U Myntri Sorkar Pdeng ba dei khmih ia ka tnad Micro Small and Medium Enterprises, Jitan Ram Majhi, mynta ka sngi u la ai jingtip ia ki lad pathai khubor shaphang ki jingjop ha ki “100 sngi’ jong ka Sorkar ha ki kam MSME ", ha ka jingialang bad ki lad pathai khubor ba la pynlong ha Udyog Bhawan, New Delhi. U Secretary, MSME, S.C.L. Das bad ki ophisar na ka tnat ki la iadon lang ha kane ka prokram.

 

 

U Myntri u la iathuh ia ki lad pathai khubor ba ki kam MSME ki dang bteng ban don ka bynta kaba heh ha ka jingkyntiew ia ka ioh ka kot, ka jingioh kam bad ka jingseng kam lajong ha kylleng ka ri. Ha ka jingai jingkren ia ka ri ha ka lyngkhuh dap 78 snem ka jingioh jinglaitluid jong ka ri ha ka 15.08.2024, u Myntri Rangbah Duh u la ban jur halor ka jingpeit bniah ka Sorkar ban kyntiew ia ka jingiaineh, ka jingsaindur thymmai bad ka jingsuk ban treikam ki MSME, kaba iahap bad ka jingthmu kaba kham heh ban pynlong ia ka India kum ka nongialam ha ka pyrthei bad u la ban jur ruh halor ka jinglong kongsan ka kam MSME.

Ha kine ki 100 sngi ba la dep, ka Sorkar India ka la pynsted ia ka jingpyntreikam ia ki prokram na ka bynta ka roi ka par bad ka la sdang ia ki sienjam bapher bapher ban pynkupbor ia ki MSME bad pynthikna ia ka jingkiew kaba iaineh jong ki kaba iahap bad ki jingthmu ba kham heh jong ka ri. Ki sienjam bapher bapher ba la wanrah ha kine ki 100 sngi ba la dep ki dei kiba thmu ban kyntiew ia ka jingkiew shaphrang, ka jingkyntiew ia ka jingseng kam lajong, ka jingplie lad ioh kam, bad ka jingpynthikna ba ki MSME ki la khreh ban iakynduh ia ki jingeh kiba don ha ka ioh ka kot jong ka pyrthei kiba kylla na ka por sha ka por.

Katto katne ki jingjop ha kine ki 100 sngi, ha kaba iadei bad ki skhim bad ki sienjam jong ka tnad MSME, kiba thmu ban pynkhlain ia ka kam MSME ki long kumne harum:

 

Ka kam pynskhem ia ki MSME

Ki MoU kiba la iasoi bad ki Jylla Maharashtra bad Andhra Pradesh ha ka 27 tarik u Jylliew 2024. Ki kam ban pynskhem kiba kynthup ia ki kam ai jingtip ki dei kiba la pynlong ha kylleng ka ri ha ka jingiatreilang bad ki Sorkar Jylla bad ki kynhun MSME ban pynrung ia ka kam MSME ha ka rynsan Udyam Registration bad ka rynsan Udyam Assist Platform (UAP). Kane ka sienjam ka thmu ban pyniasoh ia ki MSME sha ka ioh ka kot. Ha kane ka kam kaba la pynsted, ki MSME kiba la pynrung kyrteng ha ka Udyam/UAP ki la tam ia ka 5 klur. Haba ianujor bad ki 1.06 klur ki jingpynrung kyrteng ki MSME ha u 2023, kane mynta ka dei kaba la kiew sha ka 5 klur ha u 2024. Kane ka jingkiew ka jingkyntiew kyrteng ki MSME ka dei kaba la antad ban ai jingmyntoi ia kumba 21 klur ngut ki briew ha kane iadei bad ki lad ioh kam.

Hapoh ka Prime Minister's Employment Generation Programme (PMEGP), la ai kam ia palat 55 lak ngut ki briew ha kine ki 10 snem ba la dep. Hapoh kane ka skhim, la seng shibun ki micro enterprise ba thymmai bad ka thmu ban pynkiew ia ki lad ioh kam ha ki jaka sor bad ki jaka nongkyndong.

 

Ka jingseng ia ki Micro Enterprise lyngba ka PMEGP

Hapoh ka PMEGP (Prime Minister’s Employment Generation Programme), la ai jingmynjur (naduh ka 9 tarik u Jylliew) ha kine ki 100 sngi ba la dep ha kaba la seng 26,426 tylli ki micro enterprise ba thymmai ha kaba ka jingai ram ka la kot sha ka T 3,148 klur. La khmih lynti ba kane ka sienjam kan ai jingmyntoi ia kumba 2.11 lak ngut ki briew ha kaba iadei bad ka jingplie ia ki lad ioh kam.

Ka jaka pynmih jain ba ai jingiarap hapoh ka PMEGP

Ka jaka pynmih jingbam ba ai jingiarap hapoh ka PMEGP

 

Ka jingkyntiew ia ki MSME ha ka thain shatei lammihngi

Ka tnad MSME ka la ai jingmynjur ia 12 tylli ki projek ban kyntiew ia ki jingdon jingem, ba kynthup ia ka jingsdang ia ki Technology Centre bad ka jingshna kham bha ia ki industrial estate ha ka thain shatei lammihngi ba kynthup ia ka Sikkim ha ka 26 tarik u Jylliew, 2024. Kane ka projek ka thmu ban plié lad ioh kam bad kyntiew ia ka jingkiew ka ioh ka kot da kaba ai jingkyrshan ha ki kam teknoloji bad ki jingshakri ha ki kam khaii pateng. 2,290 ngut ki samla bym pat ioh kam kin ioh jingmyntoi lyngba ki lad ioh kam ba la plié ha ka thain shatei lammihngi ba kynthup ia ka Sikkim.

 

Yashasvini Campaign na ka bynta ki longkmie ba seng kam lajong

Ka tnat MSME ka la sdang ia ka Yashasvini Campaign ha ka 27 tarik u Jylliew 2024, ha ka sngi Udyami Bharat, kaba hap ha ka International MSME Day, kaba thmu ban kyntiew ia ka roi ka par kaba ialam lynti da ki longkmie lyngba ka jingseng kam lajong. Kane ka sienjam ka pyndonkam ia ka rukom treikam baroh kawei ka Sorkar, ha kaba don ka jingkyrshan na ki tnad Sorkar bapher bapher kum ka Rural Development, Tribal Affairs, Women and Child Development, bad Skill Development, ha ryngkat ki Sorkar Jylla ha ka jingiatreilang bad ka Women Entrepreneurship Platform (WEP) jong ka NITI Aayog.

Ka bynta kaba kham kyrpang jong ka Yashasvini ka dei ka public-private partnership kaba wan lyngba ka Women Entrepreneurship Platform (WEP), kaba pynthikna ia ka jingtbit ha ka kam bad ka jingpeit bniah. Yn pynlong ia ki prokram bapher bapher ban ai jingtip shaphang ki skhim Sorkar bad kyntiew ia ka jingpynkhlain, ka jingkyntiew kyrteng, bad ka jingpyntbit ia ki longkmie ba seng kam lajong. Kane ka sienjam ka ai jingkyrshan ha hynriew tylli ki bynta ba kongsan: Ka jingioh ia ka pisa, jingpyntbit, jingiasoh bad ki iew, ka jingialam lynti, ka jingbud ia ki ain bad ki jingai jingshakri kiba iadei bad ki ain bad ki kam khaii pateng.

Ka campaign kaba nyngkong, kaba la pynlong ha Jaipur ha ka 19 tarik u Naitung, 2024, ka la sakhi ia ka jingiashim bynta jong kumba 650 ngut ki longkmie ba seng kam lajong, kaba la ialam sha palat 4,000 tylli ki jingkyntiew kyrteng Udyam bad UAP. Ka campaign kaba ar, kaba la pynlong kum shi bynta ka PM Vishwakarma Conclave ha Ranchi ha ka 11 tarik u Nailur 2024, ka la sakhi ia ka jingiashim bynta jong 200 tylli ki SHG bad ki longkmie ba seng kam lajong.

Yn pynlong sa 17 tylli kine ki campaign mynta u snem. Kan ai jingmyntoi ia shi lak ki longkmie. Yn pynkhlain shuh shuh ia kane ka campaign ha ki por ban wan khnang ba kiwei kiwei ki longkmie ruh kin ioh jingmyntoi na ka.

Yashasvini campaign na ka bynta ki longkmie ba seng kam lajong

 

Ka jingbuh kyrpang ia ki longkmie hapoh ka CGTMSE ban kyntiew ia ka lad ioh shim ram khlem da buh bynda

Ka skhim CGTMSE (Ba la ai jingmynjur da ka CGTMSE Board ha ka 9 tarik u Nailur, 2024) mynta kan kynthup ia ka jingpynthikna ka jingioh shim  ram ki MSME ba long trai da ki longkmie kaba poi haduh 90%. Kane ka skhim ka don ruh ka bynta ban pynduna ia ka jingsiew ha ka shi snem kaba plié lad ioh shim ram ki longkmie ba seng kam lajong. Kane ka dei ka sienjam kaba heh ban kyntiew ia ka lad ia ki longkmie ba seng kam lajong ba kin shim ram na ki bank khlem ka jingbuh bynta. La antad ba 27 lak tylli ki MSME ba ialam da ki longkmie kin ioh jingmyntoi na kane ka sienjam.

 

Ka jingsdang ia ka skhim TEAM (Trade Enablement and Marketing) ban ai jingkyrshan ha ka jingpyniaid iew

Ka TEAM ka dei ka skhim ba thymmai ba la sdang da ka tnad MSME ha ka 27 tarik u Jylliew, 2024 hapoh ka RAMP Programme ban plié lad e-commerce ia ki MSME. Kane ka sienjam ka kyrshan ia ki MSME ba kin rung ha ki rynsan digital lyngba ka jingiasam jingtip bad ka jingkyntiew ia ki sap, ha kaba la thmu ban pulong 150 tylli ki workshop ban kyntiew ia ka jingpyniaid iew lyngba ki lad digital. Haduh mynta, la dep pynlong ar tylli kine ki workshop ha Pune bad Ranchi ha kaba la don 150 ngut ki nongiashim bynta ha man kine ki workshop. Ka jingplie lad digital ia ki MSME, kaba ai jingmyntoi ia 5 lak tylli ki MSME bad na kine 50% ki dei ki kam ba long trai da ki longkmie.

 

Ka jingsdang ia 14 tylli ki Technology Centre kiba thymmai

Ka tnat MSME ka dang sdang 14 tylli ki Technology Centre (TC) ba thymmai ha Sindhudurg (Maharashtra), Nagpur (Maharashtra), Pune (Maharashtra), Jhansi (Uttar Pradesh), Ambala (Haryana), Samba (Jammu & Kashmir), Bokaro (Jharkhand), Coimbatore (Tamil Nadu), Jabalpur (Madhya Pradesh), Bilaspur (Chhattisgarh), Rourkela (Odisha), Thiruvananthapuram (Kerala), Rajkot (Gujarat), Kopparthy (Andhra Pradesh), ha ka jingbei tyngka kaba T 2,800 klur (ba la ai jingmynjur ha ka 12 tarik u Nailar, 2024). Kine ki centre ki dei ki ban sdang ha ka rukom treikam Public-Private Partnership (PPP) bad kin plié lad ia ki MSME ha kine ki jaka ban ioh ia ki teknoloji pynmih tiar, ka jingkyntiew ia ki sap bad ki jingai jingshakri kiba iadei bad ki jingai jingmut ha ki kam khaii pateng. 1,00,000 tylli ki MSME kin ioh jingmyntoi na ka jingioh lad ia ka teknoloji, yn ai jinghikai ia 3,00,000 ngut ki samla ha kine ki 5 snem ban wan.

 

Ka skhim ZED 2.0 Certification na ka bynta ka jingpynbha ia ki mar

Ka ZED 2.0 ba la sdang da ka tnad MSME ha ka 11 tarik u Nailur, 2024 ka kyntiew ia ka jingpynmih mar Zero Defect, Zero Effect. Hapoh kane ka skhim, 5 lak tylli ki MSME kin ioh jingkyrshan ha ka jingmang tyngka kaba T 500 klur ba la buh ban iarap ia ka jingkylla sha ki kyrdan ZED ba kham halor ha ka jinglut jingsep kaba la kham duna ban ioh syrnot. 5 lak tylli ki MSME kiba la kyntiew kyrteng.

 

MSME Hackathon 4.0 na ka bynta ka jingsaindur thymmai

Ka MSME Hackathon 4.0 (ba la sdang ha ka 11 tarik u Nailur, 2024) ka kyntiew ia ka jingsaindur thymmai bad ka jingpdiang ia ka teknoloji da ki MSME khamtam ia ki nongseng kam ba dang samla kiba hapdeng 18 bad 35 snem ka rta. Kane ka skhim ka ai jingiarap pisa haduh T 15 lak ia man ka kam, kaba peit ia ki kam tynrai kiba hap hapoh ka skhim PM Vishwakarma, green energy, frontier technology, bad ka jingkyntiew ia ki kam shalan mar. La antad ba 500 ngut ki nongsaindur thymmai kin ioh jingmyntoi ka ban kyntiew ia ka jingpynkhlain ia ki startup bad ka jingsaindur thymmai.

Poster campagin na ka bynta ka MSME IDEA Hackathon 4.0

 

Ka jingbuh maw nongrim jong ka Modern Technology Centre ha Bokaro, Jharkhand

La buh ia u maw nongrim jong ka Technology Centre ha Bokaro ha ka 11 tarik u Nailur, 2024 ha Ranchi, ha ka jingbei tyngka kaba T 198 klur. Kane ka centre kan ai jingkyrshan teknoloji, jingkyntiew sap bad ki jingai jingmut ha ki kam khaii pateng ia 8,000 tylli ki MSME kiba don ha Bokaro bad hajan kane ka jaka. 22,000 ngut ki samla ki dei ki ban ioh jinghikai ka ban kyntiew ia ka lad ioh kam jong ki ha kine ki 5 snem ban wan.

Ka jingbuh maw nongrim jong ka Technology Centre ha Bokaro ha ka 11 tarik u Nailur 2024

 

Ka jingplie paidbah ia ka Centre for Rural Enterprise Acceleration through Technology (CREATE) ha Leh

Ka CREATE Centre, ba la pyntreikam ha Leh kan peit ia ka jingpynbiang jingkyrshan ia ka kam Pashmina Wool Processing bad ka jingpynmih ia ki umphniang na ki mar kiba mih ha kane ka jaka, ha kaba lah ruh ban ioh jinghikai bad ka jingkyntiew ia ki mar. Kane ka centre ka thmu ban kyntiew ia ki jingseisoh ha kane ka jaka bad pynkypbor ia ki nongpynmih mar, khamtam ki longkmie ha ka rukom ka bym ktah ia ka mariang bad kaba iaineh. La khmih lynti ba kane kan plié lad ioh kam bad kyntiew ia ka ioh ka kot jong ki nongshna tiar ha kane ka jaka khamtam kito kiba trei ha ka kam pashmina wool processing bad bio-processing.

Pashmina Wool Processing Centre ha CREATE ha Leh

 

Ka MoU jong ka Jingiatreilang hapdeng ka tnat MSME bad US-Small Business Association (US-SBA)

La soi ia ka Memorandum of Understanding (MoU) ha ka 13 tarik u Nailar, 2024, hapdeng ka Tnat MSME, Sorkar India bad ka United States Small Business Administration (US-SBA) kaba thmu ban wanrah ia ka jingiatreilang ban kyntiew ia ki kam MSME ha kine ar tylli ki ri. Kane ka jingiakut ka peit bniah ia ka jingpynkylla ia ki kam MSME sha ka green teknoloji bad ka jingkyntiew ia ki longkmie ba seng kam lajong. La kynthup lang ruh ia ka jingiasam ia ki rukom treikam ba seisoh tam bad ka jingpynkylla digital ia ki kam MSME. Ka jingiakren ka dang iaid shakhmat ban pynlong ia ka virtual webinar ba nyngkong na ka bynta ki longkmie ba seng kam lajong, ka jingkyntiew ia ki sap jong ki bad ka jingialam lynti ia ki. La kyrmen ba kane kan kyntiew ia ka jingiatreilang ha ki kam MSME, ka jingkyntiew ia ka jingiaid iew ha kylleng ka pyrthei bad ka jingkyntiew ia ki sap jong ki longkmie ba seng kam lajong.

Ka jingsoi ia ka MoU hapdeng ka tnad MSME, Sorkar India badUS-SBA ha ka 13 tarik u Nailar 2024

 

Kine ki jingjop ki dei ki dak jong ka jingkut jingmut ka Sorkar India ban pynthikna ka roi ka par kaba iaineh jong ka kam MSME, ka jingkyntiew ia ka jingsaindur thymmai bad ka jingplie lad ioh kam.

 

*****

(Release ID: 2056171) Visitor Counter : 55