کامرس اور صنعت کی وزارتہ
جرمنی کے نیورمبرگ بین الاقوامی کھلونا میلے میں ہندوستانی کھلونا سازوں کو بڑے پیمانے پر آرڈر موصول ہوئے
لازمی معیاری اصول، کسٹم ڈیوٹی میں اضافہ اور کھلونوں پر قومی ایکشن پلان (این اے پی ٹی) جیسے سرکاری اقدامات عالمی توجہ حاصل کرنے والے اعلیٰ معیار کے کھلونوں کی تیاری کی حوصلہ افزائی کرتے ہیں
Posted On:
05 FEB 2024 7:07PM by PIB Delhi
برآمد کنندگان کے مطابق، 30 جنوری 2024 سے 3 فروری 2024 تک جرمنی کے نیورمبرگ میں پانچ روزہ بین الاقوامی کھلونا میلے میں شرکت کرنے والے ہندوستانی کھلونا سازوں کو 10 ملین امریکی ڈالر سے زیادہ کے بھاری آرڈر موصول ہوئے ہیں جہاں انہوں نے اعلیٰ معیار کی مصنوعات کی نمائش کی تھی۔ ہندوستانی کھلونا صنعت نے اس بات پر روشنی ڈالی کہ لازمی معیار کے اصول، کسٹم ڈیوٹی میں اضافہ اور کھلونوں پر قومی ایکشن پلان (این اے پی ٹی) جیسے حکومتی اقدامات نے اعلیٰ معیار کی مصنوعات کی تیاری میں مدد کی ہے جسے بین الاقوامی پلیٹ فارم پر پذیرائی ملی ہے۔ ہندوستانی کھلونا سیکٹر صحت مند شرح سے ترقی کر رہا ہے اور عالمی کھلاڑیوں کے ساتھ مقابلہ کر رہا ہے۔ میلے میں سب سے زیادہ مقبول زمرے لکڑی کے کھلونے اور تعلیمی آموزش والے کھلونوں سے متعلق تھے۔
کھلونوں کے برآمد کنندگان کے مطابق امریکہ، برطانیہ، جنوبی افریقہ اور جرمنی جیسے ممالک کے خریداروں نے ان کی مصنوعات میں دلچسپی ظاہر کی اور اچھی تعداد میں آرڈر دیے۔ اس سال ہندوستان سے 55 سے زیادہ شرکاء تھے۔
نیورمبرگ کھلونا شو میں ہندوستانی کھلونا سازوں نے کہا کہ خریداروں کے نقطہ نظر اور رویے میں کافی تبدیلی دیکھی گئی ہے۔ عزت مآب وزیر اعظم جناب نریندر مودی کے کھلونا معیشت کو بڑھاوا دینے کے مطالبے کی وجہ سے ہندوستان کو اب ایک منافع بخش متبادل منزل کے طور پر پہچانا جا رہا ہے۔
ہندوستانی کھلونا سازوں نے یہ بھی اظہار کیا کہ باوقار پلیٹ فارم نے ہندوستانی مینوفیکچرنگ ماحولیاتی نظام کے ساتھ بین الاقوامی مشترکہ منصوبوں کے دروازے کھول دیے ہیں جس سے عالمی سطح پر پذیرائی حاصل ہوئی ہے۔ ہندوستانی صنعت کے ساتھ شراکت میں عالمی کھلاڑیوں کی دلچسپی نے گھریلو صنعت کاروں کو بڑھتی ہوئی بین الاقوامی اور قومی مارکیٹ دونوں کے لیے اپنی مینوفیکچرنگ صلاحیت کو بڑھانے کے لیے ایک تحریک فراہم کی ہے۔
’میڈ اِن انڈیا‘ کھلونوں کی ابھرتی ہوئی بین الاقوامی پہچان سے توقع کی جاتی ہے کہ برآمدات میں اضافے میں مدد ملے گی۔ کھلونوں کی مجموعی درآمد میں 52 فیصد کی نمایاں کمی مالی سال 2014-15 میں 332.55 ملین امریکی ڈالر سے مالی سال 2022-23 میں 158.7 ملین امریکی ڈالر تک اور کھلونوں کی برآمدات میں 239 فیصد کا اضافہ مالی سال 2014-15 میں 96.17 ملین امریکی ڈالر سے مالی سال 2022-23 میں 325.72 ملین امریکی ڈالر پہلے ہی ریکارڈ کیے جا چکے ہیں۔
جب کہ گھریلو مینوفیکچرر پہلے ہی جرمنی میں کامیابی کا تجربہ کر چکے ہیں، بین الاقوامی سطح پر مشہور بڑے کھلاڑیوں بشمول اسنیپ ڈیل (Snapdeal) اور وال مارٹ (Walmart) کے ساتھ شراکت کی بھی تیاری کی جا رہی ہے۔ حکومت اور صنعت کی مضبوط کوششوں سے یہ شعبہ مستقبل میں کامیابی کے لیے تیار ہے۔
نیورمبرگ بین الاقوامی کھلونا میلہ 3 فروری 2024 کو اختتام پذیر ہوا۔ دنیا کے سب سے بڑے کھلونا میلوں میں سے ایک میں 65 سے زیادہ ممالک کے 2,000 سے زیادہ نمائش کنندگان نے شرکت کی۔
************
ش ح۔ ف ش ع- م ف
U: 4458
(Release ID: 2002791)
Visitor Counter : 56