సినిమాలు... ఆహారం.. కళలు.. చర్చలూ… పాల్గొనడం ద్వారా అందరినీ కోలాహలంగా ఒక్క చోట చేర్చేలా రూపొందించిన వినోద మహోత్సవం ఇఫీయెస్టాను ప్రారంభించినట్లు- భారత అంతర్జాతీయ చలనచిత్రోత్సవం (ఇఫీ) నిర్వాహకులు ప్రకటించారు. గోవాలోని పాంజిమ్‌లో సుందరమైన సముద్ర తీరాన ఉన్న కళా అకాడమీలో ఈ ఇఫీయెస్టాను నిర్వహిస్తారు. ఈ నెల 21 నుంచి 28 వరకు వారం రోజుల పాటు సాగే ఈ సంబరాలు, అన్ని వయసుల వారికీ వినోదాన్ని పంచుతాయి. ఈ సాంస్కృతిక కార్యక్రమం అనేక ఆకర్షణీయమైన కార్యక్రమాలతో ఘనమైన భారతీయ సంస్కృతిని, ఆహారాన్ని, సంగీతాన్ని, సినిమాల వైవిధ్యాన్ని అనుభూతి చెందే అవకాశం సందర్శకులకు అందిస్తుంది.

సాంప్రదాయ నృత్య ప్రదర్శనలు

దేశం నలుమూలల నుంచి తరలి వచ్చిన 11 సాంప్రదాయ నృత్య బృందాలు తమ ప్రదర్శనల ద్వారా భారత దేశ ఘనమైన సాంస్కృతిక వైవిధ్యాన్నీ, భిన్న సంప్రదాయాలనీ ప్రదర్శిస్తాయి.

దేశవ్యాప్తంగా ప్రాచుర్యం పొందిన వంటకాలు

ఆహారశాల ప్రాంతంలో- ఏర్పాటు చేసిన 15-20 స్థానిక, జాతీయ రెస్టారెంట్ల ద్వారా దేశవ్యాప్తంగా ప్రాచుర్యం పొందిన వివిధ రకాల వంటలను రుచి చూసే అవకాశం సందర్శకులకు కల్పించారు. భారతీయ వంటకాలను ఆస్వాదించేలా, ఉత్సవ ఇతివృత్తమైన ఐక్యతను, వేడుకలను ప్రతిబింబిచేలా ఫుడ్ జోన్లోని ఆహార పదార్థాలను ఎంపిక చేశారు.

నిఫ్ట్ ఆధ్వర్యంలో ఫ్యాషన్ షో

ఆరు దశాబ్దాల భారతీయ సినిమాను గౌరవిస్తూ నేషనల్ ఇనిస్టిట్యూట్ ఆఫ్ ఫ్యాషన్ టెక్నాలజీ (నిఫ్ట్) ఫ్యాషన్ షోను నిర్వహిస్తోంది. దీనిలో ప్రేక్షకాదరణ చూరగొన్న ఐకానిక్ చలనచిత్రాల ప్రేరణతో రూపొందించిన డిజైన్లను ప్రదర్శించడం ద్వారా సినిమా, ఫ్యాషన్‌ల మధ్య ఉన్న సన్నిహిత సంబంధాన్ని తెలియజేస్తుంది.

చలన చిత్ర దిగ్గజాలకు గౌరవం

4,000 చదరపు అడుగుల్లో ఏర్పాటు చేసిన భారీ ఎగ్జిబిషన్లో శ్రీ రాజ్ కపూర్, శ్రీ మహమ్మద్ రఫీ, శ్రీ అక్కినేని నాగేశ్వరరావు, శ్రీ తపన్ సిన్హా లాంటి సినీ దిగ్గజాల వైభవాన్ని ప్రదర్శిస్తారు. అలాగే వర్చువల్ రియాలిటీ, ఆగ్మంటెడ్ రియాలిటీ సాంకేతికతలను ఉపయోగించి పాతకాలం నుంచి ఆధునిక కాలం వరకు సినిమాల్లో వచ్చిన పరిణామాలను అనుభూవపూర్వకంగా తెలుసుకునేలా ఏర్పాటు చేశారు.

ప్రత్యేక స్టాల్ ఏర్పాటు చేసిన నేషనల్ ఫిలిం ఆర్కైవ్ ఆఫ్ ఇండియా

ఫిలిం పునరుద్ధరణ కళ, క్లాసిక్ చిత్రాలను భద్రపరచడంలో చేసిన కృషిని ఈ కేంద్రం తెలియజేస్తుంది. ఇక్కడ పాతకాలపు ప్రొజెక్టర్ల ద్వారా అలనాటి సినిమాలను సందర్శకులు వీక్షించవచ్చు. అలాగే భారతీయ సినిమా చరిత్రను తెలుసుకోవచ్చు.

భారతీయ సినిమా ప్రయాణంపై జాతీయ మ్యూజియం

భారతీయ సినిమా జాతీయ మ్యూజియం - ఇమర్సివ్ ఆడియో-విజువల్ టూర్ ద్వారా భారతీయ చలనచిత్ర గొప్ప సంస్కృతిలోకి సందర్శకులను తీసుకువెళ్లి, చారిత్రక, ఆధునిక సినిమా కథల సమ్మేళనాన్ని వారి ముందు ఉంచుతుంది.

ప్రసార భారతి ఏర్పాటు చేసిన స్టాల్ ద్వారా ఓటీటీ అనుభవం

ప్రసార భారతి ఏర్పాటు చేసిన ఓటీటీ స్టాల్ ద్వారా డిజిటల్ ఫిలిం, టెలివిజన్ రంగాల్లో విస్తరిస్తున్న సరికొత్త ఓటీటీ (ఓవర్-ది-టాప్) ప్రపంచాన్ని అన్వేషించే అవకాశం ఉత్సవ సందర్శకులకు దక్కుతుంది.

‘‘వేవ్స్: క్రియేట్ ఇన్ ఇండియా’’ చర్చా వేదిక

అంతర్జాతీయ వినోద రంగంలో పెరుగుతున్న భారత్ ప్రభావాన్ని సందర్శకులు తెలుసుకొనేందుకు, సృజనాత్మక పోటీల్లో పాల్గొనేలా వారిని ప్రోత్సహించేందుకు అవసరమైన సమాచారాన్ని వేవ్స్ పోటీల వేదిక అందిస్తుంది.

ఇన్ఫ్లేటబుల్ థియేటర్లలో సినిమా ప్రదర్శన

విస్తృతమైన భారతీయ సినిమా రంగంలోనూ, వివిధ ఓటీటీల్లోనూ ప్రసిద్ధి పొందిన చలనచిత్రాలను ప్రదర్శించడానికి ప్రత్యేకంగా 140 సీట్లతో కూడిన ఇన్ఫ్లేటబుల్ థియేటర్‌ను ఏర్పాటు చేశారు. ఇది ఉత్సవానికి హాజరైన వారికి వినూత్నమైన సినిమా వీక్షణ అనుభూతిని కల్పిస్తుంది.

అభిమానులతో సెలబ్రిటీల మాటామంతీ

చలనచిత్ర పరిశ్రమకు చెందిన ప్రముఖులు, ఇతరులతో ప్రత్యేక కార్యక్రమాలను జొమాటో డిస్ట్రిక్ట్ ఎంటర్టైన్మెంట్ ఎరీనా ఏర్పాటు చేసింది. దీనిలో భాగంగా ఏర్పాటు చేసిన మీట్ అండ్ గ్రీట్ కార్యక్రమాల ద్వారా టాప్ సెలబ్రిటీలతో మాట్లాడే అవకాశం అభిమానులకు లభిస్తుంది. వీటి ద్వారా ప్రశ్నలు-సమాధానాలు, ఆటోగ్రాఫులు, సోషల్ మీడియా ద్వారా సెలబ్రిటీలతో మాట్లాడే కార్యక్రమాల్లో పాల్గొనడంతో పాటు, వినోద పరిశ్రమకు చెందిన ప్రముఖులను కలిసే అవకాశం దక్కుతుంది.

సంగీతం, డీజేలు, స్టాండప్ కామెడీ

ఉత్సాహభరితమైన వాతావరణాన్ని కల్పించేందుకు ఎంటర్టైన్మెంట్ జోన్‌లో జొమాటో భాగస్వామ్యంతో జనాదరణ పొందింన సంగీత కార్యక్రమాలు, డీజే, స్టాండప్ కామెడీ ప్రదర్శనలను ప్రతి రోజూ ఏర్పాటు చేశారు.

వివిధ రకాల రుచికరమైన వంటలు, సరదా ఆటలతో పాటు అగ్రశ్రేణి సంగీత కళాకారులు, డీజేలు, స్టాండ్-అప్ కమెడియన్ల ప్రత్యక్ష ప్రదర్శనల ద్వారా వినోదభరితమైన కార్నివాల్ అనుభవాన్ని జొమాటో భాగస్వామ్యంతో నిర్వహిస్తున్న ఇఫీయెస్టా అందిస్తుంది. ఎంటర్‌టైన్‌మెంట్ జోన్‌లో భారతీయ సంప్రదాయ నృత్యాలను ప్రదర్శిస్తారు. దాదాపు15-20 వరకు ఏర్పాటు చేసిన స్థానిక, జాతీయ రెస్టారెంట్ల నుంచి వైవిధ్యమైన వంటకాలను ఆహార ప్రేమికులు రుచి చూడవచ్చు.

ఇప్పుడే రిజిస్టర్ చేసుకోండి, ఇఫి ప్రతినిధిగా మారండి

ఇఫి ప్రతినిధిగా ఉత్సవ ప్రయాణాన్ని పూర్తిగా ఆస్వాదించాలనుకునే ఆసక్తి ఉన్నవారికి ముందుగానే రిజిస్ట్రేషన్లు మొదలయ్యాయి. ఈ నెల 10వ తేదీ వరకు కేవలం రూ.1000 (పన్నులు అదనం) చెల్లించి రిజిస్ట్రేషన్ చేసుకోవచ్చు. ఆ తర్వాత రూ. 2,000 చెల్లించి (పన్నులతో సహా) ప్రతినిధిగా నమోదు చేసుకోవాల్సి ఉంటుంది. వారం రోజుల పాటు జరిగే ఇఫీయెస్టా లో జరిగే అన్ని కార్యక్రమాల్లోనూ పాల్గొనే అవకాశం కల్పిస్తుంది.

అందరినీ ఏకం చేసే శక్తి కలిగిన సినిమాకు గౌరవం

కథ, కథనం ద్వారా అందరినీ ఏకం చేసే సినిమా శక్తిని సంబరంగా జరుపుకొనేలా ఇఫీయెస్టాను రూపొందించారు. సెల్ఫీ పాయింట్లు, ఫొటోబూత్‌లు, లీనమయ్యే అనుభవాలు తదితరమైన వాటి ద్వారా సినిమా శక్తిని గౌరవిస్తుంది. సినిమా ప్రపంచంతోనూ, వివిధ సంస్కృతులతోనూ సందర్శకులు అనుసంధానమయ్యే అవకాశాన్ని కల్పించి భారత్ ను ప్రత్యేకంగా నిలుపుతుంది.

 

***

(Release ID: 2072573) Visitor Counter : 35