ಒಡಿಶಾ ಮತ್ತು ಪಶ್ಚಿಮ ಬಂಗಾಳದ ಕರಾವಳಿಯನ್ನು ಅಪ್ಪಳಿಸುವ ಸಾಧ್ಯತೆಯಿರುವ 'ಡಾನಾ' ಚಂಡಮಾರುತದ ಹಿನ್ನೆಲೆಯಲ್ಲಿ, ರೈಲ್ವೆ ಸಚಿವಾಲಯದಲ್ಲಿ ಉನ್ನತ ಮಟ್ಟದ ಸಭೆ ನಡೆಸಲಾಯಿತು, ಇದರಲ್ಲಿ ಸಂಬಂಧಿತ ವಲಯ ರೈಲ್ವೆ ಅಂದರೆ ಪೂರ್ವ ಕರಾವಳಿ ರೈಲ್ವೆ ಮತ್ತು ಆಗ್ನೇಯ ರೈಲ್ವೆಯ ಸಿದ್ಧತೆಯನ್ನು ಪರಿಶೀಲಿಸಲಾಯಿತು. ಕೇಂದ್ರ ರೈಲ್ವೆ ಸಚಿವರಾದ ಶ್ರೀ ಅಶ್ವಿನಿ ವೈಷ್ಣವ್ ಅವರು ಈ ಉನ್ನತ ಮಟ್ಟದ ಸಭೆಯ ಅಧ್ಯಕ್ಷತೆ ವಹಿಸಿದ್ದರು. ರೈಲ್ವೆ ಬೋರ್ಡ್‌ ನ ಅಧ್ಯಕ್ಷರು ಮತ್ತು ಸಿಇಒ, ಎಲ್ಲಾ ಬೋರ್ಡ್ ಸದಸ್ಯರು, ಪೂರ್ವ ತೀರ ರೈಲ್ವೆ ಮತ್ತು ದಕ್ಷಿಣ ಪೂರ್ವ ರೈಲ್ವೆಯ ಜನರಲ್ ಮ್ಯಾನೇಜರ್‌ ಗಳು, ಖಡ್ಗಪುರ, ಚಕ್ರಧರಪುರ, ಆದ್ರಾ ಮತ್ತು ಖುರ್ದಾ ರೋಡ್‌ ನ ವಿಭಾಗೀಯ ರೈಲ್ವೆ ವ್ಯವಸ್ಥಾಪಕರು ಭಾಗವಹಿಸಿದ್ದರು.ಕನಿಷ್ಠ ಅಡಚಣೆಯೊಂದಿಗೆ ಗರಿಷ್ಠ ಸಿದ್ಧತೆಗಳನ್ನು ಖಚಿತಪಡಿಸಿಕೊಳ್ಳಲು ರೈಲ್ವೆ ಸಚಿವರು ನಿರ್ದೇಶನ ನೀಡಿದರು. ಪ್ರಯಾಣಿಕರಿಗೆ ಕನಿಷ್ಠ ತೊಂದರೆಯಾಗದಂತೆ ಎಚ್ಚರಿಕೆ ವಹಿಸಬೇಕು ಎಂದು ಸಲಹೆ ನೀಡಿದರು.

ಸಭೆಯಲ್ಲಿ ಈಸ್ಟ್ ಕೋಸ್ಟ್ ರೈಲ್ವೇ ಮತ್ತು ಸೌತ್ ಈಸ್ಟರ್ನ್ ರೈಲ್ವೇಯ ಜನರಲ್ ಮ್ಯಾನೇಜರ್‌ ಗಳು ರೈಲ್ವೆಯ ಸಿದ್ಧತೆಯ ಕುರಿತು ವಿವರಗಳನ್ನು ನೀಡಿದರು, ಅವುಗಳು ಈ ಕೆಳಗಿನಂತಿವೆ:-

9 ರೌಂಡ್-ದಿ-ಕ್ಲಾಕ್ ವಾರ್‌ ರೂಮ್‌ ಗಳನ್ನು ರಾಜ್ಯ ಕೇಂದ್ರಗಳಾದ ಭುವನೇಶ್ವರ ಮತ್ತು ಗಾರ್ಡನ್ ರೀಚ್ (ಕೋಲ್ಕತಾ), ಖುರ್ದಾ ರೋಡ್, ವಿಶಾಖಪಟ್ಟಣಂ, ಸಂಬಲ್‌ ಪುರ, ಚಕ್ರಧರಪುರ, ಆದ್ರಾ, ರಾಂಚಿ, ಖಡ್ಗಪುರ ಮತ್ತು ಬಾಲಸೋರ್‌ ನ ವಿಭಾಗೀಯ ಕಚೇರಿಗಳಲ್ಲಿ ಸ್ಥಾಪಿಸಲಾಗುವುದು. ಈ ವಾರ್‌ ರೂಮ್‌ ಗಳನ್ನು ಇಂಜಿನಿಯರಿಂಗ್, ಎಸ್ & ಟಿ, ಆಪರೇಟಿಂಗ್, ವಾಣಿಜ್ಯ ಮತ್ತು ಆರ್‌ ಪಿ ಎಫ್ ಅಧಿಕಾರಿಗಳು ನಿರ್ವಹಿಸುತ್ತಾರೆ. ಇದರಿಂದ ಚಂಡಮಾರುತದ ಕಾರಣದಿಂದ ಯಾವುದೇ ತ್ವರಿತ ನಿರ್ಧಾರ ತೆಗೆದುಕೊಳ್ಳಬಹುದು ಮತ್ತು ಸೇವೆಗಳು ಹಾಗೂ ಮೂಲಸೌಕರ್ಯಗಳ ಶೀಘ್ರ ಮರುಸ್ಥಾಪನೆಯನ್ನು ಖಾತ್ರಿಪಡಿಸಬಹುದು. ವಾರ್‌ ರೂಮ್‌ /ತುರ್ತು ನಿಯಂತ್ರಣ ಕೊಠಡಿಗಳು ನಿರಂತರ ಸಂವಹನಕ್ಕಾಗಿ ವಿದ್ಯುತ್ ಬ್ಯಾಕಪ್‌ ನೊಂದಿಗೆ 20 ಉಪಗ್ರಹ ದೂರವಾಣಿಗಳೊಂದಿಗೆ ಕಾರ್ಯನಿರ್ವಹಿಸುತ್ತಿವೆ. ರೈಲ್ವೆಯು ರಿಯಲ್‌-ಟೈಮ್‌ ಮಾಹಿತಿ ಪಡೆಯಲು ಮತ್ತು ಅಗತ್ಯವಿರುವಂತೆ ಸಂಪನ್ಮೂಲಗಳನ್ನು ಕ್ರೋಡೀಕರಿಸಲು ಭಾರತೀಯ ಹವಾಮಾನ ಇಲಾಖೆಯೊಂದಿಗೆ ನಿರಂತರ ಸಂಪರ್ಕದಲ್ಲಿದೆ. 

ಅಗತ್ಯವಿದ್ದಾಗ, ಸೊರೊ, ಜಲೇಶ್ವರ ಮತ್ತು ಇತರ ಪ್ರಮುಖ ನಿಲ್ದಾಣಗಳಂತಹ ವಿವಿಧ ಸ್ಥಳಗಳಲ್ಲಿ ಟ್ರ್ಯಾಕ್‌ಗಳ ತ್ವರಿತ ಮರುಸ್ಥಾಪನೆ, ಸಿಗ್ನಲಿಂಗ್ ವ್ಯವಸ್ಥೆ ಮತ್ತು ವಿದ್ಯುದ್ದೀಕರಣಕ್ಕಾಗಿ ವಿಶೇಷ ತಂಡಗಳನ್ನು ನಿಯೋಜಿಸಲಾಗುತ್ತದೆ. ವಿದ್ಯುತ್ ಕಡಿತದ ಸಂದರ್ಭದಲ್ಲಿ ರೈಲು ಕಾರ್ಯಾಚರಣೆಯನ್ನು ಖಚಿತಪಡಿಸಿಕೊಳ್ಳಲು ಡೀಸೆಲ್ ಎಂಜಿನ್‌ಗಳನ್ನು ಸಹ ಸಿದ್ಧವಾಗಿ ಇರಿಸಲಾಗಿದೆ.

600ಕ್ಕೂ ಹೆಚ್ಚು ಸಿಬ್ಬಂದಿಯನ್ನು ಭೋಜುದಿಹ್, ಬೊಕಾರೊ ಸ್ಟೀಲ್ ಸಿಟಿ, ಸೋರೊ, ನಿಂಪುರ, ಆದ್ರಾ, ರಾಜಗೋಡಾ, ಬಚ್ರಾವನ್, ಕೆಂಡುವಾ, ಕಾಲಘರ್, ತಪಾಂಗ್, ಚತರ್‌ಪುರ, ಪಲಾಸ, ಹಿಂಡೋಲ್ ರೋಡ್, ರಾಧಾಕಿಶೋರಪುರ, ಕೆಂಡುಆಪಡ, ರಘುನಾಥಪುರ, ಹರಿದಾಸಪುರ ಮುಂತಾದ ಎಲ್ಲಾ ತಂತ್ರಾತ್ಮಕ ಸ್ಥಳಗಳಲ್ಲಿ ನಿಯೋಜಿಸಲಾಗಿದೆ. ಅವರು 57 BOXN ಬಂಡೆಗಳು, 86 BOBYN ಬಲಾಸ್ಟ್ ಮತ್ತು 123 BOXN ಮರಳು/ಮೂರಂ/ಕ್ವಾರಿ ಧೂಳು ಇತ್ಯಾದಿ ಪುನಃಸ್ಥಾಪನಾ ವಸ್ತುಗಳ ಸಾಕಷ್ಟು ದಾಸ್ತಾನುಗಳೊಂದಿಗೆ ಕಾರ್ಯನಿರ್ವಹಿಸುತ್ತಿದ್ದಾರೆ. ಯಾವುದೇ ತುರ್ತು ಪರಿಸ್ಥಿತಿಗಳಿಗೆ ಪ್ರತಿಕ್ರಿಯಿಸಲು ಪರಿಹಾರ ವಾಹನಗಳು, 49 ಭಾರೀ ಯಂತ್ರೋಪಕರಣಗಳು, 7 ಟ್ರಾಲಿಗಳು ಮತ್ತು ಇತರ ಉಪಕರಣಗಳನ್ನು ಸಹ ಸಿದ್ಧವಾಗಿರಿಸಲಾಗಿದೆ. ಪರಿಹಾರ ಸಾಮಗ್ರಿ ಅಥವಾ ಇತರ ಅಗತ್ಯತೆಗಳಿಗಾಗಿ 6-7 ಬೋಗಿಗಳೊಂದಿಗೆ ಸ್ಕ್ರಾಚ್ ರೇಕ್  ಅನ್ನು ಯೋಜಿಸಿ ಖಡ್ಗಪುರದಲ್ಲಿ ಇರಿಸಲಾಗಿದೆ. ಬಾಲಸೋರ್, ದತನ್, ಖಡ್ಗಪುರ, ರೂಪ್ಸಾ ಮತ್ತು ಹಲ್ದಿಯಾದಲ್ಲಿ ಟವರ್ ವ್ಯಾಗನ್‌ಗಳನ್ನು ವ್ಯವಸ್ಥೆ ಮಾಡಿ ಇರಿಸಲಾಗಿದೆ.

ಕರಾವಳಿ ಪ್ರದೇಶಗಳಿಗೆ ರೆಡ್ ಅಲರ್ಟ್ ಘೋಷಿಸಲಾಗಿರುವುದರಿಂದ ಭುವನೇಶ್ವರ-ವಿಶಾಖಪಟ್ಟಣಂ ಕಾರಿಡಾರ್ ಉದ್ದಕ್ಕೂ ಇರುವ ನಿಲ್ದಾಣಗಳನ್ನು ಸೂಕ್ಷ್ಮವಾಗಿ ಮೇಲ್ವಿಚಾರಣೆ ಮಾಡಲಾಗುತ್ತಿದೆ. ಖಡ್ಗಪುರ ವಿಭಾಗದೊಂದಿಗೆ ಹೊಂದಿಕೊಂಡಿರುವ ಚಕ್ರಧರಪುರ ಮತ್ತು ಆದ್ರಾ ವಿಭಾಗಗಳನ್ನೂ ಸಹ ಅತ್ಯಂತ ಎಚ್ಚರಿಕೆಯ ಸ್ಥಿತಿಯಲ್ಲಿರಿಸಲಾಗಿದೆ. ಭಾರೀ ಮಳೆ ಮತ್ತು ಪ್ರವಾಹದಿಂದ ಉಂಟಾಗುವ ಹಾನಿಯನ್ನು ತಡೆಯಲು ರೈಲ್ವೆ ಸೇತುವೆಗಳು, ಹಳಿಗಳು, ಯಾರ್ಡ್‌ ಗಳು, ಮತ್ತು ಸಿಗ್ನಲಿಂಗ್ ವ್ಯವಸ್ಥೆಗಳ ಮೇಲೆ ನಿರಂತರ ನಿಗಾ ಇರಿಸಲಾಗುತ್ತಿದೆ. ಕ್ಯಾಚ್ ವಾಟರ್ ಡ್ರೈನ್‌ಗಳು ಮತ್ತು ಪಕ್ಕದ ಚರಂಡಿಗಳನ್ನು ಹೂಳು ಮತ್ತು ಸಸ್ಯಗಳಂತಹ ಅಡೆತಡೆಗಳಿಂದ ಸ್ವಚ್ಛಗೊಳಿಸಲಾಗುತ್ತಿದೆ. ಪ್ರಯಾಣಿಕರ ಸ್ಥಳಾಂತರ ಮತ್ತು ಇತರ ತುರ್ತು ಪರಿಸ್ಥಿತಿಗಳನ್ನು ನಿಭಾಯಿಸಲು ಸೋರೊ, ಬಾಲಸೋರ್, ಜಲೇಶ್ವರ, ಖಡ್ಗಪುರ ಮತ್ತು ದೀಘಾದಲ್ಲಿ ಚಾಲಕರೊಂದಿಗೆ ಕಾಯ್ದಿರಿಸುವ ವಾಹನಗಳನ್ನು ಯೋಜಿಸಲಾಗಿದೆ.

ಖಡ್ಗಪುರ-ಪಾನ್ಸ್ಕುರಾ ವಿಭಾಗ, ಖಡ್ಗಪುರ-ಭದ್ರಕ್ ವಿಭಾಗ, ತಮ್ಲುಕ್-ಹಲ್ದಿಯಾ ವಿಭಾಗ ಮತ್ತು ತಮ್ಲುಕ್-ದೀಘಾ ವಿಭಾಗಗಳಲ್ಲಿ ಪರ್ಯಾಯ ವಿದ್ಯುತ್ ಮೂಲವಾಗಿ ಡಿಜಿ ಪವರ್ (ಡೀಸೆಲ್ ಜನರೇಟರ್ ಪವರ್) ಅನ್ನು ಅಳವಡಿಸಲಾಗಿದೆ. ತಮ್ಲುಕ್, ಪಾನ್ಸ್ಕುರಾ ಮತ್ತು ಬಾಲಸೋರ್ ನಿಲ್ದಾಣಗಳಲ್ಲಿ ನೀರು ತೆರವುಗೊಳಿಸುವ ಪಂಪ್‌ ಗಳನ್ನು ಇರಿಸಲಾಗುವುದು. ಸುರಕ್ಷತಾ ಕ್ರಮವಾಗಿ ಪ್ರಮುಖ ನಿಲ್ದಾಣಗಳ ಸಂಚಾರ ಪ್ರದೇಶದಿಂದ ದೊಡ್ಡ ಹೋರ್ಡಿಂಗ್‌ ಗಳು ಮತ್ತು ಬಿಲ್‌ ಬೋರ್ಡ್‌ ಗಳನ್ನು ತೆಗೆದುಹಾಕಲು ನಿರ್ಧರಿಸಲಾಗಿದೆ. ನಿರಂತರ ಟ್ರ್ಯಾಕ್-ಪ್ಯಾಟ್ರೋಲಿಂಗ್ ಅನ್ನು 22.10.2024 ರ 18 ಗಂಟೆಯಿಂದ 25.10.2024 ರ 18 ಗಂಟೆಯವರೆಗೆ ಪ್ರಾರಂಭಿಸಲಾಗುತ್ತದೆ ಮತ್ತು ಅಗತ್ಯವಿದ್ದರೆ ವಿಸ್ತರಿಸಲಾಗುತ್ತದೆ.

ಗಾಳಿಯ ವೇಗವನ್ನು ಅವಲಂಬಿಸಿ ರೈಲುಗಳನ್ನು ನಿಲ್ದಾಣಗಳಲ್ಲಿ ನಿಯಂತ್ರಿಸಲಾಗುತ್ತದೆ/ನಿಲುಗಡೆ ಮಾಡಲಾಗುತ್ತದೆ ಮತ್ತು ಎಲ್ಲಾ ಸುರಕ್ಷತಾ ಕ್ರಮಗಳೊಂದಿಗೆ ನಿಯಂತ್ರಿಸಲು ಯೋಜಿಸಲಾಗಿದೆ. ಪ್ರಯಾಣಿಕರಿಗೆ ಅಪಾಯವನ್ನು ಕಡಿಮೆ ಮಾಡಲು ಅನೇಕ ರೈಲುಗಳನ್ನು ರದ್ದುಗೊಳಿಸಲಾಗಿದೆ, ಬೇರೆಡೆಗೆ ತಿರುಗಿಸಲಾಗಿದೆ ಅಥವಾ ಸ್ಥಗಿತಗೊಳಿಸಲಾಗಿದೆ. ಈ ನಿರ್ಧಾರವನ್ನು ಅಧಿಕೃತ ಬುಲೆಟಿನ್‌ನಲ್ಲಿ ವಿವರಿಸಲಾಗಿದೆ ಮತ್ತು ಅಧಿಕೃತ ರೈಲ್ವೆ ಚಾನೆಲ್‌ಗಳ ಮೂಲಕ ನವೀಕರಣಗಳನ್ನು ಮೇಲ್ವಿಚಾರಣೆ ಮಾಡಲು ಪ್ರಯಾಣಿಕರಿಗೆ ಸೂಚಿಸಲಾಗಿದೆ.

ಎಲ್ಲಾ ಪ್ರಮುಖ ನಿಲ್ದಾಣಗಳಲ್ಲಿ ಸಹಾಯ ಕೇಂದ್ರ ಸ್ಥಾಪಿಸಲಾಗಿದೆ. ಅವುಗಳೆಂದರೆ: ಪುರಿ - 8926100356, ಖುರ್ದಾ ರೋಡ್ - 8926100215, ಭುವನೇಶ್ವರ - 8114382371, ಕಟಕ್ - 8114382359, ಪಾರಾದೀಪ್ - 8114388302, ಜಜ್‌ಪುರ ಕೇಂಜರ್ ರೋಡ್ - 8114382342, ಭದ್ರಕ್ - 8114382301, ಪಲಾಸ - 8114382319, ಬ್ರಹ್ಮಪುರ - 8114382340. ಪ್ರಯಾಣಿಕರು ಮತ್ತು ಸಾರ್ವಜನಿಕರಿಗೆ ಪದೇ ಪದೇ ಘೋಷಣೆಗಳ ಮೂಲಕ ಮಾಹಿತಿ ನೀಡಲಾಗುವುದು.

ಯಾವುದೇ ಅಗತ್ಯ/ತುರ್ತು ಪರಿಸ್ಥಿತಿಯನ್ನು ಎದುರಿಸಲು ಮೆಚೆಡಾ, ತಾಮ್ಲುಕ್, ಖಡ್ಗಪುರ ಮತ್ತು ಬಾಲಸೋರ್‌ನಲ್ಲಿ ಸಾಕಷ್ಟು ಕ್ಲೋರಿನ್ ಕ್ಲೋರಿನ್ ಮಾತ್ರೆಗಳು, ಬ್ಲೀಚಿಂಗ್ ಮತ್ತು ಇತರ ಔಷಧಿಗಳೊಂದಿಗೆ ವೈದ್ಯಕೀಯ ತಂಡ ನಿಯೋಜಿಸಲಾಗಿದೆ. ಚಂಡಮಾರುತದ ಕಾರಣದಿಂದ ನಿಯಂತ್ರಿಸಬಹುದಾದ ರೈಲುಗಳಿಗೆ ಅನುಕೂಲವಾಗುವಂತೆ ಎಲ್ಲಾ ಪ್ರಮುಖ ನಿಲ್ದಾಣಗಳಲ್ಲಿ ಶಿಶು ಆಹಾರದೊಂದಿಗೆ ಸಾಕಷ್ಟು ಆಹಾರ ವ್ಯವಸ್ಥೆ ಮಾಡಲಾಗಿದೆ. ಎಲ್ಲಾ ಪ್ರಮುಖ ನಿಲ್ದಾಣಗಳಲ್ಲಿ ಮತ್ತು ರೈಲ್ವೆ ಕಾಲೋನಿಗಳು ಇರುವ ಸ್ಥಳಗಳಲ್ಲಿ ಸಾಕಷ್ಟು ಸಾಮರ್ಥ್ಯದ ನೀರಿನ ಟ್ಯಾಂಕ್‌ಗಳನ್ನು ಒದಗಿಸಲು ನಿರ್ಧರಿಸಲಾಗಿದೆ.

 

*****

(Release ID: 2067645) Visitor Counter : 11