ঙসি নিউ দিল্লিদা সেন্ত্রেল ৱাতর কম্মিসন(সি দব্লিউ সি) না পুথোকপা ‘ফ্লদৱাতচ ইন্দিয়া’ মোবাইল এপ্প ভর্সন ২.০ জল শক্তিগী য়ুনিয়ন মিনিস্তর শ্রী সি.আর পতিলনা হৌদোকখ্রে। সেন্ত্রেল ৱাতর কম্মিসন্না লৈবাক অসিদা ঈশিং ইচাউগা মরি লৈনবা ই-পাউ ফংহন্নবা অমসুং মীয়ামদা খুদক্তা নুমিৎ ৭ নি ফাওবগী মাংজৌননা ইচাউগী মতাংদা লাউথোক্নবা ওগস্ত ৭, ২০২৩ দা মোবাইল এপ্পকী অহানবা ভর্সন হৌদোকখি।

অহানবা ভর্সন্দা ২০০ লেভেল ফোরকাস্ত স্তেসনশিংদা মাংজৌননা ঈশিং ইচাউগী মরমদা ই-পাউ পীখি। ভর্সন ২.০গী এপ্প অসিদা হৌজিক অহেনবা ঈশিং ইচাউ য়েংশিন্নবা লৈরিবা স্তেসন ৩৯২গী ই-পাউ পীরে অমসুং হৌজিক অপুনবা স্তেসন মশিং ৫৯২ য়ৌরে অমসুং লৈবাক শীনবা থুংনা এপ্প শীজিন্নরিবা মীওইশিংদা ইচাউগী অকুপ্পা ই-পাউ ফংহল্লে। মখা তানা, ভর্সন অসিনা লৈবাক অসিদা লৈরিবা অচৌবা রিজার্বর ১৫০গী ঈশিংগী ফিবম খঙহন্দুনা রিজার্বরশিংগী মনিংদা লৈরিবা মফমশিংদা ওইরকপা য়াবা ইচাউগী ফিবমশিং হেন্না খঙহনবদা মতেং পাংলে।

সেন্ত্রেল ৱাতর কম্মিসন্না শেম্বা ‘ফ্লদৱাতচ ইন্দিয়া’ অসিদা সেতেল্লাইত দেতা নৈনবা, মেথেমেতিকেল মোদেল্লিং অমসুং মতম চানা ঈশিং ইচাউগী মরমদা মাংজৌননা লাউথোক্নবা মোনিতর তৌবা য়াওনা অৱাংবা থাক্কী তেক্নোলোজিশিং শীজিন্নরি। শীজিন্নবদা নুংঙাইবা এপ্প অসিনা ইংলিস অমসুং হিন্দী লোল অনিদা পাউ পীরি অমসুং পাবা য়াবা অমসুং খোঞ্জেল ওইনা তাবা য়াবা ফোর্মেতশু য়াওরি। এপ্প শীজিন্নরিবা মীওই অমগা খ্বাইদগী নক্নবা স্তেসন্দগী হোম পেজদা ঈশিং ইচাউগী ফিবমগী মতাংদা ই-পাউ পীরি।

‘ফ্লদৱাতচ ইন্দিয়া’ এপ্প অসি এন্দ্রোইদ অমসুং আই.ও.এস দিভাইস অনিমক্তা দাউনলোদ তৌবা য়াগনি অমসুং মালেম শীনবা থুংনা শীজিন্নবা য়াবগী খুদোংচাবা পীরি। এপ্প অসি শেন তিংদনা গুগল প্লে স্তোর (https://play.google.com/store/apps/details?id=in.gov.affcwc) নত্ত্রগা এপ্পল এপ্প স্তোর (https://apps.apple.com/in/app/floodwatch-india/id6478849444) দগী লৌথবা য়াগনি।

থৌরম অদুদা শরুক য়াখিবা অতোপ্পা শক্নাইরবশিংগী মনুংদা সেক্রেতরি(ৱাতর রিছোর্সেস, রিভর দিবলপমেন্ত অমসুং গঙ্গা রিজুবিনেসন), দেবশ্রী মুখর্জি, চিয়ারমেন(সেন্ত্রেল ৱাতর কম্মিসন), শ্রী কুসবিন্দর ভোহরা অমসুং জল শক্তি মিনিস্ত্রি অমসুং সেন্ত্রেল ৱাতর কম্মিসনগী অতোপ্পা সেনিয়ার ওফিসিএলশিং য়াওখি।

***