‘సామాజిక అధికారిత శిబిరాన్ని’ కేంద్ర సామాజిక న్యాయం- సాధికారిత  శాఖ సహాయ మంత్రి శ్రీ బి.ఎల్. వర్మ రేపు ఉత్తర్ ప్రదేశ్ లోని బదాయూన్ లో పోలీస్ లైన్ మైదానం లో  ప్రారంభించనున్నారు.

ఈ కార్యక్రమాన్ని ముందుగా గుర్తించిన 791 మంది దివ్యాంగులకు వివిధ సహాయక పరికరాలను పంపిణీ చేయడానికి  ఏర్పాటు చేయడమైంది.  భారత ప్రభుత్వ సామాజిక న్యాయం- సాధికారిత  మంత్రిత్వ శాఖ ఆధ్వర్యంలోని దివ్యాంగజనుల సాధికారిత విభాగం (డిఇపిడబ్ల్యుడి) అమలు చేస్తున్న ‘సహాయక సాధనాలు, ఉపకరణాల కొనుగోలు/అమరిక కోసం దివ్యాంగజనులకు సహాయం’ (ఎడిఐపి) పథకం లో భాగంగా ఈ శిబిరాన్ని నిర్వహించనున్నారు.

స్థానిక ప్రజాప్రతినిధుల, ప్రముఖుల సమక్షంలో ఈ కార్యక్రమం జరుగనుంది.  శారీరిక అశక్తతతో బాధలు పడుతున్న వ్యక్తులకు సమానావకాశాలను అందించి, వారు ఫలప్రదమైన, సురక్షయుక్తమైన, గౌరవ పూర్వకమైన జీవనాన్ని గడపడానికి ఏర్పాటు చేస్తున్న ఈ కార్యక్రమం దివ్యాంగులకు సాధికారిత ను కల్పించడం పట్ల ప్రభుత్వానికి గల నిబద్ధత కు నిదర్శనం.

దివ్యాంగులకు పంపిణీ చేయనున్న సహాయక ఉపకరణాలలో యంత్రం సాయంతో నడిచే మూడు చక్రాల వాహనాలు, చేతులతో నడుపుకోగలిగిన మూడు చక్రాల వాహనాలు, ఉపయోగించిన తరువాత మడత పెట్టుకోదగ్గ చక్రాల కుర్చీలు, నడకకు సాయపడే వాకర్ లు, నడకలో ఊతాన్ని ఇచ్చే చేతికర్రలు, చూపుడు శక్తి లోపించిన వారికి పనికి వచ్చే బ్రెయిలీ వస్తు సామగ్రి, సెన్సర్ ఆధారంగా పనిచేసే ఎలక్ట్రానిక్ ‘సుగమ్య’ కేన్ లు,రోలెటర్ లు, చెవుల వెనుక ధరించేందుకు తగిన వినికిడి శక్తినిచ్చే (బి.టి.ఇ,) పరికరాలు, సి.పి. చైర్ లు, స్మార్ట్ ఫోన్ లు, కృత్రిమ అవయవాలు వంటివి  ఉన్నాయి.  లబ్ధిదారులకు ఆత్మనిర్భరతను ప్రసాదించడం,  వారిని సమాజ ప్రధాన స్రవంతిలో మమేకం చేసి శక్తివంతులుగా తీర్చిదిద్దడం ఈ ఉపకరణాల పంపిణీ ఉద్దేశం.

ఈ శిబిరాన్ని డిఇపిడబ్ల్యుడి కి చెందిన ప్రభుత్వ రంగ సంస్థ ది ఆర్టిఫిషల్ లిమ్స్ మేన్యుఫేక్చరింగ్   కార్పొరేషన్ ఆఫ్ ఇండియా (ఎఎల్ఐఎమ్‌సిఒ) బదాయూన్ జిల్లా పాలన యంత్రాంగం సహకారంతో నిర్వహించనుంది. 

***