Ka World Health Organization (WHO) ka la ithuh ia ka National Institute of Indian Medical Heritage (NIIMH), Hyderabad, ka jaka treikam kaba hap hapoh ka Central Council for Research in Ayurvedic Sciences (CCRAS), hapoh ka tnat Ayush kum ka WHO Collaborating Centre (CC) na ka bynta ka "Fundamental and Literary Research in Traditional Medicine" (CC IND-177). Kane ka jingioh jingithuh ba don burom ka dei kaba ai na ka bynta saw snem, naduh ka 3 tarik u Jylliew, 2024.

La seng ia ka NIIMH Hyderabad ha u snem 1956 bad ka dei ka jaka treikam ba kyrpang bad kaba trei ha ka jingbuh jingtip bad jingpyni ia ki jingwad bniah ha ka Ayurveda, Yoga Naturopathy, Unani, Siddha, Sowa-Rigpa, Homoeopathy, Biomedicine bad kiwei kiwei ki rukom  ai jingsumar kiba don ha India. Hapoh ka jingialam jong u Prof. Vaidya Rabinarayan Acharya, Director General jong ka CCRAS, ka NIIMH bad khlieh duh jong ka WHO-CC ki la poi sha une u mawmer lyngba ka jingpeit bniah ia ka kam bad ka jingtheh met bad mynsiem ha ka kam.

U Prof. Acharya u la ong, "Kane ka jingai jingithuh da ka WHO ka long kum u mawmer ba kongsan, kaba pyni ia ka jingpyrshang jong ngi ha ki kam ba iadei bad ki rukom ai jingsumar tynrai bad ka jingwad bniah katkum ka histori.” Kane ka Institute ka la long ka nong ialam lynti ha ki sienjam digital jong ka Ayush, ba kynthup ka rynsan AMAR kaba buh jingtip shaphang 16,000 tylli ki jingthoh shaphang ka Ayush, ha kaba don 4,249 tylli ki jingthoh ba la pynkylla digital, 1,224 tylli ki kot ba jynjar ban ioh, 14,126 tylli ki catalogue bad 4,114 tylli ki kot kiba pynmih na ka por sha ka por. Ka rynsan SAHI ka pyni 793 tylli ki tiar ai jingsumar ba hyndai, katba ki e-book jong ka Ayush projek ki pynbiang lad ia ki briew ba kin ioh pule ia ki kot ba hyndai lyngba ki lad digital. Ka rynsan NAMASTE ka lum ia ki jingtip shaphang ki jingkhlad noh jong ki briew na 168 tylli ki hospital bad ka rynsan Ayush Research ka buh 42,818 tylli ki jingthoh wad bniah shaphang ka Ayush.

Ka NIIMH ka don palat 500 tylli ki jingthoh ha ryngkat ka Medical Heritage Museum bad Library kiba don ia ki kot ba jynjar ban ioh bad ki jingthoh kiba naduh u spah snem ba 15 AD. Ka Institute ka pynmih ruh ia ka Journal of Indian Medical Heritage. Ia ki jingtip ba bniah shaphang ka Institute lah ban ioh ha ka [NIIMH Official Website](http://niimh.nic.in).

Ha India, ki don kumba 58 tylli ki WHO Collaborating Centre kiba iadei bad ki bynta bapher bapher jong ka biomedicine bad ki kam science kiba iadei bad kane. Lah ban shu kdew hangne ba ka CCRAS-NIIMH, Hyderabad, ka la iasoh lang ha kane ka thup kum ka WHO Collaborating Centre kaba lai kaba iadei bad ki rukom ai jingsumar tynrai hadien ka Institute for Teaching & Research in Ayurveda, Jamnagar bad ka Morarji Desai National Institute of Yoga (MDNIY), New Delhi.

Kum ka WHO Collaborating Centre kaba nyngkong na ka bynta ka "Fundamental and Literary Research in Traditional Medicine," ka NIIMH ka hap ban iarap ia ka WHO ban pynlong ryntih ia ki jingbatai na ka bynta ka Ayurveda, Unani, Siddha, bad Sowa-Rigpa, bad pynthymmai ia ka Traditional Medicine Module-II ia ka bynta kaba Khatwei jong ka International Classification of Diseases (ICD-11). Shuh shuh, ka WHO Collaborating Centre kan kyrshan ia ki jylla ba long dkhot ba kin pynkhreh ia ki rukom wad bniah ha kaba iadei bad ki rukom ai jingsumar tynrai.

Kane ka jingioh ia kane ka jingithuh ka dei ka dak jong ka jingialam bad ki jingpyrshang jong u Vaidya Rajesh Kotecha, Secretary (Ayush), Sorkar India bad ka jingkyrshan ha ki kam teknikal na u Dr. Pawan Godatwar, Technical Officer, WHO-SEARO, New Delhi, bad Dr. Pradeep Kumar Dua, Technical Officer, TM Unit, WHO Headquarters.

Ka WHO Collaborating Centre na ka bynta ka "Fundamental and Literary Research in Traditional Medicine" ka dei ka ban ialam lynti da u Prof. Vaidya Rabinarayan Acharya, Director General, CCRAS, ha ryngkat ka kynhun kaba kynthup Dr. G. P. Prasad, Assistant Director I/c bad Unit Head, Vaidya Saketh Ram Thrigulla, Research Officer (Ayurveda), bad Dr. Santosh Mane, Research Officer (Ayurveda), NIIMH, Hyderabad, ha ka jingiatreilang bad ka Literary and Fundamental Research jong ka CCRAS Headquarters.

********