‘ప్రధానమంత్రి గతిశక్తి’ ప్రణాళిక 3 సంవత్సరాలు పూర్తయిన నేపథ్యంలో దీని స్ఫూర్తితో దేశంలోని 27 ఆకాంక్షాత్మక జిల్లాల కోసం ప్రత్యేకంగా రూపొందించిన ‘పిఎం గతిశక్తి జిల్లా బృహత్ ప్రణాళిక’ను కేంద్ర వాణిజ్య-పరిశ్రమల శాఖ మంత్రి శ్రీ పీయూష్ గోయల్ ఈ రోజు ఆవిష్కరించారు. ఈ సందర్భంగా ఆయన మాట్లాడుతూ- మౌలిక సదుపాయాల కల్పన ప్రణాళికల తయారీలో ‘గతిశక్తి’ అద్భుత ఉపకరణమని పేర్కొన్నారు. అందుకే జిల్లా బృహత్ ప్రణాళికను రాబోయే 18 నెలల్లో దేశంలోని 750కిపైగా జిల్లాలకు విస్తరిస్తామని తెలిపారు. అలాగే రవాణా ప్రణాళికల రూపకల్పనలో నగరాలకు తోడ్పాటు దిశగా ‘‘భారత నగరాల కోసం ‘సిటీ లాజిస్టిక్స్ ప్లాన్‌’ తయారీ మార్గదర్శకాల’’ను కూడా కేంద్ర మంత్రి ఆవిష్కరించారు. తద్వారా దేశంలోని నగరాలు తమ ప్రత్యేకావసరాలు, స్థానిక పరిస్థితులు, లక్ష్యాలకు అనుగుణంగా రవాణా ప్రణాళిక రూపొందించుకునే వెసులుబాటు ఉంటుందని తెలిపారు.

   అంతర్జాతీయ మౌలిక సదుపాయాల కల్పనలో భారత్ ముందడుగు వేయడానికి ఈ జాతీయ బృహత్ ప్రణాళిక సమర్థ, సత్వర, మెరుగైన, తక్కువ ఖర్చుతో కూడిన, అధిక నాణ్యతగల ఉపకరణమని శ్రీ గోయల్ స్పష్టం చేశారు. నేటి ఈ వేగం, సామర్థ్యాలే భారత్ బలాన్ని నిర్వచించే లక్షణాలని ఆయన పేర్కొన్నారు. భవిష్యత్ అవసరాలను దృష్టిలో పెట్టుకోవడంతోపాటు సమర్థంగా అమలు చేయడం ద్వారా అత్యాధునిక, నాణ్యమైన మౌలిక సదుపాయాలను సకాలంలో నిర్మిస్తున్నందున భారతదేశం ప్రపంచవ్యాప్త గుర్తింపు సాధించిందని తెలిపారు. రానున్న కాలంలో ప్రపంచ దేశాలు కూడా తమ మౌలిక సదుపాయాల ప్రణాళికల రూపకల్పన కోసం ఈ ఉపకరణాన్ని వాడుకుంటాయని పేర్కొన్నారు.

   ప్రధానమంత్రి గతిశక్తి బృహత్ ప్రణాళిక భూగోళ-ప్రాదేశిక, ఇతర అత్యాధునిక సాంకేతిక పరిజ్ఞానాలను అనుసరించిందని మంత్రి గుర్తుచేశారు. తద్వారా అనుసంధాన ప్రక్రియను విప్లవాత్మకంగా మార్చి గణనీయ పురోగతి సాధించిందని పేర్కొన్నారు. ఈ ప్రణాళికలో ప్రతి సమాచారం కచ్చితమైనదిగా ఉంటుందని, ఒకటికి రెండుసార్లు పరీక్షిస్తూ క్రమానుగత నవీకరణ చేపట్టేలా ఒక యంత్రాంగం కూడా ఇందులో ఉందని ఆయన వివరించారు. ఈ అద్భుత ఉపకరణానికి రూపమిచ్చిన ‘బైశాగ్-ఎన్’ (బిఐఎస్ఎజి-ఎన్) బృందాన్ని శ్రీ గోయల్ అభినందించారు. అత్యున్నత మేధకు గతిశక్తి ఒక ఉదాహరణ అని, ‘జిఐఎస్’ ఆధారిత వేదిక వల్ల ప్రభుత్వానికి వ్యయం గణనీయంగా ఆదా కాగలదని తెలిపారు. అలాగే దీనిద్వారా లభించే సమాచారం ఆధారంగా చేపట్టే నిర్ణయ ప్రక్రియ వల్ల మౌలిక సదుపాయాల నిర్మాణం మరింత సమర్థంగా, వేగంగా సాగుతుందని చెప్పారు.

   ప్రధానమంత్రి గతిశక్తి ఒక ఇరుసుగా మారిందని, దీనిచుట్టూ మౌలిక సదుపాయాల కల్పన కార్యక్రమాలు నానాటికీ మరింత పుంజుకుంటున్నాయని శ్రీ గోయల్ తెలిపారు. శరవేగంగా పురోగమించే అతిపెద్ద ఆర్థిక వ్యవస్థలలో ఒకటిగా భారత్ రూపొందడంలో ప్రధానమంత్రి గతిశక్తి బహుగుణ ప్రభావం చూపుతూ కీలకపాత్ర పోషించిందని ఆయన వివరించారు. ప్రాదేశిక సాంకేతికతకు 20 ఏళ్ల కిందట నాంది పలకడంలో ప్రధానమంత్రి శ్రీ నరేంద్ర మోదీ దూరదృష్టిని  శ్రీ గోయల్ గుర్తుచేశారు. భూగోళ-ప్రాదేశక అంశాల పరస్పర ప్రభావాన్ని ఆయన ఆనాడే గుర్తించి, గుజరాత్‌లో దానికి కార్యరూపం ఇచ్చారని కొనియాడారు.

   ‘నిర్దిష్ట ప్రాంత అభివృద్ధి విధానం’ కింద ‘పిఎం గతిశక్తి’ పరిధిని విద్యుత్ ప్రసార లైన్లు, పాఠశాలలు, ఆస్పత్రులు వంటి సామాజిక మౌలిక సదుపాయాలకు ప్రధాని మోదీ విస్తరించారని కేంద్ర మంత్రి పేర్కొన్నారు. భౌతిక మౌలిక సదుపాయాల కల్పనపై మనం ప్రణాళికలు రూపొందిస్తున్న క్రమంలో జీవన సౌలభ్యం దిశగా సామాజిక మౌలిక సదుపాయాల కోసం కూడా తయారు చేయవచ్చు. ఈ క్రమంలో వాణిజ్య సౌలభ్యంతో జనజీవన సౌలభ్యాన్ని జోడించే దిశగానూ ప్రధానమంత్రి గతిశక్తి ఇప్పుడు ముందడుగు వేస్తోందన్నారు. ఇవి రెండూ ఒకదానికొకటి పర్యాయపదాలు కావడమే ఇందుకు కారణమని పేర్కొన్నారు.

****