స్వయం సమృద్ధ భారతం కార్యక్రమంపై భారత సైన్యం తన నిబద్ధతను చాటుకుంటోంది. ఈ మేరకు ఇవాళ ‘ఇన్నొవేషన్స్ ఫర్ డిఫెన్స్ ఎక్సలెన్స్’ (ఐడెక్స్) ద్వారా 8వ కొనుగోలు ఒప్పందంపై సంతకం చేసింది. న్యూఢిల్లీలో సౌత్ బ్లాక్‌లోని ఆర్మీ స్టాఫ్ వైస్-చీఫ్ లెఫ్టినెంట్ జనరల్ ఎన్.సి.రాజా సుబ్రమణి సమక్షంలో ‘జనరేషన్ ఆఫ్ క్వాంటం సెక్యూర్ కీ (క్వాంటం కీ డిస్ట్రిబ్యూషన్-క్యుకెడి)’ కొనుగోలు దిశగా మెస్సర్స్ ‘కును’ (క్యుయుఎన్‌యు) ల్యాబ్స్‌ సంస్థతో ఈ ఒప్పందం కుదిరింది. ‘ఐడెక్స్’ నిర్వహించిన ‘సార్వత్రిక పోటీ 2.0’లో 200 కిలోమీటర్ల  ‘సింగిల్ హాప్ క్వాంటం కీ డిస్ట్రిబ్యూషన్’ సాంకేతికతను ‘కును’ ల్యాబ్స్ ప్రతిపాదించింది. ‘ఆల్గరిథమ్-ఆధారిత ఎన్‌క్రిప్షన్ సిస్టమ్‌’ల స్థానంలో ఈ సాంకేతికత వినియోగంలోకి వస్తుంది. తద్వారా మానవశక్తి సామర్థ్య గరిష్ఠం కావడంతోపాటు మరింత భద్రతకు భరోసా ఉంటుంది.

   గౌరవనీయ ప్రధానమంత్రి ‘డిఫెన్స్ ఎక్స్‌పో ఇండియా-2018’ సందర్భంగా ఏప్రిల్ 12న ‘ఐడెక్స్’ను ప్రారంభించారు. విద్యా, పరిశోధన-అభివృద్ధి సంస్థలతోపాటు ‘ఎంఎస్ఎంఇ’లు, అంకుర సంస్థలు సహా వ్యక్తిగత ఆవిష్కర్తలను ఈ వ్యవస్థ ఒక వేదికపైకి తెస్తుంది. తద్వారా ‘డిఫెన్స్-ఏరోస్పేస్‌’ రంగంలో సాంకేతిక ప్రగతిని, ఆవిష్కరణలను ప్రోత్సహించే వాతావరణ రూపకల్పన లక్ష్యంగా ‘ఐడెక్స్’ కృషి చేస్తుంది. ఇందులో భాగంగా పరిశోధన-అభివృద్ధి కార్యకలాపాల కోసం వాటికి ఆర్థిక సహాయం, నిధుల మంజూరుతోపాటు ఇతరత్రా మార్గాల్లోనూ  చేయూతనిస్తుంది. భవిష్యత్తులో భారత ‘డిఫెన్స్-ఏరోస్పేస్ ఆర్గనైజేషన్’ (డిఐఒ) అవసరాలకు తగిన ఆవిష్కరణలకు రూపమిచ్చే సామర్థ్యం వీటికుంది. కాగా- అంకుర సంస్థలతో, ఆవిష్కర్తలతో సముచిత సంబంధాలు ఏర్పరచుకోవడంలో ‘డిఐఒ’ పరిధిలోని ‘ఐడెక్స్’ అగ్రభాగాన నిలిచింది. ముఖ్యంగా రక్షణ రంగ అంకుర సంస్థల సమూహంలో గణనీయ ఉరవడిని ప్రేరేపించింది.

   ‘ఐడెక్స్’ పరిధిలో ప్రస్తుతం కృత్రిమ మేధ సంబంధిత 74 ప్రాజెక్టులున్నాయి. ఇవన్నీ ‘ఏసింగ్ డెవ‌ల‌ప్‌మెంట్‌ ఆఫ్ ఇన్నొవేషన్  టెక్ విత్ ఐడెక్స్’ (అదితి), ‘డిఫెన్స్ ఇండియా స్టార్టప్ ఛాలెంజ్’ (డిఐఎస్‌సి), ‘ఓపెన్ ఛాలెంజ్ స్కీమ్’లో అంతర్భాగంగా ఉన్నాయి. వీటిద్వారా 77 అంకుర సంస్థలకు చేయూత లభిస్తోంది. ఈ సంస్థలు భారత సైన్యం కోసం అత్యాధునిక ఆవిష్కరణలను రూపొందిస్తాయి. ఈ నేపథ్యంలో వివిధ ‘ఐడెక్స్’ పథకాల కింద ఇప్పటికే అందిన నాలుగు పరికరాలను భారత సైన్యం క్షేత్రస్థాయిలో ప్రయోగాత్మకంగా వినియోగిస్తోంది. ఈ ఫలితాల ప్రాతిపదికన అంకుర సంస్థల ద్వారా తదుపరి తరం వినూత్న సాంకేతిక పరిజ్ఞాన నమూనాల రూపకల్పనలో ముందడుగు పడుతుంది.

 

***

(Release ID: 2060483) Visitor Counter : 74