آج  ہندوستان میں نیدرلینڈ کی سفیر محترمہ ماریسا  گیرارڈس نے نئی دلی کے کرشی بھون  میں محکمہ زراعت اور کسانوں کی بہبود کے سکریٹری ڈاکٹر دیویش چترویدی سے خیر سگالی ملاقات کی۔ اس ملاقات نے دونوں ممالک کے درمیان جاری تعاون پر تبادلہ خیال کرنے ، زراعت اور اس سے منسلک شعبوں میں تعاون کے ممکنہ شعبوں کو تلاش کرنے کا ایک قیمتی موقع فراہم کیا۔

سفیر گیرارڈس نے نیدرلینڈز اور ہندوستان کے درمیان زرعی شعبے میں 40 سے زیادہ برسوں  سے جاری مفاہمت نامے پر مبنی  مضبوط شراکت داری پر روشنی ڈالی۔ انہوں نے خاص طور پر باغبانی میں تعاون کو مزید وسعت دینے  کے لیے پختہ عزم کا اظہار کیا اور دونوں ممالک کے لیے ایک دوسرے کی مہارت سے سیکھنے کی صلاحیت پر زور دیا۔

ڈاکٹر چترویدی نے ہندوستان اور نیدرلینڈ کے درمیان طویل مدتی اور خوشگوار تعلقات پر زور دیا اور باہمی دلچسپی کے شعبوں جیسے باغبانی ، مویشی پروری، صلاحیت سازی اور ٹیکنالوجی کی منتقلی میں تعاون کے اہم مواقع  پر تبادلہ خیال کیا۔

انہوں نے بتایا کہ ہندوستان اور نیدر لینڈ نے کامیابی کے ساتھ 24 سینٹرز آف ایکسی لینس(سی او ایز) کی نشاندہی کی ہے۔ ان میں سے 9 کو باغبانی کے مربوط ترقی کے مشن (ایم آئی ڈی ایچ)کے تحت  فنڈنگ کے لئے منظوری دے دی گئی ہے۔ انہیں اپنے ڈچ ہم منصبوں سے قابل قدر تکنیکی مدد حاصل ہوئی ہے۔ ان میں سے 7 سینٹرز آف ایکسیلنس (سی او ای) مکمل ہو چکے ہیں۔ ان مراکز میں تجارتی پیداوار شروع ہو گئی ہے، جو پورے ہندوستان میں کسانوں کو اعلیٰ معیار کے پودے لگانے کا سامان فراہم کر رہے ہیں۔ اب تک، 25,000 سے زیادہ کسان ان مراکز میں تربیت حاصل کر چکے ہیں۔ دونوں اطراف نے اس اہم شعبے میں اپنے موجودہ تعاون کو مزید مضبوط بنانے کی اہمیت پر زور دیا۔

ایڈیشنل سکریٹری جناب پرمود کمار مہردا نے ہندوستان کی ضروریات کے مطابق زرعی مشینری تیار کرنے کے لیے تعاون پر مبنی کوشش کی تجویز پیش کی، جو زرعی اختراع کو آگے بڑھانے کے لیے مشترکہ وژن کی عکاسی کرتی ہے۔

اجلاس میں وزارت خارجہ کے نمائندوں اور محکمہ زراعت اور کسانوں کی بہبود کے اعلیٰ حکام نے بھی شرکت کی۔

***

ش ح ۔ ک ا۔ ع د

(Release ID: 2067602) Visitor Counter : 27