উপ-রাস্ত্রপতিগী লোইশঙ
স্বর্ন ভারত ত্রস্ত ভেঙ্কতচলমগী ২৩শুবা এনিভর্সরী সেলেব্রেসনদা পীখিবা উপ-রাস্ত্রপতীগী ৱারোল
Posted On:
17 AUG 2024 2:12PM by PIB Imphal
খ্বায়দগী ইকায়খুম্নরবা, ঐনা ৱাফম কয়ামরুম তমজহৌবা মীশক অমা ওইরিবা হান্নগী উপ-রাস্ত্রপতী শ্রী এম. ভেঙ্কাইয়াা নাইদু জী।
মরূপশিং, মহাক্কী ফীদম অমদি ৱাখল্লোন তমজবদি অরায়বনি, অদুবু মহাক্কী মফমদা লেপ্পদি অরায়বা নত্তে। মীওইবা খুন্নাইগী শরুক তরুক থোকপগী অমগী য়ুম ওইরিবা ভারতকী মাঙজিল থাবা মীওইশিংগী মরক্তা অমা ওইরিবা, লৈবাক্কী য়াইফনবগীদমক কত্থোক্লবা পুন্সি অমা ওইনা মহাক্কী ফীদম্না খোঙফম হোংদনা লেপ্লি, অমসুং মহাক্কী থম্মোয়না ভারতকী খুঙ্গংগী লমদা লৈরি। ঙসি ঐনা মফমসিদা খোঙ হেক কানশিল্লকপদা উরিবা অসি থৌনা হাপ্পা পুক্নিং থৌগৎপা অনিমক্কী মশক ওইনা ঐগী পুক্নিংদা মতম চুপ্পদা লৈহৌরগনি। সিভিলাইজেসন্না মথৌ তৌবা, খুৎশম্ননা চৎমিন্নবা মথৌ তাবশিংগীদমক পুক্নিং ৱাবিবা। হায়রিবসি অদোমগী ৱাখলদা লাম্বা ফংবিবরা? দ্রোপআউত অমা খুৎশম্নবিদুনা, স্কিল অমা তম্বিরি। মীওই অসিনা চহি ২৩গী মমাঙদা ৱাখল্লোন অমা পোকখিবা অঙকপা ওইদে, অমসুং ৱাখল্লোন অদুদি স্বর্ন ভারত ত্রস্তনি।
অদুগুম্বা ভারতকী মঙলান অদু ঙসি ঐখোয় পুম্নমক্কী মীৎমাঙদা মঙফাওনররে। ভেঙ্কাইয়াহ নাইদু জী ইকায়খুম্নবদা মতিক চারবা মীওইনি। ঐনা লৈবাকসিগী মীওই অমা ওইনা অমদি লৈবাকসিগী উপ-রাস্ত্রপতী অমা ওইনা মহাক্কী মফমদা তৌবিমল খঙবা ফোঙদোকচনবা ৱাহৈ অমত্তা লৈতে।
লনাই ওইবা মীৎকুপ অমা ঐ ময়ামগী মফমদা থমজগে। মহাক্না লমজিংবিখিবা মীওই কয়াগী মরমদা ঐ খঙজদে, অদুবু লোক সভাগী স্পীকর অমসুং ঐখোয় অনিমক চহি ২৫গী মমাঙদা থেংনখি। ঐখোয় অনি তান চাননা মহাক্কী ময়ুমদা উনখি। ঐনা হৌজিকসু লৌশিং, লমজিংগী ৱাহৈশিং, অমসুং ঐখোয়না করি তৌগদগে: মদুদি লৈবাক্কীদমক ঐখোয়গী থৌদাং য়াগদবনি হায়খিবা ময়েক শেংনা নীংশিংলি।
ঐনা মফমসিদা লাকপদা করি উবা ফংগদগে হায়বা ঐ করিমত্তা খঙখিদে। থাজনবগীমক মীৎনা উবা তাই। সর, অদোম্না মরম ওইরগা, মফমসিদা লেঙশিনখিবা মীওই কাঙলুপশিংগী মরক্তা ঐসু অমা ওইজনবগী খুদোংচাবা ফংজরি, হান্নগী প্রধান মন্ত্রীদগী হৌরগা হৌজিক্কী প্রধান মন্ত্রী, রাস্ত্রপতী, রাজ্যপালশিং – কনাবু ৱাৎলিবগে? মিং অম হাপচিল্লে, মদুদি জগদীপ ধনকর, অৱা-অনা কয়া থেংনরক্লবা ঝুনঝুনুগী খুঙ্গং অমদগী মীওইই অমা। ঐবু খুৎশম্নবিনবা মীওই মরাং কায়না লৈখিদে। অদোম্না অদুগুম্বা মীওইশিংবু খুৎশম্নবিদুনা পুবিবা, মখোয়গী পুন্সিদা অহোংবা পুরকখিবা, মখোয়গী মায়থোঙদা মোমোন নোকহনবিখিবা ঐ থেংনরে। ঐনা মসিগীদমক নুংঙাইবা ফোঙদোকচরি।
স্বর্ন ভারত ত্রস্তনা, মাগী ২৩শুবা চহিসিদা, দেকেদ কয়া লৈরক্লবগুম ইথিল অমা ফাওহল্লি। অথুবা মতমদা, ঐনা লুপা ফুদোংবা চহিগী থৌরমগীদমক মীৎয়েঙ থমজরি, অমসুং মদুনা ভেঙ্কাইয়াহ নাইদু জী অমসুং স্বর্ন ভারত ত্রস্তকী চপ চাবা থাক ওইগনি, অমসুং খোঙচৎ অদু হেন্না মতিং লৈবা হেনগৎলক্কনি হায়না ঐনা থাজৈ।
চহি ২৩গী মমাঙদা স্বর ভারতকী মঙলান মঙখিবা, হায়রিবা মঙলান অদু ঐখোয়গী ইমাঙদা মঙফাওনররে অমসুং ২০৪৭গী খোঙচৎকী ঐখোয়গী মরাথোন খোঙচৎ অসিদা মফমসিগী খোঙহৌ অসিসু য়াম্না মরুওই। মফমসিগী খোঙহৌ মশিংগী ৱাফম নত্তে, ফীদমদুগী ৱাফম্নি।
ঐনা লৈবাক মীয়াম খুদিংমক্কী মফমদা মফমসিদা করি তৌরিবগে হায়বা য়েংবিদুনা, মদুবু মতৌ তম্নবা অমসুং মসিনা ফিদম ওইহনবিনবা ৱাফম থমজরি।
ৱাখল্লোন অসিগী মরুমদা লৈরিবা দীপা ভেঙ্কত, মহাক্কা কয়ারক হন্না উনজখ্রে। ঐনা মহাক্কা অহান্বা ওইনা উনবা মতমদা, ঐ উপ-রাস্ত্রপতীগী শঙ্গায়দা ৱেস্ত বেঙ্গল স্তেতকী রাজ্যপাল ওইনা লাকখিবনি। মতমদুদা ৱা খন্নখিবদা, মহাক অসি করিগুম্বা অফবা, খুন্নাইগী কান্নবা হীরম অমদা মনুং হঞ্জিন্না শরুক য়াবা মীওই অমা ওইরমগনি হায়বা ঐ খঙবা ঙমখি। কয়াদা য়াওল পুরক্কদবা থবক অমা কয়াদা পুক্নিং লুপ্না তৌরিবনো হায়বদুদি ঐ করিসু খঙবদি ঙমখিদে। তোপ তোপ্পা মশক অমনি, মসিনা মীয়ামগী থৌগলদা ঐখোয়গী খুন্নাইগী খোঙফম উৎলি। মহাক্কী মফমদা, মহাক্কী কাঙবু পুম্বগী মফমদা নুংঙাইবা ফোঙদোকচরি, অমসুং মহাকপু তাইবঙ মপুনা থৌজানবিবা ওইসনু।
ভারত মচা খুদিংমক্না শেন্মিৎলোনগী লৈবাক নিংবদা থাজবা থমগদবনি, শেন্মিৎলোনগী লৈবাক নিংবা হায়বসি স্বদেশীগী মায়ওন অমনি; মসি ভোকেল ফোর লোকেলগী মমি অমনি। করিগুম্বা ঐখোয়না শেন্মিৎলোনগী লমদা লৈবাক নিংবগী ইহুলদা থাজবা থম্লবদি, ঐখোয়না খুদক্তা মহৈ ফংবা ঙমগনি হায়বদু খন্থবিয়ু।
ঐখোয়না পুশিল্লক্ত্রসু য়াবা পোৎলমশিং মপান্দগী পুশিল্লক্লি, ঐখোয়না কার্পেত, ফীরোল, কেন্দল, তেলঙ্গা, অমসুং শান্নপোৎনচিংবা পোৎলমশিং মপান্দগী পুশিল্লক্লি। থৌওং অসিদা ঐখোয়গী ফোরেন এক্সচেঞ্জ মপান্দা থাদোক্লি। লৈবাকসিদা শাজবা য়াবা পোৎলমশিং মপান্দগী পুশিল্লক্তুনা শীজিন্নবা মতমদা ঐখোয়না ঐখোয়গী শিন্মীশিংগী থবক মুন্বিরিবনি।
ঐখোয়না ঐখোয়গী ওন্ত্রপ্রিন্যুরশিংগী লম্বীদা খুরৌ থাংলিবনি মরমদি হায়রিবা পোৎলমশিং অদু ঐখোয়গী ওন্ত্রপ্রিন্যুরশিংনা, ঐখোয়গী শিন্মীশিংনা পুথোকচবা য়াবা ঙাক্তনি। মরম অসিনা ঐনা ময়ামদা থমজনিংবদি, পুশিল্লক্ত্রবসু য়াবা পোৎলমশিংগীদমক ফোরেন এক্সচেঞ্জ মপান্দা থাদোকখিবা লেপ্পিয়ু, হীরমসিদা ফিরেপ অমা লৌবিয়ু। কঞ্জ্যুমরশিংনা লেপচগদবা ৱাফম ওইরবসু, ফম্পাকথকসিদগী ঐনা ইন্দস্ত্রী, ত্রেদ, অমসুং কম্মর্সকী মফমদা ৱাফম অমা থমজরি: মখোয়না হীরমসিদা ফিরেপ অমা লৌবা তাই। মদুনা ঐখোয়গী মীওইশিংদা থবক পীগদৌরিবনি অমসুং ওন্ত্রপ্রিন্যুরসিপ মকা ফলহনগদৌরিবনি।
মরূপশিং, অতোপ্পা অরুবা ৱাফম অমনা মহৌশাগী লনশিং অসিনি। ঐখোয়না মওং চুম্না শীজিন্নবা তাই। ঐখোয়না পেত্রোলবু ঐখোয়গী ফুরিৎখাউগী মপাঙ্গল, ঐখোয়গী শেন্মিৎলোনগী মপাঙ্গল য়েংলগা শীজিন্নদবা তাই, ঐখোয়গী মথৌ তাবগী মতুং ইন্না শীজিন্নবা তাই। মওং অমা হেক্তদা ফংলিবা মহৌশাগী লন পুম্নমক হৈ-শিংনা শীজিন্নবা মথৌ তাই।
করিগুম্বা শেলগী পাঙ্গলনা মসিদা ফিরেপ লৌরবদি, ঐখোয়না অপন্বা লৈতনা শেল চাদিং তৌগনি, অদু ওইরবদি ঐখোয়না ঐখোয়গী তুংগী মীরোলবু অৱাফমদা লংশিল্লমগদৌরিবনি। শেল খরা কান্ননবগীদমক লৈবাক্কী শেন্মিৎলোনবু মওং অমা নৎত্রগা অমদা শোকহনবা হায়বসি ৱাখল ৱাৎপগী মতৌনি।
ঐখোয়দা ৱাখল্লোন অমা শেমগৎপা তাই, ঐখোয়না মতম পুম্বদা লৈবাক্না মাঙদা থমগদবনি, ঐখোয়না লৈবাকপু রাজনিতীগী মথক্তা থমগদবনি, ইশাগী কান্নবগী মথক্তা থমগদবনি, অমসুং শেল-থুমগী কান্নবগী মথক্তা থমগদবনি। মসিমক পুরক্কনি হায়বদা ঐনা চিংনবা করিসু লৈতে।
ঐখোয়গী লৈবাক অসি মহৌশাগী লন্না থৌজানবিবা লৈবাক্নি, অদুবু ঐখোয়না রো মেতরিএল মপান্দা থাদোকপা উবদা থম্মোয় শোকই। হিথাংফমশিংদা য়েংবিয়ু – ঐখোয়গী আইরন ওরশিং মপান্দা থাদোক্লি, ঐখোয়না মদুদা ভেল্যু হাপচিল্লুদে। থৌওং অসিদা, ঐখোয়না থবক পীবগী মতিংবু য়ৈথৎলি। মীওই খরনা থুনা শেল তান্বখক্তমক খল্লি, লৈবাক অমা ওইনা মদুদা ভেল্যু হাপচিল্লুদে, মদু ঐখোয়না তৌরোইদবনি। অসিগুম্বা হীরম পুম্নমকসিদা পুক্নিং নীংথিনা চঙলক্কনি হায়না ঐনা থাজৈ।
ঐনা ৱাফম অসি অহান্বা ওইনা পুখৎলকপা নত্তে। ইকায়খুম্নরবা ভেঙ্কাইয়াহ নাইদুনা মরক মরক্তা অচম্বা মওংদা, অকন্বা ৱাহৈদা, হায়রিবা ৱাফমশিং অসি পার্লিয়ামেন্ততা হায়খ্রে, মীয়াম তিন্বা ফম্পাকশিংদসু থমখ্রে। ঐনা ৱাফম অসি মফমসিদা হায়রিবগী মরমদি ঐনা মফম অসিদা উরিবা, অদোম্না হায়বিরিবশিং চেদা তাবা মমি নত্তে, তশেংনা থোক্লিবা ৱাফমশিংনি।
মহাক্না করিগুমবা মতমদা ৱাফম খরা হায়বা ঐ তাখি অদুবু মফমসিদা লাকপা মতমদদি, মহাক্না হায়খিবদু করিনো হায়বা ঐ খঙলক্লে। পুম্নমক অদু মফমসিদা তশেংবা ৱাফমশিং ওইরম্লে। মফমসিদা অহোংবা পুরকপগী হৌরকফম ওইহন্বা য়াই। মসিনা লৈবাকসিদা অচৌবা অহোংবা অমা পুরকপা য়াই। ঐঙোন্দা চিংনবা লৈতে – ঐ ত্রস্ত অসিগী মেম্বর অমা ওইদবদি য়াই, অদুবু ঐনা মসিগী খোঙমীনি। ঐনা মসিগী খোঙমী ওইরিবনি মরমদি ত্রস্ত অসিনা ভারত সংবিধানগী প্রিএম্বলবু থমক ওইনা পাঙথোক্লি।
ঙসিগী নুমিৎ অসিদা তশেংনা তৌদুনা উৎনবগী – তৌদুনা উৎলিবশিং অদুনা মীচম মীয়ামগী পুন্সিদা অওনবা পুরক্লি হায়বা উৎপা মরু ওই। মপুন্সিদা থাজবা মাঙখ্রবা মীওইশিংদুগী পুন্সিদা অহোংবা পুরকপা মরু ওই।
ঐনা ত্রস্তকী মফমদা চাউনা মায় পাকপা ওইবিয়ু হায়না য়াইফরোল পীজরি। ঐনা ত্রস্ত অসি অঙকপা ফংনা চাওখৎপা ওইসনু হায়না য়াইফরোল পীজরি। ভারতনা বিক্সিত ভারতকী শক্লোন্দা নীংতম্বগী চহি চাম্মশুবা কুমওন থৌরম পাঙথোকপা মতমদুগী চহি ২গী তুংদা ত্রস্ত অসিসু মাগী সনা ফুদোংবা কুমওন থৌরম পাঙথোক্কনি হায়বা ঐ খঙই। ঐখোয় খরদি মতমদুদা লৈররোই, অদুবু মসিনা লৈবাকসিদা খ্বায়দগী অথোইবা ওইহৌগনি। ৱাফমসিদা ঐঙোন্দা চিংনবা অমত্তা লৈতে।
ঐগী ৱাফম রিগ বেদদগী লৌশিং পুক্কৈগী পুক্নিং থৌগৎনিংঙাই ওইরবা ৱাহৈ খরগা লোয়ননা লোইশিঞ্জগে: সঙ্গচ্ছধ্বন সম্বদধ্বন সম ৱো – ঐখোয় পুন্না চঙশিনমিন্নসি, ঐখোয় খোঞ্জেল অমত্তা ওইনা লাউমিন্নসি অমসুং ঐনা মখা হাপচিঞ্জরি ঐখোয় লৈবাক্কীদমক ৱা ঙাংমিন্নসি, ঐখোয় লৈবাকপু পুম্নমক্কী মথক্তা মাঙ থানা থমসি।
লৈবাকসিদা মীওই খরদি, মরম ইচা চাদনা, মখোয়গী রাজনিতীগী কান্নববু লৈবাক্কী য়াইফবগী মথক্তা থাঙ্গত্তুনা থম্লি। মখোয়গী লৌশিং হেনগৎলকপা ওইসনু; মকা ফন্না শাৎকায়নবগীদমক মীৎকুপ খুদিং মখোঙ শোম্বিবা মথৌ তারিবা নীংতম্বা অসি ফংনবগীদমক থৱায় কৎখিবা মীওইশিংদুদগী তমশিন্বা ঙম্বা ওইসনু হায়না ঐখোয় থাজবা থমসি অমসুং থৌনিজসি।
হন্না হন্না থাগৎচরি, পুম্নমকপু খুরুমজরি, পুম্নমকপু ইকোক নোঞ্জরি।
****
(Release ID: 2046326)
Visitor Counter : 4