‘ప్రపంచం దీర్ఘకాలిక మనుగడను దృష్టిలో పెట్టుకొని నూతన ఆవిష్కరణలు, డిజిటల్ పరివర్తన’ అన్న ఇతివృత్తం ఆధారంగా 15వ ఐటీయూ కెలిడోస్కోప్ ఎకడమిక్ కాన్ఫరెన్స్ న్యూఢిల్లీలోని భారత్ మండపంలో రేపటి రోజు (2024 అక్టోబరు 21)న ప్రారంభం కానుంది. అంతర్జాతీయ టెలికమ్యూనికేషన్ల సంబంధిత పరిశోధన, ఇంకా ప్రమాణాల అభివృద్ధి పరంగా చూస్తే ఒక చెప్పుకోదగ్గ మేలిమలుపుగా ఈ సమావేశం నిలుస్తుందని భావిస్తున్నారు. ఇంటర్నేషనల్ టెలికమ్యూనికేషన్ యూనియన్ (ఐటీయూ) ఏర్పాటు చేస్తున్న ఈ సమావేశం అక్టోబరు 21న మొదలై అక్టోబరు 23 వరకు జరుగనుంది. 5జీ, కృత్రిమ మేధ (ఏఐ), ఇంటర్‌నెట్ ఆఫ్ థింగ్స్ (ఐఒటీ), క్వాంటమ్ కమ్యూనికేషన్లు, ఇతర పరివర్తన ప్రధాన సాంకేతిక విజ్ఞానాలలో అత్యంత తాజా పరిణామాలను చర్చించడానికి విద్య, పరిశ్రమ, ప్రభుత్వం.. ఈ మూడు రంగాల అత్యంత ప్రతిభావంతులను ఈ సమావేశం ఒక చోటుకు తీసుకు రానుంది.

డిజిటల్ ట్రాన్స్‌ఫర్మేషన్‌, టెలికమ్యూనికేషన్లలో నూతన ఆవిష్కరణలను, సహకారాన్ని పెంపొందింప చేసేందుకు ఒక కీలక వేదికగా కెలిడోస్కోప్ 2024 నిలవబోతోంది. ఇదివరకు ఎన్నడూ రానంత ఎక్కువ సంఖ్యలో అధ్యయన పత్రాలు ఈ సంవత్సరంలో నిర్వహిస్తున్న కార్యక్రమానికి వచ్చాయి. ఈ సన్నివేశం డిజిటల్ మౌలిక సదుపాయాల కల్పనతో పాటు టెలికమ్యూనికేషన్ల ప్రమాణాలకు సంబంధించి రాబోయే కాలంలో ఎలాంటి మార్పులూ చేర్పులు చోటు చేసుకోవచ్చనే అంశంపై ప్రపంచ దేశాలలో పెరిగిపోతున్న కుతూహలానికి అద్దం పడుతోంది. 140కి పైగా పత్రాలు అందడం ఈ కార్యక్రమం చరిత్రలో ఇదే తొలిసారి. ఈ అంశం దీర్ఘకాలం పాటు మనుగడ, డిజిటల్ ఇన్‌క్లూజన్, ఇంకా భద్రతలు సహా ప్రపంచానికి ఎదురవుతున్న సవాళ్ళను పరిష్కరించడంలో సరికొత్త పరిశోధనలు జరిగాయని నిరూపిస్తున్నది.

కెలిడోస్కోప్ 2024 తాలూకు కొన్ని ప్రధాన అంశాలు:

1. అగ్రగామి మూడు పత్రాలను తలా  2000 సీహెచ్ఎఫ్ బహుమతి తో సత్కరించనున్నారు

టెలికమ్యూనికేషన్స్ రంగంలో అత్యంత వినూత్న, అమిత ప్రభావాన్విత పరిశోధనలను మూడింటిని ఎంపిక చేసి ఒక్కొక్క పత్రానికి 2000 సీహెచ్ఎఫ్ (స్విస్ ఫ్రాంకు)ల నగదు బహుమతితో  సత్కరించనున్నారు. 

ప్రపంచవ్యాప్తంగా ప్రసిద్ధ నిపుణుల సంఘం పరిశీలించిన అనంతరం వీటిని ఎంపిక చేశారు. విజేతలుగా నిలిచిన పత్రాలు క్వాంటమ్ కమ్యూనికేషన్, నెట్‌వర్క్ సెక్యూరిటీలతో పాటు 5జీ వినియోగం వంటి రంగాలలో అతి కీలక మార్పులను ఆవిష్కరించాయి.

2.   యువ రచయితలకు పట్టం

నవ తరం పరిశోధకులను ప్రోత్సహించేందుకు ఉద్దేశించిన ఒక ప్రత్యేక ప్రయత్నంలో భాగంగా ఐటీయూ ఎంపిక చేసిన పత్రాలను సమర్పించిన యువ రచయితలకు నైపుణ్య ధ్రువపత్రాలను ఇచ్చి, వారిని సత్కరించనుంది. యువ ప్రతిభాన్వితులను ప్రోత్సహించాలన్న, ప్రపంచంలో డిజిటల్ ట్రాన్స్‌ఫర్మేషన్ కు తోడ్పడే టెలికమ్యూనికేషన్స్ రంగ సంబంధిత ఆధునిక పరిశోధనలకు పట్టం కట్టాలన్న ఐటీయూ దృఢదీక్షను ఈ కార్యక్రమం చాటిచెబుతున్నది.

3.  మూడు రోజుల పాటు సాగనున్న  ఆలోచనాపూర్ణ నాయకత్వ మేధోమథనం

6జీ తాలూకు నెట్‌వర్క్ నిర్మాణాలు, కృత్రిమ మేధ (ఏఐ) ఆరోగ్య సంరక్షణ రంగంలో పోషించదగ్గ పాత్ర, స్మార్ట్ సిటీస్ కోసం ఐఓటీ (ఇంటర్‌నెట్ ఆఫ్ థింగ్స్) వినియోగం, క్వాంటమ్ క్రిప్టోగ్రఫీ వంటి విస్తృత శ్రేణి అంశాలను గురించిన సాంకేతిక సదస్సులు, ఇంకా మండలి చర్చలు ఈ సమావేశంలో చోటు చేసుకోనున్నాయి.  ఉద్దండ నిపుణులు, కీలక సంబంధిత వర్గాల వారు (స్టేక్ హోల్డర్స్) ఈ సదస్సులలో పాలుపంచుకొని, కొత్తగా ఉనికి లోకి వస్తున్న సాంకేతికతలు ఇవ్వజూపే అవకాశాలు, సవాళ్ళను పట్టించుకొని, వాటికి వారి వంతు పరిష్కారాలను సూచించనున్నారు.

4. భౌగోళిక ప్రమాణాలపై ప్రత్యేక దృష్టి

వరల్డ్ టెలికమ్యూనికేషన్ స్టాండర్‌డైజేషన్ అసెంబ్లీ (డబ్ల్యుటీఎస్ఏ-24)లో భాగంగా జరుగుతున్న కెలిడోస్కోప్ 2024 తదుపరి తరం సాంకేతికతలకు అవసరమైన భౌగోళిక ప్రమాణాలను నిర్దేశించడంలో అంతర్జాతీయ సమన్వయం ఎంతైనా ముఖ్యమని కూడా చెప్పనుంది.  అన్ని వర్గాలను కలుపుకొనిపోతూ, భద్రమైన దీర్ఘకాలంపాటు మన్నే తరహాలో ఈ సాంకేతికతలను  అమలుపరచి తీరాలని స్పష్టం చేయనుంది. 

5.  మూడో రోజున మండలి చర్చ

సమావేశాలలో చివరి రోజైన అక్టోబరు 23న మండలి చర్చలను రెండిటిని నిర్వహించనున్నారు.  ఒకటో ప్యానెల్ డిస్కషన్ లో మిగిలిన ‘‘మూడు బిలియన్ మందిని కలపడం’’ అనే అంశంపై శ్రద్ధ తీసుకోనున్నారు.  రెండో ప్యానెల్ డిస్కషన్ లో భౌగోళిక ప్రమాణాలను అభివృద్ధి పరచడంలో యువతీ యువకులు పోషించవలసిన పాత్ర ఏమిటనేది పరిశీలిస్తారు.  దీనిలో భాగంగా టెలికమ్యూనికేషన్స్, ఇంకా సాంకేతిక విజ్ఞానం సంబంధిత ప్రమాణాల అంశాలలో యువత ప్రాతినిధ్యాన్ని, యువత అందించవలసిన సేవలను మరింత పెంచడమే ధ్యేయంగా పెట్టుకోనున్నారు.

భౌగోళిక టెలికమ్యూనికేషన్స్ వ్యవస్థలో భారతదేశం భూమిక

ఈ సంవత్సరంలో కెలిడోస్కోప్ నకు ఆతిధేయిగా వ్యవహరిస్తూ భారతదేశం భౌగోళిక డిజిటల్ ఇకోసిస్టమ్ లో తన నాయకత్వ పాటవం అంతకంతకూ పెరుగుతోందని రుజువు చేసుకొంటోంది. ‘డిజిటల్ ఇండియా’, ‘మేక్ ఇన్ ఇండియా’ వంటి కీలక కార్యక్రమాలను అమలు చేయడం ద్వారా డిజిటల్ మౌలిక సదుపాయాల కల్పనలో నూతన ఆవిష్కరణలకు ఒక ముఖ్య కూడలిగా మన దేశం తనను ఆవిష్కరించుకొంది. కెలిడోస్కోప్ 2024  5జీ సేవల వినియోగం పరంగా భారతదేశం పురోగతిని తెలియజేయడం ఒక్కటే కాకుండా, ప్రపంచ విపణి కోసం దేశీయంగా సాంకేతికతల ఆవిష్కరణలో ఇండియా పోషిస్తున్న పాత్రను కూడా వెల్లడి చేస్తోంది.

టెలికమ్యూనికేషన్స్ రంగంలో ప్రపంచ స్థాయి చర్చలకు ముఖ్య బిందువుగా న్యూఢిల్లీ నిలుస్తున్న క్రమంలో, నవకల్పన, అన్ని వర్గాలను కలుపుకొని ముందుకు సాగడం, ప్రపంచం అంతటా డిజిటల్ సాంకేతికతల దీర్ఘకాలిక మనుగడలకు చోదక శక్తిగా నిలచే భావి సహకార ప్రధాన కార్యాచరణకు ఒక దిశను ఈ నగరం చూపనుంది.

ఐటీయూ కెలిడోస్కోప్ ను గురించి

ఐటీయూ కెలిడోస్కోప్ ఏడాదిలో ఒకసారి జరిగే కార్యక్రమం. ఇది టెలికమ్యూనికేషన్స్ రంగ సాంకేతికతలకు ప్రపంచ స్థాయి ప్రమాణీకరణను ఏర్పరచడంలో దోహదం చేసే ఆలోచనల ఆదాన ప్రదానాన్ని ప్రోత్సహిస్తూ, పండితులకు, పరిశ్రమకు మధ్య అంతరాన్ని పూడ్చే వంతెనలా ఉంటోంది.  కెలిడోస్కోప్ నిర్వహణను 2008లో మొదలు పెట్టినప్పటి నుంచి ఇది డిజిటల్ కమ్యూనికేషన్స్ భవితను చర్చించడంలో అత్యంత  ప్రభావాన్విత చర్చల వేదికలలో ఒకటిగా పేరు తెచ్చుకొంది. ఈ వేదిక పరిశోధకులకు, నూతన ఆవిష్కర్తలకు వారి అత్యంత ఆశాజనకమైన అధ్యయనాలను సమర్పించడానికి ఒక అవకాశాన్ని  ఇస్తూ వస్తోంది.

ఈ కార్యక్రమం గురించిన, వక్తలను గురించిన, ఇంకా సదస్సులను గురించిన సమగ్ర సమాచారాన్ని https://www.itu.int/en/ITU-T/academia/kaleidoscope/2024/Pages/default.aspx లింకు లో ఆధికారిక ఐటియూ కెలిడోస్కోప్ 2024 వెబ్ సైట్ ను తెరవడం ద్వారా గాని, లేదా గూగుల్ లో ఇంగ్లిషులో ITU Kaleidoscope 2024 అని టైప్ చేశాక మొదటగా కనపడే వెబ్ సైట్ ను ఎంచుకొని గాని చూడవచ్చు.

 

క్రమం తప్పక తాజా సమాచారం కోసం, ఈ కింది మాధ్యమాలలో డీఓటీ హేండల్స్ ను అనుసరించగలరు:   ‘ఎక్స్’ లో X - https://x.com/DoT_India ఇన్ స్టా గ్రామ్ లో Insta- https://www.instagram.com/department_of_telecom?igsh=MXUxbHFjd3llZTU0YQ== ఫేస్ బుక్ లో Fb - https://www.facebook.com/DoTIndia యూట్యూబ్ లో YT- https://www.youtube.com/@departmentoftelecom]

 

 

***

(रिलीज़ आईडी: 2066743) आगंतुक पटल : 127