বে ওফ বেঙ্গলগী নোংলৈ-নুংশিৎ ‘মিচাং’ থেংননবা রাজ্য সরকারশিং অমসুং কেন্দ্র সরকারগী মিনিস্ত্রিশিং/দিপার্তমেন্তশিংনা থৌরাং তৌরিবশিং হন্না য়েংশিন্নবা ঙসি কেবিনেত সেক্রেতরি শ্রী রজিব গৌবনা লুচিংদুনা নেসনেল ক্রাইসিস মেনেজমেন্ত কম্মিতি(এন সি এম সি)গী মীফম অমা পাংথোকখ্রে।

নোংলৈ-নুংশিৎ ‘মিচাং’গী হৌজিক ওইরিবা ফিবমগী মতাংদা ইন্দিয়ান মেতিওরোলোজিকেল দিপার্তমেন্ত(আই এম দি)গী দিরেক্তর জেনেরেলনা কম্মিতিদা পাউদমখি। বে ওফ বেঙ্গলগী খা-নোংচুপ থংবদা লৈরিবা নোংলৈ-নুংশিৎ অসি হৌখিবা পুং ৬ তা পুংদা কিমি ৯গী চাংদা অৱাং-নোংচুপলোমদা হুমজিল্লক্লি অমসুং ঙসি ভারতকী মতম পুং ১৬৩০দা পুদুচেরিদগী ইস্ত-সাউথইস্ততা কিমি ২৬০ রোম, চেন্নাইগী সাউথইস্ততা কিমি ২৫০, নেল্লোরগী সাউথ-সাউথইস্ততা কিমি ৩৮০, বাপাতলাগী সাউথ-সাউথইস্ততা কিমি ৪৯০ অমসুং মাচিলিপাত্নমগী সাউথ-সাউথইস্ততা কিমি ৫০০ লাপ্না লেতিচুদ 11.8°N অমসুং লোঙ্গিচুদ 82.2°E তা লৈরি।

নোংলৈ-নুংশিৎ অসি মখা তানা অৱাংনোংচুপলোমদা হুমজিল্লকপা য়ানা লৈরি অমসুং দিশেম্বর ৪গী নুমিৎয়ুংবা ফাওবদা অন্ধ্র প্রদেসকী খাদা লৈবা বে ওফ বেঙ্গলগী ৱেস্তসেন্ত্রেল অমসুং তামিল নাদুগী অৱাং থংবা শরুক্তা য়ৌরকপা য়াই। তুংদা,মসি দিশেম্বর ৫গী নুমিৎয়ুংবা মতুংদা পুংদা কিমি ৯০-১০০ ফাওবগী খোঙজেলদা অকনবা নোংলৈ-নুংশিৎ অমা ওইনা নেল্লোর অমসুং মাচিলিপত্নমগী মরক্তা অন্ধ্র প্রদেসকী খা থংবা শরুক লানখিগনি।

কেবিনেত সেক্রেতরিনা হায়খি আই.এম.দিগী খ্বাইদগী নৌবা চেকশিনৱাগী মতুংইন্না মরী লৈনবা রাজ্যশিংনা দরকার ওইবা চেকশিন-থৌরাং খুদিংমক লৌখৎকদবনি। অশি-অনা অমতা থোকহল্লোইদবনি অমসুং খুদোংথিনিঙাই ওইবা মফমশিংদগী মাংজৌননা মতম চানা মী হোন্দোক্কদবনি।

মাংজৌননা চেকশিন-থৌরাং লৌখৎপগীদমক তামিল নাদু, ওরিসা, পুদুচেরিগী চীফ সেক্রেতরিশিং অমসুং অন্ধ্র প্রদেসকী স্পিসিএল চীফ সেক্রেতরিনা কম্মিতি থাগৎপা ফোঙদোকখি। অকুৎপা মফমশিং মশক খঙদোক্লে অমসুং রিলিফ সেন্তরশিংদা মী লৈহনবগী থবক হৌরে হায়না কম্মিতিদা পাউদমখি। এস.এম.এসশিং অমসুং নোং-চিংগী পাউশিংগী খুৎথাংদা লম-লমগী লোলশিংদা মীয়ামদা চেকশিনৱাশিং পীরে। সমুদ্রদা লৈবা ঙামীশিং অমসুং হিশিং অশোই-অঙাম থোক্তনা থুংলরে। তঙাইফদবা পোৎলমশিং পৈশীন্দুনা থম্লে। 24/7 য়েংশিন্নবা অমসুং ফিবম কুপ্না শেন্নবা লোকেল এদমিনিস্ত্রেসন্না মতিক চাবা ওফিসিএলশিং থম্লে।

নেসনেল দিজাস্তর রেসপোন্স ফোর্স(এন দি আর এফ)না তামিল নাদু, অন্ধ্র প্রদেস অমসুং পুদুচেরিদা তিম ২১ থম্লে অমসুং অহেনবা তিম ৮ রিজার্ব ওইনা থম্লে। জহাজশিং অমসুং এয়ারক্রাফশিংগা লোয়ননা কোস্ত কার্দ, লান্মী অমসুং নেভিগী মী কনবা অমসুং তেংবাং পীবগী তিমশিং শেম-শাদুনা লৈরে।

কেন্দ্রগী এজেন্সিশিং অমসুং তামিল নাদু, অন্ধ্র প্রদেস, ওরিসা অমসুং পুদুচেরি সরকারশিংনা পায়খৎলিবা থবকশিং হন্না য়েংশিল্লদুনা, মাঙজৌননা পায়খৎফম থোকপা থবকশিং পায়খৎনবা কেবিনেত সেক্রেতরিনা তকশিনখি। মহাক্না হায়খি অশি-অনা য়াওদনবা অমসুং লন-থুমশিং মাংদনবা পান্দম থমগদবনি। মতম চানা মী লৌথোকপগী থবক পাংথোক্কদবনি। লম-লমগী লোলশিংদা মতম চানা চেকশিনৱাশিং পীগদবনি।

সমুদ্রদা লৈরিবা ইন্সতোল্লেসনশিংদা মথৌ পাংথোক্লিবা মীওই খুদিংমক খুদক্তা শাফগদবা মফমশিংদা লৈহন্নবা পোর্তস, সিপ্পিং অমসুং ৱাতরৱেজ মিনিস্ত্রি, পেত্রোলিয়ম অমসুং নেচরেল গ্যাস মিনিস্ত্রি অমসুং ভারতকী কোস্ত কার্দতা কেবিনেত সেক্রেতরিনা খঙহনখ্রে। দরকারগী মতুংইন্না মতিক চাবা এন.দি.আর.এফ তিমশিং থম্লে অমসুং মতে পাংনবা কেন্দ্রগী এজেন্সিশিং থৌরাং তৌদুনা লৈরে হায়না মহাক্না তামিল নাদু, অন্ধ্র প্রদেস, ওরিসা অমসুং পুদুচেরি সরকারশিংদা থাজবা পীখি।

মীফম অদুদা তামিল নাদু, অন্ধ্র প্রদেস, ওরিসা অমসুং পুদুচেরিগী চীফ সেক্রেতরিশিং, অন্ধ্র প্রদেসকী রেভিনিয়ু অমসুং দিজাস্তর মেনেজমেন্তগী স্পিসিএল চীফ সেক্রেতরি, য়ুনিয়ন হোম সেক্রেতরি, ফিসরিজ দিপার্তমেন্তগী সেক্রেতরি, পৱার মিনিস্ত্রিগী সেক্রেতরি, পোর্তস, সিপ্পিং অমসুং ৱাতরৱেজ মিনিস্ত্রিগী সেক্রেতরি, তেলিকম্মুনিকেসন দিপার্তমেন্তগী সেক্রেতরি, পেত্রোলিয়ম অমসুং নেচরেল গ্যাসকী সেক্রেতরি, এন.দি.এম.এগী মেম্বর সেক্রেতরি, আই.এম.দিগী দি.জি, কোস্ত কার্দকী দি.জি, সি.আই.এস.সি আই.দি.এস, আই.জি এন.দি.আর.এফ অমসুং হোম এফেয়ার্স মিনিস্ত্রিগী সেনিয়র ওফিসারশিং শরুক য়াখি।

****