ثقافت اور سیاحت کے مرکزی وزیر جناب گجیندر سنگھ شیخاوت نے آج نیشنل آرکائیوز آف انڈیا، جن پتھ، نئی دہلی میں ’’سشاسن اور ابھیلیکھ‘‘ (گڈ گورننس اور ریکارڈ) کے عنوان سے نمائش کا افتتاح کیا۔ انہوں نے یہاں دکھائے گئے ریکارڈ کا بھی مشاہدہ کیا اور ایک میٹنگ میں ریکارڈ کے تحفظ کے نظام کا بھی جائزہ لیا۔ اس موقع پر جناب شیخاوت نے کہا کہ ریکارڈ ہمیں حکمرانی کی حالت اور سمت کی حقیقت سے آگاہ کرتے ہیں۔ اس نمائش میں حکومت ہند کی مختلف وزارتوں اور محکموں سے نئے حاصل کیے گئے تاریخی دستاویزات کی نمائش کی گئی۔

پچھلی دہائی کے دوران، حکومت ہند کی صفائی مہم نے نہ صرف صحت عامہ کو بہتر بنایا ہے بلکہ ملک کے تاریخی آثار کے تحفظ کی بھی حوصلہ افزائی کی ہے۔ اس مہم کے ایک اہم پہلو میں مختلف وزارتوں، محکموں اور دیگر سرکاری اداروں میں پرانے ریکارڈوں کا جائزہ، تصرف اور تشخیص شامل ہے، جس کا مقصد تاریخی طور پر اہم ریکارڈ کو نیشنل آرکائیوز آف انڈیا (این اے آئی ) کو منتقل کرنا ہے۔ اس اقدام نے اس بات کو یقینی بنانے میں اہم کردار ادا کیا کہ اچھی حکمرانی کی بنیاد — اچھی طرح سے محفوظ شدہ آرکائیو ریکارڈ — کو آئندہ نسلوں کے لیے تقویت حاصل ہو۔

سووچھ بھارت مشن کے تحت 2021 سے 2024 تک تاریخی اہمیت کی تقریباً 74,000 فائلوں کو 11 وزارتوں اور محکموں سے جانچ کے بعد نیشنل آرکائیوز میں منتقل کیا گیا۔ اس نمائش کے ذریعے، نیشنل آرکائیوز نے ان نئی حاصل شدہ دستاویزات کی ایک جھلک فراہم کی، جو ہندوستان میں حکمرانی کے ارتقاء کے بارے میں بصیرت اور آگاہی پیش کرتے ہیں۔

نمائش میں ہندوستان کے نیشنل آرکائیوز اور مختلف وزارتوں اور محکموں کے درمیان دیرپا تاریخی اہمیت کے ریکارڈ کو محفوظ کرنے میں تعاون پر زور دیا گیا، صفائی اور حکمرانی کے اصولوں کو اجاگر کیا گیا جو معاشرے کے تمام شعبوں میں ترقی کو آگے بڑھاتے ہیں۔

مہمانوں کو خصوصی مہم کے دوران حاصل کردہ انمول تاریخی دستاویزات کی ایک نادر جھلک پیش کی گئی۔ صدر کے سکریٹریٹ کی کارروائیوں سے لے کر آبی وسائل کے انتظام میں پیشرفت تک، کئی اہم جھلکیاں نمایاں تھیں:

صدر کا سکریٹریٹ: نمائش میں دستاویزات کی نمائش کی گئی، جس میں راشٹرپتی بھون کی پہلی فضائی فوٹو گرافی اور جنرل سیم مانیک شا کو ہندوستان کے پہلے فیلڈ مارشل کے طور پر بلند کرنا شامل ہے۔

الیکشن کمیشن آف انڈیا: آنے والوں کیلیے بیلٹ بکس سے لے کر الیکٹرانک ووٹنگ مشینوں (ای وی ایمز) کے نفاذ تک کے سفر کا پتہ لگانے میں کامیاب رہے، جو پہلی بار 1982 کے کیرالہ اسمبلی انتخابات میں متعارف کرایا گیا تھا۔

ریلوے کی وزارت: ریکارڈز نے سری لنکا اور میانمار جیسے ممالک میں ہندوستان کے اندر اور بین الاقوامی سطح پر ریل نیٹ ورکس کو پھیلانے میں ہندوستانی ریلوے کے کردار کو ظاہر کیا۔

آبی وسائل کی وزارت: پانی کے تحفظ کی ہندوستان کی دیرینہ تاریخ سے متعلق دستاویزات، بشمول سوم کملا امبا پروجیکٹ اور قومی آبی پالیسی پر مواد، نمائش کے لیے رکھے گئے تھے۔

وزارت قانون و انصاف: آرکائیول مواد نے آزادی کے بعد امپیریل لائبریری کا نام بدل کر نیشنل لائبریری کرنے پر روشنی ڈالی، ساتھ ہی 1955 کے شہریت بل پر بات چیت کی۔

بجلی کی وزارت: بجلی کے بڑے منصوبوں سے متعلق کلیدی ریکارڈز، جیسے کہ اتراکھنڈ میں ٹہری ڈیم اور کوٹیشور ڈیم، نمایاں تھے۔

پارلیمانی امور کی وزارت: اس نمائش میں اہم قانون سازی کی پیشرفت، جیسے آئینی ترمیمی بل اور لوک سبھا کے اسپیکر اور راجیہ سبھا کے نائب چیئرمین کے انتخاب پر نمائشیں شامل تھیں۔

تجارت اور صنعت کی وزارت: آنے والوں نے ہندوستان کی تجارت اور صنعتی ترقی سے متعلق اہم ریکارڈز بشمول بوفورس کمیٹی اور قومی تجدید فنڈ (این آر ایف) کے دستاویزات کی کھوج کی۔

بھاری صنعتوں اور عوامی اداروں کی وزارت: انجینئرنگ کے کمالات، جیسے کولکتہ میں ہگلی برج، کو اصل دستاویزات کے ذریعے اجاگر کیا گیا۔

پیٹنٹ آفس: قابل ذکر پیٹنٹ، جیسے کہ وشواس رگھوناتھ بھروے کے ذریعہ پیٹنٹ شدہ کثیر لسانی ٹائپ رائٹر، کی نمائش کی گئی۔

پریس انفارمیشن بیورو: نمائش میں اہم واقعات بھی پیش کیے گئے، جیسے جنرل جینتو ناتھ چودھری اور ایئر مارشل ارجن سنگھ کو پدم وبھوشن کا ایوارڈ، نیز کلکتہ ریڈیو پر سردار ولبھ بھائی پٹیل کا 1950 کا خطاب۔

’’سشاسن اور ابھیلیکھ‘‘ نے ایک مضبوط آرکائیو سسٹم کے ساتھ ساتھ صاف ستھرے انتظامی اور حکومتی ماحول کو برقرار رکھنے کی اہمیت کی مثال دی ہے جو آنے والی نسلوں کے لیے انمول تاریخی ریکارڈ کو محفوظ رکھتا ہے۔ اس مجموعہ کے ذریعے، این اے آئی نے نہ صرف سوچھ بھارت مشن کا جشن منایا بلکہ یہ بھی دکھایا کہ کس طرح ریکارڈ کا مناسب انتظام شفافیت، جوابدہی اور ملک کی بھرپور تاریخ کے تحفظ کو یقینی بناتا ہے۔ یہ نمائش عوام کے لیے یکم اکتوبر 2024، صبح 10.00 بجے سے شام 4.00 بجے تک، نیشنل آرکائیوز آف انڈیا، نئی دہلی میں کھلی تھی۔

نیشنل آرکائیوز آف انڈیا وزارت ثقافت کے تحت ایک منسلک دفتر ہے۔ یہ 11 مارچ 1891 کو کولکتہ (کلکتہ) میں امپیریل ریکارڈ ڈیپارٹمنٹ کے طور پر قائم کیا گیا تھا۔ 1911 میں دارالحکومت کی کلکتہ سے دہلی منتقلی کے بعد، نیشنل آرکائیوز آف انڈیا کی موجودہ عمارت 1926 میں تعمیر کی گئی جس کا ڈیزائن سر ایڈون لیوٹینز نے بنایا تھا۔ کلکتہ سے تمام ریکارڈ کی نئی دہلی منتقلی 1937 میں مکمل ہوئی۔ یہ پبلک ریکارڈز ایکٹ، 1993 اور پبلک ریکارڈز رولز، 1997 کے نفاذ کے لیے نوڈل ایجنسی ہے۔

 ۔  ۔  ۔

ش ح ۔ م ع ۔  ت ح     

U - 724

(Release ID: 2060936) Visitor Counter : 18