سڑک ٹرانسپورٹ اور شاہراہوں کے مرکزی وزیر جناب نتن گڈکری نے قومی ترقی میں بنیادی ڈھانچے کے اہم کردار پر روشنی ڈالتے ہوئے اس بات پر زور دیا کہ بہتر ٹرانسپورٹ سسٹم اقتصادی ترقی کے نئے دروازے کھولتا ہے اور روزگار کے نئے مواقع پیدا کرتا ہے۔ وزیر موصوف بھوپال میں منعقدہ مدھیہ پردیش پبلک ورکس ڈیپارٹمنٹ اور انڈین روڈ کانگریس کے زیر اہتمام ’’سڑک اور پل کی تعمیر میں تازہ ترین ابھرتے ہوئے رجحانات اور ٹیکنالوجیز‘‘ کے موضوع پر دو روزہ کانفرنس کے افتتاحی اجلاس سے خطاب کر رہے تھے۔

جناب گڈکری نے اس بات کا اعادہ کیا کہ بنیادی ڈھانچے کی ترقی وزیر اعظم جناب نریندر مودی کے لیے اولین ترجیح ہے، کیونکہ یہ شعبہ نہ صرف ترقی کو آگے بڑھاتا ہے بلکہ ہندوستان کے مستقبل کا خاکہ بھی تیار کرتا ہے۔ انہوں نے کلیدی مقاصد جیسے کہ غیر سمجھوتہ کرنے والے معیار کو یقینی بنانے، سڑک حادثات میں کمی، ماحولیات کی حفاظت اور زمینی چیلنجوں کو حل کرنے پر زور دیا، جو ان کے خیال میں تمام سطح پر اجتماعی کوششوں سے ہی حاصل کیے جا سکتے ہیں۔

دیہی سڑکوں کی ترقی کی اہمیت کے بارے میں بات کرتے ہوئے جناب گڈکری نے ’’کچرے سے دولت بنانے‘‘ کی پالیسی کو اپنانے کی وکالت کی، جو سڑک کی تعمیر میں فضلات کے استعمال کو فروغ دیتی ہے، جس سے مالی اور ماحولیاتی دونوں طرح کے فوائد حاصل ہوتے ہیں۔

مدھیہ پردیش کے وزیر اعلیٰ ڈاکٹر موہن یادو نے اپنے خطاب میں کہا کہ یہ کانفرنس ریاست کے بنیادی ڈھانچے کی ترقی میں نئی رفتار لائے گی، جس سے مختلف تعمیراتی پروجیکٹوں کی کامیابی میں اہم کردار ادا ہوگا۔

دو روزہ کانفرنس میں متعدد تکنیکی اجلاس منعقد ہوں گے جہاں ملک بھر کے ماہرین جدید ٹیکنالوجیز، تعمیراتی مواد اور انجینئرنگ، خریداری اور تعمیرات (ای پی سی) معاہدے کی عملدرآمد میں درپیش چیلنجز پر غور و خوض کریں گے۔ تقریب کے ایک حصے کے طور پر سڑک اور پل کی تعمیر میں استعمال ہونے والی جدید ترین مشینری اور ٹیکنالوجیز کی نمائش کا بھی اہتمام کیا گیا ہے۔

******

ش  ح۔ م ع ۔ م ر

U-NO. 1491

(Release ID: 2066340) Visitor Counter : 13