ঙসি প্রধান মন্ত্রী শ্রী নরেন্দ্র মোদীনা লুচিংদুনা ৭, লোক কলয়ান মার্গতা লৈবা মহাক্কী য়ুমদা অনুসন্ধান নেসনেল রিছার্স ফাউন্দেসনগী অহানবা গভর্নিং বোদি মীফম পাংথোকখ্রে। মীফম অদুদা ভারতকী সাইন্স অমসুং তেক্নোলোজিগী ফিবম অমসুং রিছার্স অমসুং দিবলপমেন্তগী থৌরমশিং অমুক হন্না শেমগৎনবগী মতাংদা মীৎয়েং থমখি।  

মীফম অদুদা প্রধান মন্ত্রীনা হায়খি অনুসন্ধান নেসনেল রিছার্স ফাউন্দেসনগী অহানবা গভর্নিং বোদি মীফম পাংথোক্তুনা ঙসি অনৌবা অমা হৌরে। থিজিনবগী থবক্তা অপনবা পীরিবশিং মশক খঙদোক্কদবনি অমসুং লৌথোক্কদবনি। অচৌবা পান্দমশিং থমগদবনি, মখোয় ফংনবা মীৎয়েং চঙগদবনি অমসুং অনৌবা থিজিনবগী থবকশিং পাংথোক্কদবনি। হৌজিক থেংনরিবা অৱাবশিং কোকহন্নবা অনৌবা পাম্বৈশিং পুথোক্নবা থিজিনবা মীৎয়েং থমগদবনি। খুদোংচাদবশিং অদু মালেমগী ওইবা য়াই অদুবু মখোয়গী পাম্বৈ অদু ভারতকী দরকার ওইবশিংগী মতুংইন্না মফম অসিগা চুনবা ওইগদবনি।

ইন্সতিতুসনশিং ফগৎহনবা অমসুং মগুন হেনগৎহনবগী তঙাইফদবা প্রধান মন্ত্রীনা খন্নখি। মখোয়না খঙলিবা হিরমশিংদা য়ুম্ফম ওইদুনা অখঙ-অহৈশিংগী মমিং পরেং অমা শেম্নবা প্রধান মন্ত্রীনা পাউতাক পীখ্রে। রিছার্স অমসুং দিবলপমেন্তগা মরী লৈনবা ই-পাউশিং লাইনা খোঙ্গুল লীনবা দাসবোর্দ অমা শেমগৎনবা প্রধান মন্ত্রীনা পাউতাক পীখ্রে।

প্রধান মন্ত্রীনা হায়খি রিছার্স অমসুং ইন্নোবেসনগী রিছোর্সশিং শীজিন্নবগী সাইন্তিফিক মোনিতরিং দরকার ওইরে। মসি অশা য়াম্না লৈবা অহৌবা অমনি। মখোয়গী থবকশিংগীদমক অৱাৎপা অমতা লৈতে হায়বা লৈবাক অসিগী বিজ্ঞানগী লমদা থবক তৌরিবা মীওইশিংনা থাজগদবনি। অতল তিনকরিং লেবশিংগী অফবা কান্নবশিং খন্নবদা প্রধান মন্ত্রীনা হায়খি হায়রিবা লেবশিং অসিগী মকোক মথং খন্দোকপগী থবক পাংথোক্কদবনি। মহৌশাগী অকোয়বগী ফিবমদা অহোংবা লাকপা, ইলেক্ত্রিক গারিশিংগী বেত্তরিগী মচাকশিং, লেবশিংদা দাইমন্দশিং পুথোকপা অমসুং অতৈ কয়াগী অনৌবা পাম্বৈশিং পুথোক্নবা তোঙান-তোঙানবা হিরমশিংদা থিজিনগদবনি।

মীফম মনুংদা, গভর্নিং বোদিনা থিজিনবগী থবকশিং অঙনবা তাঙ্কক্তা লৈরিবা য়ুনিভর্সিতিশিংগা মকোক থোংবা ইন্সতিতুসনশিংগা থবক তৌমিন্ননবা হব অমসুং স্পোক মওংদা থৌরম অমা হৌদোক্নবা ৱারেপ লৌখ্রে।

ভারতকী মরুওইবা হিরমশিংদা গ্লোভেল পোজিসনগী থবক, লৈবাক্কী মরুওইবা থবকশিংদা রিছার্স অমসুং দিবলপমেন্ত পাংথোকপা, পুন্না চাউখৎমিন্নবা পুক্নিং থৌগৎপা, কেপাসিতি বিল্দিং, সাইন্তিফিক ওইবা থবকশিং হেনগৎহনবা অমসুং ইন্নোবেসনগী থবকশিং ফগৎহনবা, উদ্যোগকা পুন্না চৎশিন্নবা থিজিনবগী থবকশিংগী খুৎথাংদা একাদেমি রিছার্স অমসুং ইন্দস্ত্রিএল এপ্লিকেসনশিংগী মরক্তা অহোবা লৈরিবা অসি মেনখৎনবা অনুসন্ধান নেসনেল রিছার্স ফাউন্দেসন্না পায়খৎকদবা মরুওইবা লাল্লোংশিংশু গভর্নিং বোদিনা খন্নখ্রে।

খনগৎলবা মরুওইবা হিরমশিং হায়বদি ইলেক্ত্রিক গারি, এদভান্স মেতরিয়েলশিং, সোলার সেলশিং, স্মার্দ ইনফ্রাস্ত্রকচর, হেল্থ অমসুং মেদিকেল তেক্নোলোজি, তুংকোইনা চৎনবা য়াগদবা লৌউ-শিংউ অমসুং ফোতোনিক্সতা অনুসন্ধান নেসনেল রিছার্স ফাউন্দেসন্না মিসনগী মওংদা পাম্বৈদা য়ুম্ফম ওইবা থিজিন্নবা থৌরমশিং হৌদোক্কনি। হায়রিবা থবকশিং অসিনা অত্মানির্ভর ভারত্তা চঙশিল্লিবা ঐখোয়গী খোঙচত্তা মাইপাক্না মতেং পাংগনি হায়না গভর্নিং বোদিনা ফোঙদোকখি।

উদ্যোগ থৱায় য়াওনা শরুক য়াদুনা ত্রান্সলেসন্নেল রিছার্সকী মরুওইবা পল্লদুনা, লৌশিং হেনগৎহন্নবা ফন্দামেন্তেল রিছার্সকী থবক পুক্নিং থৌগৎনবশু গভর্নিং বোদিনা ফোঙদোকখ্রে। হুমেনিতিশিং অমসুং সোসিএল সাইন্সশিংগী মরক্তা হিরম অমনা অমদা থিজিনবগী থবক শৌগৎনবা সেন্তরস ওফ এক্সলেন্সশিং লিংখৎনবা বোদি অসিনা ৱারেপ লৌখ্রে। থিজিনবগী থবক লাইহন্নবা থিজিল্লোয়শিংদা মনিংতম্বা অমসুং অরোন-অথুপ লৈতবা ফন্দ থাদবগী থবকশিং ফংহনবগী দরকার ওইবা অদুশু মীফম অদুদা য়ানখ্রে।

বিকিসিত ভারত ২০৪৭গী পান্দমশিং ফংনবা অমসুং মালেম শীনবা থুংবগী রিছার্স অমসুং দিবলপমেন্ত এজেন্সিশিংনা পায়খৎলিবা মালেমগী খ্বাইদগী ফবা থবকশিং ইন্নবা ঙম্নবা অনুসন্ধান নেসনেল রিছার্স ফাউন্দেসনগী লাল্লোংশিংশু অদুনা মান্নগদবনি হায়না গভর্নিং বোদিনা পাউতাক পীখ্রে।

মীফম অদুদা গভর্নিং বোদিগী ভাইস-প্রসিদেন্ত ওইনা য়ুনিয়ন ইজুকেসন মিনিস্তর শ্রী ধর্মেন্দ্র প্রধান, মেম্বর সেক্রেতরি ওইনা ভারত সরকারগী প্রিন্সিপাল সাইন্তিফিক এদভাইজর, নিতি অয়োগ মেম্বর(সাইন্স) অমসুং সেক্রেতরি, সাইন্স অমসুং তেক্নোলোজি দিপার্তমেন্ত, বাইওতেক্নোলোজি দিপার্তমেন্ত, সাইন্তিফিক অমসুং ইন্দস্ত্রিএল রিছার্স দিপার্তমেন্ত অমসুং হায়র ইজুকেসন দিপার্তমেন্তগী এক্স-ওফিসিও মেম্বরশিং শরুক য়াখি। শরুক য়াখিবা অতোপ্পা শক্নাইরবশিংগী মনুংদা প্রোফেসার ভারগাবা (প্রিন্সতোন য়ুনিভর্সিতি, য়ু.এস.এ), দোক্তর রোমেস তি ৱাধৱানি(সিমফোনি তেক্নোলোজি গ্রুপ, য়ু.এস.এ), প্রো: সুব্রা সুরেস(ব্রাউন য়ুনিভর্সিতি, য়ু.এস.এ), দোক্তর রগুবেন্দ্র তনৱার(ইন্দিয়ান কাউন্সিল ওফ হিস্তোরিকেল রিছার্স), প্রো: জয়রাম এন. চেঙ্গালুর(তাতা ইন্সতিতুৎ ওফ ফন্দামেন্তেল রিছার্স) অমসুং প্রো: জি রঙ্গারাজন(ইন্দিয়ান ইন্সতিতুৎ ওফ সাইন্স) য়াওখি।

অনুসন্ধান নেসনেল রিছার্স ফাউন্দেসনগী মরমদা

রিছার্স অমসুং দিবলপমেন্ত য়োকখৎনবা অমসুং ভারতকী য়ুনিভর্সিতিশিং, কলেজশিং, রিছার্স ইন্সতিতুসনশিং অমসুং আর অমসুং দি লেবোরেতোরিশিংদা রিছার্স অমসুং ইন্নোবেসনগী চৎনবী অমা য়োকখৎনবা অনুসন্ধান নেসনেল রিছার্স ফাউন্দেসন লিংখৎখিবনি। নেসনেল ইজুকেসন পোলিসিগী ৱারেপশিং মতুংইন্না লৈবাক অসিদা সাইন্তিফিক রিছার্সকী অৱাংবা থাক্কী লাল্লোংগী মাইকৈ তাক্নবা খ্বাইদগী ৱাংবা বোদি অমা ওইনা অনুসন্ধান নেসনেল রিছার্স ফাউন্দেসন্না থবক তৌরি। অনুসন্ধান নেসনেল রিছার্স ফাউন্দেসন্না উদ্যোগ, মহৈলোয়শঙ, সরকারগী বিভাগশিং অমসুং রিছার্স ইন্সতিতুসনশিংগা লোয়ননা পুন্না থবক তৌমিন্নরি।

****