ਭਾਰਤ ਮੰਡਪਮ, ਨਵੀਂ ਦਿੱਲੀ ਵਿਖੇ ਆਯੋਜਿਤ ਗ੍ਰੀਨ ਹਾਈਡ੍ਰੋਜਨ (ਆਈਸੀਜੀਐੱਚ-2024) 'ਤੇ ਅੰਤਰਰਾਸ਼ਟਰੀ ਕਾਨਫਰੰਸ ਦੇ ਦੂਜੇ ਦਿਨ, ਨਵੰਬਰ 2024 ਵਿੱਚ ਆਯੋਜਿਤ ਹੋਣ ਵਾਲੇ ਯੂਰਪੀਅਨ ਹਾਈਡ੍ਰੋਜਨ ਵੀਕ ਦੇ ਨਾਲ ਭਾਰਤ ਦੀ ਵਿਸ਼ੇਸ਼ ਸਾਂਝੇਦਾਰੀ ਦਾ ਐਲਾਨ ਕੀਤਾ ਗਿਆ। ਇਸ ਦਿਨ ਨੇ ਨਿਰਯਾਤ ਨੂੰ ਹੁਲਾਰਾ ਦੇਣ ਲਈ ਈਯੂ ਦੇ ਗ੍ਰੀਨ ਨਿਯਮਾਂ 'ਤੇ ਧਿਆਨ ਦੇਣ ਦੇ ਭਾਰਤ ਦੇ ਇਰਾਦੇ ਨੂੰ ਉਜਾਗਰ ਕੀਤਾ। ਇਸ ਤੋਂ ਇਲਾਵਾ, ਅਮੋਨੀਆ ਆਯਾਤ ਟਰਮੀਨਲ ਲਈ ਨੀਦਰਲੈਂਡ ਦੇ ਚੈਨ ਟਰਮੀਨਲ ਅਤੇ ਭਾਰਤ ਤੋਂ ਏਸੀਐੱਮਈ ਕਲੀਨਟੈਕ ਵਿਚਕਾਰ ਇਰਾਦਾ ਪੱਤਰ (ਐੱਲਓਆਈ) 'ਤੇ ਹਸਤਾਖਰ ਕੀਤੇ ਗਏ।

ਸਮਾਗਮ ਵਿੱਚ ਗ੍ਰੀਨ ਹਾਈਡ੍ਰੋਜਨ ਸੈਕਟਰ ਵਿੱਚ ਸਕੋਪ ਅਤੇ ਚੁਣੌਤੀਆਂ ਬਾਰੇ ਈਯੂ, ਆਸਟ੍ਰੇਲੀਆ ਅਤੇ ਨੀਦਰਲੈਂਡ ਦੇ ਦ੍ਰਿਸ਼ਟੀਕੋਣਾਂ ਨੂੰ ਸਾਹਮਣੇ ਲਿਆਉਣ ਵਾਲੇ ਸੈਸ਼ਨ ਵੀ ਦੇਖੇ ਗਏ। ਪੰਕਜ ਅਗਰਵਾਲ, ਸਕੱਤਰ, ਬਿਜਲੀ ਮੰਤਰਾਲਾ, ਭਾਰਤ ਸਰਕਾਰ ਦੀ ਪ੍ਰਧਾਨਗੀ ਹੇਠ ਹਾਈਡ੍ਰੋਜਨ ਯੂਰਪ ਦੇ ਸੀਈਓ ਜੋਰਗੋ ਚੈਟਜ਼ੀਮਾਰਕਕਿਸ ਦੇ ਨਾਲ ਈਯੂ ਸੈਸ਼ਨ ਵਿੱਚ ਗਲੋਬਲ ਡੀਕਾਰਬੋਨਾਈਜ਼ੇਸ਼ਨ ਯਤਨਾਂ ਵਿੱਚ ਇੱਕ ਮਹੱਤਵਪੂਰਨ ਹਿੱਸੇ ਵਜੋਂ ਗ੍ਰੀਨ ਹਾਈਡ੍ਰੋਜਨ ਦੀ ਭੂਮਿਕਾ 'ਤੇ ਧਿਆਨ ਕੇਂਦਰਿਤ ਕੀਤਾ ਗਿਆ। ਇਸ ਚਰਚਾ ਨੇ ਉਜਾਗਰ ਕੀਤਾ ਕਿ ਯੂਰਪੀ ਯੂਨੀਅਨ (ਈਯੂ) ਜੈਵਿਕ ਬਾਲਣ ਦੇ ਪ੍ਰਤੀਯੋਗੀ ਵਜੋਂ ਹਾਈਡ੍ਰੋਜਨ ਦੇ ਸਕੇਲਿੰਗ ਨੂੰ ਉਤਸ਼ਾਹਿਤ ਕਰਨ ਲਈ ਕਾਰਬਨ ਦੀ ਕੀਮਤ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਮਦਦ ਕਰਨ ਲਈ ਆਪਣੀ ਐਮਿਸ਼ਨ ਟਰੇਡਿੰਗ ਸਿਸਟਮ (ਈਟੀਐੱਸ) ਨੂੰ ਸੁਧਾਰਨ 'ਤੇ ਕੇਂਦ੍ਰਿਤ ਹੈ।

ਇਸ ਤੋਂ ਬਾਅਦ ਪੰਕਜ ਜੈਨ, ਸਕੱਤਰ, ਪੈਟਰੋਲੀਅਮ ਅਤੇ ਕੁਦਰਤੀ ਗੈਸ ਮੰਤਰਾਲਾ, ਭਾਰਤ ਸਰਕਾਰ ਨੇ ਸੀਐੱਸਆਈਆਰਓ ਹਾਈਡ੍ਰੋਜਨ ਇੰਡਸਟਰੀ ਮਿਸ਼ਨ ਦੇ ਆਗੂ ਡਾ. ਪੈਟਰਿਕ ਹਾਰਟਲੇ ਨਾਲ ਗੱਲ ਕੀਤੀ, ਜਿਨ੍ਹਾਂ ਨੇ ਸਾਂਝਾ ਕੀਤਾ ਕਿ ਸਹਿਯੋਗ, ਘਰੇਲੂ ਅਤੇ ਅੰਤਰਰਾਸ਼ਟਰੀ ਤੌਰ 'ਤੇ, ਖਾਸ ਤੌਰ 'ਤੇ ਭਾਰਤ ਵਰਗੇ ਦੇਸ਼ਾਂ ਨਾਲ, ਉਦਯੋਗ ਦੇ ਪੱਧਰ ਨੂੰ ਵਧਾਉਣ, ਤਕਨਾਲੋਜੀ ਦੀ ਤਰੱਕੀ, ਅਤੇ ਕਰਮਚਾਰੀਆਂ ਦੇ ਵਿਕਾਸ ਨੂੰ ਚਲਾਉਣ ਲਈ ਜ਼ਰੂਰੀ ਹੈ। ਰੈਗੂਲੇਟਰੀ ਫਰੇਮਵਰਕ, ਸਟੋਰੇਜ ਹੱਲ, ਅਤੇ ਵੱਡੇ ਪੱਧਰ 'ਤੇ ਅਖੁੱਟ ਊਰਜਾ ਪਹੁੰਚ ਹਾਈਡ੍ਰੋਜਨ ਸੈਕਟਰ ਲਈ ਅਹਿਮ ਚੁਣੌਤੀਆਂ ਬਣੀਆਂ ਹੋਈਆਂ ਹਨ।

ਭਾਰਤ ਸਰਕਾਰ ਦੇ ਵਿਗਿਆਨ ਅਤੇ ਤਕਨਾਲੋਜੀ ਵਿਭਾਗ ਦੇ ਸਕੱਤਰ ਡਾ. ਅਭੈ ਕਰੰਦੀਕਰ ਦੀ ਪ੍ਰਧਾਨਗੀ ਹੇਠ ਹੋਏ ਨੀਦਰਲੈਂਡ ਸੈਸ਼ਨ ਨੇ ਵਿਸ਼ਵ ਹਾਈਡ੍ਰੋਜਨ ਵਿਕਾਸ ਨੂੰ ਅੱਗੇ ਵਧਾਉਣ ਲਈ ਨੀਦਰਲੈਂਡ ਦੀ ਵਿਆਪਕ ਰਣਨੀਤੀ ਦੀ ਡੂੰਘਾਈ ਨਾਲ ਸੰਖੇਪ ਜਾਣਕਾਰੀ ਪ੍ਰਦਾਨ ਕੀਤੀ। ਸੈਸ਼ਨ ਵਿੱਚ ਹਾਨ ਫੇਨਸਟ੍ਰਾ, ਹਾਈਡ੍ਰੋਜਨ ਇੰਟਰਨੈਸ਼ਨਲ ਪ੍ਰੋਗਰਾਮ ਦੇ ਕੋਆਰਡੀਨੇਟਰ ਅਤੇ ਆਰਥਿਕ ਮਾਮਲਿਆਂ ਅਤੇ ਜਲਵਾਯੂ ਨੀਤੀ ਦੇ ਮੰਤਰਾਲੇ ਦੇ ਸੀਨੀਅਰ ਨੀਤੀ ਸਲਾਹਕਾਰ; ਮਾਰਕ-ਸਾਈਮਨ ਬੈਂਜਾਮਿਨਸ, ਹੈਵਨਬੇਡਰਿਜਫ ਰੋਟਰਡੈਮ ਐੱਨ ਵੀ ਵਿਖੇ ਬਿਜ਼ਨਸ ਮੈਨੇਜਰ; ਅਤੇ ਭਾਰਤ, ਨੇਪਾਲ ਅਤੇ ਭੂਟਾਨ ਵਿੱਚ ਨੀਦਰਲੈਂਡ ਦੇ ਰਾਜ ਦੀ ਰਾਜਦੂਤ ਮਿਸ ਮਾਰੀਸਾ ਗੇਰਾਡਸ  ਨੇ ਸ਼ਿਰਕਤ ਕੀਤੀ। 

ਪਲੈਨਰੀ ਸੈਸ਼ਨਾਂ ਤੋਂ ਇਲਾਵਾ, ਦਿਨ ਵਿੱਚ ਕਈ ਤਰ੍ਹਾਂ ਦੀਆਂ ਗਤੀਵਿਧੀਆਂ ਕਰਵਾਈਆਂ ਗਈਆਂ, ਜਿਸ ਵਿੱਚ ਯੂਥ ਸੈਸ਼ਨ ਇੱਕ ਹਾਈਲਾਈਟ ਰਿਹਾ। ਐੱਮਐੱਨਆਰਈ ਦੇ ਸਕੱਤਰ ਸ਼੍ਰੀ ਅਜੈ ਯਾਦਵ ਨੇ ਅਰਥਵਿਵਸਥਾਵਾਂ ਅਤੇ ਸਮਾਜਾਂ ਦੇ ਸਸ਼ਕਤੀਕਰਨ ਵਿੱਚ ਊਰਜਾ ਦੀ ਭੂਮਿਕਾ 'ਤੇ ਜ਼ੋਰ ਦਿੰਦੇ ਹੋਏ ਸਵਾਗਤੀ ਭਾਸ਼ਣ ਦਿੱਤਾ। ਉਨ੍ਹਾਂ ਨੌਜਵਾਨਾਂ ਨੂੰ ਭਾਰਤ ਦੇ ਊਰਜਾ ਭਵਿੱਖ ਨੂੰ ਆਕਾਰ ਦੇਣ ਦੀ ਆਪਣੀ ਸਮਰੱਥਾ ਨੂੰ ਉਜਾਗਰ ਕਰਦੇ ਹੋਏ, ਗ੍ਰੀਨ ਹਾਈਡ੍ਰੋਜਨ ਸੈਕਟਰ ਵਿੱਚ ਨਵੀਨਤਾ ਲਿਆਉਣ ਅਤੇ ਲੀਡਰਸ਼ਿਪ ਭੂਮਿਕਾਵਾਂ ਲੈਣ ਲਈ ਉਤਸ਼ਾਹਿਤ ਕੀਤਾ। ਭਾਰਤ ਸਰਕਾਰ ਦੇ ਪ੍ਰਮੁੱਖ ਵਿਗਿਆਨਕ ਸਲਾਹਕਾਰ ਪ੍ਰੋਫੈਸਰ ਅਜੈ ਕੇ ਸੂਦ ਨੇ ਵਿਸ਼ੇਸ਼ ਟਿੱਪਣੀਆਂ ਕਰਦਿਆਂ ਕਿਹਾ, “ਜਿਵੇਂ ਕਿ ਅਸੀਂ ਭਵਿੱਖ ਵੱਲ ਦੇਖਦੇ ਹਾਂ, ਜੋ ਗ੍ਰੀਨ ਹਾਈਡ੍ਰੋਜਨ ਸੈਕਟਰ ਤਰੱਕੀ ਦੇ ਮੁੱਖ ਚਾਲਕ ਵਜੋਂ ਖੜ੍ਹਾ ਹੈ, ਅਨੁਮਾਨਾਂ ਦੇ ਨਾਲ ਇਹ ਦਰਸਾਉਂਦਾ ਹੈ ਕਿ ਇਹ 2050 ਤੱਕ ਚਾਰ ਕਰੋੜ ਨੌਕਰੀਆਂ ਪੈਦਾ ਕਰੇਗਾ। ਇਹ ਸ਼ਾਨਦਾਰ ਵਾਧਾ ਨਾ ਸਿਰਫ਼ ਵਾਤਾਵਰਣ ਦੀ ਸਥਿਰਤਾ ਨੂੰ ਮਹੱਤਵਪੂਰਨ ਤੌਰ 'ਤੇ ਅੱਗੇ ਵਧਾਉਣ ਦੀ ਸੈਕਟਰ ਦੀ ਸਮਰੱਥਾ ਨੂੰ ਉਜਾਗਰ ਕਰਦਾ ਹੈ, ਸਗੋਂ ਆਰਥਿਕ ਵਿਕਾਸ ਅਤੇ ਨਵੀਨਤਾ ਨੂੰ ਵਧਾਉਣ ਵਿੱਚ ਇਸਦੀ ਅਹਿਮ ਭੂਮਿਕਾ ਨੂੰ ਵੀ ਰੇਖਾਂਕਿਤ ਕਰਦਾ ਹੈ।

ਸੈਸ਼ਨ ਦੇ ਨਾਲ ਅੱਗੇ ਵਧਦੇ ਹੋਏ, ਭਾਰਤੀ ਬੈਡਮਿੰਟਨ ਖਿਡਾਰਨ ਅਤੇ ਓਲੰਪਿਕ ਤਮਗਾ ਜੇਤੂ ਅਤੇ ਵਿਸ਼ਵ ਚੈਂਪੀਅਨ ਮਿਸ ਸਾਇਨਾ ਨੇਹਵਾਲ ਨੇ ਇੱਕ ਪ੍ਰੇਰਨਾਦਾਇਕ ਭਾਸ਼ਣ ਦਿੰਦਿਆਂ ਕਿਹਾ, "ਇੱਕ ਟਿਕਾਊ ਭਵਿੱਖ ਦੀ ਸਾਡੀ ਭਾਲ ਵਿੱਚ, ਇਸ ਸੰਸਾਰ ਬਾਰੇ ਸੋਚਣਾ ਜ਼ਰੂਰੀ ਹੈ ਜੋ ਅਸੀਂ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਪਿੱਛੇ ਛੱਡ ਰਹੇ ਹਾਂ। ਜਲਵਾਯੂ ਬਦਲਾਅ ਦਾ ਪ੍ਰਭਾਵ ਇੱਕ ਹਕੀਕਤ ਹੈ ਅਤੇ ਅਥਲੀਟਾਂ ਅਤੇ ਆਗੂਆਂ ਦੇ ਰੂਪ ਵਿੱਚ ਸਾਡੀ ਜ਼ਿੰਮੇਵਾਰੀ ਹੈ ਕਿ ਅਸੀਂ ਹਾਂ ਪੱਖੀ ਤਬਦੀਲੀ ਨੂੰ ਪ੍ਰੇਰਿਤ ਕਰੀਏ। ਜਿਸ ਤਰ੍ਹਾਂ ਸਾਡੀ ਖੇਡ ਵਧੀ ਹੈ ਅਤੇ ਵਧ-ਫੁੱਲ ਰਹੀ ਹੈ, ਉਸੇ ਤਰ੍ਹਾਂ ਇੱਕ ਸਿਹਤਮੰਦ ਵਾਤਾਵਰਣ ਪ੍ਰਤੀ ਸਾਡੀ ਵਚਨਬੱਧਤਾ ਵੀ ਹੋ ਸਕਦੀ ਹੈ।”

ਯੁਵਾ ਸੈਸ਼ਨ ਦੇ ਹਿੱਸੇ ਵਜੋਂ, ਮਿਸ ਸ਼੍ਰੀਆ ਰਾਏ, ਸ਼੍ਰੀ ਸੈਲੇਸ਼ ਸਿੰਘਲ, ਸ਼੍ਰੀ ਅਭੀਰ ਭੱਲਾ, ਮਿਸ ਵਿਵੇਕਾ ਜਾਨੀ, ਮਿਸਟਰ ਐਸ਼ਲੇ ਵਿਲਕਿਨਸਨ, ਅਤੇ ਮਿਸ ਸਨੇਹਾ ਸ਼ਾਹੀ ਸਮੇਤ ਨੇਤਾਵਾਂ ਦਾ ਇੱਕ ਪੈਨਲ, ਮਿਸ ਪ੍ਰਿਯੰਕਾ ਸਹਿਸਰਬੁੱਧੇ ਦੁਆਰਾ ਸੰਚਾਲਿਤ ਕੀਤਾ ਗਿਆ, ਜਿਸ ਵਿੱਚ ਜਲਵਾਯੂ ਕਾਰਵਾਈ ਅਤੇ ਸਥਿਰਤਾ ਵਿੱਚ ਨੌਜਵਾਨਾਂ ਦੀ ਮਹੱਤਵਪੂਰਨ ਭੂਮਿਕਾ ਨੂੰ ਉਜਾਗਰ ਕੀਤਾ ਗਿਆ। ਉਨ੍ਹਾਂ ਨੇ 2030 ਤੱਕ ਅਖੁੱਟ ਊਰਜਾ ਦਾ ਤੀਜਾ ਸਭ ਤੋਂ ਵੱਡਾ ਉਤਪਾਦਕ ਬਣਨ ਦੇ ਭਾਰਤ ਦੇ ਟੀਚੇ ਨਾਲ ਮੇਲ ਖਾਂਦਿਆਂ ਗ੍ਰੀਨ ਹਾਈਡ੍ਰੋਜਨ, ਡੀਕਾਰਬੋਨਾਈਜ਼ੇਸ਼ਨ ਅਤੇ ਅਖੁੱਟ ਊਰਜਾ ਦੇ ਮਹੱਤਵ ਬਾਰੇ ਚਰਚਾ ਕੀਤੀ।

ਆਪਣੇ ਸੰਬੋਧਨ ਵਿੱਚ, ਸ਼੍ਰੀ ਭੁਪਿੰਦਰ ਐੱਸ ਭੱਲਾ, ਸਕੱਤਰ, ਐੱਮਐੱਨਆਰਈ ਨੇ ਹਾਜ਼ਰੀਨ ਨੂੰ ਇਹ ਕਹਿ ਕੇ ਪ੍ਰੇਰਿਤ ਕੀਤਾ ਕਿ ਸਾਡਾ ਟੀਚਾ ਨੌਜਵਾਨਾਂ ਵਿੱਚ ਸਥਿਰਤਾ ਅਤੇ ਨਵੀਨਤਾ ਲਈ ਜਨੂੰਨ ਨੂੰ ਪੈਦਾ ਕਰਨਾ ਹੈ। ਮਿਲ ​​ਕੇ ਕੰਮ ਕਰਨ ਅਤੇ ਨਵੀਆਂ ਤਕਨੀਕਾਂ ਨੂੰ ਅਪਣਾ ਕੇ, ਅਸੀਂ ਸਾਰਥਕ ਤਬਦੀਲੀ ਲਿਆ ਸਕਦੇ ਹਾਂ ਅਤੇ ਸਾਰਿਆਂ ਲਈ ਇੱਕ ਰੌਸ਼ਨ, ਹਰਿਆ ਭਰਿਆ ਭਵਿੱਖ ਸਿਰਜ ਸਕਦੇ ਹਾਂ। ।" ਇਸ ਵਚਨਬੱਧਤਾ ਨੂੰ ਦੁਹਰਾਉਂਦੇ ਹੋਏ, ਜੀਐੱਚ2 ਇੰਡੀਆ ਦੇ ਡਾਇਰੈਕਟਰ ਸ਼੍ਰੀ ਨਿਸ਼ਾਂਤ ਬਾਲਸ਼ਨਮੁਗਮ ਨੇ ਗ੍ਰੀਨ ਹਾਈਡ੍ਰੋਜਨ ਦੀ ਬਦਲਾਅ ਪੂਰਨ ਸਮਰੱਥਾ ਨੂੰ ਉਜਾਗਰ ਕੀਤਾ। ਉਨ੍ਹਾਂ ਨੋਟ ਕੀਤਾ, "ਗ੍ਰੀਨ ਹਾਈਡ੍ਰੋਜਨ ਦੁਨੀਆ ਦੇ ਲਗਭਗ 18 ਤੋਂ 20% ਕਾਰਬਨ ਨਿਕਾਸ ਦਾ ਇੱਕੋ ਇੱਕ ਹੱਲ ਹੈ," ਅਤੇ ਉਨ੍ਹਾਂ ਤਾਕੀਦ ਕੀਤੀ, "ਰਲ-ਮਿਲ ਕੇ, ਅਸੀਂ ਸਾਰਿਆਂ ਨੂੰ ਸਾਫ਼-ਸੁਥਰੇ ਭਵਿੱਖ ਲਈ ਕੰਮ ਕਰਨਾ ਚਾਹੀਦਾ ਹੈ, ਅਤੇ ਤੁਸੀਂ ਇਸ ਵਿੱਚ ਆਪਣੀ ਭੂਮਿਕਾ ਨਿਭਾ ਕੇ ਯੋਗਦਾਨ ਪਾ ਸਕਦੇ ਹੋ।" ਇਹ ਟਿੱਪਣੀਆਂ ਟਿਕਾਊ ਅਭਿਆਸਾਂ ਨੂੰ ਅੱਗੇ ਵਧਾਉਣ ਅਤੇ ਜਲਵਾਯੂ ਬਦਲਾਅ ਦੇ ਵਿਰੁੱਧ ਵਿਸ਼ਵਵਿਆਪੀ ਯਤਨਾਂ ਵਿੱਚ ਨੌਜਵਾਨਾਂ ਨੂੰ ਸ਼ਾਮਲ ਕਰਨ ਲਈ ਇੱਕ ਏਕੀਕ੍ਰਿਤ ਸਮਰਪਣ ਨੂੰ ਦਰਸਾਉਂਦੀਆਂ ਹਨ।  ਐੱਨਜੀਐੱਚਐੱਮ, ਐੱਮਐੱਨਆਰਈ ਦੇ ਮਿਸ਼ਨ ਡਾਇਰੈਕਟਰ ਸ਼੍ਰੀ ਅਭੈ ਬਾਕਰੇ ਨੇ ਸੈਸ਼ਨ ਦੇ ਅੰਤ ਵਿੱਚ ਸਾਰਿਆਂ ਦਾ ਧੰਨਵਾਦ ਕੀਤਾ। 

ਇਸਦੇ ਸਮਾਨਾਂਤਰ, ਇੱਕ ਜੀਐੱਚ2ਥੌਨ ਹੈਕਾਥੌਨ ਦਾ ਆਯੋਜਨ ਵੀ ਕੀਤਾ ਗਿਆ, ਜਿੱਥੇ ਭਾਗੀਦਾਰਾਂ ਨੇ ਗ੍ਰੀਨ ਹਾਈਡ੍ਰੋਜਨ ਤਕਨਾਲੋਜੀ ਨੂੰ ਅੱਗੇ ਵਧਾਉਣ ਲਈ ਆਪਣੇ ਨਵੀਨਤਾਕਾਰੀ ਹੱਲ ਪੇਸ਼ ਕੀਤੇ। ਆਈਆਈਟੀ ਬੰਬੇ ਦੇ ਨੰਦਲਾਲ ਗੁਪਤਾ ਨੂੰ ਜੇਤੂ ਐਲਾਨਿਆ ਗਿਆ। ਸੈਸ਼ਨ ਨੂੰ ਸੰਬੋਧਿਤ ਕਰਦੇ ਹੋਏ, ਸ਼੍ਰੀ ਅਜੈ ਯਾਦਵ, ਸਕੱਤਰ, ਐੱਮਐੱਨਆਰਈ ਨੇ ਟਿੱਪਣੀ ਕੀਤੀ ਕਿ “ਜੀਐੱਚ2ਥੌਨ ਇੱਕ ਦੂਰਅੰਦੇਸ਼ੀ ਪਹਿਲਕਦਮੀ ਹੈ, ਜੋ ਕਿ ਹਾਈਡ੍ਰੋਜਨ ਤਕਨਾਲੋਜੀ ਦੇ ਭਵਿੱਖ ਨੂੰ ਆਕਾਰ ਦੇਣ ਲਈ ਸਟਾਰਟਅੱਪਸ, ਖੋਜਕਰਤਾਵਾਂ ਅਤੇ ਤਕਨੀਕੀ ਮਾਹਰਾਂ ਦੀ ਨਵੀਨਤਾ ਦਾ ਇਸਤੇਮਾਲ ਕਰਦੀ ਹੈ। ਆਪਣੀ ਕਿਸਮ ਦੀ ਪਹਿਲੀ ਘਟਨਾ ਦੇ ਤੌਰ 'ਤੇ, ਇਹ ਗ੍ਰੀਨ ਹਾਈਡ੍ਰੋਜਨ ਮਿਸ਼ਨ ਪ੍ਰਤੀ ਸਾਡੀ ਵਚਨਬੱਧਤਾ ਨੂੰ ਦਰਸਾਉਂਦੀ ਹੈ, ਜੋ ਕਿ ਇੱਕ ਟਿਕਾਊ, ਗ੍ਰੀਨ ਊਰਜਾ ਭਵਿੱਖ ਵੱਲ ਭਾਰਤ ਦੀ ਤਬਦੀਲੀ ਦੀ ਅਗਵਾਈ ਕਰਨ ਲਈ ਅਗਲੀ ਪੀੜ੍ਹੀ ਨੂੰ ਸ਼ਕਤੀ ਪ੍ਰਦਾਨ ਕਰਦੀ ਹੈ।"

ਉਦਯੋਗ ਦੇ ਆਗੂਆਂ ਅਤੇ ਜਨਤਕ ਕੰਪਨੀਆਂ ਦੇ 100 ਤੋਂ ਵੱਧ ਸਟਾਲ ਗ੍ਰੀਨ ਹਾਈਡ੍ਰੋਜਨ ਵੈਲਿਊ ਚੇਨ ਦੇ ਖੇਤਰ ਵਿੱਚ ਨਵੀਨਤਮ ਤਕਨਾਲੋਜੀਆਂ ਅਤੇ ਨਵੀਨਤਾਵਾਂ ਦਾ ਪ੍ਰਦਰਸ਼ਨ ਕਰ ਰਹੇ ਹਨ। ਇਸ ਸਮਾਗਮ ਨੂੰ 2000 ਤੋਂ ਵੱਧ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਡੈਲੀਗੇਟਾਂ ਦੁਆਰਾ ਸ਼ਿਰਕਤ ਕੀਤੀ ਗਈ ਹੈ ਜਿਸ ਵਿੱਚ ਅਕਾਦਮਿਕ, ਉਦਯੋਗ ਮਾਹਰ ਸਟਾਰਟ-ਅੱਪ, ਨੀਤੀ ਨਿਰਮਾਤਾ ਅਤੇ ਡਿਪਲੋਮੈਟ ਸ਼ਾਮਲ ਹਨ। ਪ੍ਰਦਰਸ਼ਨੀ ਦੇ ਨਾਲ-ਨਾਲ, ਇਸ ਦਿਨ ਇੱਕ ਰਾਸ਼ਟਰੀ ਪੋਸਟਰ ਮੁਕਾਬਲਾ ਵੀ ਕਰਵਾਇਆ ਗਿਆ ਜਿੱਥੇ ਭਾਗੀਦਾਰਾਂ ਨੇ ਇੱਕ ਟਿਕਾਊ ਭਵਿੱਖ ਬਣਾਉਣ ਵਿੱਚ ਆਪਣੇ ਵਿਚਾਰਾਂ ਅਤੇ ਨਵੀਨਤਾਵਾਂ ਦਾ ਪ੍ਰਦਰਸ਼ਨ ਕੀਤਾ।

ਇਸ ਦਿਨ ਨੇ ਸਿੰਗਾਪੁਰ ਅਤੇ ਦੱਖਣੀ ਕੋਰੀਆ 'ਤੇ ਦੋ ਮੁਲਕੀ ਗੋਲਮੇਜ਼ਾਂ, ਭਾਰਤ-ਅਮਰੀਕਾ ਹਾਈਡ੍ਰੋਜਨ ਟਾਸਕਫੋਰਸ ਲਈ ਇੱਕ ਉਦਯੋਗਿਕ ਗੋਲਮੇਜ਼, ਅਤੇ ਹਾਈਡ੍ਰੋਜਨ 'ਤੇ ਇੱਕ ਸਫਲਤਾਪੂਰਵਕ ਗੋਲਮੇਜ਼ ਦਾ ਆਯੋਜਨ ਕੀਤਾ, ਜਿਨ੍ਹਾਂ ਵਿੱਚ ਸਾਰਿਆਂ ਨੇ ਡੂੰਘੇ ਅੰਤਰਰਾਸ਼ਟਰੀ ਸਹਿਯੋਗ ਅਤੇ ਰਣਨੀਤਕ ਸੰਵਾਦਾਂ ਨੂੰ ਉਤਸ਼ਾਹਿਤ ਕੀਤਾ।

ਜਿਵੇਂ ਕਿ ਆਈਸੀਜੀਐੱਚ-2024 ਅੱਗੇ ਵਧ ਰਿਹਾ ਹੈ, ਇਹ ਗ੍ਰੀਨ ਹਾਈਡ੍ਰੋਜਨ ਤਕਨਾਲੋਜੀਆਂ ਨੂੰ ਅੱਗੇ ਵਧਾਉਣ ਅਤੇ ਇੱਕ ਟਿਕਾਊ ਭਵਿੱਖ ਲਈ ਮਹੱਤਵਪੂਰਨ ਭਾਈਵਾਲੀ ਸਥਾਪਤ ਕਰਨ ਲਈ ਇੱਕ ਮਹੱਤਵਪੂਰਨ ਪਲੇਟਫਾਰਮ ਬਣਿਆ ਹੋਇਆ ਹੈ।

ਨਵੀਂ ਤੇ ਅਖੁੱਟ ਊਰਜਾ ਮੰਤਰਾਲਾ ਅਤੇ ਭਾਰਤ ਸਰਕਾਰ ਦੇ ਮੁੱਖ ਵਿਗਿਆਨਕ ਸਲਾਹਕਾਰ ਦਾ ਦਫ਼ਤਰ, ਪੈਟਰੋਲੀਅਮ ਅਤੇ ਕੁਦਰਤੀ ਗੈਸ ਮੰਤਰਾਲਾ, ਵਿਗਿਆਨ ਅਤੇ ਤਕਨਾਲੋਜੀ ਵਿਭਾਗ ਅਤੇ ਵਿਗਿਆਨਕ ਅਤੇ ਉਦਯੋਗਿਕ ਖੋਜ ਵਿਭਾਗ ਦੇ ਸਹਿਯੋਗ ਨਾਲ, ਗ੍ਰੀਨ ਹਾਈਡ੍ਰੋਜਨ 2024 (ਆਈਸੀਜੀਐੱਚ2024) ਦੀ ਦੂਜੀ ਅੰਤਰਰਾਸ਼ਟਰੀ ਕਾਨਫਰੰਸ ਦਾ ਆਯੋਜਨ ਕਰ ਰਹੇ ਹਨ। ਸੋਲਰ ਐਨਰਜੀ ਕਾਰਪੋਰੇਸ਼ਨ ਆਫ਼ ਇੰਡੀਆ ਅਤੇ ਈਵਾਈ ਲੜੀਵਾਰ ਅਮਲ ਅਤੇ ਗਿਆਨ ਭਾਗੀਦਾਰ ਹਨ। ਫਿੱਕੀ ਇਸਦਾ ਉਦਯੋਗਿਕ ਭਾਈਵਾਲ ਹੈ।

******

ਸੁਸ਼ੀਲ ਕੁਮਾਰ