ಕರ್ನಾಟಕ ಸಂಗೀತ, ಕನ್ನಡ ಸಂಸ್ಕೃತಿ ಮತ್ತು ದಾಸ ಪರಂಪರೆಯಲ್ಲಿ ಕರ್ನಾಟಕದ ಶ್ರೀಮಂತ ಪರಂಪರೆಯನ್ನು ಗಣ್ಯ ಅತಿಥಿಗಳೊಂದಿಗೆ ಆಚರಿಸುವ ಮೈಸೂರು ಸಂಗೀತ ಸುಗಂಧ ಉತ್ಸವವನ್ನು ಇಂದು ಮೈಸೂರಿನಲ್ಲಿ ಉದ್ಘಾಟಿಸಲಾಯಿತು. ಭಾರತ ಸರ್ಕಾರದ ಪ್ರವಾಸೋದ್ಯಮ ಸಚಿವಾಲಯವು ಆಯೋಜಿಸಿರುವ ಉತ್ಸವವು ಮೈಸೂರನ್ನು ಸಾಂಸ್ಕೃತಿಕ ಪ್ರವಾಸೋದ್ಯಮದ ಕೇಂದ್ರವನ್ನಾಗಿ ಮಾಡಿದೆ, ಇದು ಭಾರತದ ಸಂಗೀತ ಮತ್ತು ಸಾಂಸ್ಕೃತಿಕ ಪರಂಪರೆಗೆ ಕರ್ನಾಟಕದ ಅನನ್ಯ ಕೊಡುಗೆಗಳನ್ನು ಎತ್ತಿ ತೋರಿಸುತ್ತದೆ.

ಕೇಂದ್ರ ಹಣಕಾಸು ಸಚಿವರಾದ ಶ್ರೀಮತಿ ನಿರ್ಮಲಾ ಸೀತಾರಾಮನ್ ಅವರು ಕಾರ್ಯಕ್ರಮದ ಭಾಗವಾಗಿರುವುದಕ್ಕಾಗಿ ಹರ್ಷ ವ್ಯಕ್ತಪಡಿಸಿದರು, ಮೈಸೂರು ಕರ್ನಾಟಕದ ಕಲೆ ಮತ್ತು ಸಂಸ್ಕೃತಿಯ "ಮುಖ್ಯ ಕೇಂದ್ರ" ಎಂದು ಶ್ಲಾಘಿಸಿದರು. ಪ್ರಧಾನಮಂತ್ರಿ ನರೇಂದ್ರ ಮೋದಿಯವರ ವಿಕಾಸ (ಅಭಿವೃದ್ಧಿ) ಮತ್ತು ವಿರಾಸತ್ (ಪರಂಪರೆ) ದೃಷ್ಟಿಕೋನವನ್ನು ಒತ್ತಿ ಹೇಳಿದ ಅವರು, ಕರ್ನಾಟಕದ ಸಾಂಸ್ಕೃತಿಕ ಶ್ರೀಮಂತಿಕೆಯು ಆರ್ಥಿಕ ಬೆಳವಣಿಗೆಯೊಂದಿಗೆ  ಜೊತೆಯಾಗಿ ಸಾಗಬೇಕು ಎಂದು ಹೇಳಿದರು. ತಮ್ಮ ಭಾಷಣದಲ್ಲಿ, ಶ್ರೀಮತಿ  ಸೀತಾರಾಮನ್ ಅವರು ಏಕ ಭಾರತ ಶ್ರೇಷ್ಠ ಭಾರತ ಉಪಕ್ರಮವನ್ನು ಎತ್ತಿ ತೋರಿಸಿದರು, ಇದು ಭಾರತದ ವೈವಿಧ್ಯಮಯ ಸಂಸ್ಕೃತಿಗಳ ನಡುವೆ ಏಕತೆಯನ್ನು ಬೆಳೆಸುವ ಗುರಿಯನ್ನು ಹೊಂದಿದೆ. ಅವರು ದಾಸ ಸಂಪ್ರದಾಯವನ್ನು, ವಿಶೇಷವಾಗಿ ಕರ್ನಾಟಕ ಸಂಗೀತದಲ್ಲಿ ಪುರಂದರದಾಸರ ಮಹತ್ವದ ಪಾತ್ರದ ಬಗ್ಗೆ ಹೇಳಿದರು ಹಾಗು  ಮೈಸೂರಿನ ಸಂಗೀತ ಮತ್ತು ಶ್ರೀಗಂಧದ ಪರಂಪರೆಯನ್ನು ಆಚರಿಸುವ ಮೂಲಕ ಉತ್ಸವದಲ್ಲಿ ಡಿಜಿಟಲ್ ಮೂಲಕ ಜೊತೆಯಾಗಿರಲು ವಿಶ್ವಾದ್ಯಂತ ಕನ್ನಡಿಗರನ್ನು ಒತ್ತಾಯಿಸಿದರು.

ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಮತ್ತು ಪ್ರವಾಸೋದ್ಯಮ ರಾಜ್ಯ ಸಚಿವರಾದ ಶ್ರೀ ಸುರೇಶ್ ಗೋಪಿ ಅವರು ಮೈಸೂರಿನ ಸಾಂಸ್ಕೃತಿಕ ಪ್ರಾಮುಖ್ಯತೆಯನ್ನು ಗೌರವಿಸುತ್ತಾ, ಭಾರತದ "ಮೃದು ಶಕ್ತಿ" ಅದರ ಸಂಗೀತ ಮತ್ತು ಕಲೆಗಳಲ್ಲಿ ಬೇರೂರಿದೆ, ಇದು ಪ್ರವಾಸಿಗರಲ್ಲಿ ಆಳವಾಗಿ ಸಂಪರ್ಕ ಹೊಂದಿದೆ ಎಂದು ಹೇಳಿದರು. ಸಾಂಸ್ಕೃತಿಕ ಪ್ರವಾಸೋದ್ಯಮವನ್ನು ಉತ್ತೇಜಿಸಲು ಭಾರತದಾದ್ಯಂತ ಇದೇ ರೀತಿಯ ಉತ್ಸವಗಳನ್ನು ಕಲ್ಪಿಸುವ ಸಂದರ್ಭದಲ್ಲಿ ಅವರು ಪ್ರವಾಸೋದ್ಯಮದ ಕಾರ್ಯಕ್ರಮದಲ್ಲಿ ಸಂಗೀತ ಕಚೇರಿಗಳನ್ನು ಸೇರಿಸಿದ್ದಕ್ಕಾಗಿ ಪ್ರವಾಸೋದ್ಯಮ ಸಚಿವಾಲಯವನ್ನು ಶ್ಲಾಘಿಸಿದರು. ಕರ್ನಾಟಕದ ಸಂಗೀತ ಪರಂಪರೆಯ ಮೂಲಕ ಪ್ರೇಕ್ಷಕರನ್ನು ಪ್ರೇರೇಪಿಸಲು ಮತ್ತು ಒಗ್ಗೂಡಿಸಲು ಉತ್ಸವವು ವೇದಿಕೆಯಾಗಿದೆ ಎಂದು ಶ್ರೀ ಗೋಪಿ ಶ್ಲಾಘಿಸಿದರು.

ಸಮಾಜ ಕಲ್ಯಾಣ ಸಚಿವರು ಹಾಗೂ ಮೈಸೂರು ಜಿಲ್ಲಾ ಉಸ್ತುವಾರಿ ಸಚಿವರಾದ ಡಾ.ಎಚ್.ಸಿ. ಮಹದೇವಪ್ಪನವರು ಕರ್ನಾಟಕ ಸಂಗೀತವು ವಿಜಯನಗರ ಕಾಲದಿಂದಲೂ  ಉತ್ಕೃಷ್ಟ ಸ್ಥಿತಿಯಲ್ಲಿತ್ತು  ಎಂದು ಕರ್ನಾಟಕದ ಸುದೀರ್ಘ ಸಂಗೀತ ಪರಂಪರೆಯನ್ನು ಕೊಂಡಾಡಿದರು. ಅವರು ಕರ್ನಾಟಕದ ವಿವಿಧತೆಯಲ್ಲಿ ಏಕತೆಯ ಬಗ್ಗೆ ಒತ್ತಿ ಹೇಳಿದರು, ಅಲ್ಲಿ ಭಾಷೆಗಳು, ಸಂಪ್ರದಾಯಗಳು ಮತ್ತು ಪಾಕಪದ್ಧತಿಗಳು ಒಂದು ಚೈತನ್ಯದಾಯಕ  ಸಾಂಸ್ಕೃತಿಕ ಗುರುತನ್ನು ರೂಪಿಸುತ್ತವೆ. ಮೈಸೂರನ್ನು ಸಾಂಸ್ಕೃತಿಕ ಪ್ರವಾಸೋದ್ಯಮ ಕೇಂದ್ರವನ್ನಾಗಿ ಮಾಡುವಲ್ಲಿ ಪ್ರವಾಸೋದ್ಯಮ ಸಚಿವಾಲಯದ ಪ್ರಯತ್ನಗಳನ್ನು ಶ್ಲಾಘಿಸಿದ ಡಾ.ಮಹದೇವಪ್ಪ ಅವರು ಸಾಮಾಜಿಕ ಸಾಮರಸ್ಯ ಮತ್ತು ಪರಸ್ಪರ ಗೌರವವನ್ನು ಉತ್ತೇಜಿಸುವಲ್ಲಿ ಮೈಸೂರು ಸಂಗೀತ ಸುಗಂಧದಂತಹ ಉತ್ಸವಗಳ ಪಾತ್ರವನ್ನು ಎತ್ತಿ ತೋರಿಸಿದರು.

ಮೈಸೂರಿನ ಸಂಸದರಾದ ಶ್ರೀ ಯದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯರ್ ಅವರು ಉತ್ಸವದ ಆಯೋಜನೆಗೆ ಕೃತಜ್ಞತೆ ಸಲ್ಲಿಸಿ, ಮೈಸೂರಿನ ಐತಿಹಾಸಿಕ ಮಹತ್ವವನ್ನು ಸಾರಿದರು. ಅವರು ಸಂಗೀತಕ್ಕೆ ಒಡೆಯರ್ ಕುಟುಂಬದ ಕೊಡುಗೆಗಳನ್ನು ವಿಶೇಷವಾಗಿ ಜಯಚಾಮರಾಜ ಒಡೆಯರ್ ಅವರ ಕರ್ನಾಟಕ ಸಂಗೀತ ಸಂಯೋಜನೆಗಳ ಬಗ್ಗೆ ತಿಳಿಸಿದರು ಮತ್ತು "ಸಂಗೀತ ಪಿತಾಮಹ"  ಪುರಂದರ ದಾಸರಿಗೆ ಗೌರವ ಸಲ್ಲಿಸಿದರು. ಅವರ ಭಾಷಣವು ಕರ್ನಾಟಕ ಸಂಗೀತದ ಕೇಂದ್ರವಾಗಿ ಮೈಸೂರಿನ ಪಾತ್ರವನ್ನು ಬಲಪಡಿಸಿತು ಮತ್ತು  ಅದರ ಬುನಾದಿಯಾಗಿ ಕರ್ನಾಟಕದ ಹರಿದಾಸರನ್ನು ಗುರುತಿಸಿತು.

ಪ್ರವಾಸೋದ್ಯಮ ಸಚಿವಾಲಯದ ಹೆಚ್ಚುವರಿ ಕಾರ್ಯದರ್ಶಿ ಶ್ರೀ ಸುಮನ್ ಬಿಲ್ಲಾ ಅವರು ಆಗಮಿಸಿದವರನ್ನು ಸ್ವಾಗತಿಸಿದರು, ಮೈಸೂರು ಸ್ವದೇಶ ದರ್ಶನ 2.0 ಯೋಜನೆಯಡಿಯಲ್ಲಿ ಸಾಂಸ್ಕೃತಿಕ ಮತ್ತು ಪ್ರವಾಸೋದ್ಯಮ ಕೇಂದ್ರವಾಗಿ ಆಯ್ಕೆಯಾಗಿದೆ ಎಂದು ಹೇಳಿದರು. ರಾಜ್ಯದ ಶ್ರೀಮಂತ ಪರಂಪರೆಯನ್ನು ಪ್ರತಿಬಿಂಬಿಸುವ ಕರ್ನಾಟಕದ ಜಿಐ-ಟ್ಯಾಗ್ ಮಾಡಿದ ಕರಕುಶಲ ವಸ್ತುಗಳು, ಜವಳಿ ಮತ್ತು ಪಾಕಪದ್ಧತಿಯ ಹಬ್ಬದ ಆಚರಣೆಯನ್ನು ಬಗ್ಗೆ ತಿಳಿಸಿದರು. ಮೈಸೂರಿನ ಸಾಂಸ್ಕೃತಿಕ ಪ್ರಾಮುಖ್ಯತೆಯನ್ನು ಹೆಚ್ಚಿಸುವ ಮತ್ತು ಕರ್ನಾಟಕದ ವೈವಿಧ್ಯಮಯ ಸಂಪ್ರದಾಯಗಳನ್ನು ಆಚರಿಸುವ ಉದ್ದೇಶದಿಂದ ಉತ್ಸವವನ್ನು ಆಯೋಜಿಸಲು ಬೆಂಬಲ ನೀಡಿದ ಕರ್ನಾಟಕ ಪ್ರವಾಸೋದ್ಯಮ ಇಲಾಖೆ, ವಿವಿಧ ಸಚಿವಾಲಯಗಳು ಮತ್ತು ಸಂಗೀತ ನಾಟಕ ಅಕಾಡೆಮಿಗೆ ಶ್ರೀ ಬಿಲ್ಲಾ ಧನ್ಯವಾದ ಅರ್ಪಿಸಿದರು.

ಮೈಸೂರು ಸಂಗೀತ ಸುಗಂಧ ಉತ್ಸವವು ಮುಂದಿನ ಮೂರು ದಿನಗಳಲ್ಲಿ ಮುಂದುವರಿಯುತ್ತದೆ, ಇದು ಸ್ಪೂರ್ತಿದಾಯಕ ಕನ್ನಡ ಸಂಗೀತ ಸಂಯೋಜನೆಗಳು, ಜಿಐ-ಟ್ಯಾಗ್ ಮಾಡಿದ ಕರಕುಶಲ ವಸ್ತುಗಳ ಪ್ರದರ್ಶನಗಳು ಮತ್ತು ಕರ್ನಾಟಕದ ಅಧಿಕೃತ ಆಹಾರ ಪದ್ಧತಿಯ ಅನುಭವಗಳನ್ನು ನೀಡುತ್ತದೆ. ಈ ಕಾರ್ಯಕ್ರಮವು ಸಾಂಸ್ಕೃತಿಕ ತಾಣವಾಗಿ ಮೈಸೂರಿನ ಖ್ಯಾತಿಯನ್ನು ಬಲಪಡಿಸುವ ನಿರೀಕ್ಷೆಯಿದೆ, ಕರ್ನಾಟಕದ ಸಂಗೀತ, ಕಲೆ ಮತ್ತು ಪರಂಪರೆಯ ಸಾರವನ್ನು ಅನುಭವಿಸಲು ಭಾರತದಾದ್ಯಂತ ಮತ್ತು ಹೊರಗಿನ ಪ್ರವಾಸಿಗರನ್ನು ಸೆಳೆಯುತ್ತದೆ.

ಮೈಸೂರು ಸಂಗೀತ ಸುಗಂಧ ಉತ್ಸವದ ನೇರ ಪ್ರಸಾರವನ್ನು ಇಲ್ಲಿ ವೀಕ್ಷಿಸಬಹುದು

https://www.youtube.com/live/oFDn-3TsLTg?feature=shared

 

*****
 

(Release ID: 2072135) Visitor Counter : 19