Ka kynhun jong ka India ba ialam da u Secretary, ka tnat Commerce, Sunil Barthwal ka la iashim bynta ha ka jingialang ki Myntri hapoh ka Indo-Pacific Economic Framework for Prosperity (IPEF) kaba la long ha Singapore ha ka 6 tarik u Jylliew 2024.

Ka jingpynbna IPEF Ministerial ha ka 14 tarik u Naiwieng 2023 ka la pynbna ia ki jingiakut na ka bynta ka Ioh ka Kot Kaba Khuid, Ka Ioh ka Kot kaba Ryntih lang ia Baroh bad ka Jingiakut halor ka Indo-Pacific Economic Framework for Prosperity. Namar kane kito kiba iatrei lang ha ka IPEF ki la peit ia ka jingthoh jong kine ki jingiakut na ka liang jong ka ain bad ka kam ioh jingmynjur ha la ki ri.

Mynta, ki dkhot IPEF ki la soi ia kine ki jingiakut kiba long ki rukom treikam ki bym pat ju iohi ban pynbeit ia ki jingeh ha ki spah snem ba 21 bad ban pynkhlain ia ki jingiadei ha ka ioh ka kot ha ka thain kaba kongsan bha. Ka India ka la iashim bynta ha kane ka jingiasoi bad ki jingiakren hapdeng ki myntri. Hynrei ka India kam shym la soi ia kine ki jingiakut namar ka kam ban ioh jingbit hapoh ka ri ka dang iaid shakhmat bad yn pyndep ia kane ka kam hadien ba la tei ia ka Sorkar kaba thymmai. Kine ki jingiakut kin sdang hadien ba kumno kumno san tylli ki dkhot IPEF ki pyndep ia ki kam kiba iadei bad ki ain hapoh ki ri jong ki.

Ha ka jingai jingkren jong u, u Barthwal u la kdew sha ka jingiaid shaphrang ban seng ia ki lai tylli ki kynhun iatrei lang hapoh ka Jingiakut Supply Chain, ki Cooperative Work Programme hapoh ka Jingiakut Clean Economy bad ki kam iatrei lang hapoh ka Jingiakut Fair Economy. U la ban jur ruh ba ka India, lyngba ka jingdon ki briew kiba la tbit ha ki kam, ki jingaiei ka mariang, bad ka jingkyrshan ki polisi, ka thmu ban don ka bynta kaba heh ha ki kam pynbiang mar sha kylleng ka pyrthei. Ka Sorkar ka trei borbah ban wad ia ki rukom pynbeit ia ki jingeh ban pynthikna ia ka jingiashim bynta ka India ha ki kam pynbiang mar kiba iar bad kiba iaid ryntih.

Ka Jingiakut IPEF halor ka Ioh ka Kot kaba Khuid

Ka Jingiakut halor ka Ioh ka Kot kaba Khuid ka thmu ban pynstet ia ki jingpyrshang jong ki dkhot IPEF na ka bynta ka jingshngain ha ki kam bording, ka jingiaineh ka suinbneng, ka jingpynduna ia ka jingpynmih GHG; wad bad tei ia ki rukom treikam ban pynduna ia ka jinghap shaniah ha ka bording ba ioh na ki fossil fuel; ka jingkyntiew ia ki jingiatreilang ha ki kam teknikal, ka jingpyntbit ia ki nongtrei, ki jingiatreilang ban pyntbit ia ki briew bad ha ki kam wad bniah, bad ban iatrei lang ban plié lad ia ka roi ka par, ka jingioh lad bad ka jingpyndonkam ia ka bording ba khuid bad ruh ki teknoloji ki bym ktah ia ka mariang. Kane ka jingiakut kan plié lad ia ki jingbei tyngka, ka jingpynbiang pisa ha ka sut kaba la pynduna, ki projek ba iatrei lang, ka jingpyntbit ia ki briew, ka jingai jingiarap ha ki kam teknikal ia ki karkhana khamtam ki MSME, khnang ban pyniasoh shuh shuh ia ki kompani ka India ha ki kam pynbiang mar, khamtam ha ka thain Indo-Pacific. Ia kine yn leh lyngba ki jingiatrei lang kum ki Cooperative Work Programme bad ka IPEF Catalytic Capital Fund.

Cooperative Work Programme (CWP)

Ki dkhot IPEF ki la iaroh ia ki sienjam ban tei bad pynneh ia ki jingiatrei lang ba jrong samoi hapdeng ki kynhun bapher bapher jong ki dkhot ha ki kam kiba iadei bad ka suinbneng lyngba ka rukom treikam jong ka CWP, khnang ban rah shakhmat ia ki thong jong ka Jingiakut IPEF Clean Economy. Naduh ba la pynbna ia ki CWP halor ki lad pynbiang hydrogen (ha u Jymmang 2023), bad ki iew carbon, ka bording ba khuid, ka umphniang liengsuin ba iaineh, bad ki jingsiew jingdiah kiba ryntih (ha u Lber 2024), ki dkhot IPEF ba iashim bynta ki la pynkhreh ia ka rukom treikam na ka bynta ka jingiatreilang bad ki la kdew sha ka jingiaid shaphrang ha katto katne ki CWP kiba la don hapoh ka jingiakren. U Barthwal, ha ka jingai jingkren jong u, u la iaroh ia ki CWP hapoh ka Jingiakut Clean Economy “ba la saindur ban plié lad ia ki jingthmu ban wanrah jingkylla ha ki kam bording ka ban iarap tei ia ka thain Indo-Pacific kaba kham iaineh bad kaba kham riewspah.”

Ka kynhun ka la pynbna ia ka CWP ba thymmai ba ialam lynti da ka India “e-waste urban mining” mynta ka sngi. Kane ka CWP kan plié lad ia ka jingpeit ia ka e-waste ha ka rukom kaba kham bha da ki dkhot IPEF, ba kynthup ia ka jingiasam ia ki jingnang jingtip shaphang ki teknoloji, ki rukom treikam bad ki kam bad ruh ka jingwanrah ia ki jingpynbeit na ka bynta ka rukom lum bad rukom pyndonkam biang ia ki mar ha ka rukom kaba kham seisoh, khamtam ha kaba iadei bad ki nar bad ki mar poh khyndew ba kham kongsan.

U Barthwal u la ong “Ka jingpeit bniah ka India sha ka jingkylla sha ka ioh ka kot kaba bun bynta ka long kaba shai ha ki CWP kiba iadei bad ka jingpeit ia ka e-waste, ba thmu ban wanrah jingseisoh na ki jingdon jingem bad ka jingiada na ka jingpyn jakhlia.” U Commerce Secretary u la ai jingsngewnguh ia ki dkhot IPEF kiba la ai ka jingkyrshan ia ka jingtyrwa ka India ia ka CWP bad u la ong ba ka India ka thmu ban iatrei lang bad ki dkhot IPEF ha kiwei kiwei ki CWP ban plié lad ia ki jijngmyntoi kiba bun kiba wan na kine ki CWP na ka bynta ka roi ka par bad ruh na ka bynta ki jingmyntoi ba wan sha ka imlang sahlang.

IPEF Catalytic Capital Fund

Ki dkhot IPEF ki la iaroh ia ka jingsdang ia ka jingpyntreikam ia ka IPEF Catalytic Capital Fund, kaba kyrshan ia ka jingpyniar jong ka ioh ka kot kaba bha bad kaba khuid ha ki ri IPEF ba dang kiew hapoh ka Jingiakut IPEF Clean Economy. Ki nongkyrshan ba dang kham bun katba dang mih ki sngi ia kane ka Fund - Australia, Japan, Korea bad ka United States – ki la jam shakhmat ha ki kam ha ki ri jong ki ban pynbiang US $33 million kum ka jingpynbiang pisa ban wanrah haduh US $3.3 billion ha ka jingbei tyngka na ki kynhun bad ki riew shimet. Ka Private Infrastructure Development Group (PIDG), kaba pyniaid ia kane ka Fund ka la ai jingtip ia ki dkhot IPEF shaphang ki projek bapher bapher ban wan bad ki la iakren shaphang ki lad ban pyllait ia ka jingpynbiang pisa ha ka sut kaba la pynduna, ki jingiarap ha ki kam teknikal, ka jingpynkhlain ia ki kam ban wanrah ia ka jingbei tyngka na ki kynhun bad ki riew shimet.

Investor Forum

Ka kynhun jong ki nongkhaii ba la ialam da ka Invest India ruh ka la iashim bynta ha kane ka Forum.

Palat 30 tylli ki kompani na India kin pyni ia ki lad ban bei tyngka ha ki kam bording kiba pynmih na ki tyllong ba lah ban pynthymmai ha ka jingiadon lang jong ki nongbei tyngka na kylleng ka pyrthei kum ka Blackrock, KKR & Co., JP Morgan bad kiwei kiwei.

Hapoh ka Sustainable Infrastructure track, saw tylli ki projek ka India ki la pyni ia ki kam jong ki sha ki nongbei tyngka na kylleng ka pyrthei. Kumjuh 10 tylli ki ClimateTech startup jong ka India ki la pyni ia ki kam jong ki sha kito kiba don jingthmu ban bei tyngka na kylleng ka pyrthei ha kane ka Forum. Kane ka Forum ia ki nongbei tyngka ka la plié ia ka lad kaba kyrpang ia ki nongpyniaid projek bad ki startup ba kin iakren bad kyntiew ia ki jingiadei bad palat 100 ngut ki nongbei tyngka na kylleng ka pyrthei.

6 ngut ki nongbei tyngka na India kiba kynthup ia ki venture capital fund, private equity firm bad kiwei kiwei ki nongbei tyngka ki la iashim bynta ha kane ka Forum ban peit ia ki lad bei tyngka bad ki lad iatrei lang bad ki nongbei tyngka na kylleng ka pyrthei bad ruh ki multilateral development bank.

Ka Jingiakut IPEF Fair Economy

Ka Jingiakut halor ka Fair Economy ka thmu ban wanrah ia ki kam ka ioh ka kot kaba shai bad ki kam khaii kiba shai kaba lah ban kyntiew ia ka khaii pateng bad ka jingbei tyngka ha ki iew jong ki ri ba long dkhot; kyntiew ia ki kam ba ryntih lang ia baroh ki nongkhaii bad ki nongtrei ha ka ioh ka kot jong ki dkhot IPEF; kyntiew ia ki sienjam ban iada na jingbam sap da kaba pynkhlain ia ki kam, ka jingpynbiang ia ki rynsan ba khlain ka jingshngain, bad ka jingkyntiew ia ka jingiashim bynta da ki kynhun shimet, kyrshan ia ki sienjam ban kyntiew ia ka jingshai ha ki kam khajna bad ka jingiasam ia ki jingtip na ka bynta ki kam khajna hapdeng ki bor ba dei peit, ka jingpyndonkam ia ki jingdon jingem, ka jingpeit ia ki kam khajna; bad ka jingkyrshan ia ka jingkyntiew ia ka bor threikam bad ban ai jingkyrshan ha ki kam teknikal ia ki dkhot IPEF, lyngba ka jingiasam ia ki jingnang jingstad bad ki rukom treikam ba seisoh, ka jingwanrah bad jingpyndonkam ia ki jingsaindur thymmai ha ki kam teknikal, bad ki jingiatreilang bad ki kynhun shimet bad kiwei kiwei katkum ki jingdonkam.

U Barthwal u la iaroh ia ka jingpeit bniah ka IPEF ia ka jingai jingiarap ha ki kam teknikal bad ka jingnoh synniang sha ka jingkyntiew ia ka bor treikam na ka bynta ka Jingiakut Fair Economy bad u la kdew sha ka prokram ai jinghikai ha ka Digital Forensics & System-Driven Risk Analysis hapoh ka Pillar IV Technical Assistance bad Capacity Building catalogue ba ka India ka lah ban tyrwa sha kiwei kiwei ki dkhot IPEF.

Ka sienjam IPEF ban kyntiew ia ki sap

Ki dkhot IPEF ki la iaroh ia ka jingiaid shaphrang jong ka sienjam IPEF ban kyntiew ia ki sap ba la sdang ha u Nailur 2022 ban ai jingkyrshan ia ka jingkyntiew ia ka ioh ka kot bad ka roi ka par da kaba pynbiang lad ia ki longkmie bad ki khynnah kynthei ha ki dkhot IPEF kiba dang kiew shakhmat ha kaba ki lah ban ioh ia ki sap ha ki kam digital. Hapoh kane ka sienjam, 14 tylli ki kompani US kiba iashim bynta bad ka Asia Foundation ki la pynbiang 10.9 million tylli ki lad ban kyntiew ia ki sap ha ki dkhot IPEF, khamtam ia ki longkmie bad ki khynnah kynthei ha kine ki 2 snem ba la dep bad ka India ka la ioh 4 million na kine ki lad.

Ki sienjam ban wan

Ka jingialang ki myntri ka la rai ruh ban pynshlur ia ka jingpynlong ia ki jingialang ba nyngkong jong ki lai tylli ki Supply Chain institutional committee lyngba ki lad digital ha u Naitung 2024 bad ka jingiakynduh markhmat ha Washington DC ha ki bnai ba kut jong u snem 2024. La rai ruh ban pynlong ia ka jingiakynduh ki myntri ka ban wan lyngba ki lad digital ha u Nailur 2024 bad trei na ka bynta ka jingpynlong ia ka jingialang ba nyngkong jong ka IPEF Council bad ka Joint Commission ha u 2025.

Shaphang ka IPEF

La sdang ia ka IPEF ha ka 23 tarik u Jymmang 2022 ha Tokyo, Japan, ha kaba la don 14 tylli ki ri – Australia, Brunei, Fiji, India, Indonesia, Japan, Republic of Korea, Malaysia, New Zealand, Philippines, Singapore, Thailand, Vietnam bad USA. Ka IPEF ka thmu ban pynkhlain ia ki jingiadei ha ka ioh ka kot bad ka jingiatreilang hapdeng ki ri ba long dkhot da ka jingthmu ban kyntiew ia ka jingkiew shaphrang, ka jingskhem ha ka ioh ka kot bad ka jingriewspah ha ka thain.

Ka rukom treikam ka don nongrim ha saw tylli ki reshod kiba iadei bad ka khaii pateng (Pillar I); Supply Chain Resilience (Pillar II); Clean Economy (Pillar III); bad Fair Economy (Pillar IV). Ka India ka la iasoh bad ki Pillar II haduh IV jong ka IPEF katba ka dang peit ia ka Pillar-I.

***