প্রধানমন্ত্রীগী লোইশঙ
প্রধান মন্ত্রীনা গুজরাতকী নবসারীদা লুপা করোর ৪৭,০০০ হেনবগী তোঙান-তোঙানবা চাউখৎ-থৌরাংগী প্রোজেকশিং মীয়ামদা কৎথোকখ্রে অমসুং উরেপ-উয়ুং তমখ্রে
বদোদারা মুম্বাই এক্সপ্রেসৱেগী মরুওইবা শরুকশিং মীয়ামদা কৎথোকখ্রে
কাক্রাপার এতোমিক পৱার স্তেসন্দা অনৌবা প্রেসরাইজ হেভি ৱাতর রিয়েক্তর অনি: KAPS-3 অমসুং KAPS-4 মীয়ামদা কৎথোকখ্রে
নবসারীদা পি.এম মিত্রা পার্ক শানবা থবক শুবা হৌদোকখ্রে
সুরত মিনিউনিসিপাল কোর্পোরেসন, সুরত অর্বান দিবলপমেন্ত ওথোরিতি অমসুং দ্রিম সিতিগী তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমখ্রে
লম্বী, রেল, লাইরিক-লাইশু অমসুং ঈশিং পীনবগী প্রোজেকশিং উরেপ-উয়ুং তমখ্রে
“নবসারীদা লাকপদা মতম পুম্নমক্তা নুংঙাইবা ফাওই। তোঙান-তোঙানবা প্রোজেকশিং শঙ্গাবা অমসুং হৌদোকপা অসিনা গুজরাতকী চাউখৎপগী খোঙচৎ মপাঙ্গল কনখৎহনগনি”
“অতোপ্পশিংদা থাজবা লৈরক্ত্রবা মতমদা মোদীগী গরেন্তি লাক্কনি”
“লায়রবা নত্ত্রগা মিদল ক্লাস ওইগেরা, খুঙ্গং নত্ত্রগা সহর ওইগেরা, ঐখোয়গী সরকারগী থবক্তি মীওই খুদিংমক্কী হিংবগী থাক ৱাংখৎহনবনি”
“ঙসি, লৈবাক্কী অপীকপা সহরশিং ফাওবদা অফবা চৎথোক-চৎশিনগী ইনফ্রাস্ত্রকচর শেমগৎলে”
“ঙসি, মালেম্না দিজিতেল ইন্দিয়া মশক খঙলে”
Posted On:
22 FEB 2024 6:10PM by PIB Imphal
ঙসি প্রধান মন্ত্রী শ্রী নরেন্দ্র মোদীনা গুজরাতকী নবসারীদা লুপা করোর ৪৭,০০০ হেনবগী তোঙান-তোঙানবা চাউখৎ-থৌরাংগী প্রোজেকশিং মীয়ামদা কৎথোকখ্রে অমসুং উরেপ-উয়ুং তমখ্রে। প্রোজেকশিংগী মনুংদা মৈ পুথোকপা, লম্বী, রেল, কন্নেক্তিবিতি, সহর চাউখৎহনবা, ঈশিং পীবা, লাইরিক-লাইশু অমসুং তেক্সতাইল য়াওরি।
থৌরম অদুদা তিনখিবা মীয়ামদা ৱা ঙাংবদা, প্রধান মন্ত্রীনা হায়খি থৌরম অসি ঙসি গুজরাতকী অহুমশুবা থৌরম্নি অমসুং ঙসি অঙনবা শরুক্তা গুজরাতকী পাসুপালাকশিং(শা-ষন ব্রিদরশিং) অমসুং দাইরি ইন্দস্ত্রিগা মরী লৈনবা মীওশিংগী থৌরম অমা শরুক য়াখ্রে। মেহসনাদা বলিনাথ মহাদেব লাইশঙদা প্রান প্রাতিস্থাদা শরুক য়াখি। হৌজিক ঐ চাউখৎ-থৌরাংগী কুহ্মৈ অসি শরুক য়ানবা নবসারীদা লাক্লে। থৌরম অসিদা শরুক য়ারিবা মীওইশিং মখোয়গী মোবাইল ফোনশিংগী ফ্লাস লাইতশিং থান্নবা অমসুং চাউখৎ-থৌরাংগী অচৌবা কুহ্মৈ অসিগী শরুক অমা ওইনবা মহাক্না তকশিনখি।
তেক্সতাইল, ইলেক্ত্রিসিতি অমসুং সহর শেমগৎপগী হিরমশিংদা বদোদারা, নবসারী, বরুচ অমসুং সুরত্তা ঙসি লুপা করোর ৪০,০০ হেনবগী প্রোজেকশিংগীদমক প্রধান মন্ত্রীনা মীয়ামদা হরাওবা ফোঙদোকখি।
মোদী কি গরেন্তিগী মরমদা ঙাংনরিবা অসিগী মতাংদা প্রধান মন্ত্রীনা হায়খি মহাক্না পীখিবা থাজবশিং থবক ওইনা পাংথোকই হায়বসি মতম কয়াগী মমাঙদগী গুজরাতকী মীয়াম্না খঙলবা অচুম্বা অমনি। মহাক্না চীফ মিনিস্তর ওইরিঙৈদা ‘ফাইব এফ’ হায়বদি ফার্ম, ফার্ম তু ফাইবর, ফাইবর তু ফেক্তরি, ফেক্তরি তু ফেসন, ফেসন তু ফোরেনগী মতাংদা ৱা ঙাংখি। মদুগী পান্দমদি তেক্সতাইলশিংগী মপুংফাবা সপ্লাই অমসুং ভেলু চেন অমা লৈহনবনি। ঙসিদি সুরতকী সিল্ক সিতি অসি নবসারী ফাওবা য়ৌরে। সেক্তর অসিদা খ্বাইদগী চাউবা পোৎথোক পুথোকপা লৈবাকশিং অমসুং মপান্দা থাদোকপা লৈবাকশিংগা ভারতকা চাংদম্নবা ঙম্লে।
গুজরাতকী তেক্সতাইল ইন্দস্ত্রিগী থৌদাংগী মতাংদা প্রধান মন্ত্রীনা হায়খি সুরত্তা পুথোক্লিবা তেক্সতাইলশিংগী তোপ-তোপ্পা মশক অমা লৈরে। পি.এম মিত্রা পার্ক লোইশিল্লকপা মতমদা লমদম অসিদা অহোংবা অমা লাক্লগনি। পার্ক অসি লুপা করোর ৩,০০০ চঙনা শেমগৎকদবনি। পি.এম মিত্রা পার্কনা ককপা, তুবা, গিন্নিং, গার্মেন্তস, তেক্নিকেল তেক্সতাইল অমসুং তেক্সতাইল মেছিন্নরিগুম্বা থবকশিংদা ভেলু-চেন ইকোসিস্তেম অমা শেমগৎকনি অমসুং থবক ফংবা হেনগৎহনগনি। পার্ক অসিদা শিন্মীশিংগী য়ুমশিং, লোজিস্তিক্স পার্ক, পোৎ-চৈ থমফম, লায়য়েংশঙ অমসুং ত্রেনিং অমসুং স্কিল দিবলপমেন্তগী খুদোংচাবশিং লৈগনি।
লুপা করোর ৮০০ চঙনা তাপী রিভর বরাজ শানবা উরেপ-উয়ুং তম্বগী মতাংদা প্রধান মন্ত্রীনা হায়খি বরাজ অসি শাবা লোইশিল্লবা মতুংদা সুরত্তা ঈশিং ফংদবগী অৱাবশিং কোকহল্লগনি অমসুং ঈশিং ইচাউগুম্বা ফিবমশিং ঙাকথোকপদা মতেং পাংলগনি।
নোংমগী পুন্সিদা অমসুং উদোগ চাউখৎহনবদা ইলেক্ত্রিসিতিগী মরুওইবা পল্লদুনা, প্রধান মন্ত্রীনা হায়খি গুজরাত্তা চহি২০-২৫গী মমাঙদা য়াম্না তোইনা মৈ মুৎলমখি। মহাক্না গুজরাতকী চীফ মিনিস্তর ওইরকপা মতমদা খুদোংচাদবা কয়া মায়োক্নখি অমসুং মপান লৈবাকশিংদগী কোয়লা অমসুং গ্যাস পুশিল্লকপা অসি অচৌবা খুদোংচাদবা অমা ওইখি। ঈশিংদগী মৈ পুথোক্নবা খুদোংচাবা মরাংকাইনা লৈখিদে। “মোদী হাই তো মুমকিন হাই”। মৈ পুথোকপদা থেংনরিবা অৱাবশিং কোকহন্নবা সরকারনা থবক কয়া পায়খৎখি। অৱাংবা থাক্কী তেক্নোলোজি শীজিন্নবা পুক্নিং থৌগৎখি অমসুং সোলার অমসুং ৱিন্দ ইনর্জি পুথোকপগী থবক পায়খৎখি অমসুং মসিদগী ঙসি গুজরাত্তা য়াম্লবা ইলেক্ত্রিসিতি পুথোক্লে।
নিউক্লিয়ারদগী মৈ পুথোকপগী মতাংদা প্রধান মন্ত্রীনা হায়খি ঙসি লৈবাক মীয়ামদা কাক্রাপার এতোমিক পৱার স্তেসন্দা অনৌবা প্রেসরাইজ হেভি ৱাতর রিয়েক্তর অনি: KAPS-3 অমসুং KAPS-4 কৎথোকখ্রে। হায়রিবা রিয়েক্তরশিং অসি অত্মানির্ভর ভারতকী খুদমশিংনি অমসুং মসিনা গুজরাত চাউখৎহনবদা মতেং পাংগনি।
প্রধান মন্ত্রীনা হায়খি অনৌবা ইনফ্রাস্ত্রকচরশিংগা লোয়ননা হান্না অমুক্ত ওইখিদ্রিবা মওংদা খা থংবা গুজরাত চাউখৎলে। পি.এম সুর্য়াঘর স্কিমশিংনা য়ুমশিংগী মৈগী বিল হন্থহনবা খক নত্তনা অহেনবা শেন তান্নবগী পাম্বৈ অমসু ওইরগনি। লৈবাক অসিগী অহানবা বুল্লেত ত্রেন লমদম অসি ফাওদুনা চেল্লগনি অমসুং লমদম অসিগা লৈবাক অসিগী অচৌবা উদোগকী মফমশিং-মুম্বাই অমসুং সুরতকা শম্নহল্লগনি।
প্রধান মন্ত্রীনা হায়খি উদোগ চাউখৎপগীদমক হৌজিক মীয়াম্না নবসারী মশক খঙলে। নবসারী য়াওনা নোংচুপ গুজরাত শীনবা থুংনা মসিগী লৌউ-শিংউ চাউখৎপগীদমক মীয়াম্না খঙনরে। লমদম অসিগী লৌমীসিংদা কান্নবশিং ফংহন্নবা সরকারনা থবক কয়া পায়খৎলে। লমদম অসিদা উহৈ-ৱাহৈ থাবগী ইহৌ অমা লৈরে অমসুং মালেমদা মমিং চৎলবা হাপুস অমসুং বালসারি মখলগী হৈনৌশিং অমসুং চিকু নবসারীদগী পুথোক্লি। পি.এম কিষান সম্মান নিধিগী মখাদা লৌমীশিংনা লুপা করোর ৩৫০ হেনবগী শেন্থং ফংখ্রে।
প্রধান মন্ত্রীনা মখা তানা হায়খি নহারোলশিং, লায়রবশিং, লৌমীশিং অমসুং নুপীশিংগী ফিবম ফগৎহন্নবা মহাক্না গরেন্তি পীরি। গেরেন্তি অসি স্কিমশিং খক শেম্বগী মথক্তা মখোয় মপুংফানা থবক ওইনা পাংথোক্লি। মমাঙদা ত্রাইবেলশিংগী খুঙ্গংশিং অমসুং সমুদ্র মপানগী খুঙ্গংশিং মীরাইরমখি। হৌজিক পাল্লিবা সরকার অসিনা উমারগামদগী হৌরগা অম্বাজি ফাওবা তঙাইদবা খুদোংচাবশিং ফংহল্লে। জাতিগী থাক্তশু, চাউখৎপগী থাকশিং য়ৌদ্রিবা এস্পিরেসন দিস্ত্রিক ১০০ হেন্না লৈবাক অসিগী অতৈ মফমশিংগুম চাউখৎহল্লে।
শ্রী মোদীনা মখা তানা হায়খি অতোপ্পশিংদা থাজবা লৈরক্ত্রবা মতমদা মোদীগী গরেন্তি লাকই। লায়রবগী পাক্কাগী য়ুম, লেম্না চেঙ, মৈ অমসুং তোতি ঈশিং পীবা অমসুং লায়রবা, লৌমীশিং, দুকান ফম্বশিং অমসুং শিন্মীশিংগী ইন্সুরেন্স স্কিম অসি মোদীগী গরেন্তিনি। মোদীগী গরেন্তিনা মরম ওইদুনা মসি ঙসি থবক ওইনা পাংথোক্লে।
ত্রাইবেলশিংগী লমদমদা সিক্কল সেল এনেমিয়াগী অৱাবা মায়োক্নরিবা অসিগী মতাংদা প্রধান মন্ত্রীনা হায়খি জাতিগী থাক্তা লায়না অসি মুৎথৎনবা অকনবা থবক পায়খৎপা দরকার ওইরে। মহাক্না চীফ মিনিস্তর ওইরিঙৈদা রাজ্য অসিদা সিক্কল সেল এনেমিয়া থেংননবা অকনবা থবকশিং পায়খৎখি। লায়না অসি মপুংফানা থেংননা জাতিগী থাক্তা থবক কয়া পায়খৎলে। সিক্কল সেল এনেমিয়াদগী নিংতম্নবা হৌজিক ঐখোয়না নেসনেল মিসন অমা হৌদোক্লে। লৈবাক শীনবা থুংনা লৈরিবা ত্রাইবেলশিংগী লমদমদগী লায়না অসি মুৎথৎনবা সরকারনা পান্দম থম্লি। মিসন অসিগী মখাদা, লৈবাক শীনবা থুংনা ত্রাইবেলশিংগী লমদমদা সিক্কল সেল এনেমিয়াগী স্কৃন্নিং পাংথোক্লে। ত্রাইবেলশিংগী লমদমদা মেদিকেল কলেজশিংশু হাংদোক্লগনি।
প্রধান মন্ত্রীনা হায়খি লায়রবা নত্ত্রগা মিদল ক্লাস ওইগেরা, খুঙ্গং নত্ত্রগা সহর ওইগেরা, ঐখোয়গী সরকারগী থবক্তি মীওই খুদিংমক্কী হিংবগী থাক ৱাংখৎহনবনি। পুন্না চাউখৎমিন্নবা হায়বসি সরকারগী পান্দমনি। মমাঙদা শেন-থুমগী ফিবম মচিং লেংদনা লৈরমখি। শেন-থুমগী ফিবম মচি লেংদবা হায়বদি লৈবাক অসিগী অকক্নবা রিছোর্স লৈ হায়বনি।
হায়রিবা মতম অদুদা খুঙ্গং অমসুং সহর চাউখৎপদা অচৌবা চৈথেং অমা পীখিবা অদু শন্দোক্না তাক্লদুনা, প্রধান মন্ত্রীনা হায়খি ভারতকী ইকোনোমি অসি ২০১৪দা ১১শুবা মফমদা লৈরম্বদগী হৌজিক মালেমদা খ্বাইদগী চাউবা ইকোনোমিগী ৫শুবা মফমদা লৈরি। মসিনা তাক্লিবদি ঙসি ভারতকী মীয়ামদা চাদিং তৌনবা শেন য়াম্না লৈরে অমসুং ভারতনা চাদিং তৌরে হায়বনি। মরম অদুনা, ঙসি লৈবাক্কী অপীকপা সহরশিং ফাওবদা অফবা চৎথোক-চৎশিনগী ইনফ্রাস্ত্রকচর শেমগৎলে। অপীকপা সহরশিংদা নোংথক্কী চৎথোক-চৎশিনগী খুদোংচাবশিং ফংহল্লে অমসুং লায়রবশিংগী পাক্কাগী য়ুম করোর ৪ হেন্না শাখ্রে।
প্রধান মন্ত্রীনা হায়খি ঙসি মালেম্না দিজিতেল ইন্দিয়া মশক খঙলে। দিজিতেল ইন্দিয়ানা অনৌবা স্তার্দ-অপশিং শেমগৎতুনা অপীকপা সহরশিংদা অওনবশিং পুরক্লে অমসুং শান্নবগী লমদা নহারোলশিংদা অওনবা কয়া পুরক্লে। অসিগুম্বা অপীকপা সহরশিংদা নিও-মিদল ক্লাস অমা থোরকপা অসিনা মালেমদা ভারতনা ৩শুবা খ্বাইদগী চাউবা ইকোনোমি ওইরকপদা মতেং পাংগনি।
প্রধান মন্ত্রীনা হায়খি চাউখৎ-থৌরাং অমসুং হেরিতেচ অনিমক সরকারনা মরুওইনা লৌরি। লমদম অসি ভারতকী লাইনিং অমসুং পুৱারিগী মরুওইবা মফম অমনি অমসুং মফম অসি নিংতম ইহৌ নত্ত্রগা লৈবাক শেমগৎপগী মরুওইবা মফম অমনি। রাজনিতিগী মীচং-মীখায় নাইবা, পেনহলবা অমসুং শেঞ্জা-থুমজনা মরম ওইদুনা লমদম অসি মীরাইদুনা লাকখি। ঙসিদি ভারতকী ইনাকখুল্লবা হেরিতেচগী খোন্থাং অসি মালেম শীনবা থুংনা তারে। দান্দি সোল্ত সত্যগ্রাহগী মফমদা দান্দি মেমোরিএল অমা শেমগৎলে অমসুং সারদার পতেলনা পাংথোক্লম্বা থবকশিংদা কৎথোকপা ওইনা স্তেচু ওফ য়ুনিতি শাখিবনি।
লোইশিল্লকপদা, প্রধান মন্ত্রীনা হায়খি মথং চহি ২৫দা লৈবাক অসি চাউখৎনবা লম্বী শেম্বা লোইরে। মথং চহি ২৫দা, ঐখোয়না বিকসিত গুজরাত অমা অমসুং বিকসিত ভারত অমা শেমগনি।
থৌরম অদুদা শরুক য়াখিবশিংগী মনুংদা গুজরাতকী চীফ মিনিস্তর শ্রী ভুপেন্দ্র পতেল অমসুং এম.পি শ্রী সি.আর পতিল, তোঙান-তোঙানবা এম.পিশিং, এম.এল.এশিং অমসুং গুজরাত সরকারগী মিনিস্তরশিং য়াওখি।
নুঙগীৱারোল
প্রধান মন্ত্রীনা মীয়ামদা কৎথোকখিবা চাউখৎ-থৌরাংগী প্রোজেকশিংগী মনুংদা বদোদারা মুম্বাই এক্সপ্রেসৱে; বারুচ, নবসারী, বালসাদতা তোঙান-তোঙানবা লম্বীগী প্রোজেকশিং; তাপীদা খুঙ্গংদা থক্নবা ঈশিং পীনবা প্রোজেক; বারুচতা লৈনুংগী দ্রেনেজ প্রোজেক য়াওরি। নবসারীদা পি.এম মেগা ইন্তিগ্রেতেদ তেক্সতাইল রিজন এন্দ এপ্পারেল (পি এম মিত্রা) পার্ক শানবা থবক প্রধান মন্ত্রীনা হৌদোকখি।
থৌরম অসিদা প্রধান মন্ত্রীনা উরেপ-উয়ুং তমখিবা প্রোজেকশিংগী মনুংদা বারুচ-দাহেজ এসেস কন্ত্রোল এক্সপ্রেসৱে; বদোদারাগী এস.এস.জি হোস্পিতালদা তোঙান-তোঙানবা প্রোজেকশিং; বদোদারাদা রিজনেল সাইন্স সেন্তর; সুরত, বদোদারা অমসুং পঞ্চমহলদা রেলৱে গেজ ওনখৎপগী তোঙান-তোঙানবা প্রোজেকশিং; বারুচ, নাভসারি অমসুং সুরত্তা তোঙান-তোঙানবা লম্বীগী প্রোজেকশিং; বালসাদতা থক্নবা ঈশিং পীনবা স্কিমশিং অমসুং নর্মাদা জিলাদা স্কুল অমসুং হোস্তেল বিল্দিং অমসুং অতোপ্পা প্রোজেকশিং য়াওখি।
প্রধান মন্ত্রীনা সুরত মিনিউনিসিপাল কোর্পোরেসন, সুরত অর্বান দিবলপমেন্ত ওথোরিতি অমসুং দ্রিম সিতিগী তোঙান-তোঙানবা চাউখৎ-থৌরাংগী প্রোজেকশিং মীয়ামদা কৎথোকখি অমসুং উরেপ-উয়ুং তমখি।
প্রধান মন্ত্রীনা কাক্রাপার এতোমিক পৱার স্তেসন(কে এ পি এস) য়ুনিত-৩ অমসুং য়ুনিত-৪ দা অনৌবা প্রেসরাইজ হেভি ৱাতর রিয়েক্তর(পি ঐচ দব্লিউ আর) অনি মীয়ামদা কৎথোকখি। নিউক্লিয়ার কোওপরেসন ওফ ইন্দিয়া লিমিতেদ( এন পি সি আই এল)না লুপা করোর ২২,৫০০ হেন্না চঙনা শাবা কাক্রাপার এতোমিক পৱার স্তেসন(কে এ পি এস) য়ুনিত-৩ অমসুং য়ুনিত-৪ দা অপুনবা মেগাৱাত ১৪০০ পুথোকপা ঙমগনি অমসুং মসি লৈবাক অসিনা শাজবা খ্বাইদগী চাউবা প্রেসরাইজ হেভি ৱাতর রিয়েক্তরনি। মখোয় মখল অসিগী অহানবা রিয়েক্তরশিংনি অমসুং মালেমদা খ্বাইদগী ফবশিংগা চাংদম্নবা য়ারবা অশোই-অঙাম থোক্তনা খুদোংচাবশিং য়াওরে। অপুনবা ওইনা রিয়েক্তর অনি অসিনা চহি অমদা ইলেক্ত্রিসিতি য়ুনিত বিল্লিয়ন ১০.৪ রোম পুথোক্কনি অমসুং গুজরাত, মহারাস্ত্রা, মধ্য প্রদেস, ছতিসগর, গৱাগুম্বা রাজ্যশিং অমসুং দাদ্রা অমসুং নগর হাভেলি অমসুং দমন অমসুং দিয়ুগী কঞ্জুমরশিংদা কান্নবা পীগনি।
****
(Release ID: 2008478)
Visitor Counter : 85
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Tamil
,
Telugu
,
Kannada
,
Malayalam