ইকুই কুইদবা মতমদা পাংথোক্কদৌরিবা খেলো ইন্দিয়া ৱিমেন্স ৱুশু লীগকী নোরদর্ন জোনেল রাউন্দ অসিনা মীয়ামগী পুক্নিং চীংশিন্নবা শেম শারি অমসুং মসিদা মালেমগী থাক্কী শান্নরোই অয়ীরা চিস্তী অমসুং কোমল নগরশু শরুক য়াগদৌরি। চাংয়েংনবা অসিদা সব-জুনিয়র, জুনিয়র অমসুং সেনিয়র কেতগরী শিনবা থুংবদা শান্নরোই 350না মশাগী হৈ-শিংবা উত্তুনা জুলাই 9 দগী 13 ফাওবা পতিয়ালাগী নেতাজী সুভাস নেস্নেল ইন্সতিত্যুত ওফ স্পোর্ত্তা পাংথোক্কনি। সাই পতিয়ালানা শীন লাঙদুনা পাংথোক্কদৌরিবা থৌরম অসিদা সন্দা (ফাইতিং) অমসুং তাওলু (ফোর্ম) অনিমক মনুং চনগনি অমসুং হরিয়ানা, পঞ্জাব, দিল্লী, হিমাচল প্রদেশ, চন্দিগর, উত্তরাখন্দ, জম্মু অমসুং কশ্মীর অমদি লদাখকী শান্নরোইশিংনা শরুক য়াগনি।

ৱুশু ফেদেরসন ওফ ইন্দিয়ানা পাংথোক্কদৌরিবা থৌরম অসিগী শেলগী মনা ওইগদৌরিবা লুপা লাক্ষ 7.2গী শেনফম অসি য়ুথ এফিয়র্স অমসুং স্পোর্ত মন্ত্রালয়গী স্পোর্ত বিভাগনা পুথোক্লি। সব-জুনিয়র, জুনিয়র অমসুং সেনিয়র ইভেন্তকী মকোক থোংবা শান্নরোই নিপান্না শেলগী মনা ফংগনি।

হৌখিবা থাদা কর্নাতকাদা মায় পাক্না পাংথোকখিবা সাউথ জোনেল ইভেন্তকী মতুংদা নোর্থ জোনেল মীত অসিনা লীগ কেলেন্দরগী মথংগী ফেজ হৌদোক্কনি। জোনেল মীত মরিগী মতুংদা নেস্নেল রেঙ্কিং চেম্পিয়নশিপ অমা পাংথোক্কদবনি।

ৱিমেন্স ৱুশু লীগ অসিনা মালেমগী থাক্তা মেদল লৌরবী অমসুং এন.এস.এন.আই.এস. পতিয়ালাদা ত্রেন তৌখ্রবী অয়ীরা (চহি 18) অমসুং কোমল (চহি 19)গুম্না মায় পাকপা ঙম্বগী খুদোংচাবা কয়া শান্নরোই কয়াদা পীগনি।

“হৌখিবা চেম্পিয়নশিপ অনিদা সনাগী মেদল লৌরবা মতুংদা শান্নগদৌরিবা ঐহাক্কী অহুমশুবা খেলো ইন্দিয়া ৱিমেন্স ৱুশু লীগ অসিদা ঐহাক্না ইশাগী লমদমদা শান্নগদৌরিবা অসিদা য়াম্না নুংঙাইবা ফাওরি”, কম্পিতিসন অসিদা ইং 2022দগী অহানবা ওইনা শরুক য়াবা হৌখিবী অয়ীরানা হায়খি।

“খেলো ইন্দিয়া ৱিমেন্স লীগ অসি নুপীমচাশিংগীদমক্তা, মরু ওইনা, তুংগী মতমদা মিৎয়েং থম্লিবীশিংগীদমক্তা য়াম্না মরু ওইরি অমসুং ঐহাক্না মসিগীদমক্তা সরকারবু থাগৎচনীংই। ঐহাক্কী ওইনদি, এসিয়ন গেম্সকী 52 kg গী কেতগরীদা গোল্দঃ মেদল লৌদুনা অরুম্বগী কেতগরী অসিদা মসিগুম্বা মায় পাকপা ফংবা খ্বাইদগী অহানবা ভারত মচা ওইবা হায়বসি ঐহাক্কী অপাম্বনি। মসিগী মমাংদা, সেপ্তেম্বর থাদা চাইনাদা পাংথোক্কদৌরিবা সেনিয়র এসিয়ন চেম্পিয়নশিপ্তা গোল্দ মেদল লৌবা হায়বসি ঐহাক্কী পান্দম্নি”, অয়ীরানা মখা তাখি।

জম্মু অমসুং কশ্মীরগী অয়ীরা চিস্তীনা খেলো ইন্দিয়া ৱিমেন্স ৱুশু লীগ অসিদা মহাক্কী থংন-থংনবা অহুম্লক শুবা গোল্দ মেদল লৌনবা মিৎয়েং থম্লি।

সেনিয়রগী 52 Kgগী সন্দা কেতগরীদা শরুক য়াগদৌরিবী জম্মু অমসুং কশ্মীরগী অয়ীরানা ইং 2022দা ইন্দোনেসিয়াদা পাংথোকখিবা জুনিয়র ৱর্ল্দ ৱুশু চেম্পিয়নশিপ্তা ব্রোঞ্জ লৌখ্রবনি। ইং 2022দা জিওর্জিয়াদা পাংথোকখিবা ইন্তর্নেস্নেল ৱুশু চেম্পিয়নশিপ অমদি ইং 2024দা পাংথোকখিবা রসিয়ন মোস্কো স্তার্স ৱুশু ইন্তর্নেস্নেল চেম্পিয়নশিপ্তা মহাক্না সনাগী মেদলশু লৌখ্রবনি।

ইং 2023দা পাংথোকখিবা রসিয়ন মোস্কো স্তার্স ৱুশু ইন্তর্নেস্নেল চেম্পিয়নশিপ্তা সন্দাদা সনাগী মেদল লৌখ্রবী চন্দিগরগী কোমলনা হায়খি, “নেস্নেলগী মথক্তা চহিসিমক্তদা তুর্নামেন্ত অমগা শান্নবগী খুদোংচাবা ফংবসিনা ঐহাক্না ইশাদা থাজরিবা অসি য়াম্না হেনগৎহল্লে”।

“খেলো ইন্দিয়া ৱিমেন্স লীগ অসিনা ঐখোয়দা ঐখোয়গী পর্ফোর্মেন্স নৈননবা, ঐখোয়গী মশান্নদা অশোইবা মশক খঙদোক্নবা অমসুং চুম্থোকফম থোকপা মফম খঙদোক্নবা ঐখোয়দা য়াম্না ফবা ফম্বাক অমা পীবিরি”, মশাগী চহি 14 শুবা মতমদা মশাবু ঙাকথোকচনবগী তেক্নিক তম্বা হৌখ্রবী কোমলনা হায়খি।

ইং 2023গী রসিয়ন মোস্কো স্তার্স ৱুশু ইন্তর্নেস্নেল চেম্পিয়নশিপ্তা ফংখিবা মশাগী গোল্দ মেদলগা লোয়ননা চন্দিগরগী কোমল

নুপীগী স্পোর্তকী মতাংদাঃ

স্পোর্ত ফোর ৱিমেন ভর্তিকেলগী মখাদা খেলো ইন্দিয়া ৱিমেন্স ৱুশু লীগ অসি মপুং ওইবা মওং অনিদা খায়দোকই – মেজর লীগ অমসুং সিতী লীগ। লীগশিং অসিনা তোঙান-তোঙানবা দিসিপ্লিন কয়াদা নুপীগী স্পোর্ত হেন্না খুমাং চাউশিলহন্নবা ফম্বাক অমা ওইনা তেংবাংলি। অহেনবা ৱাফম ওইনা, লীগশিং অসি চহি নত্ত্রগা অরুম্বগী অখন্নবা কেতগরীগী মনুংদা পাংথোকই অমসুং মশান্না খুদিংগী মথৌ তাবশিং য়েংদুনা মওং শেম্মি।

য়ুথ এফিয়র্স অমসুং স্পোর্তকী কেন্দ্র মন্ত্রালয়না শৌগৎপা মসিগুম্বা থৌওং অসিনা নুপী শান্নরোইশিংনা মশিং য়াম্না শরুক য়াহনবদা পুক্নিং থৌগৎপগা লোয়ননা লৈবাক শিনবা থুংবগী তোঙান-তোঙানবা স্কিল লেভেল অমসুং চহিগী কাঙলুপকী মনুংদা লৈবা তেলেন্ত মশক খঙদোকপা অমসুং মখোয়গী চাউখৎ থৌরাংদশু তেংবাংই। মসিগুম্বা নীংথিনা মওং শেম্লবা থৌওংশিং অসিগী খুত্থাংদা খেলো ইন্দিয়া খঙথাং অসিনা শান্নবগী মতিক লৈবা চৎনবী অমা শাগৎনবা অমসুং ভারত্তা নুপী শান্নরোইশিং পুথোকপদা শৌগৎনবা পান্দম থম্লি।

***