مرکزی وزیر جناب جی کشن ریڈی کی قیادت میں کانوں کی وزارت، ہندوستان کے معدنیات کی تلاش کے شعبے کو آگے بڑھانے کی سمت میں اہم قدم اٹھا رہی ہے۔ ڈاکٹر امبیڈکر انٹرنیشنل سنٹر، نئی دہلی میں منعقدہ نیشنل منرل ایکسپلوریشن ٹرسٹ (این ایم ای ٹی) کی چھٹی گورننگ باڈی میٹنگ میں مالی سال 2023-24 کے لیے این ایم ای ٹی کی کارکردگی کا مکمل جائزہ لیا گیا۔

میٹنگ کے دوران، مرکزی وزیر جناب ڈاکٹر جتیندر سنگھ اور کوئلہ اور کانوں کے وزیر مملکت جناب ستیش چندر دوبے کی موجودگی میں، 2023-24 کے لیے این ایم ای ٹی کی سالانہ رپورٹ کو سرکاری طور پر جناب جی کشن ریڈی نے جاری کیا۔ رپورٹ میں معدنیات کی تلاش میں این ایم ای ٹی کی نمایاں کامیابیوں پر روشنی ڈالی گئی ہے، جس میں ہندوستان کے وسائل کی صلاحیت کو بڑھانے کے لیے اس کی لگن پر زور دیا گیا ہے۔

اہم پیش رفت:

1. این جی ڈی آر پورٹل کو بڑھانا

وسائل کے زیادہ مؤثر انتظام اور ملک کی ترقی کی طرف ایک اسٹریٹجک اقدام میں، جناب کشن ریڈی نے نیشنل جیو سائنٹیفک ڈیٹا ریپوزٹری (این جی ڈی آر) پورٹل کو وسعت دینا شروع کیا ہے۔ اس پہل کا مقصد جیولوجیکل سروے آف انڈیا، ڈائریکٹوریٹ آف ہائیڈرو کاربن، اور محکمہ جوہری توانائی کے درمیان جغرافیائی اعداد و شمار کے اشتراک کے لیے ہموار تعاون کو آسان بنانا ہے، جو کہ کانوں کی وزارت کی رہنمائی میں کیا جا رہا ہے۔ یہ تعاون ملک کے فائدے کے لیے جیو سائنسی ڈیٹا کے استعمال کو بہتر بنانے کی جانب ایک اہم قدم ہے۔

2. معاوضے کی اسکیمیں

این ایم ای ٹی کی گورننگ باڈی نے ایکسپلوریشن اخراجات کے جزوی معاوضے کے لیے ایک نظرثانی شدہ اسکیم کو منظوری دی ہے، جس سے کمپوزٹ لائسنس (سی ایل) حاملین کے لیے معاوضے کی حد کو 8.00 کروڑ روپے تک بڑھا دیا گیا ہے۔ اس کے علاوہ، جونیئر مائننگ کمپنیوں کی زیادہ سے زیادہ شرکت کی حوصلہ افزائی کے لیے، جناب کشن ریڈی نے ایکسپلوریشن لائسنس (ای ایل) حاملین کے لیے 20.00 کروڑ روپے تک کی پیشکش کرتے ہوئے ایک نئی ری ایمبرسمنٹ اسکیم کی توثیق کی ہے۔ یہ اقدامات پورے ملک میں تلاشی کی سرگرمیوں کو فروغ دینے اور آگے بڑھانے کے لیے ضروری ہیں۔

3. بائیں بازو کی انتہا پسندی سے متاثرہ اضلاع اور اسٹارٹ اپس کے لیے تعاون

این ایم ای ٹی بائیں بازو کی انتہا پسندی سے متاثرہ اضلاع میں فیلڈ ورک کے لیے چارجز کے معیاری شیڈول سے 1.25 گنا زیادہ پیش کش کر کے فعال طور پر معدنیات کی تلاش کو چلا رہا ہے۔ اس کے علاوہ، این ایم ای ٹی کانوں کی وزارت کی ایس اینڈ ٹی پرزم اسکیم کے تحت اسٹارٹ اپس اور ایم ایس ایم ای کو اہم تعاون فراہم کر رہا ہے، جس میں آرٹیفیشل انٹیلی جنس، آٹومیشن اور ڈرون ٹیکنالوجی جیسی جدید ٹیکنالوجیز پر توجہ دی جا رہی ہے۔

4. اہم اور اسٹریٹیجک معدنیات کی تلاش کے لیے مراعات

اس شعبے کو تقویت دینے کی مزید کوششوں میں، جناب کشن ریڈی نے اہم اور اسٹریٹجک معدنیات کی دریافت میں مصروف ایجنسیوں کے لیے 25 فیصد ایکسپلوریشن ترغیب کا اعلان کیا ہے۔ اس ترغیب سے ان اہم علاقوں میں تلاش کی کوششوں کو نمایاں طور پر بڑھانے کی امید ہے، جس سے معدنی وسائل میں ہندوستان کی خود انحصاری میں مدد ملے گی۔

اس کے علاوہ، جناب جی کشن ریڈی نے ریاستوں سے زور دے کر کہا کہ وہ این ایم ای ٹی کی طرز پر معمولی معدنیات کی تلاش کی حوصلہ افزائی کے لیے اسٹیٹ منرل ایکسپلوریشن ٹرسٹ کے قیام پر غور کریں۔ انہوں نے مرکزی حکومت کی طرف سے مکمل تعاون کا یقین دلایا اور مختلف ریاستوں کے ماڈل کا مطالعہ کرنے کا مشورہ دیا جنہوں نے پہلے ہی اسی طرح کا نظام قائم کر رکھا ہے۔

اس موقع پر خطاب کرتے ہوئے کوئلہ اور کانوں کے وزیر مملکت جناب ستیش چندر دوبے نے کہا کہ این ایم ای ٹی نے مختلف ایکسپلوریشن ایجنسیوں کو اکٹھا کرکے ملک میں معدنیات کی تلاش کو اگلے مرحلے تک پہنچایا ہے۔ وزیر نے تمام اسٹیک ہولڈروں سے کہا کہ وہ کان کنی کے شعبے میں ’آتم نربھرتا‘ حاصل کرنے کے لیے مل کر کام کریں۔ وزیر نے این ایم ای ٹی کے مکمل استعمال کو یقینی بنانے کے لیے ریاستی سطح پر سیمینار اور ورکشاپ کے انعقاد کی ضرورت پر بھی زور دیا۔

یہ اقدامات اجتماعی طور پر ہندوستان کے معدنیات کی تلاش کے شعبے کو مضبوط بنانے کے لیے ایک مضبوط حکمت عملی کی نمائندگی کرتے ہیں، پائیدار ترقی اور وسائل کے مؤثر استعمال کو یقینی بناتے ہیں۔ کانوں کی وزارت جدت کو فروغ دینے، ابھرتی ہوئی ٹیکنالوجیز کی حمایت کرنے اور ملک کی ترقی کے لیے ضروری معدنیات کی تلاش کو فعال کرنے کے لیے پرعزم ہے۔

    ***********

ش ح۔ ف ش ع- م ر

U: 9748