متعدد اسکیموں کا مقصد غیر منظم ڈیری شعبے کو منظم کرنا اور خوراک اور چارے کی کمی کو پورا کرنا ہے: جناب راجیو رنجن سنگھ

ماہی پروری، حیوانات اور ڈیری کے مرکزی وزیر جناب راجیو رنجن سنگھ عرف للن سنگھ نے کل گوا میں ہندوستان کے سی ایل ایف ایم اے کے دو روزہ قومی سمپوزیم کا افتتاح کیا۔ سی ایل ایف ایم اے آف انڈیا کے چیئرمین جناب سریش دیورا، وزارت حیوانات، ڈیری اور ماہی پروری میں حیوانات کے کمشنر ڈاکٹر ابھیجیت مترا اور محکمہ حیوانات اور ڈیری کے سابق جوائنٹ سکریٹری جناب او پی چودھری بھی اس تقریب میں موجود تھے۔

اپنے خطاب میں، جناب راجیو رنجن نے مویشی پالنے میں گھریلو طور طریقوں کو فروغ دینے اور درآمدات پر انحصار کم کرنے کے لیے مرکزی حکومت کی نمایاں کوششوں پر روشنی ڈالی۔ انہوں نے کئی اسکیموں کا بھی ذکر کیا جن کا مقصد غیر منظم ڈیری شعبے کو منظم کرنا اور خوراک اور چارے کی کمی کو دور کرنا ہے۔ سی ایل ایف ایم اے کے اقدامات کی تعریف کرتے ہوئے، انہوں نے امید ظاہر کی کہ اس طرح کے مباحثے سے حکومت کو پالیسی سازی میں مدد ملے گی۔

جناب سریش دیورا نے ہندوستانی معیشت میں مویشیوں کے شعبے کی اہمیت پر زور دیتے ہوئے ہوئے کہا کہ یہ کسانوں اور مویشی پالنے سے وابستہ افراد کے لیے روزگار فراہم کرتا ہے۔ اس صنعت کا سالانہ کاروبار 12 لاکھ کروڑ روپے ہے، اور اعلیٰ معیار کی مویشیوں کی مصنوعات جیسے انڈے، گوشت، دودھ اور پنیر کی عالمی مانگ میں مسلسل اضافہ ہو رہا ہے۔

ڈاکٹر ابھیجیت مترا نے ہندوستان کے مویشیوں کے شعبے کو فائدہ پہنچانے کے لیے حکومت، صنعت اور تحقیقی اداروں کے درمیان بہتر تال میل اور تعاون کی ضرورت پر زور دیا۔ تقریب میں، سی ایل ایف ایم اے آف انڈیا نے جناب او پی چودھری کو لائف ٹائم اچیومنٹ انعام سے نوازا۔

******

ش ح۔ ض ر ۔ م ر

U-NO. 242