صحت سے متعلق تحقیق کے محکمے اور انڈین کونسل آف میڈیکل ریسرچ (ڈی ایچ آر۔آئی سی ایم آر) نے آج سشما سوراج بھون، نئی دہلی میں ڈی ایچ آر۔آئی سی ایم آر ہیلتھ ریسرچ ایکسیلنس سمٹ 2024 کی میزبانی کی۔ اس اہم  تقریب میں آئی سی ایم آر کے 113ویں یوم تاسیس کے موقع پر اور ہندوستان میں بایومیڈیکل تحقیق کو آگے بڑھانے کے لیے ادارے کے عزم کی ایک صدی سے زیادہ کا جشن منایا گیا ۔

اس سمٹ میں صحت کی دیکھ بھال اور تحقیق کے شعبوں کی ممتاز شخصیتیں شریک تھیں، جن میں صحت اور خاندانی بہبود کے مرکزی وزیر جناب جگت پرکاش نڈا (ویڈیو پیغام کے ذریعے) بھی شریک تھے۔ صحت اور خاندانی بہبود کی وزیر مملکت، محترمہ انوپریا پٹیل؛ رکن (صحت)، نیتی آیوگ، ڈاکٹر۔ وی کے پال اور سکریٹری ڈی ایچ آر اور ڈائریکٹر جنرل آئی سی ایم آر، ڈاکٹر۔ راجیو بہل بھی اس تقریب میں موجود تھے۔

صحت اور خاندانی بہبود کے مرکزی وزیر جناب جگت پرکاش نڈا نے اجتماع سے خطاب کیا (ویڈیو پیغام کے ذریعے) اور کہا کہ "آج، ہم صحت کی تحقیق کو آگے بڑھانے اور لاکھوں لوگوں کی زندگیوں کو بہتر بنانے کے لیے آئی سی ایم آر کے غیر متزلزل عزم کی ایک صدی سے زیادہ کا جشن منا رہے ہیں۔ آئی سی ایم آر بایومیڈیکل ریسرچ میں سب سے آگے رہا ہے، جو صحت کے کچھ انتہائی اہم چیلنجوں سے نمٹنے میں اہم کردار ادا کر رہا ہے۔ تپ دق، ملیریا، اور کووڈ 19 جیسی متعدی بیماریوں کا مقابلہ کرنے سے لے کر غیر متعدی امراض، ماں اور بچے کی صحت اور غذائیت سے متعلق مسائل کے حل کو آگے بڑھانے تک —آئی سی ایم آر نے ہندوستان کے صحت کی دیکھ بھال کے منظر نامے پر ایک امٹ نشان چھوڑا ہے۔

مرکزی وزیر صحت نے ممتاز شخصیتوں اور  آئی سی ایم آر عملے کو مبارکباد دی اور کہا کہ "جیسے جیسے ہم آگے بڑھ رہے ہیں، ہماری  یہ پہچان یاد دلاتی ہے  کہ ہر کوشش اہمیت رکھتی ہےاور ہمیشہ نئے درخشاں مواقع ہوتے ہیں۔ مجھے یہ بتاتے ہوئے خوشی ہو رہی ہے کہ اب سے، آئی سی ایم آر اپنے یوم تاسیس کی سالانہ تقریب کے دوران تحقیقی مہارت کو تسلیم کرنے کی یہ روایت جاری رکھے  گی۔ انہوں نے خواہش ظاہر کی کہ "آئیے ایک ساتھ مل کر ایک صحت مند اور مضبوط ہندوستان کی تعمیر کے اپنے مشن میں آگے بڑھیں"۔

وزیر مملکت نے مزید کہا کہ آج کا دن  ان بے شمار زندگیوں کو یاد کرنے کا ہے جو آئی سی ایم آر کے تعاون سے بدل گئی ہیں اور ڈی ایچ آر۔آئی سی ایم آر  کی ٹیم کو لگن اور عزم کے لیے سراہا۔ انہوں نے کہا کہ ان شراکتوں کو تسلیم کرنا آنے والی نسلوں کو متاثر کرے گا۔

اس موقع پر خطاب کرتے ہوئے ڈاکٹر۔ وی کے پال، رکن (صحت)، نیتی آیوگ نے ​​کہا کہ "جدت طرازی اور تحقیق میں آج ہم جو پیشرفت دیکھ رہے ہیں، ان سے صحت کو درپیش نہ صرف ہمارے وقت کے اہم چیلنجوں سے نمٹنے کی صلاحیت پیدا ہوگی بلکہ ہندوستان کو صحت کی تحقیق میں ایک عالمی رہنما کے طور پر بھی مقام حاصل ہوگا۔  اس اجتماعی کوشش سے ایک مزید  صحت مند مستقبل کی بنیاد پڑ رہی ہے اور اس بات کی یقین دہانی ہو رہی ہے کہ بھارت کو  سائنسی اختراعات اور صحت کی دیکھ بھال کی عمدہ کارکردگی میں قائدانہ مقام حاصل ہوگا۔  آئی سی ایم آر کی پوری ٹیم کو ان کی کامیابیوں پر مبارکباد دیتے ہوئے انہوں نے کہا کہ ہر روز ہمارا مقصد وکست بھارت کے ہدف کو آگے بڑھانا ہے۔

ڈاکٹر راجیو بہل، سکریٹری ڈی ایچ آر اور ڈائریکٹر جنرل آئی سی ایم آر نے کہا، "ڈی ایچ آر ۔ آئی سی ایم آر ہیلتھ ریسرچ ایکسی لینس سمٹ ایک ایسے ماحول کو فروغ دینے کے لیے ہمارے غیر متزلزل عزم کو واضح کرتا ہے جہاں پر اثر انگیز تحقیق پھلے پھولے۔ آج ہم جن کامیابیوں کا جشن منارہے ہیں وہ ہندوستان کے عمدہ محققین، اداروں اور معاون ٹیموں کی اجتماعی کوششوں کا نتیجہ ہیں۔ سائنسی علم کو آگے بڑھانے اور ایک صحت مند اور زیادہ خوشحال ہندوستان کی تعمیر میں مدد کرنے کے لیے میں ان سب کا تہہ دل سے شکریہ ادا کرتا ہوں۔"

اس تقریب میں  حفظان صحت  کے شعبے میں  جدت طرازی میں آئی سی ایم آر کے تعاون کو تقویت دینے کے لیے ڈیزائن کیے گئے کئی اہم اقدامات کے آغاز کا بھی جائزہ لیا  گیا۔ ان میں قابل ذکر ریسرچ انفراسٹرکچر شیئرنگ ایکو سسٹم (آئی۔ آر آئی ایس ای) پالیسی  بھی شامل ہے جو صحت کی دیکھ بھال کی جدت کو فروغ دینے کے لیے آئی سی ایم آر کی وسیع لیبارٹری اور ریسرچ نیٹ ورک تک رسائی کو بڑھانے کے لیے ایک باہمی تعاون کا پلیٹ فارم ہے۔ آئی سی ایم آر کی آئی ڈرون پہل، جسے وزیر اعظم جناب نریندر مودی نے 29 اکتوبر 2024 کو آیوروید ڈے کے موقع پر شروع کیا تھا، آج محترمہ  انوپریہ پٹیل نے تلنگانہ کے پی ایچ سی یدادری بھاوونگری میں اس کا مظاہرہ کیا۔

اس سمٹ میں آئی سی ایم آر ہسٹری بک کا اجراء بھی کیا گیا، جس میں آئی سی ایم آر کی ایک صدی سے زیادہ کی کامیابیوں اور ہندوستان کے صحت کی دیکھ بھال کے منظر نامے میں شراکت کی تفصیل دی گئی ہے۔ اس کے علاوہ، دانشورانہ املاک کی پالیسی، سی ایس آر فنڈز، اور ٹیکنالوجی کی منتقلی سے متعلق نئے  رہنما خطوط متعارف کرائے گئے ہیں، جن سے جدت کو آگے بڑھانے، تعاون کی حوصلہ افزائی، اور وسائل کی تقسیم کو بہتر بنانے کے لیے ایک مضبوط فریم ورک قائم ہوتا ہے۔

سمٹ میں پورے  ہندوستان میں آئی سی ایم آر کے اداروں اور آئی سی ایم آر کے تعاون یافتہ میڈیکل کالجوں اور تحقیقی اداروں کے ممتاز محققین کو تسلیم کرتے ہوئے طبی تحقیق میں مثالی شراکت کا جشن منایا گیا۔ افراد اور ٹیموں کو بہترین ریسرچ پیپر، بہترین اختراع، بہترین ٹیم ریسرچ اور بہترین پی ایچ ڈی طلبا، نیز ادارہ جاتی امتیازات بشمول بہترین آئی سی ایم آر انسٹی ٹیوٹ، بہترین ایکسٹرامورل انسٹی ٹیوٹ، بہترین ملٹی ڈسپلنری ریسرچ یونٹ، بہترین ماڈل رورل ہیلتھ ریسرچ یونٹ، بہترین وائرل ریسرچ اینڈ ڈائیگنوسٹک لیبارٹری، اور بہترین ہیلتھ ٹیکنالوجی کے اعزازات سے نوازا گیا۔

****

ش ح۔ا س ۔ا ک پ۔

U-2459

(Release ID: 2073316) Visitor Counter : 18