ٹیکسٹائل کے مرکزی وزیر جناب گری راج سنگھ نے آج یہاں پوری ٹیکسٹائل ویلیو چین کی نمائندگی کرنے والے بڑے صنعتی نمائندوں / ایکسپورٹ پروموشن کونسلوں / ایسوسی ایشنوں کے ساتھ بات چیت کی۔

جناب سنگھ نے اپنے خطاب میں اس شعبے میں بھاری سرمایہ کاری کو راغب کرنے ، جدید عالمی معیار کے بنیادی ڈھانچے کی تعمیر ، کاروبار کرنے میں آسانی میں اضافہ کرنے اور روزگار کے مواقع پیدا کرنے پر توجہ مرکوز کرنے کی اہمیت پر زور دیا ۔

اس موقع پر ٹیکسٹائل کی مرکزی وزیر مملکت جناب پبیترا مارگریٹا، سکریٹری ٹیکسٹائل محترمہ رچنا شاہ اور وزارت کے سینئر افسران بھی موجود تھے۔

اجلاس میں اقتصادی ترقی میں اس شعبے کے کردار اور مستقبل میں ترقی کے امکانات بشمول مینوفیکچرنگ، برآمدات اور روزگار کے مواقع پیدا کرنے پر توجہ مرکوز کی گئی۔

صنعت اور ٹیکسٹائل ویلیو چین کے اسٹیک ہولڈروں نے اس شعبے کے وژن کے حصول کے لیے اپنے خیالات اور تجاویز کا تبادلہ کرنے کا موقع فراہم کرنے کے لیے مرکزی وزیر کا تہہ دل سے شکریہ ادا کیا۔

بات چیت کے دوران صنعت کے نمائندوں نے ٹیکسٹائل سیکٹر کی موجودہ صورت حال کے بارے میں اپنے خیالات پیش کیے جن میں چیلنجز، ترقی کے امکانات اور دستیاب مواقع شامل ہیں۔ انھوں نے مرکزی حکومت کے ذریعے اٹھائے گئے اہم اقدامات کی ستائش کی جن میں پی ایم مترا پارک اسکیم، ٹیکسٹائل کے لیے پی ایل آئی اسکیم، نیشنل ٹیکنیکل ٹیکسٹائل مشن اور اسکلنگ پروگرام سمرتھ شامل ہیں جس سے سرمایہ کاری کو راغب کرنے، استعداد بڑھانے اور روزگار پیدا کرنے میں مدد ملے گی۔ انھوں نے شعبے کی ترقی کو مہمیز کرنے اور روزگار کے مواقع پیدا کرنے کے لیے جدید خیالات اور تجاویز کا تبادلہ کیا۔

***

(ش ح – ع ا – ع ر)

U. No. 8372