بندرگاہوں، جہاز رانی اور آبی گزرگاہوں کے مرکزی وزیر جناب سربانند سونووال نے آج پارلیمنٹ میں میری ٹائم سیکٹر کو متاثر کرنے والے اہم امور پر ایک جامع اپ ڈیٹ فراہم کیا۔ ان کے تفصیلی جوابات کنٹینر کی کمی اور بندرگاہ کی صلاحیت میں توسیع سے متعلق خدشات کو دور کرتے ہیں ، جس میں حکومت کی جاری کوششوں اور اسٹریٹجک اقدامات کو اجاگر کیا گیا ۔

بھارتی برآمد کنندگان کو متاثر کرنے والے کنٹینر کی کمی کے بارے میں پوچھے گئے سوالات کے جواب میں وزیر جناب سونووال نے واضح کیا کہ کنٹینرز کی کوئی شدید کمی نہیں ہے۔ حالیہ چیلنجز بحیرہ احمر کے بحران سے پیدا ہوئے ہیں ، جو 2023 کے آخر میں شروع ہوا اور 2024 کے اوائل تک جاری رہا۔ اس بحران کے نتیجے میں جہازوں کو نہر سوئز سے کیپ آف گڈ ہوپ کی طرف موڑنا پڑا ، جس سے ٹرانزٹ کے اوقات میں 35 سے 40 فیصد اضافہ ہوا۔ نتیجتاً، اس کی وجہ سے بڑی عالمی بندرگاہوں پر تاخیر ہوئی اور چارٹر کرایے کی لاگت میں اضافہ ہوا۔

ان مسائل کو کم کرنے کے لیے، حکومت نے متعدد فعال اقدامات کیے ہیں. شپنگ کمپنیاں فی الحال مارکیٹ کی ضروریات کی بنیاد پر عالمی سطح پر خالی کنٹینرز کو دوبارہ تعینات کر رہی ہیں۔ وزارت تجارت و صنعت اپنے سروس امپروومنٹ گروپ فریم ورک کے تحت فعال طور پر کام کر رہی ہے، شپنگ لائنوں، بندرگاہ کے حکام اور برآمدی درآمد ی ایسوسی ایشنوں کے ساتھ باقاعدگی سے بات چیت کر رہی ہے۔ قابل ذکر اقدامات میں خلل زدہ راستوں پر سفر کرنے والے جہازوں کے لیے حفاظتی قافلوں کو مشورہ دینا اور کنٹینر کارپوریشن آف انڈیا کے ساتھ تعاون کے ذریعہ اندرون ملک کنٹینر ڈپو کے ہجوم کو دور کرنا شامل ہے۔

مزید برآں، ڈائریکٹوریٹ جنرل آف شپنگ طویل مدتی حل کے طور پر بھارتی اداروں کے ذریعہ کنٹینرز کی ملکیت اور آپریشن کو فروغ دے رہا ہے۔ یونیفائیڈ لاجسٹکس انٹرفیس پلیٹ فارم (یو ایل آئی پی) اور لاجسٹک ڈیٹا بینک (ایل ڈی بی) کے ذریعے ٹریکنگ اور ٹریسنگ میکانزم کی ترقی کا مقصد برآمدی کنٹینرز کی تبدیلی کے وقت کو بہتر بنانا ہے، جس سے ان کی دستیابی میں اضافہ ہوگا۔

جناب سونووال نے ملک بھر میں بندرگاہ کی صلاحیتوں کو بڑھانے سے متعلق سوالات کا بھی جواب دیا۔ 2014-15 سے 2023-24 تک بھارت کی تمام 12 بڑی بندرگاہوں میں بندرگاہ کی گنجائش میں توسیع نمایاں رہی ہے۔ مثال کے طور پر، شیاما پرساد مکھرجی پورٹ نے اپنی صلاحیت میں 31.29 فیصد اضافہ کیا، جبکہ پارادیپ پورٹ میں 141.86 فیصد کا نمایاں اضافہ دیکھا گیا۔ قابل ذکر ہے کہ کامراجر پورٹ اور وی او چدمبرنار پورٹ نے بالترتیب 154.05 فیصد اور 150.19 فیصد کی متاثر کن توسیع حاصل کی۔ چنئی، کوچین اور نیو منگلور جیسی دیگر بندرگاہوں میں بھی قابل ذکر اضافہ ہوا ہے۔ گجرات کی دین دیال بندرگاہ نے گذشتہ دہائی کے دوران صلاحیت میں 121.79 فیصد کا قابل ذکر اضافہ کیا ہے، جو اس کی آپریشنل صلاحیت میں نمایاں اضافے کا غماز ہے۔ مجموعی طور پر، ان بندرگاہوں کی مجموعی صلاحیت میں 87.01 فیصد اضافہ ہوا ہے جو سمندری بنیادی ڈھانچے کو بڑھانے کے لیے حکومت کے عزم کو ظاہر کرتا ہے۔

وزیر موصوف کے بیانات موجودہ سمندری چیلنجوں سے نمٹنے اور بھارت کے بندرگاہ اور جہاز رانی کے شعبے کی طویل مدتی پائیداری اور کارکردگی کو یقینی بنانے کے لیے جاری کوششوں کے غماز ہیں۔ حکومت کے فعال اقدامات کا مقصد برآمد کنندگان کی مدد کرنا، کنٹینر لاجسٹکس کو ہموار کرنا اور مستقبل کی ضروریات کو پورا کرنے کے لیے بندرگاہ کی صلاحیتوں کو بڑھانا ہے۔

***

(ش ح – ع ا – ع ر)

U. No. 9026