নমস্কাৰ!

কেন্দ্ৰীয় কেবিনেটত থকা মোৰ সহকৰ্মী ধৰ্মেন্দ্ৰ প্ৰধানজী, দেশৰ বিভিন্ন প্ৰান্তৰ পৰা আমাক সহযোগ কৰা ৰাজ্যপাল, শিক্ষা জগতৰ বিশিষ্ট ব্যক্তিসকল, ভদ্ৰলোক আৰু ভদ্ৰমহিলাসকল!

উন্নত ভাৰতৰ সংকল্পৰ বাবে আজিৰ দিনটো অতি গুৰুত্বপূৰ্ণ। উন্নত ভাৰত গঢ়াৰ সৈতে সম্পৰ্কিত এই কৰ্মশালাৰ আয়োজন কৰাৰ বাবে মই সকলো ৰাজ্যপালক বিশেষভাৱে অভিনন্দন জনাইছো। দেশৰ যুৱ শক্তিক নিৰ্দেশনা দিয়াৰ দায়িত্ব থকা সহকৰ্মীসকলক আপোনালোকে এখন মঞ্চলৈ লৈ আহিছে। শিক্ষানুষ্ঠানসমূহৰ ভূমিকা হৈছে ব্যক্তি নিৰ্মাণ কৰা আৰু ব্যক্তি নিৰ্মাণৰ জৰিয়তেহে ৰাষ্ট্ৰ নিৰ্মাণ হয়। আৰু যি যুগত আজি ভাৰত উপনীত হৈছে, সেই সময়ছোৱাত ব্যক্তি নিৰ্মাণৰ অভিযান অতি গুৰুত্বপূৰ্ণ হৈ পৰিছে। যুৱকণ্ঠৰ কৰ্মশালাৰ সফলতাৰ বাবে মই আপোনালোকক আগতীয়াকৈ শুভকামনা জনাইছো।

বন্ধুসকল,

বুৰঞ্জীয়ে প্ৰতিখন দেশক এনে এক সময় প্ৰদান কৰে, যি সময়ত দেশে ইয়াৰ উন্নয়নৰ যাত্ৰা বহুগুণে আগুৱাই লৈ যায়। এক প্ৰকাৰে এয়া হৈছে সেই দেশৰ 'অমৃত কাল'। ভাৰতৰ বাবে সম্প্ৰতি এই 'অমৃতকাল' আহি পৰিছে। এইটো ভাৰতৰ ইতিহাসৰ সেই সময় যেতিয়া দেশখনে বৃহৎ উত্থানৰ দিশে অগ্ৰসৰ হৈছে । আমাৰ চাৰিওফালে এনে বহুতো দেশৰ উদাহৰণ আছে যিসমূহে এটা নিৰ্দিষ্ট সময়ত এনে বৃহৎ উত্থানৰ জৰিয়তে নিজকে বিকশিত কৰিছে। সেয়েহে মই কওঁ, এইটো ভাৰতৰ বাবেও সঠিক সময়। আমি এই অমৃতকালৰ প্ৰতিটো মুহূৰ্তৰ সুবিধা ল'ব লাগিব, আমি এটা মুহূৰ্তও হেৰুওৱা উচিত নহয়।

বন্ধুসকল,

আমাৰ সকলোৰে সন্মুখত অনুপ্ৰেৰণাৰ বাবে, স্বাধীনতাৰ দীঘলীয়া সংগ্ৰাম আছে। যেতিয়া আমি এটা লক্ষ্য আগত ৰাখি উৎসাহ আৰু আবেগেৰে স্বাধীনতাক চূড়ান্ত লক্ষ্য হিচাপে বিবেচনা কৰি যুঁজত অৱতীৰ্ণ হৈছিলো, তেতিয়া আমি সফলতা লাভ কৰিছিলো। এই সময়ছোৱাত সত্যাগ্ৰহ, বিপ্লৱৰ পথ, স্বদেশী সম্পৰ্কে সজাগতা, সামাজিক আৰু শৈক্ষিক সংস্কাৰৰ চেতনা, এই সকলোবোৰ ধাৰা একত্ৰিত হৈ স্বাধীনতা আন্দোলনৰ শক্তি হৈ পৰিছিল। এই সময়ছোৱাত কাশী হিন্দু বিশ্ববিদ্যালয়, লক্ষ্ণৌ বিশ্ববিদ্যালয়, বিশ্ব-ভাৰতী, গুজৰাট বিদ্যাপীঠ, নাগপুৰ বিশ্ববিদ্যালয়, অন্নমালাই বিশ্ববিদ্যালয়, অন্ধ্ৰ বিশ্ববিদ্যালয়, কেৰালা বিশ্ববিদ্যালয়ৰ দৰে বহুতো প্ৰতিষ্ঠানে দেশৰ চেতনা শক্তিশালী কৰিছিল। এইটো সেই সময় আছিল যেতিয়া প্ৰতিটো সোঁতত যুৱসকলৰ মনত স্বাধীনতাৰ বিষয়ে এক নতুন চেতনা সঞ্চাৰিত হৈছিল। সমগ্ৰ যুৱ প্ৰজন্ম এটা স্বাধীনতাৰ প্ৰতি সমৰ্পিত হৈ থিয় হৈছিল। দেশত এনে ধাৰণা গঢ় লৈ উঠিছিল যে যি কৰিব লাগিব, সেয়া স্বাধীনতাৰ বাবে কৰিব লাগিব আৰু এতিয়া কৰিব লাগিব। যদি কোনোবাই যঁতৰ ঘূৰাইছিল, সেয়াও স্বাধীনতাৰ বাবে। কোনোবাই বিদেশী সামগ্ৰী বৰ্জন কৰিছিল, সেয়াও স্বাধীনতাৰ বাবে। কোনোবাই কবিতা আবৃত্তি কৰিছিল, সেয়াও স্বাধীনতাৰ বাবে। কোনোবাই কিতাপ বা বাতৰি কাকতত লিখিছিল, সেয়াও স্বাধীনতাৰ বাবে। যদি কোনোবাই বাতৰি কাকতৰ পত্ৰিকা বিতৰণ কৰিছিল, তেন্তে সেয়াও স্বাধীনতাৰ বাবে। একেদৰে আজি প্ৰতিজন ব্যক্তি, প্ৰতিটো প্ৰতিষ্ঠান, প্ৰতিটো সংগঠনে এই সংকল্পৰে আগবাঢ়িব লাগিব যে মই যি কৰোঁ সেয়া বিকশিত ভাৰতৰ বাবে হ'ব লাগে। আপোনাৰ লক্ষ্য আৰু সংকল্পৰ কেৱল এটা উদ্দেশ্য হোৱা উচিত– বিকশিত ভাৰত। এজন শিক্ষক হিচাপে, উন্নত ভাৰতৰ লক্ষ্যত উপনীত হোৱাত দেশক সহায় কৰিবলৈ আপুনি কি কৰা উচিত বুলি ভাবে? এখন বিশ্ববিদ্যালয়ৰ তৰফৰ পৰা ভাৰতৰ দ্ৰুত বিকাশ সাধন কৰাৰ বাবে কি কৰা উচিত, সেই বিষয়ে আপোনালোকে চিন্তা কৰক। আপুনি যি ক্ষেত্ৰৰ সৈতে জড়িত হৈ আছে, সেই ক্ষেত্ৰত এনে কি হোৱা উচিত যিয়ে ভাৰতক বিকাশৰ পথেৰে দ্ৰুতগতিত ধাৱিত কৰিব পাৰে?

বন্ধুসকল,

আপুনি প্ৰতিনিধিত্ব কৰা শিক্ষানুষ্ঠানসমূহত থকা যুৱ শক্তিক এই এটা লক্ষ্যৰ দিশেৰে ধাৱমান হোৱাৰ বাবে অনুপ্ৰাণিত কৰিব লাগিব। আপোনাৰ প্ৰতিষ্ঠানলৈ অহা প্ৰতিগৰাকী যুৱক-যুৱতীয়ে কিছুমান বিশেষত্বৰ সৈতে আহে। যিমানেই বৈচিত্ৰ্যপূৰ্ণ নহওঁক কিয় তেওঁলোকৰ ধাৰণাসমূহ বিকশিত ভাৰত গঢ়াৰ ধাৰাৰ সৈতে সংযুক্ত হ'ব লাগিব। মই বিচাৰোঁ যে আপোনালোক সকলোৱে আপোনাৰ পৰিসৰৰ বাহিৰত চিন্তা কৰক আৰু বিকশিত ভাৰত@২০৪৭ দৃষ্টিভংগীত অৰিহণা যোগাবলৈ পৰিসৰৰ সিপাৰে চিন্তা কৰক।  দেশৰ প্ৰতিখন মহাবিদ্যালয় আৰু বিশ্ববিদ্যালয়ৰ অধিকসংখ্যক যুৱক-যুৱতীয়ে যাতে এই অভিযানত যোগদান কৰিব পাৰে সেয়া নিশ্চিত কৰিবলৈ, আপুনি বিশেষ অভিযানৰ প্ৰয়াস চলোৱা উচিত, নেতৃত্ব লোৱা উচিত, সৰল ভাষাত কথাবোৰ প্ৰকাশ কৰা উচিত। আজি মাইগভৰ আওতাৰ ভিতৰত বিকশিত ভাৰত@২০৪৭ শাখাটো মুকলি কৰা হৈছে। ইয়াত বিকশিত ভাৰতৰ দৃষ্টিভংগী সম্পৰ্কীয় ধাৰণা সন্দৰ্ভত এটা শাখা আছে। আৰু যিহেতু আইডিয়া অৰ্থাৎ ধাৰণা আই অৰ্থাৎ 'মই'ৰ সৈতে আৰম্ভ হয়, গতিকে ইয়াত এনে ধাৰণাৰ প্ৰয়োজন যিয়ে মই নিজে কি কৰিব পাৰো, সেই বিষয়ে বৰ্ণনা কৰে। আৰু ঠিক যেনেদৰে আইডিয়াত 'আই' প্ৰথম, ইণ্ডিয়াতো 'আই'ৰ উল্লেখ প্ৰথমে হয়। অৰ্থাৎ যদি আমি সফলতা প্ৰাপ্ত কৰিব বিচাৰো, লক্ষ্য প্ৰাপ্ত কৰিব বিচাৰো, সঠিক ফলাফল আনিব বিচাৰো, তেনেহ'লে ই আমাৰ নিজৰ 'মই'ৰ সৈতে আৰম্ভ হয়। মাইগভত, এই অনলাইন ধাৰণা পৰ্টেলত ৫ টা পৃথক বিষয় সন্দৰ্ভত পৰামৰ্শ দিব পাৰি। সৰ্বশ্ৰেষ্ঠ ১০ টা পৰামৰ্শৰ বাবে পুৰষ্কাৰৰ ব্যৱস্থা কৰা হৈছে।

বন্ধুসকল,

যেতিয়া মই পৰামৰ্শৰ কথা কওঁ, আপোনাৰ সন্মুখত এখন মুকলি আকাশ থাকে। আমি দেশত এনে এক অমৃত প্ৰজন্ম গঢ়ি তুলিব লাগিব, যি অনাগত বছৰবোৰত দেশৰ কৰ্ণধাৰত পৰিণত হ'ব, যিয়ে দেশক নেতৃত্ব দিয়াৰ লগতে দিশ প্ৰদান কৰিব। আমি দেশৰ এনে এটা যুৱ প্ৰজন্ম প্ৰস্তুত কৰিব লাগিব, যি দেশৰ স্বাৰ্থক সৰ্বাধিক অগ্ৰাধিকাৰ দিয়ে, যিয়ে তেওঁৰ কৰ্তব্যক সৰ্বাধিক অগ্ৰাধিকাৰ দিয়ে। আমি নিজকে কেৱল শিক্ষা আৰু দক্ষতাৰ মাজত সীমাবদ্ধ ৰাখিব নালাগে। দেশৰ নাগৰিকসকলে কেনেদৰে ২৪ ঘণ্টা সজাগ হৈ থাকিব পাৰে এজন নাগৰিক হিচাপে সেই সন্দৰ্ভতো প্ৰচেষ্টা বৃদ্ধি কৰাৰ প্ৰয়োজন। আমি সমাজত সেই চেতনা আনিব লাগিব, য’ত কেমেৰা স্থাপন কৰা হওঁক বা নহওঁক, জনসাধাৰণে যান-বাহনৰ নিয়মসমূহ উলংঘা কৰিব নালাগে। জনসাধাৰণৰ মাজত কৰ্তব্যবোধ ইমান বেছি হ'ব লাগে যাতে তেওঁলোকে সময়মতে কাৰ্যালয়ত উপস্থিত হয় তথা তেওঁলোকৰ দায়িত্ব পালন কৰিবলৈ আগবাঢ়ি আহে। ইয়াত তৈয়াৰ হোৱা যিকোনো সামগ্ৰীৰ মান ইমান ভাল হ'ব লাগে যাতে মেড ইন ইণ্ডিয়া প্ৰত্যক্ষ কৰাৰ পিছত ক্ৰেতাসকলৰ গৌৰৱ আৰু বৃদ্ধি হয়। যেতিয়া দেশৰ প্ৰতিজন নাগৰিকে, যি ভূমিকাতে নাথাকক কিয়,  তেওঁৰ দায়িত্ব পালন কৰিবলৈ আৰম্ভ কৰিব,  তেতিয়া দেশো আগবাঢ়িব। যিদৰে প্ৰাকৃতিক সম্পদ ব্যৱহাৰৰ সৈতে জড়িত বিষয়সমূহৰ কথা ক’ব পাৰি। যেতিয়া পানী সংৰক্ষণৰ প্ৰতি গুৰুত্ব থাকিব, যেতিয়া বিদ্যুৎ সঞ্চয়ৰ ক্ষেত্ৰত গুৰুত্ব থাকিব, যেতিয়া পৃথিৱী মাতৃক বচাবলৈ ৰাসায়নিক পদাৰ্থৰ ব্যৱহাৰ কম হ'ব, যেতিয়া ৰাজহুৱা পৰিবহনৰ সৰ্বাধিক ব্যৱহাৰৰ প্ৰতি গুৰুত্ব থাকিব, তেতিয়া সমাজ, দেশ আৰু প্ৰতিটো ক্ষেত্ৰত যথেষ্ট ইতিবাচক প্ৰভাৱ পৰিব। মই আপোনাক এনে বহুতো উদাহৰণ দিব পাৰো।

আপোনালোকে ভাবিব যে এইবোৰ সৰু বিষয়। কিন্তু এইসমূহৰ প্ৰভাৱ ব্যাপক। পৰিষ্কাৰ পৰিচ্ছন্নতাৰ ব্যাপক আন্দোলনক কেনেদৰে নতুন দিশ প্ৰদান কৰিব পাৰি তাৰ বাবেও আপোনাৰ পৰামৰ্শ গুৰুত্বপূৰ্ণ। আমাৰ যুৱচামে কেনেদৰে আধুনিক জীৱনশৈলীৰ পাৰ্শ্বক্ৰিয়াৰ মুখামুখি হ’ব পাৰে তাৰ বাবে আপোনাৰ পৰামৰ্শ গুৰুত্বপূৰ্ণ হ'ব। মবাইল ফোনৰ জগতখনৰ বাহিৰেও আমাৰ যুৱক-যুৱতীসকলে বাহিৰৰ পৃথিৱীখন চোৱাটোও সমানে গুৰুত্বপূৰ্ণ। এজন শিক্ষক হিচাপে আপুনি বৰ্তমান আৰু পৰৱৰ্তী প্ৰজন্মত এনে বহুতো ধাৰণা প্ৰোথিত কৰিব লাগিব। আৰু আপুনি নিজেই আপোনাৰ শিক্ষাৰ্থীসকলৰ বাবে আদৰ্শ হ'ব লাগিব। দেশৰ নাগৰিকসকলে দেশৰ স্বাৰ্থৰ বিষয়ে চিন্তা কৰিলে এখন শক্তিশালী সমাজ গঢ়ি উঠিব। আৰু আপুনি এইটোও জানে যে শাসন আৰু প্ৰশাসনত আমি সমাজখনৰ মানসিকতাৰ আভাস দেখিবলৈ পাওঁ। যদি মই শিক্ষাক্ষেত্ৰখনৰ কথা কওঁ, তেন্তে ইয়াৰ সৈতে সম্পৰ্কিত বহুতো বিষয় আছে। তিনি-চাৰি বছৰীয়া পাঠ্যক্ৰমৰ অন্তত আমাৰ শিক্ষানুষ্ঠানসমূহে প্ৰমাণপত্ৰ দিয়ে, ডিগ্ৰী দিয়ে। কিন্তু প্ৰতিগৰাকী শিক্ষাৰ্থীৰ ওচৰত বাধ্যতামূলকভাৱে কোনো দক্ষতা থকাটো আমি নিশ্চিত কৰা উচিত নহয় নে? এনে ধৰণৰ আলোচনা তথা ইয়াৰ সৈতে সম্পৰ্কিত পৰামৰ্শই বিকশিত ভাৰতৰ যাত্ৰাৰ পথ পৰিষ্কাৰ কৰিব। সেয়েহে, আপুনি আপোনাৰ প্ৰতিটো চৌহদ, প্ৰতিটো প্ৰতিষ্ঠান আৰু ৰাজ্যিক পৰ্যায়ত এই বিষয়সমূহ সন্দৰ্ভত চিন্তা-চৰ্চা কৰাৰ এক বিস্তৃত প্ৰক্ৰিয়া আগবঢ়াই নিয়া উচিত।

বন্ধুসকল,

বিকশিত ভাৰত গঢ়ি তোলাৰ এই অমৃতকাল একে, একেই সময়, যি আমি প্ৰায়ে পৰীক্ষাৰ দিনত দেখা পাওঁ। শিক্ষাৰ্থীসকল তেওঁলোকৰ পৰীক্ষাৰ প্ৰদৰ্শনৰ বিষয়ে যথেষ্ট আত্মবিশ্বাসী হৈ থাকে, কিন্তু তথাপি তেওঁলোকে শেষ মুহূৰ্তলৈকে কোনোধৰণৰ কৰ্তব্য এৰি নিদিয়ে। প্ৰতিগৰাকী শিক্ষাৰ্থীয়ে তেওঁৰ সৰ্বস্ব উজাৰি দিয়ে, সময়ৰ প্ৰতিটো মুহূৰ্তক এটা লক্ষ্যৰ সৈতে সংযোগ কৰে। আৰু যেতিয়া পৰীক্ষাৰ তাৰিখ ঘোষণা কৰা হয়, এনে লাগে যেন গোটেই পৰিয়ালটোৰ পৰীক্ষা কাষ চাপিছে। কেৱল শিক্ষাৰ্থীয়েই নহয়, গোটেই পৰিয়ালটোৱে এক অনুশাসনৰ পৰিধিৰ ভিতৰত সকলো কাম কৰে। আমাৰ বাবেও দেশৰ নাগৰিক হিচাপে পৰীক্ষাৰ তাৰিখ ঘোষণা কৰা হৈছে। আমাৰ সন্মুখত ২৫ বছৰৰ 'অমৃতকাল' আছে। আমি এই 'অমৃতকাল' আৰু বিকশিত ভাৰতৰ লক্ষ্যত উপনীত হোৱাৰ বাবে ২৪ ঘণ্টা কাম কৰিব লাগিব। এটা পৰিয়াল হিচাপে এই পৰিৱেশ সৃষ্টি কৰাটো আমাৰ সকলোৰে সামূহিক দায়িত্ব।

বন্ধুসকল,

আজি বিশ্বত জ্যেষ্ঠ ব্যক্তিৰ সংখ্যা দ্ৰুতগতিত বৃদ্ধি হোৱাৰ পৰিবৰ্তে ভাৰত যুৱচামৰ সৈতে শক্তিশালী হৈছে। বিশেষজ্ঞসকলে কয় যে ভাৰত অহা ২৫-৩০ বছৰৰ বাবে কৰ্মৰত বয়সৰ জনসংখ্যাৰ ক্ষেত্ৰত শীৰ্ষস্থানত থাকিব। সেইকাৰণে সমগ্ৰ বিশ্বই ভাৰতৰ যুৱপ্ৰজন্মৰ ওপৰত দৃষ্টি নিবদ্ধ ৰাখিছে। যুৱশক্তি পৰিৱৰ্তনৰ হোতা তথা পৰিৱৰ্তনৰ হিতাধিকাৰী। আজি মহাবিদ্যালয় আৰু বিশ্ববিদ্যালয়ত থকা যুৱ বন্ধুসকলৰ কেৰিয়াৰো অহা ২৫ বছৰে ঠাৱৰ কৰিব। এই যুৱক-যুৱতীসকলে নতুন পৰিয়াল আৰু নতুন সমাজ সৃষ্টি কৰিবলৈ গৈ আছে। সেয়েহে বিকশিত ভাৰত কেনেধৰণৰ হোৱা উচিত সেই সিদ্ধান্ত লোৱাটো আমাৰ যুৱ শক্তিৰ অধিকাৰ। এই মনোভাৱৰ সৈতে, চৰকাৰে দেশৰ প্ৰতিজন যুৱক-যুৱতীক বিকশিত ভাৰতৰ কাৰ্য পৰিকল্পনাৰ সৈতে জড়িত কৰিব বিচাৰে। চৰকাৰে দেশৰ যুৱকণ্ঠক বিকশিত ভাৰত গঢ়াৰ নীতি আৰু ৰণনীতিৰ সৈতে একত্ৰিত কৰিব বিচাৰিছে। যুৱচামৰ সৈতে আপোনালোকৰ সম্পৰ্ক অধিক হোৱা বাবে আপোনালোক সকলো বন্ধুৰ অৱদান এইক্ষেত্ৰত অতি গুৰুত্বপূৰ্ণ।

বন্ধুসকল,

আমি অনুসৰণ কৰিব লগা প্ৰগতিৰ পৰিকল্পনা চৰকাৰৰ উপৰি দেশখনে নিৰ্ধাৰণ ল'ব। দেশৰ প্ৰতিজন নাগৰিকৰ ইয়াত অৰিহণা থাকিব, সক্ৰিয় অংশগ্ৰহণ থাকিব। সবকা প্ৰয়াস অৰ্থাৎ জনসাধাৰণৰ অংশগ্ৰহণ এনেকুৱা এটা মন্ত্ৰ যাৰ জৰিয়তে আটাইতকৈ ডাঙৰ সংকল্পবোৰো পূৰণ হয়। স্বচ্ছ ভাৰত অভিযান, ডিজিটেল ইণ্ডিয়া অভিযান, কৰোনাৰ বিৰুদ্ধে যুঁজ, ভোকেল ফৰ লোকেল আদৰ্শৰ কথা হওঁক, আমি সকলোৱে সবকা প্ৰয়াস আদৰ্শৰ শক্তি দেখিছোঁ। সকলোৰে প্ৰচেষ্টাৰ জৰিয়তেহে এখন বিকশিত ভাৰত গঢ়ি উঠিব। আপোনালোক সকলো বিদ্বান লোকসকল হৈছে এনেধৰণৰ, যিয়ে দেশৰ বিকাশৰ দৃষ্টিভংগী নিজেই গঢ় দিব পাৰে তথা যুৱ শক্তিক অনু্প্ৰাণিত কৰিব পাৰে। গতিকে আপোনালোকৰ পৰা প্ৰত্যাশা অধিক। দেশৰ ভৱিষ্যত লিখাৰ এয়া এটা মহান অভিযান। আপোনালোকৰ প্ৰতিটো পৰামৰ্শই বিকশিত ভাৰতৰ ভাবমূৰ্তিৰ গম্ভীৰতা অধিক বৃদ্ধি কৰিব। আকৌ এবাৰ, মই আপোনালোকক আজিৰ কৰ্মশালাৰ বাবে শুভকামনা জনাইছো। আজি এক আন্দোলন আৰম্ভ হৈছে। মই দৃঢ়ভাৱে বিশ্বাস কৰোঁ যে আমি সকলোৱে মিলি ২০৪৭ চনৰ ভিতৰত এখন বিকশিত ভাৰত গঢ়ি তুলিব পাৰিম। আজি যাত্ৰা আৰম্ভ হৈছে। ইয়াৰ নেতৃত্ব শিক্ষাবিদসকলৰ হাতত আছে, নেতৃত্ব শিক্ষাৰ্থীৰ হাতত আছে, নেতৃত্ব শিক্ষা জগতৰ প্ৰতিষ্ঠানসমূহৰ হাতত আছে। এয়া নিজেই নিজৰ দেশ তথা নিজক গঢ়ি তুলিব পৰা প্ৰজন্মৰ সময়। তেওঁলোক সকলোলৈ মোৰ শুভেচ্ছা। ধন্যবাদ!

***

DS/ST/DK/DD/AT