ఈ రోజు ఢిల్లీలో జరిగిన 'స్టార్టప్ ఇండియా' కార్యక్రమంలో భాగంగా భాస్కర్ (భారత్ స్టార్టప్ నాలెడ్జ్ యాక్సెస్ రిజిస్ట్రీ) వెబ్‌సైట్‌ను కేంద్ర వాణిజ్య, పరిశ్రమలశాఖా మంత్రి శ్రీ పియూష్ గోయల్ ప్రారంభించారు. ఈ సందర్భంగా కీలకోపన్యాసం చేస్తూ ఈ వెబ్ సైటుకు 'ఉదయించే సూర్యుడు' అని అర్థం వచ్చేలా ‘భాస్కర్‌’ అని పేరు పెట్టడం సముచితంగా ఉందన్నారు. సూర్యుడితో జ్ఞానోదయం, కాంతి, అభివృద్ధి వస్తాయని, అంకుర సంస్థలు- కలిసి పనిచేయడానికీ, సహకరించుకోవడానికీ, పరస్పరం పోటీ పడటానికీ భాస్కర్ తోడ్పడతుందని ఆయన అన్నారు. కలలు కనేవాళ్లూ, దానిని ఆచరణలో పెడుతున్న వాళ్లూ, పాతను తోసిరాజని కొత్తను పరిచయం చేసేవాళ్లూ- ఇలా అందరినీ ఒకే దగ్గరకు తీసుకొస్తున్న ‘భాస్కర్’ ‌వేదిక ఒక గొప్ప ఆలోచన అంటూ ప్రశంసించారు. భవిష్యత్తుపై నమ్మకాన్ని ప్రోది చేయడానికీ, ఆశల్ని నెరవేర్చడానికీ, విజయం సాధించడానికీ భాస్కర్ ఉపకరిస్తుందని, దీని ద్వారా ఔత్సాహిక పారిశ్రామికవేత్తలు తమ కలల్ని సాకారం చేసుకోగలరని చెప్పారు. అంకుర వ్యవస్థను ప్రోత్సహించడం గురించి ఆయన మాట్లాడుతూ, అందరికీ చేరువ చేసేందుకూ, ప్రజాస్వామ్యబద్ధంగా ఉంచేందుకూ, ప్రపంచస్థాయిలో పేరు తెచ్చుకునేందుకూ ప్రభుత్వం కృషి చేస్తుందని తెలిపారు.'బ్రాండ్ ఇండియా'ను నిర్మించడానికి సాంకేతికత, కలుపుగోలుతనం భారతీయులకు ఉపకరిస్తాయని, తద్వారా ప్రపంచవ్యాప్తంగా దేశీయ ఉత్పత్తుల్నీ, సేవలనీ విక్రయించడం తేలికవుతుందన్నారు. అంకుర వ్యవస్థ వల్ల భారత్‌ పట్ల ప్రపంచానికి ఉన్న దృక్పథం మారిపోతుందన్నారు.

 

నూతన ఆవిష్కరణలకు ఔత్సాహిక పారిశ్రామిక దృక్పథం తోడైతే అది అంకురం అవుతుందని ఆయన నిర్వచనం చెప్పారు. మంచి భవిష్యత్తు కోసం ముందు విధాన రూపకల్పన జరగాలన్న ప్రధానమంత్రి నరేంద్ర మోదీ దార్శనికత నేపథ్యంలో స్టార్టప్ ఇండియా భారత వృద్ధికి దోహదపడుతోందన్నారు. ప్రజలను ఉద్యోగ సృష్టికర్తలుగా మార్చేందుకు ప్రోత్సహించడం, వైఫల్యాలను ఉజ్వల భవిష్యత్తుకు మెట్లుగా చూడటంలో ఔత్సాహిక పారిశ్రామికవేత్తలకు సహాయం పడటం వల్ల పెద్ద ఆలోచనలు ఫలిస్తాయని పేర్కొన్నారు. 

నేషనల్ స్టార్టప్ అడ్వైజరీ కౌన్సిల్(ఎన్ఎస్ఏసీ)ను సెక్షన్ 8 కంపెనీగా ఏర్పాటు చేయాలని మంత్రి సూచించారు. ఈ కొత్త కంపెనీ షేర్లను కేటాయించడం ద్వారా 100 కోట్లకు ఎదిగే అవకాశం ఉన్న అంకుర సంస్థల్ని (యూనీకార్న్) గుర్తించవచ్చనీ, ప్రోత్సహించవచ్చనీ తద్వారా ఔత్సాహిక పారిశ్రామిక వేత్తలకు సాధికారత కల్పించడం సాధ్యం అవుతుందని మంత్రి పేర్కొన్నారు. అంకుర వ్యవస్థ నిజాయితీతో, నాణ్యతతో, నిబద్ధతతో పని చేయాలనీ, అది స్వతంత్రంగా ఉండాలనీ, ప్రపంచ స్థాయిలో ప్రతిష్ఠ తెచ్చుకోవాలని ప్రభుత్వం కోరుకుంటున్నట్లు ఆయన చెప్పారు.
అంకుర వ్యవస్థ దేశమంతటా, దేశం ఆవల కూడా చక్కగా పని చేసేందుకు వీలుగా సులభతరమైన లింకుల ద్వారా మొత్తం అంకుర వ్యవస్థ‌లో సమాచార మార్పిడి, చర్చల దిశగా ఉపయోగం ఉండాలనీ, ఇందుకోసం భాస్కర్‌ను ఏకీకృత పరిష్కార వేదికగా మార్చాలని కోరారు. మెరుగైన ఫీచర్లు, టెక్నాలజీతో కూడిన భాస్కర్ 2.0 త్వరలో విడుదల కావాలని ఆయన ఆకాంక్షించారు.

 

డీపీఐఐటీ కార్యదర్శి అమర్‌దీప్ సింగ్ భాటియా మాట్లాడుతూ.. " మొత్తం అంకుర వ్యవస్థ సమష్టి కృషికి పిలుపునిచ్చే ఈ ప్రత్యేకమైన వెబ్ సైటును ప్రారభించుకోవటం మెచ్చుకోదగిన ముందడుగుగా చెప్పుకోవచ్చు. ప్రపంచంలో అన్ని ప్రాంతాల్లో ఉన్న అంకుర వ్యవస్థల కంటే మన అంకుర వ్యవస్థ జయకేతనాన్ని ఎగురవేస్తుందని వ్యాఖ్యానించారు. ఇన్నోవేషన్‌కు భారత్ స్టార్టప్ నాలెడ్జ్ యాక్సెస్ రిజిస్ట్రీ ఉత్ప్రేరకంగా పనిచేస్తుంది, ముఖ్యంగా ద్వితీయ, తృతీయ శ్రేణి నగరాల్లోని అంకురాల మధ్య మరింత అనుసంధాన్ని పెంపొందిస్తుంది. ఆవిష్కరణలు సమ్మిళితంగా ఉండేలా, అవకాశాలు అందరికీ అందుబాటులో ఉండేలా చూస్తుంది. ఇది ప్రాంతీయ స్థాయి అంకురాలు ఒకదానికొకటి సహకరించుకునేందుకు, వృద్ధి చెందటానికి అవకాశం కల్పిస్తుంది. తద్వారా దేశ ఆర్థిక పురోగతికి దోహదం చేయడానికి వాటికి వీలు కల్పిస్తుంది” అన్నారు.

భారత వృద్ధికి దోహదపడటంలో అంకురాలు పోషించే కీలక పాత్రను వివరిస్తూ, భాస్కర్ ఈ వృద్ధిని సరైన దిశలో ఎలా వేగవంతం చేస్తుందో- డీపీఐఐటీ జాయింట్ సెక్రటరీ సంజీవ్ క్లుప్తంగా వివరించారు. "వనరులకు సమగ్రంగా వినియోగించుకునేందుకు వీలు కల్పించటం ద్వారా, నిరంతరం మార్పు చెందుతోన్న నేటి మార్కెట్‌ సవాళ్లను తట్టుకొని నిలబడి, అవకాశాలను అందిపుచ్చుకునేలా చేసేందుకు అంకుర వ్యవస్థలో ఉన్న వారికి భాస్కర్ మార్గదర్శకంగా పనిచేస్తుంది. జ్ఞానమే శక్తి అని విశ్వసిస్తున్నామని, భాస్కర్ ద్వారా ప్రతి భారతీయ స్టార్టప్‌కు పరిమాణం, స్థానంతో సంబంధం లేకుండా, వాటి ఎదుగుదలను వేగంగా పెంచే వనరులు అందుబాటులో ఉండేలా చూస్తున్నాం” అని వ్యాఖ్యానించారు.

అంకురాలు,  పెట్టుబడిదారులు, మార్గదర్శకులు, సర్వీస్ ప్రొవైడర్లు, ప్రభుత్వ సంస్థలతో కూడిన భారత అంకుర వ్యవస్థను బలోపేతం చేయడానికి ఉద్దేశించిన భాస్కర్ ‌ప్రారంభోత్సవ కార్యక్రమాన్ని వాణిజ్య, పరిశ్రమల మంత్రిత్వ శాఖకు చెందిన వ్యాపార, అంతర్గర వాణిజ్య ప్రోత్సాహక విభాగం(డీపీఐఐటీ) తన ప్రతిష్ఠాత్మక కార్యక్రమం 'స్టార్టప్ ఇండియా' కింద నిర్వహించింది.

 

నిరంతర సహకారం, విజ్ఞాన వినిమయం, సృజనాత్మకతకు సంబంధించి ఒకే దగ్గర సమాచారం, పరిష్కారం లభించే భాస్కర్ వెబ్ సైటును దేశంలో వేగంగా అభివృద్ధి చెందుతున్న అంకుర వ్యవస్థను ఏకీకృతం, శక్తిమంతం చేసేందుకు రూపొందించారు. ఆగస్టు 2024 నాటికి 1.4 లక్షలకు పైగా డీపీఐఐటీ గుర్తింపు పొందిన అంకురాలతో, భారత్‌ ప్రపంచవ్యాప్తంగా అతిపెద్ద, అత్యంత శక్తిమంతమైన అంకుర వ్యవస్థల్లో ఒకటిగా ఉంది. అయితే, వనరులు, వాటాదారులూ ఎవరికి వారే అన్నట్లుగా అయింది. అందరూ గుర్తించేందుకు వీలుగా, అందుబాటులో ఉండేలా ఇంక్యుబేటర్లు, విధాన నిర్ణేతలు, ఇతర కీలక భాగస్వాములను ఒకే గొడుగు కిందకు తీసుకురావటమే భాస్కర్ లక్ష్యం.
భాస్కర్‌కు సంబంధించిన ప్రతిపాదనలు:

పరిశ్రమతో సంబంధాలు : వివిధ రంగాలు, పరిశ్రమలు, సాంకేతికలు, ప్రాంతాల నుంచి భాగస్వాములను ఏకతాటిపైకి తీసుకురావడం ద్వారా ఈ వెబ్ సైటు అందరికీ అవకాశాలను సృష్టిస్తుంది.

చలనశీల వ్యవస్థ: వ్యక్తిగతీకరించిన డ్యాష్ బోర్డులు, పీర్-టు-పీర్ కనెక్ట్ ఫీచర్ల ద్వారా భావసారూప్యత కలిగిన వ్యక్తులతో సులభంగా కలిసి, వారితో భాగస్వామ్యాలు ఏర్పాటు చేసుకోవచ్చు. తదుపరి అవకాశం ఒక క్లిక్ దూరంలో ఉండేలా భాస్కర్ చూసుకోనుంది. 

మెరుగైన విజిబిలిటీ:  ప్రొఫైల్ కార్డులను ఉపయోగించి మిమ్మల్ని మీరు అంకుర వ్యవస్థ అంతటా కనిపించేలా చేసుకోవచ్చు. 

వ్యక్తిగత గుర్తింపు సంఖ్య: వ్యక్తిగత డ్యాష్ బోర్డ్ కోసం మీ ప్రొఫైల్‌కు లింక్ అయిన మీ భాస్కర్ ఐడీని పొందండి. మీ డిజిటల్ గుర్తింపు వివిధ సేవలను మీరు పొందేందుకు, ఇతరులు మిమ్మల్ని గుర్తించేందుకు ఉపయోగపడుతుంది. 

నిరంతరం అభివృద్ధి చెందుతున్న అంకుర వ్యవస్థ భాగస్వాములును లేదా వాటాదారులను ఒకే గొడుకు కిందకు తీసుకొచ్చే కేంద్రీకృత డిజిటల్ వేదికగా భాస్కర్ పనిచేస్తుంది. రాబోయే కాలంలో ఇది ప్రపంచంలోని అంకుర వ్యవస్థకు సంబంధించి అతిపెద్ద డిజిటల్ సమాచార నిధిగా మారుతుంది.

***