U Myntri Rangbah Duh, Narendra Modi u la ai jingkren sha ki lad pathai khubor shuwa ban sdang ka dorbar ba nyngkong jong ka 18th Lok Sabha mynta ka sngi.

U Myntri Rangbah Duh u la sdang da kaba ong ba kane ka dei ka sngi jong ka jingsngewsarong ha ka synshar paidbah, kadei ka sngi jong ka burom. Ha ka sien ba nyngkong naduh ba ioh jinglaitluid, bam smai ha ka iing dorbar thawain Parliament ba thymmai jong ngi. “Ha kane ka sngi kaba kongsan, nga pdiang sngewbha ia ki MP ba shah jied nyngkong bad nga kitbok kitrwiang ia baroh,” la ong u Myntri Rangbah Duh.

U la ong ba ka jingwan jong kane ka Parliament ka dei ka lad ban pynurlong ia ki jingthrang jong ki briew jong ka India bad u la ong ba ka dei ka lad kaba kongsan bha ban kot sha ka jingstet shuh shuh bad ki kliar ba thymmai da ka jingshitrhem ba thymmai. U la ong ba ka 18^th Lok Sabha ka sdang mynta ka sngi ban pynurlong ia ka thong ban tei ia ka India kaba la kiew shaphrang shuwa u snem 2047. U Myntri Rangbah Duh u la ong ba ka jingpynlong ia ka elekshon kaba heh tam ha ka pyrthei ka dei ka burom na ka bynta 140 klur ngut ki briew jong ka ri. “Palat 65 klur ngut ki nongjied nongmihkhmat ki la iashim bynta ha kane ka kam,” la ong u Myntri Rangbah Duh da ka jingkmen katba u la kdew ruh ba kane ka dei tang ka sien kaba ar naduh ba ioh jinglaitluid ba ki briew jong ka ri ki la jied ia ka Sorkar ban bteng lai sien kynthih. “Kane ka lad ka la wan hadien 60 snem bad ka long shisha ka burom,” u la bynrap.

U Myntri Rangbah Duh u la ai jingsngewnguh ia ki briew kiba la jied ia ka Sorkar ba kan bteng lai sien bad u la ong ba kane ka dei ka dak jong ka jinghun ki briew ia ki jingthmu jong ka Sorkar, ki polisi jong ka bad ka jingtrei shitom jong ka na ka bynta ki briew. “Ha kine ki 10 snem ba la dep, ngi la pyrshang ban wanrah ia ka rukom treikam ba kyrpang namar ngi ngeit ba donkam ia ka jingbun paid ban pyniaid ia ka sorkar hynrei ka jingiahap jingmut ruh ka long kaba donkam bha ban pyniaid ia ka ri,” la ong u Myntri Rangbah Duh. U la ong ba ka dei ka jingpyrshang jong ka Sorkar ban ai jingshakri ia ka Maa Bharati da kaba wanrah ia ka jingiahap jingmut bad da kaba iamir jingmut lang bad baroh ban pynurlong ia ki jingthrang bad ki jingangnud jong ki 140 klur ngut ki briew jong ka ri.

Da kaba ban jur halor ka jingiamir jingmut lang bad baroh bad pynstet ia ka jingshim ia ki rai hapoh ka Riti Synshar jong ka India, u Myntri Rangbah Duh u la ong ba u kmen shaphang ka jingbun ki MP ba dang samla kiba la bam smai ha ka 18^th Lok Sabha. U la kren shaphang ka jinglong kyrpang u nombor 18 katkum ki jingngeit ha India, ha kaba u la ong ba ka Gita ka don 18 tylli ki lynnong kiba ai ia ka khubor jong ka karma, ka kamram bad ka jingsngewlem, don 18 tylli ki Purana bad Uppurana, shiteng u nombor 18 ka long 9 kaba dei ka dak jong ka jingbiang tam, bad ka rta ban ioh thep vote ha India ka dei 18 snem. “Ka 18^th Lok Sabha ka dei ka Amrit Kaal jong ka India. Ka jingwan jong kane ka Lok Sabha ka dei ruh ka dak kaba shongkun,” la ong u Modi.

U Myntri Rangbah Duh u la ong ba lashai ka dei ka 25 tarik u Jylliew. 50 snem mynshuwa ha kane ka sngi, ka la wan ka jingsynshar emergency bad ba kane ka dei ka dak iong ha ka Riti Synshar. U Modi u la ong ba ki pateng mynta kin ym klet lano lano ruh ia katei ka por ba la kyntait ia ka Riti Synshar da kaba leh klet ia ka synshar paidbah bad la pynkylla ia ka ri sha ka phatok. U Myntri Rangbah Duh u la kyntu ia ki briew ba kin kut jingmut ban iada ia ka synshar paidbah jong ka India khnang ba kane kan ym jia shuh lano lano. U Myntri Rangbah Duh u la ong, “Ngin kut jingmut ban don ka synshar paidbah kaba khlain bad ban pynurlong ia ki jingthrang jong ki briew jong ka ri da kaba bud ia ka Riti Synshar jong ka India.”

U Myntri Rangbah Duh u la ong ba ka jingbahkhlieh jong ka Sorkar ka la kiew lai shah namar ki briew ki la jied ia kane ka Sorkar la lai sien. U la kular ia ki briew jong ka ri ba ha kane ka samoi kaba lai, ka Sorkar kan trei shitom lai shah bad pynurlong lai shah ki jingseisoh.

Da kaba kdew sha ki jingkhmih lynti jong ki briew ha kaba iadei bad ki MP ba thymmai, u Myntri Rangbah Duh u la kyntu ia ki MP ba kin pyndonkam ia kane ka lad na ka bynta ka bha ka miat jong ki briew bad ka jingai jingshakri ia ki briew bad ruh ba kin shim lut ia ki sienjam na ka bynta ka bha ka miat jong ki briew. Ha ka jingkren shaphang ka liang pyrshah, u Myntri Rangbah Duh u la ong ba ki paidbah ki khmih lynti ia ka liang pyrshah ba kan trei borbah da kaba bat ruh ia ka burom jong ka synshar paidbah. “nga khmih lynti ba ka liang pyrshah kan leh ia kane,” u la bynrap. U Myntri Rangbah Duh u la ong ba ki briew ki kwah ia ki kam kiba shisha ym ki jingpyrta bad u la ong ba u ngeit skhem ba ki MP kin pynurlong ia kine ki jingthrang jong ki briew.

U Myntri Rangbah Duh u la ban jur halor ka jingbahkhlieh jong man ki MP ban iatrei lang ban pynurlong ia ka jingthmu ban tei ia ka India kaba la kiew shaphrang bad khlain ka jingshaniah jong ki briew. U la ong ba ka jinglait haduh 25 klur ngut ki briew na ka jingduk tasam ka wanrah ia ka jingngeit kaba thymmai ba ka India shen kan lah ban pynduh jait ia ka jingduk. “Ki briew jong ka ri jong ngi, 140 klur ngut ki nongshong shnong, kim ju ran dien na ka jingtrei shitom. Ngi dei ban plie lad ia ki katba lah,” la ong u Myntri Rangbah Duh. U la ong ba kane ka Iing Dorbar Thaw Ain kan long ka jaka jong ki jingkut jingmut bad ba ka 18th Lok Sabha kan pynurlong ia ki jingthrang jong ki briew jong ka India. U Myntri Rangbah Duh u la pynkut ia ka jingkren da kaba kitbok kitrwiang ia ki MP bad da kaba kyntu ia ki ba kin pyndep ia ka kamram jong ki da ka jingskhem jingmut.

***