انڈین ایگریکلچرل ریسرچ انسٹی ٹیوٹ (آئی اے آر آئی)، نئی دہلی نے ممتاز زرعی سائنسدان اور ہندوستان میں سبز انقلاب کے موجد پروفیسر ایم ایس سوامی ناتھن کو باوقار بھارت رتن ایوارڈ سے نوازنے کے اعتراف میں آج ایک خصوصی تقریب کا اہتمام کیا۔

ڈاکٹر ہمانشو پاٹھک، سکریٹری، ڈی اے آر ای اور ڈی جی، آئی سی اے آر اور صدر، این اے اے ایس نے مختصر طور پر پروفیسر ایم ایس سوامی ناتھن کی اہم کامیابیوں اور ان کی زندگی کے مظاہر پر روشنی ڈالی۔ انہوں نے سی آر آر آئی، کٹک میں پروفیسر ایم ایس سوامی ناتھن کے ساتھ کام کرنے کی اپنی یادیں بھی تازہ کیں۔

ڈاکٹر اے کے سنگھ، ڈائریکٹر، آئی سی اے آر-آئی اے آر آئی اور سکریٹری، این اے اے ایس نے کہا کہ یہ ملک کے لیے بڑے اعزاز اور فخر کی بات ہے کہ پروفیسر ایم ایس سوامی ناتھن کو 9 فروری 2024 کو باوقار بھارت رتن ایوارڈ سے نوازا گیا۔ انہوں نے پروفیسر ایم ایس سوامی ناتھن کی زندگی بھر کی لگن اور زرعی تحقیق، پائیدار ترقی اور غذائی تحفظ میں نمایاں شراکت پر روشنی ڈالی۔ انہوں نے اس بات پر زور دیا کہ کس طرح پروفیسر سوامی ناتھن کی دور اندیش قیادت اور اختراعی نقطہ نظر نے ہندوستان اور اس سے باہر کے زرعی منظر نامے پر نمایاں طور پر اثر ڈالا ہے۔

ڈائس پر موجود دیگر معززین میں چیئرپرسن، پروٹیکشن آف پلانٹ ورائٹیز اینڈ فارمرز رائٹس اتھارٹی، ڈاکٹر ٹی موہا پاترا، چانسلر، سنٹرل ایگریکلچرل یونیورسٹی، امپھال ڈاکٹر آر بی سنگھ اور ٹی اے اے ایس کے بانی چیئرمین ڈاکٹر آر ایس پروڈہ شامل تھے۔ ڈاکٹر ایچ ایس گپتا، ڈاکٹر پنجاب سنگھ، ڈاکٹر کے وی پربھو اور بہت سے دوسرے لوگ آن لائن طور پر پروگرام میں شامل ہوئے۔

پروفیسر ایم ایس سوامی ناتھن، جنہیں ہندوستان کے سبز انقلاب کے موجد کے نام سے جانا جاتا ہے، کو 1960-70 کی دہائی کے دوران گندم اور چاول کی فصلوں کی پیداواری صلاحیت اور پیداوار میں اضافہ کرنے کے ان کے تاریخی کام کے ذریعے لاکھوں لوگوں کو فاقہ کشی سے بچانے کے لیے جانا جاتا ہے۔ انہوں نے ”سبز انقلاب“ کو ”سدا بہار انقلاب“ میں تبدیل کرنے کا تصور بھی فراہم کیا۔ وہ پسماندہ لوگوں کو فائدہ پہنچانے کے لیے سائنس کی طاقت پر پختہ یقین رکھتے تھے اور کسانوں کو علم اور وسائل سے با اختیار بنانے کے لیے آواز اٹھاتے تھے۔ انہوں نے 1988 میں ایم ایس سوامی ناتھن ریسرچ فاؤنڈیشن کی بنیاد رکھی۔ انہوں نے اپنی آخری سانس تک معاشی ترقی کی حکمت عملی تیار کرنے اور فروغ دینے کے لیے وہاں کام کیا جس کا براہ راست ہدف غریب کسانوں، خاص طور پر دیہی علاقوں میں خواتین کے روزگار کو بڑھانا تھا۔

اس جشن میں پروفیسر ایم ایس سوامی ناتھن کے شاندار کیریئر اور پائیدار میراث پر تقاریر، پرزنٹیشن اور خیالات پیش کیے گئے۔ ڈائس پر موجود معززین کو زراعت، تحقیق اور دیہی ترقی میں ان کی گراں قدر خدمات کے لیے اظہار تشکر اور تعریف کرنے کا موقع ملا۔ جب انہوں نے نوبل انعام یافتہ ڈاکٹر نارمن بورلاگ کے ساتھ 1960 کی دہائی میں سبز انقلاب کے مقصد کی حمایت کی، اس کے بعد انہوں نے زراعت کے تمام شعبوں کو شامل کرتے ہوئے پائیدار ترقی کے لیے سدا بہار انقلاب کی وکالت کی۔ پروفیسر سوامی ناتھن ہندوستان میں جن کئی عہدوں پر فائز رہے، ان میں شامل ہیں ڈائریکٹر، آئی اے آر آئی (1961 تا 72)؛ ڈائریکٹر جنرل، آئی سی اے آر اور نو تشکیل شدہ ڈی اے آر ای کے سیکرٹری (1972 تا 79)؛ زراعت سیکرٹری، حکومت ہند (1979)؛ قائم مقام ڈپٹی چیئرمین اور ممبر، پلاننگ کمیشن (1980-82)۔ اس کے علاوہ، وہ پہلے ہندوستانی تھے جو انٹرنیشنل رائس ریسرچ انسٹی ٹیوٹ، فلپائن (1982 تا 88) کے ڈائریکٹر جنرل بنے، اور ان کی قیادت کو 1987 میں پہلے ورلڈ فوڈ پرائز کے ساتھ تسلیم کیا گیا۔ ان کا سب سے اہم کردار 2004 میں سامنے آیا، جب انہیں کسانوں سے متعلق قومی کمیشن کا چیئرمین مقرر کیا گیا۔ پروفیسر سوامی ناتھن نے آل انڈیا ایگریکلچرل ریسرچ سروس (اے آر ایس) کی تشکیل میں اہم کردار ادا کیا۔

اپنی بڑی عمر کے باوجود، سوامی ناتھن تحقیق اور وکالت میں سرگرم رہے۔ وہ اپنی تحریروں، عوامی تقریروں کی مصروفیات، اور کئی فورم اور کانفرنسوں میں حاضری کے ذریعے دیہی ترقی، غذائی تحفظ، اور پائیدار زراعت کے بارے میں بات چیت میں اضافہ کرتے رہے۔ پروفیسر سوامی ناتھن نے زرعی ترقی، تحقیق اور پالیسی کی وکالت کے لیے وقف اداروں اور انجمنوں کے قیام اور دیکھ بھال میں کلیدی کردار ادا کیا۔ ان کے وژن اور اقدار کو اب بھی ان اداروں نے برقرار رکھا ہے۔ پروفیسر ایم ایس سوامی ناتھن کی بیٹیوں، یعنی ڈاکٹر نتھیا، ڈاکٹر مدھورا اور ڈاکٹر سومیا، ایم ایس ایس آر ایف، چنئی نے پروگرام میں اپنی ورچوئل موجودگی درج کروائی اور ان کی زندگی کے گوشوں پر تبادلہ خیال کیا۔

                                               **************

ش ح۔ ف ش ع- م ف

13-02-2024

U: 4923