکہ بھارت میں بہترین عالمی نمونوں سے سیکھا جا سکے اور ان کو مقامی ضروریات کے مطابق ڈھالا جا سکے۔ ڈاکٹر جتیندر سنگھ نے کہا، "ڈاکٹر پیٹر جیسے رہنماؤں کے ساتھ، ہمارے پاس یہ موقع ہے کہ ہم بھارت میں ذیابیطس کی دیکھ بھال کو بہتر بنا سکیں،" انہوں نے زور دیا کہ بین الاقوامی تعاون ذیابیطس کی دیکھ بھال میں اہم پیش رفت کا سبب بن سکتا ہے۔

ڈاکٹر جتیندر سنگھ نے وزارت سائنس و ٹیکنالوجی کی جانب سے قابلِ رسائی ذیابیطس کی نگرانی کے اوزار تیار کرنے کی کوششوں کو بھی اجاگر کیا، جن میں اسمارٹ، غیر مداخلتی آلات شامل ہیں جو مریضوں کو اپنی صحت کا آسانی سے انتظام کرنے کے قابل بناتے ہیں۔ انہوں نے جاری کوششوں کا ذکر کیا جن کا مقصد سستے میڈیکل آلات اور مصنوعی ذہانت پر مبنی حل تیار کرنا ہے، جو صحت کی دیکھ بھال کو سستا اور قابلِ رسائی بنانے کے حکومت کے عزم کو ظاہر کرتا ہے۔

اپنے خطاب کے اختتام پر، وزیر نے اس بات پر زور دیا کہ ذیابیطس کی دیکھ بھال اور روک تھام اتنی اہم ہے کہ اسے صرف طبی ماہرین کے رحم و کرم پر نہیں چھوڑا جا سکتا۔ اس کے بجائے، اس کے لیے صحت کی دیکھ بھال فراہم کرنے والوں، پالیسی سازوں، خاندانوں، اور کمیونٹیوں کی متحدہ قومی کوششوں کی ضرورت ہے۔ انہوں نے کہا، "ذیابیطس ایک قومی مسئلہ ہے جو لاکھوں لوگوں کو متاثر کرتا ہے، اور مشترکہ کوششوں کے ذریعے ہم آگاہی، دیکھ بھال، اور علاج کی رسائی کے خلا کو پُر کر سکتے ہیں۔"

جب عالمی یوم ذیابیطس عالمی سطح پر آگاہی پیدا کرتا ہے، تو ڈاکٹر جتیندر سنگھ کا پیغام عمل کی ایک اپیل ہے، جو ہر بھارتی کے لیے معیاری ذیابیطس کی دیکھ بھال کو یقینی بنانے کے لیے مشترکہ کوشش کی ضرورت پر زور دیتا ہے۔

****

UR-2464

(ش ح۔ اس ک۔ع ر )

(Release ID: 2073325) Visitor Counter : 20