مرکزی وزیر داخلہ اورباہمی تعاون کے وزیر جناب امت شاہ نے آج بہار کے پٹنہ میں مشرقی زونل کونسل کی 26ویں میٹنگ کی صدارت کی۔ بہار کے وزیر اعلیٰ نتیش کمار اور اڈیشہ، مغربی بنگال، بہار اور جھارکھنڈ کے سینئر وزراء نے میٹنگ میں شرکت کی۔ بین ریاستی کونسل سکریٹریٹ کے سکریٹری، رکن ممالک کے چیف سکریٹریز، ریاستی حکومتوں اور مرکزی وزارتوں اور محکموں کے سینئر عہدیدار بھی میٹنگ میں موجود تھے۔

اپنے خطاب میں مرکزی وزیر داخلہ جناب امت شاہ نے کہا کہ ملک کا ثقافتی دارالحکومت ہونے کے علاوہ مشرقی خطہ قدیم زمانے سے کئی بڑے تعلیمی اداروں کا مرکز بھی رہا ہے۔ انہوں نے کہا کہ مشرقی خطہ میں تعلیم کے میدان میں بہت تجربات ہوئے ہیں اور مقابلہ جاتی امتحانات میں بھی مشرقی علاقے کے بچے سب سے زیادہ کامیاب ہوتے ہیں۔ وزیر داخلہ نے یہ بھی کہا کہ مشرقی خطہ نے پورے ملک کی صنعتی ترقی کی بنیاد رکھی ہے اور اس خطے کے بہت سے محب وطن لوگوں نے آزادی سے پہلے اور بعد میں ملک کی تعمیر نو میں اہم کردار ادا کیا ہے۔ یہ خطہ معدنی وسائل اور پانی سے مالا مال ہے اور مشرقی ریاستیں جیسے بہار، اڑیسہ، جھارکھنڈ اور مغربی بنگال پورے ملک کی ضروریات کے لیے تقریباً تمام معدنی وسائل مہیا کرتی ہیں۔

جناب امت شاہ نے کہا کہ وزیر اعظم جناب نریندر مودی کے تعاون پر مبنی وفاقیت کے جذبے کو تقویت دینے کا وژن گزشتہ 9 برسوں میں پورا ہوا ہے۔ جناب نریندر مودی کے وزیر اعظم بننے کے بعد زونل کونسل کے اجلاسوں کی تعداد میں اضافہ کو اجاگر کرتے ہوئے وزیر داخلہ نے کہا کہ 2004 سے مئی 2014 تک زونل کونسلوں اور ان کی قائمہ کمیٹیوں کی کل میٹنگوں کی تعداد صرف 25 تھی اور اس مدت کے دوران ہر سال اوسطاً 2.7 اجلاس منعقد ہوتے تھے۔ لیکن گزشتہ 9 برسوں میں جون 2014 سے اب تک، کووڈ-19 کی وبا کے باوجود، زونل کونسلز اور ان کی قائمہ کمیٹیوں کے کل 56 اجلاس منعقد ہوئے اور ہر سال اوسطاً 6.2 اجلاس منعقد ہوئے۔ اس سال اب تک کل 9 اجلاس ہو چکے ہیں جن میں زونل کونسلز کے 4 اجلاس اور اسٹینڈنگ کمیٹیوں کے 5 اجلاس شامل ہیں۔ انہوں نے مزید کہا کہ یہ دوگنا سے زیادہ اضافہ وزیر اعظم مودی کے ٹیم انڈیا کے تصور کو ظاہر کرتا ہے۔

تقریباً تین گھنٹے تک جاری رہنے والی میٹنگ سے خطاب کرتے ہوئے وزیر داخلہ نے کہا کہ زونل کونسلوں کے اجلاسوں میں 1157 مسائل کو حل کیا گیا ہے۔ انہوں نے کہا کہ زونل کونسل کے اجلاسوں میں سیاسی معاملات پر اختلافات سے گریز کیا جائے اور معاملات کو خوش اسلوبی سے حل کرنے کی کوشش کی جائے۔ جناب امت شاہ نے کہا کہ قومی اہمیت کے کئی مسائل کو زونل کونسل کے اجلاسوں کے ایجنڈے میں بھی شامل کیا گیا ہے۔ ان میں پوشن ابھیان (غذائیت مہم) کے ذریعے بچوں میں غذائیت کی کمی کو ختم کرنا، اسکول چھوڑنے والے بچوں کی شرح کو کم کرنا، تیز رفتار تحقیقات کے لیے فاسٹ ٹریک اسپیشل کورٹس(ایف ٹی ایس سیز) کو فعال کرنا اور خواتین اور بچوں کے خلاف عصمت دری کے مقدمات کو تیزی سے نمٹانا شامل ہیں۔ ہر گاؤں کے 5 کلومیٹر کے اندر بینکوں/انڈیا پوسٹ پیمنٹ بینک کی شاخوں کی سہولت، ملک میں دو لاکھ نئی پرائمری ایگریکلچرل کریڈٹ سوسائٹیز(پی اے سی ایسز) کی تشکیل اور ملک میں موجود تمام پی اے سی ایسز کو مضبوط کرنا بھی شامل کیا گیا ہے۔ انہوں نے کہا کہ وزیر اعلیٰ، وزیر اور چیف سکریٹری کی سطح پر ان مسائل کا ہر تین ماہ بعد جائزہ لینے کی ضرورت ہے۔ میٹنگ میں کان کنی، بعض اشیاء پر مرکزی مالی امداد، بنیادی انفراسٹرکچر کی تعمیر، حصول اراضی اور زمین کی منتقلی، پانی کی تقسیم، براہ راست بینیفٹ ٹرانسفر اسکیم کے نفاذ، ریاست کی تنظیم نو اور علاقائی سطح پر مشترکہ دلچسپی کے امور پر بھی تبادلہ خیال کیا گیا۔ .

جناب امت شاہ نے کہا کہ میٹنگ میں چاروں ریاستوں - بہار، جھارکھنڈ، مغربی بنگال اور اڈیشہ نے متعلقہ ریاستوں میں نافذ کیے جانے والے اچھے طور  طریقوں کے بارے میں متاثر کن پرزینٹیشن دیئے ہیں۔ انہوں نے کہا کہ یہ اچھے طریقے دیگر ریاستوں کو مثبت قدم اٹھانے کی ترغیب دیں گے۔ میٹنگ میں بتایا گیا کہ حاجی پور-سوگولی نئی ریلوے لائن منصوبے کے لیے زمین کے حصول کا کام تقریباً مکمل ہو چکا ہے۔ اس کے علاوہ، مغربی بنگال کے نابا دویپ گھاٹ-نابادویپ دھام نیو ریلوے پروجیکٹ (15 کلومیٹر) کے لیے زمین کے حصول کا کام بھی شروع ہو گیا ہے۔ مزید برآں، کرشن نگر-نابا دویپ گھاٹ گیج کی تبدیلی (12.2 کلومیٹر) یعنی کرشن نگر-امگھاٹہ (8.30 کلومیٹر) کے مکمل حصے پر کام شروع کیا گیا ہے۔

بہار میں ذات پات پر مبنی سروے کے بارے میں وزیر داخلہ اورباہمی  تعاون  کے وزیر نے کہا کہ جب ان کی پارٹی بہار میں اقتدار میں تھی تو اس نے ذات پر مبنی سروے کی حمایت کی تھی۔ انہوں نے کہا کہ گورنر نے بھی بل کی منظوری دے دی۔ انہوں نے مزید کہا کہ ذات پات پر مبنی سروے کے حوالے سے کچھ مسائل ہیں، جن کے بارے میں انہوں نے اس امید کا اظہار کیا کہ  ریاستی حکومت ان کو حل کرلے گی۔ جناب شاہ نے کہا کہ مرکزی حکومت کا ذات پر مبنی سروے میں رکاوٹیں پیدا کرنے کا کبھی کوئی ارادہ نہیں تھا۔

مرکزی وزیر داخلہ نے کہا کہ اگرچہ زونل کونسل کے اجلاسوں کا کردار مشاورتی ہوتا ہے لیکن مرکزی وزیر داخلہ کے طور پر اپنے ساڑھے چار سال کے تجربے کی بنیاد پر میں یہ کہہ سکتا ہوں کہ کونسل کی میٹنگوں اور اس کی قائمہ کمیٹی کو اہمیت دیتے ہوئے ، ہم نے بہت سے مسائل حل کیے ہیں۔ 17 جون 2023 کو ہونے والی قائمہ کمیٹی کے 13ویں اجلاس میں کل 48 معاملات پر گہرائی سے تبادلہ خیال کیا گیا، جن میں سے کل 28 مسائل کو رکن ریاستوں کے چیف سیکرٹریز اور اعلیٰ حکام کے درمیان بات چیت کے بعد باہمی رضامندی سے حل کیا گیا۔ ریاستوں اور مرکز کے درمیان آج کی میٹنگ میں کل 21 مسائل پر تبادلہ خیال کیا گیا۔

ش ح۔س ب ۔ ج

Uno3705