ثقافت اور سیاحت کے مرکزی وزیر جناب گجیندر سنگھ شیخاوت نے آج نوی  ممبئی کے  ڈی وائی پاٹل ڈیمڈ ٹو بی یونیورسٹی میں وکست بھارت ایمبیسیڈر یووا کنیکٹ پروگرام سے خطاب کرتے ہوئے ملک کے نوجوانوں پر زور دیا کہ وہ ملک کے ثقافتی سفیر بنیں۔ جناب شیخاوت نے کہا کہ ہندوستان عالمی سیاحوں کی بڑی تعداد کے لیے توجہ کا مرکز ہے۔ اس سلسلے میں انہوں نے نوجوانوں اور طلبہ برادری سے کہا کہ وہ ملک کی ثقافت، روایات اور اقدار کے علمبردار اور محافظ بنیں۔

اس موقع پر اظہار خیال کرتے ہوئے ثقافت اور سیاحت کے مرکزی  وزیر جناب شیخاوت نے کہا کہ ملک کے نوجوان وکست بھارت کے معمار ہوں گے اور مستقبل میں ترقی یافتہ ہندوستان میں رہنے والے آج کے نوجوانوں کو وکست بھارت  کے تصور کو ساکار کرنے  کا کریڈٹ دیں گے۔ انہوں نے ان پر زور دیا کہ وہ ملک کے قابل احترام مجاہدین آزادی  کے خوابوں کو پورا کریں،  جنہوں نے ہندوستان کو نوآبادیاتی حکمرانوں سے آزاد کرانے کے لیے اپنے آپ کو قربان کیا۔ مرکزی وزیر نے کہا کہ اب وقت اور موقع ہے کہ 2047 میں وکست بھارت بنانے کے مقصد کے ساتھ قوم کی تعمیر میں شراکت دار بنیں، جو کہ ہمارے  مجاہدین آزادی کو حقیقی خراج عقیدت ہوگا۔

جناب شیخاوت نے کہا کہ وزیر اعظم نریندر مودی کی قیادت میں مرکزی حکومت نے گزشتہ برسوں میں ‘اصلاح، کارکردگی، تبدیلی’ کی حکمت عملی اپنائی،  جس سے بہت سے شہریوں کی زندگیوں میں تبدیلی آئی۔ اس حکمت عملی کے نتیجے میں بینکنگ کے بغیر بینکنگ اور دنیا کے سب سے بڑے مالیاتی شمولیت کے آغاز، غیر فنڈڈ کو فنڈنگ، عوامی نظام تقسیم، غیر ہنر مندوں کو ہنر مند بنانا، زرعی پیداوار کے لیے ایک ملک ایک منڈی اور غیر بیمہ شدہ افراد کی بیمہ کی شروعات ہوئی۔ پچھلے دس برسوں  میں ملک نے بڑے پیمانے پر بنیادی ڈھانچے کی ترقی اور تبدیلی بھی دیکھی ہے۔ حکومت نے ڈیجیٹائزیشن اور ڈیجیٹل ادائیگیوں پر بھی زور دیا ہے ،جو بہت سے دوسرے ممالک کے لیے ایک ترجیح بن گیا ہے۔ ڈیجیٹل انڈیا پر زور بھی کووڈ-19کے دوران ملک میں سب سے بڑی ویکسینیشن مہم کے نفاذ کا باعث بنا۔ جناب شیخاوت نے کہا کہ آج ہندوستان دنیا کی تیسری سب سے بڑی معیشت ہے اور ملک کے نوجوانوں نے ملک کو آگے لے جانے میں بڑے پیمانے پر تعاون کیا ہے۔

ثقافت اور سیاحت کے مرکزی وزیر جناب شیخاوت نے کہا کہ خود کفالت یا ‘آتم نربھرتا’ آگے بڑھنے کا راستہ ہے۔ اس تناظر میں، وزیر نے کہا کہ ‘آتم نر بھر بھارت’ کا زور دفاعی مینوفیکچرنگ سیکٹر کے ساتھ ساتھ بہت سے شعبوں میں محسوس کیا گیا ہے۔ انہوں نے مزید کہا کہ تیجس طیاروں کی مانگ بہت سے ممالک کی طرف سے بہت زیادہ ہے۔ جناب شیخاوت نے کہا کہ ہندوستان کی کامیابی کی کہانی ترقی کی رفتار اور پیمانہ، بدعنوانی کے تئیں زیرو ٹالرنس اور ملک کی روایتی اقدار کے ذریعے سامنے آئی ہے۔

جناب  گجیندر سنگھ شیخاوت نے اس موقع پر کامیابی حاصل کرنے والے طلباء سے بھی بات چیت کی۔ ڈی وائی پاٹل ڈیمڈ ٹو بی یونیورسٹی کے چانسلر اور صدر ڈاکٹر وجے ڈی پاٹل، ڈی وائی پاٹل ڈیمڈ ٹو بی یونیورسٹی کے پرو وائس چانسلر اور وائس پریذیڈنٹ ڈاکٹر شیوانی وی پاٹل، وائس چانسلر محترمہ وندنا مشرا اور این وائی کے ایس  ڈائریکٹر (مہاراشٹر اور گوا) جناب  پرکاش کمار مانورے اس موقع پر معززین کے درمیان موجود تھے۔

*********************

(ش ح۔   ک ا۔ ت ع)

UR-1114

(Release ID: 2063895)