భారత అంకురాల వ్యవస్థను బలోపేతం చేసే లక్ష్యంతో వాణిజ్య, పరిశ్రమల మంత్రిత్వ శాఖ పరిధిలోని- వ్యాపార, అంతర్గత వాణిజ్య ప్రోత్సాహక విభాగం (డీపీఐఐటీ) అద్భుతమైన వెబ్ సైటును ప్రారంభించనున్నది. స్టార్టప్ ఇండియా కార్యక్రమం కింద రూపొందించిన ఈ వెబ్ సైటు పేరు: భారత్ స్టార్టప్ నాలెడ్జ్ యాక్సెస్ రిజిస్ట్రీ (భాస్కర్). అంకురాలు, పెట్టుబడిదారులు, మార్గదర్శకులు (మెంటార్స్), సర్వీస్ ప్రొవైడర్లు, ప్రభుత్వ సంస్థలతో సహా ఔత్సాహిక పారిశ్రామిక వ్యవస్థలోని భాగస్వామ్యాలను ఒకే చోట నిర్వహించేందుకు, క్రమబద్దీకరించేందుకు, సహకారాన్ని పెంపొందించేందుకు భాస్కర్ ను రూపొందించారు.

ఆవిష్కరణలు, వ్యవస్థాపకతలో భారత్‌ను ప్రపంచ నాయకత్వ స్థాయికి తీసుకురావాలన్న ప్రభుత్వ దార్శనికతకు అనుగుణంగా దీనికి రూపకల్పన చేశారు. ఇది అంకుర విప్లవం పట్ల దేశం చూపెడుతున్న నిబద్ధతను మరింత బలపరచనుంది.

కేంద్రీకృత వేదిక ద్వారా ఆవిష్కరణలకు సాధికారత

డీపీఐఐటీ గుర్తింపు పొందిన అంకుర సంస్థలు దేశంలో 1,46,000కు పైగా ఉన్నాయి. ప్రపంచంలోనే ఇంత పెద్ద ఎత్తున అంకుర సంస్థలు కలిగిన దేశంగా భారత్ గుర్తింపు తెచ్చుకుంటున్నది. పారిశ్రామికవేత్తలు, పెట్టుబడిదారులు ఎదుర్కొంటున్న సవాళ్లకు ఒక వేదికగా ఉన్న ఈ భాస్కర్ ‌ద్వారా పరిష్కారాలు లభిస్తాయని భావిస్తున్నారు. కేంద్రీకృత సమాచార నిధి అయిన భాస్కర్ నుంచి విస్తృత వనరులు, సాధనాలు, విజ్ఞానాన్నీ అంతరాయం లేకుండా పొందవచ్చు. ఆలోచనల నుంచి కలల్ని సాకారం చేసుకునే వరకూ ఔత్సాహిక పారిశ్రామికవేత్త ప్రయాణానికి ఉపయోగపడుతుంది.

అంకురాల వ్యవస్థలో పరస్పర సంబంధాలు, సహకారం, వృద్ధికి అనుకూలమైన వాతావరణాన్ని ఏర్పరుస్తుంది. ప్రతి వాటాదారుకీ ప్రత్యేకమైన భాస్కర్ ఐడీలను అందించనున్నారు. దీని ద్వారా ఒకరితోనొకరు బంధాన్ని ఏర్పరుచుకోవడం సులభం కానుంది. కావాల్సిన సమాచారం, పెట్టుబడిదారులు, సాంకేతికత తదితర అంశాల గురించి శోధించటాన్ని ఈ వేదిక మెరుగుపరుస్తుంది. సంబంధిత అవకాశాలు, భాగస్వామ్యాలను సమర్థవంతంగా కనుగొనడానికి ఇది వీలు కల్పిస్తుంది.

భాస్కర్ ముఖ్య విశేషాలు

అంకురాల వ్యవస్థలోని వాటాదారుల కోసం ప్రపంచంలోనే అతిపెద్ద సమాచార నిధిని తయారు చేయటం భాస్కర్ ప్రాథమిక లక్ష్యం. దీన్ని సాధించేందుకు వీలుగా ఈ వేదిక అనేక కీలక అంశాలను కలిగి ఉంది అవి:

పరస్పర కలయికలు, సహకారం: అంకురాలు, పెట్టుబడిదారులు, మార్గదర్శకులు, ఇతర వాటాదారుల మధ్య అంతరాన్ని భాస్కర్ భర్తీ చేస్తుంది. ఇది అన్ని విభాగాల మధ్య అంతరాయం లేని అనుసంధానాన్ని అందిస్తుంది.

వనరులకు కేంద్రీకృతంగా అందించడం: వనరులను ఏకీకృతం చేయడం ద్వారా, అంకుర సంస్థలకు ఈ వేదిక కీలకమైన సాధనాలు (టూల్స్), విజ్ఞానాన్ని(నాలెడ్జ్) తక్షణమే పొందేందుకు వీలు కల్పిస్తుంది. ఇది వేగంగా నిర్ణయాలు తీసుకోవడం, మరింత సమర్థవంతమైన విస్తరణ దిశగా ఆయా అంకురాలకు సాయపడుతుంది.

వ్యక్తిగత గుర్తింపు: ప్రతి వాటాదారుకూ ప్రత్యేకమైన భాస్కర్ ఐడీ ఇస్తారు. వ్యక్తిగత అనుసంధానం, అనుభవాలు ప్రతి ఒక్కరికి అందేలా ఇది చూసుకుంటుంది.

అన్వేషణను మెరుగుపరచటం: కావాల్సిన అంశాలను తెలుసుకోవడానికి సంబంధించి శక్తివంతమైన, అంశాల వారీ విభాగాలు ఇందులో ఉన్నాయి. దీని ద్వారా అవసరమైన వనరులు, సహ భాగస్వాములను సులభంగా కనుక్కోవచ్చు. వేగంగా నిర్ణయాలు తీసుకునేందుకు, వాటిని అమలు చేసేందుకు ఇది వీలు కల్పిస్తుంది.

ప్రపంచ స్థాయి చిహ్నంగా భారత్‌కు మద్దతు: ప్రపంచంలోని ఆవిష్కరణల కేంద్రంగా భారత దేశ ఖ్యాతిని పెంచేందుకు అంకురాలకు, పెట్టుబడిదారులకు ఒకే తరహాలో దేశవిదేశాలనుంచి మరింత సులువుగా సమాచారం అందేలా చూడటం కోసం భాస్కర్ ఒక వాహనంగా పని చేస్తుంది.

భారత అంకుర వ్యవస్థకు సంబంధించి ముందు చూపు

ఆవిష్కరణ, ఔత్సాహిక పారిశ్రామికవేత్తలను తయారు చేయడం, ఉద్యోగ కల్పనలను ప్రోత్సహించడానికి ప్రభుత్వం తీసుకుంటున్న చర్యల్లో భాస్కర్ వేదిక ఒక ముఖ్యమైన ముందడుగు. ఇది అంకురాలు, పెట్టుబడిదారులు, సేవల్ని అందించేవారు, ప్రభుత్వ సంస్థలు కలిసి పనిచేయడానికీ, ఆలోచనలను పరస్పరం పంచుకునేందుకూ, వృద్ధిని వేగవంతం చేయడానికీ ఒక కేంద్రీకృత వేదికగా పనిచేస్తుంది.

జ్ఞానం, వనరులను సులభంగా పొందడానికి వీలు కల్పించడం ద్వారా భాస్కర్ భారత్‌ అంకుర వ్యవస్థ పూర్తి సామర్థ్యాన్ని వాడుకోవటంలో సహాయపడుతుంది. ఔత్సాహిక పారిశ్రామికవేత్తలను తయారు చేయడంలో భారత్‌ ప్రపంచ కరదీపికగా ఆవిర్భవించడానికి దోహదపడుతుంది.

మరింత తట్టుకునే సామర్థ్యం గల సమ్మిళిత, ఆవిష్కరణ ఆధారిత ఆర్థిక వ్యవస్థను సృష్టించడంలో, సంపన్న భవిష్యత్తుకు పునాది వేయడంలో ఈ భాస్కర్ వెబ్ సైటు కీలకం కానుంది.

అంకుర వ్యవస్థలోని అందరూ భాస్కర్‌లో భాగస్వాములు కావాలని ప్రభుత్వం ఆహ్వానిస్తోంది. ప్రస్తుత భారత అంకుర వ్యవస్థను పునర్నిర్వచించడానికి, వ్యవస్థాపకతకు సంబంధించి మరింత అనుసంధానంతో కూడిన సమర్థవంతమైన, సహకార వాతావరణాన్ని సృష్టించడానికి భాస్కర్ తయారైంది. ఈ వెబ్ సైటును రేపు ప్రారంభించనున్నారు. ఇది భారత ఆవిష్కరణల వ్యవస్థలో గేమ్ ఛేంజర్‌గా మారనుంది.

భారత అంకురాల భవిష్యత్తును తీర్చిదిద్దనున్న భాస్కర్

భారత అంకుర వ్యవస్థ అభివృద్ధి చెందుతోంది. ప్రపంచంలో వ్యవస్థాపకతకు సంబంధించి దేశ స్థాయిని పెంచడంలో భాస్కర్ కీలక పాత్ర పోషిస్తారు. సహకార సంస్కృతిని పెంపొందించడం ద్వారా, ఈ ప్లాట్‌ఫామ్‌ సవాళ్లను అధిగమించడానికి, భవిష్యత్ అవసరాలను తీర్చే సృజనాత్మక పరిష్కారాలను అంకురాలు తయారు చేయటానికి సహాయపడుతుంది.

భాస్కర్ ను ఆవిష్కరించటంతో ప్రపంచ స్థాయిలో ఆవిష్కరణలు, వ్యవస్థాపకత, ఆర్థిక వృద్ధిలో దేశాన్ని అగ్రగామిగా తీర్చిదిద్దేందుకు ప్రభుత్వం నిబద్ధతతో పని చేస్తోంది.

***