ഇന്ത്യാ രാജ്യാന്തര ചലച്ചിത്രമേളയുടെ (IFFI) ഭാഗമായി സിനിമ, ഭക്ഷണം, കല, സംവേദനാത്മക അനുഭവങ്ങൾ എന്നിവയുടെ മാന്ത്രികതയിലൂടെ കലാസമൂഹത്തെ ഒരുമിച്ചുകൊണ്ടുവരാന്‍ ആവിഷ്ക്കരിച്ച ആകര്‍ഷണീയ വിനോദ മാമാങ്കമായ IFFIESTA-യുടെ സമാരംഭം പ്രഖ്യാപിച്ചു. ഗോവയിലെ പനാജിയില്‍ ദൃശ്യഭംഗിയാര്‍ന്ന കടൽത്തീരത്ത് സ്ഥിതി ചെയ്യുന്ന കലാ അക്കാദമിയിലാണ് IFFIESTA സംഘടിപ്പിക്കുന്നത്.  എല്ലാ പ്രായക്കാർക്കും ഒരാഴ്ചത്തെ ആഘോഷവും വിനോദവും വാഗ്ദാനം ചെയ്തുകൊണ്ട് 2024 നവംബർ 21 മുതൽ 28 വരെ മേള നടക്കും. ഇന്ത്യൻ സംസ്കാരം, ഭക്ഷണം, സംഗീതം, സിനിമ എന്നിവയുടെ വൈവിധ്യങ്ങൾ തേടാന്‍ സന്ദർശകർക്ക് അവസരം നൽകുന്നതിലൂടെ ബൃഹത്തായ ഈ സാംസ്കാരിക പരിപാടി വിവിധ തലങ്ങളില്‍ ആകര്‍ഷണീയമാകും. 

പരമ്പരാഗത നൃത്ത പ്രകടനങ്ങൾ

ഇന്ത്യയിലുടനീളമുള്ള പതിനൊന്ന് പരമ്പരാഗത നൃത്തസംഘങ്ങൾ രാജ്യത്തിന്റെ സമ്പന്നമായ സാംസ്കാരിക വൈവിധ്യവും ആകര്‍ഷണീയമായ പാരമ്പര്യങ്ങളും മനംകവരുന്ന നൃത്ത പ്രകടനങ്ങളിലൂടെ വേദിയിലെത്തിക്കും. 

ഇന്ത്യയിലെങ്ങുമുള്ള രുചിവൈവിധ്യങ്ങള്‍

സന്ദർശകർക്ക് ഇന്ത്യയിലെങ്ങുമുള്ള വൈവിധ്യമാർന്ന രുചിക്കൂട്ടുകള്‍ ആസ്വദിക്കാനുള്ള അവസരവുമായി മികച്ച 15-20 പ്രാദേശിക - ദേശീയ ഭക്ഷണശാലകള്‍ ഫുഡ് സോണിന്റെ ഭാഗമായി സജ്ജീകരിക്കും.

കുട്ടികളുടെ കളിയിടം 

മേളയിലുടനീളം കുട്ടികളുടെ ശ്രദ്ധയാകര്‍ഷിക്കുന്ന വിധത്തില്‍ രൂപകൽപ്പന ചെയ്ത പ്രത്യേക ഗെയിമിങ് സോണിലെ വിവിധ പ്രവർത്തനങ്ങളും മത്സരങ്ങളും മേളയ്ക്കെത്തുന്ന കുട്ടികളെ രസിപ്പിക്കും.  

NIFT -ന്റെ ഫാഷൻ ഷോ

ഇന്ത്യൻ സിനിമയുടെ ആറ് പതിറ്റാണ്ടുകള്‍ക്ക് ശ്രദ്ധാഞ്ജലിയര്‍പ്പിച്ച് നാഷണൽ ഇൻസ്റ്റിറ്റ്യൂട്ട് ഓഫ് ഫാഷൻ ടെക്‌നോളജി (NIFT) സംഘടിപ്പിക്കുന്ന ഫാഷൻ ഷോ ജനപ്രിയ സിനിമാ വേഷങ്ങളില്‍നിന്ന്  പ്രചോദനമുൾക്കൊണ്ട് അതിശയകരമായ ഡിസൈനുകളിലൂടെ സിനിമയും ഫാഷനും തമ്മിലെ അടുത്ത ബന്ധം ആഘോഷിക്കും.

ചലച്ചിത്ര ഇതിഹാസങ്ങളുടെ ആഘോഷം

ശ്രീ രാജ് കപൂർ, ശ്രീ മുഹമ്മദ് റഫി, ശ്രീ അക്കിനേനി നാഗേശ്വര റാവു, ശ്രീ തപൻ സിൻഹ എന്നിവരുൾപ്പെടെ ചലച്ചിത്ര ഇതിഹാസങ്ങളുടെ പാരമ്പര്യം ആഘോഷിക്കുന്നതിനായി 4,000 ചതുരശ്ര അടി വിസ്തൃതിയില്‍ വലിയ പ്രദർശനമൊരുക്കും. പഴയകാലം മുതൽ ആധുനിക കാലം വരെയുള്ള ചലച്ചിത്ര പരിണാമത്തെക്കുറിച്ച്  വിർച്വൽ റിയാലിറ്റി,  ഓഗ്മെൻ്റഡ് റിയാലിറ്റി സാങ്കേതികവിദ്യകളുപയോഗിച്ച്  തയ്യാറാക്കുന്ന ഈ സംവേദനാത്മക പ്രദർശനം സന്ദർശകർക്ക് ആഴത്തിലുള്ള അനുഭവം സമ്മാനിക്കും. 

നാഷണൽ ഫിലിം ആർക്കൈവ് ഓഫ് ഇന്ത്യയുടെ കലാസൃഷ്ടി

വിശിഷ്ട സിനിമകളെ ‌വീണ്ടെടുക്കുന്ന കലയെക്കുറിച്ചും അവയുടെ സംരക്ഷണത്തില്‍ ഉൾപ്പെട്ടിരിക്കുന്ന കഠിന പ്രയത്നങ്ങളെക്കുറിച്ചും ഗൃഹാതുരത്വത്തോടെ ഈ സൃഷ്ടി അവതരിപ്പിക്കും. 

നാഷണൽ മ്യൂസിയം ഓഫ് ഇന്ത്യൻ സിനിമയുടെ പ്രദര്‍ശനം 

നാഷണൽ മ്യൂസിയം ഓഫ് ഇന്ത്യൻ സിനിമ ഒരുക്കുന്ന ദൃശ്യ-ശ്രാവ്യ സംവിധാനങ്ങളോടെയുള്ള പ്രദര്‍ശനം ചരിത്രത്തിൻ്റെയും ആധുനിക ചലച്ചിത്ര ആഖ്യാനത്തിന്റെയും സമന്വയത്തിലൂടെ ഇന്ത്യൻ സിനിമയുടെ സമ്പന്ന പൈതൃകത്തെക്കുറിച്ചുള്ള യാത്രയിലേക്ക് സന്ദർശകരെ കൊണ്ടുപോകും.

പ്രസാർ ഭാരതി OTT പരിചയകേന്ദ്രം 

മേളയ്ക്കെത്തുന്നവര്‍ക്ക് ഡിജിറ്റൽ സിനിമയിലെയും ടെലിവിഷനിലെയും ഏറ്റവും പുതിയ OTT (ഓവർ-ദി-ടോപ്പ്) ഉള്ളടക്കത്തിൻ്റെ വികസിച്ചുകൊണ്ടിരിക്കുന്ന ലോകത്തെക്കുറിച്ച് അറിവുപകരാന്‍ പ്രസാർ ഭാരതി OTT ബൂത്ത് അവസരമൊരുക്കും. 

"വേവ്സ്: ക്രിയേറ്റ് ഇന്‍ ഇന്ത്യ" സമ്പര്‍ക്കവേദി

സന്ദർശകർക്ക് സർഗാത്മക മത്സരങ്ങളില്‍‌ പങ്കെടുക്കാനും ആഗോള വിനോദ ഭൂമികയില്‍ ഇന്ത്യയുടെ വർധിച്ചുവരുന്ന സ്വാധീനത്തെക്കുറിച്ച് അറിയാനും സംവേദനാത്മക അനുഭവങ്ങളിലൂടെ വേവ്സ് ചലഞ്ചസ് സമ്പര്‍ക്കവേദി അവസരമൊരുക്കും. 

ഇന്‍ഫ്ലാറ്റബിള്‍ തീയറ്ററുകളിൽ സിനിമാ പ്രദർശനം

ഇന്ത്യൻ ചലച്ചിത്രവേദികളില്‍നിന്നും നിന്നും വിവിധ OTT പ്ലാറ്റ്‌ഫോമുകളിൽ നിന്നുമുള്ള ജനപ്രിയ സിനിമകളുടെ പ്രദർശനം 140 ഇരിപ്പിടങ്ങളുള്ള ഇന്‍ഫ്ലാറ്റബിൾ തിയേറ്ററുകളില്‍ ഒരുക്കും.   ഇത് ചലച്ചിത്രമേളയില്‍ പങ്കെടുക്കുന്ന എല്ലാവർക്കും നൂതനവും ആഴമേറിയതുമായ സിനിമാ അനുഭവം ഉറപ്പാക്കും. 

ആരാധകരുമായി താരങ്ങളുടെ കൂടിക്കാഴ്ച

സിനിമാ വ്യവസായത്തിലും പുറത്തുമുള്ള പ്രമുഖ നേതാക്കളെ പങ്കെടുപ്പിച്ച് സൊമാറ്റോ ഡിസ്ട്രിക്ട് എൻ്റർടൈൻമെൻ്റ് അരീന പ്രത്യേക പരിപാടികൾ സംഘടിപ്പിക്കും. മീറ്റ് ആൻഡ് ഗ്രീറ്റ്സ്, ചോദ്യോത്തര സെഷനുകൾ, ഓട്ടോഗ്രാഫ് ഒപ്പുവെയ്ക്കല്‍, സമൂഹമാധ്യമ ഇടപെടലുകൾ എന്നിവയിലൂടെ വിനോദമേഖലയിലെ ഏറ്റവും സ്വാധീനമുള്ള  വ്യക്തികളുമായി ബന്ധപ്പെടാനും മുൻനിര താരങ്ങളുമായി സംവദിക്കാനും ആരാധകർക്ക് അവസരം ലഭിക്കും.

സംഗീതവും ഡിജെയും ഹാസ്യാവതരണങ്ങളും

എല്ലാ ദിവസവും എൻ്റർടൈൻമെൻ്റ് സോൺ സൊമാറ്റോയുടെ പങ്കാളിത്തത്തോടെ ഊർജസ്വലവും ആകര്‍ഷണീയവുമായ അന്തരീക്ഷത്തില്‍ ജനപ്രിയ സംഗീതപ്രകടനങ്ങളും ഡിജെയും ഹാസ്യാവതരണങ്ങളുമുൾപ്പെടെ തത്സമയ പ്രകടനങ്ങൾ സംഘടിപ്പിക്കും.

മികച്ച സംഗീതജ്ഞരുടെയും ഡിജെകളുടെയും  ഹാസ്യാവതാരകരുടെയും തത്സമയ പ്രകടനങ്ങള്‍ക്കൊപ്പം രുചിവൈവിധ്യങ്ങളും രസകരമായ മത്സരങ്ങളുമടങ്ങുന്ന ഭക്ഷ്യ - വിനോദ കാർണിവല്‍ സൊമാറ്റോ ഡിസ്ട്രിക്റ്റ് അവതരിപ്പിക്കുന്ന "ദി പൾസി”ന്റെ ഭാഗമായി ഒരുക്കും. എന്‍റര്‍ടെയിന്മെന്റ് സോണില്‍ ഓരോ ദിവസവും  ഇന്ത്യയിലുടനീളമുള്ള പരമ്പരാഗത നൃത്ത സംഘങ്ങളുടെ പ്രദർശനമൊരുക്കും.  ഭക്ഷണ പ്രേമികൾക്ക് 15-20-ലധികം പ്രാദേശിക - ദേശീയ ഭക്ഷണശാലകളില്‍നിന്ന്  വൈവിധ്യമാർന്ന രുചിക്കൂട്ടുകള്‍ തേടാനും അവസരമുണ്ടാകും.   

ഇപ്പോൾ രജിസ്റ്റർ ചെയ്യാം

ഇന്ത്യാ രാജ്യാന്തര ചലച്ചിത്രമേളയുടെ മുഴുവന്‍ യാത്രയും അനുഭവിക്കാൻ ആഗ്രഹിക്കുന്നവർക്ക് ആദ്യഘട്ട രജിസ്ട്രേഷനിലൂടെ പ്രത്യേക നിരക്കില്‍ 1,000 രൂപയ്ക്ക് (നികുതി അധികം) 2024 നവംബർ 10 വരെ  ഡെലിഗേറ്റ് രജിസ്ട്രേഷന്‍ ആരംഭിച്ചിരിക്കുന്നു.  ഇതിന് ശേഷം, രജിസ്ട്രേഷൻ നിരക്ക് നകുതിയുള്‍പ്പെടെ  2,000 രൂപയായിരിക്കും. ഈ രജിസ്ട്രേഷൻ IFFIESTA യുടെ ഒരാഴ്ച നീണ്ടുനിൽക്കുന്ന മേളയടക്കം എല്ലാ പരിപാടികളിലേക്കും പ്രവേശനം നല്‍കുന്നു.

*****************************

(Release ID: 2072128) Visitor Counter : 69