அமைதி மற்றும் அகிம்சையின் உலகளாவிய அடையாளமாகத் திகழும் மகாத்மா காந்தியின் பிறந்த நாளானஅக்டோபர் 2 ஆம் தேதி ஆண்டுதோறும் சர்வதேச அகிம்சை தினமாகக்  கொண்டாடப்படுகிறது. 2007 ஆம் ஆண்டில் ஐக்கிய நாடுகள் சபையால், பிரகடனப்படுத்தப்பட்ட இந்த நாள், சமூகங்களை வடிவமைப்பதில் அகிம்சையின் சக்தியை நினைவூட்டுகிறது.

மகாத்மா காந்தியின் தத்துவமான சத்தியாக்கிரகம் மற்றும் வன்முறையற்ற எதிர்ப்பு, நவீன வரலாற்றில் மாற்றத்திற்கான மிகவும் சக்திவாய்ந்த சக்திகளில் ஒன்றாக உள்ளது. பிரிட்டிஷ் ஆட்சிக்கு எதிரான அவரது அமைதியான போராட்டங்கள், குறிப்பாக1930 இல் தண்டி யாத்திரை, அடக்குமுறையை எதிர்கொள்ள அகிம்சையின் சக்தி மீதான அவரது நம்பிக்கையை எடுத்துக்காட்டியது. மகாத்மா காந்தியைப் பொறுத்தவரை, அகிம்சை என்பது ஒரு அரசியல் கருவி மட்டுமல்ல, அமைதியான வழிமுறைகள் மூலம் மட்டுமே அமைதியை அடைய முடியும் என்ற நம்பிக்கையில் வேரூன்றிய ஒரு வாழ்க்கை முறை.

"அகிம்சை மனிதகுலத்தின் வசம் உள்ள மிகப்பெரிய சக்தி. அது அழிக்கும் வலிமையான ஆயுதத்தைவிட வலிமையானது" , என்று மகாத்மா காந்தி கூறினார்,  இந்த நம்பிக்கை அமெரிக்காவில் மார்ட்டின் லூதர் கிங் ஜூனியரின் சிவில் உரிமைகளுக்கான போராட்டம் முதல் தென்னாப்பிரிக்காவில் நிறவெறிக்கு எதிரான நெல்சன் மண்டேலாவின் போராட்டம் வரை உலகெங்கிலும் உள்ள இயக்கங்களுக்கு தொடர்ந்து ஊக்கமளிக்கிறது. அவரது கருத்துக்கள் எண்ணற்ற தலைவர்கள் மற்றும் இயக்கங்களில் செல்வாக்கு செலுத்தின. எதிர்ப்பு மற்றும் சீர்திருத்தத்திற்கான சக்திவாய்ந்த கருவியாக அகிம்சையின் உலகளாவிய முறையீட்டை அடிக்கோடிட்டுக் காட்டியது.

இன்றைய உலகில் மகாத்மா காந்தியின் பொருத்தம்

அரசியல், சமூக மற்றும் சுற்றுச்சூழல் சவால்களால் குறிக்கப்பட்ட ஒரு சகாப்தத்தில், மகாத்மா காந்தியின் அகிம்சை கொள்கைகள் ஆழமாக எதிரொலிக்கின்றன. பயங்கரவாதம், மோதல், பருவநிலை மாற்றம் மற்றும் வளர்ந்து வரும் சமத்துவமின்மை ஆகியவை அமைதியான தீர்வுகளுக்கான அவசரத் தேவையை வலியுறுத்துகின்றன. மனிதகுலத்தின் உள்ளார்ந்த நன்மை மீதான காந்தியின் நம்பிக்கை பிளவுகளை குணப்படுத்துவதற்கும் தொற்றுநோய்கள் மற்றும் வறுமை உள்ளிட்ட நவீன நெருக்கடிகளை நிவர்த்தி செய்வதற்கும் ஒரு செயல்திட்டத்தை  வழங்குகிறது.

அமைதி என்பது ஒரு தொலைதூர லட்சியம் மட்டுமல்ல, அடையக்கூடிய இலக்கு என்பதை அவரது தத்துவம் நமக்கு நினைவூட்டுகிறது! அவரது போதனைகள் நம்பிக்கை மற்றும் நல்லிணக்கத்தின் எக்காலத்திற்கும் பொருத்தமான  செய்தியை நமக்கு தெரிவிக்கின்றன.

மகாத்மா காந்தியின் ஞானம், அரசியல் எதிர்ப்பைத் தாண்டி நீடித்த பிரச்சினைகளைத் தொடுவதற்கு விரிவடைந்தது. ஒவ்வொருவரின் தேவைக்கும் போதுமானது, ஆனால் அனைவரின் பேராசைக்கும் அல்ல என்ற அவரது புகழ்பெற்ற மேற்கோள் அகிம்சை மற்றும் பொறுப்பான வளப் பயன்பாட்டிற்கு இடையேயான தொடர்பை அடிக்கோடிட்டுக் காட்டுகிறது. இன்றைய சூழலில், எளிமை, பாதுகாப்பு மற்றும் தன்னம்பிக்கை ஆகிய அவரது மதிப்புகள் தூய்மை மற்றும் சுற்றுச்சூழல் நிலைத்தன்மையை ஊக்குவிக்கும் தூய்மை இந்தியா இயக்கம் போன்ற இந்தியாவின் முன்முயற்சிகளில் பிரதிபலிக்கின்றன.

சர்வதேச அகிம்சை தினம் மகாத்மா காந்தியின் அமைதி மற்றும் அகிம்சை குறித்த நீடித்த தத்துவத்தின் உலகளாவிய நினைவூட்டலாகச் செயல்படுகிறது. அவரது பிறந்த நாளில் கடைப்பிடிக்கப்படும் இந்த நாள், அவர் தமது வாழ்நாள் முழுவதும் வென்ற வன்முறையற்ற எதிர்ப்பின் கொள்கைகளுக்கு மரியாதை செலுத்துகிறது.

மகாத்மா காந்தியின் போதனைகள் இந்தியாவின் சமூக மற்றும் அரசியல் கட்டமைப்பில் ஆழமான தாக்கத்தை ஏற்படுத்துகின்றன. பல்வேறு அரசுத் துறைகள் மற்றும் நிறுவனங்கள் அவரது கொள்கைகளை தீவிரமாக நிலைநிறுத்தி ஊக்குவிக்கின்றன, தூய்மையான, தன்னம்பிக்கை மற்றும் அமைதியான சமூகத்திற்கான காந்தியின் பார்வை நவீன ஆட்சி மற்றும் பொது வாழ்க்கையில் ஒருங்கிணைக்கப்படுவதை உறுதி செய்கிறது.

2014-ல் தொடங்கப்பட்ட தூய்மை இந்தியா இயக்கம், மகாத்மாகாந்தியின் தத்துவமான தூய்மையைப் பிரதிபலிக்கும் மிக முக்கியமான முன்முயற்சிகளில் ஒன்றாக உள்ளது. தூய்மையான மற்றும் ஆரோக்கியமான இந்தியாவை உருவாக்குவதை நோக்கமாகக் கொண்ட இந்தப் பிரச்சாரம், "தூய்மை தெய்வபக்திக்கு அடுத்தது" என்ற காந்தியின் நம்பிக்கையுடன் எதிரொலிக்கிறது. இது குடிமக்கள் தங்கள் சுற்றுப்புறத்தை பராமரிப்பதற்கான கூட்டுப் பொறுப்பை எடுக்க ஊக்குவிக்கிறது, தனிப்பட்ட மற்றும் சமூக ஈடுபாட்டை வளர்க்கிறது.

தூய்மையே சேவை இயக்கம், பழக்க,வழக்கத் தூய்மை, கலாச்சாரத் தூய்மை என்ற கருப்பொருளுடன், செப்டம்பர் 17 முதல் அக்டோபர் 1 வரை நடைபெற்றது. தூய்மை இந்தியா இயக்கத்தின் 10-வது ஆண்டு நிறைவையொட்டி அக்டோபர் 2-ம் தேதி காந்தி ஜெயந்தியுடன் இந்த இயக்கம் நிறைவடைந்தது. எஸ்.எச்.எஸ் பிரச்சாரம் இந்தியா முழுவதும் தூய்மை மற்றும் சுகாதாரத்தை பராமரிக்க நடத்தை மாற்றம் மற்றும் சமூக பங்களிப்பை ஊக்குவிப்பதில் கவனம் செலுத்தியது.

மேலும் விவரங்களுக்கு இந்தச் செய்திக்குறிப்பைக் காணவும் https://pib.gov.in/PressReleasePage.aspx?PRID=2060983

---

PKV/DL