প্রধান মন্ত্রী, শ্রী নরেন্দ্র মোদীনা ঙসি ভিদিও মেসেসকী থোংদা বিক্ষিৎ ভারত সঙ্কল্প য়াত্রাগী বেনিফিসরীশিংগা ৱারী শাখ্রে। মহাক্না প্রধান মন্ত্রী মহিলা কিসান দ্রোন কেন্দ্রসু হাংদোকখি। থৌরম অসিদা প্রধান মন্ত্রীনা দেওগরগী AIIMSতা মরু ওইবা পন্দুপ ওইরিবা 10,000শুবা জন ঔশাধি কেন্দ্র খুৎশিন্নখি। শ্রী মোদীনা লৈবাক অসি জন ঔশাধি কেন্দ্রশিংগী মশিং 10,000দগী 25,000দা হেনগৎহন্নবা প্রোগ্রামসু হৌদোকখি। কেন্দ্রগী লৌউ-শিংউ অমসুং লৌমীশিংগী য়াইফ থৌরাং মন্ত্রী শ্রী নরেন্দ্র সিংহ তোমরনা তরাম্না ওকপগী ৱারোল পীখি। নহা, নুপী, লৌমী অমসুং লৈবাক্কী তোঙান-তোঙানবা কাংলুপশিংদগী মীওই লাখ কয়ানা ভারত সরকারগী বিক্ষিৎ ভারত সঙ্কল্প য়াত্রদা শরুক য়াখি। তোঙান-তোঙানবা মফমশিংদা রাজ্যপাল, লেফতনেন্ত গভর্নর, মুখ্য মন্ত্রী, কেন্দ্র অমসুং রাজ্য মন্ত্রীশিং, MPশিং-MLAশিং অমসুং অতোপ্পা মীয়ামগী মীহুৎশিংনা শরুক য়াখি।

থৌরম অসিদা ৱা ঙাংলদুনা প্রধান মন্ত্রীনা হায়খি মদুদি বিক্ষিৎ ভারত সঙ্কল্প য়াত্রা অসি ঙসি নুমিৎ 15নি মপুং ফারি অমসুং হৌজিক খোঙজেল য়াংখৎলক্লে। মীয়াম্না থাজবা অমসুং শরুক য়াবা অসিনা VBSY বেন অসি ‘বিকাস রথ’দগী ‘মোদী কী গরেন্তী ভেহিকল’ হায়না মমিংদা অহোংবা লাকখিবা অদু ফোঙদোক্লদুনা প্রধান মন্ত্রীনা প্রজাশিংদা সরকারদা মখোয়না থাজবা থম্বীবগীদমক থাগৎপা ফোঙদোকখ্রে। মহাক্না VBSY গী বেনিফিসরীশংগা লোয়ননা ৱারী শাবা ফংবদা নুংঙাইবা ফোঙদোকখি অমসুং মখোয়গী থৌনা, থৱায় য়াওবা অমসুং ফিরেপ অদুবু থাগৎখি। মহাক্না মখোয়দা ‘মোদী কী গরেন্তী ভেহিকল’না হৌজিক ফাওবদা গ্রাম পঞ্চায়ৎ 12,000 হেন্না য়ৌশিনখ্রে, মসিদা চাউরাক্না প্রজা লাখ 30গা থবক তৌখি হায়না পাউদমখি। মহাক্না নুপীশিংনা VBSYদা শরুক য়াবগীদমক্তসু থাগৎপা ফোঙদোকখি। “খুঙ্গং খুদিংদা লৈবা মীওই খুদিংমক্না চাউখৎপগী ৱাহন্থোক অসি খঙই” হায়বা ৱাফমগা লোয়ননা প্রধান মন্ত্রীনা  VBSYনা সরকারগী থৌশিল অমদগী জন অন্দোলন ওইরক্লি হায়না ফোঙদোকখি। অনৌবা অমসুং অরিবা বেনিফিসরীশিং অমসুং VBSYগা মরী লৈনবা মীওইশিংনা সোসিএল মেদিয়া প্লেৎফোর্মশিংদা দিজিতেল এক্সতিবিতীশিং হেনগৎলকপা অসি উবদা শ্রী মোদীনা মখোয়াদা মহাক্না নুমিৎ খুদিংগী নমো এপ অসি মোনিতর তৌবনিনা মদুদা অসিগুম্বা ফোতোগ্রাফশিং অমসুং ভিদিওশিং অপলোদ  তৌনবা মখোয়দা হায়খি। মহাক্না হায় “নহারোলনা VBSYগী এম্বেসেদরশিং ওইবা য়াই”। ‘মোদী কী গরেন্তী ভেহিকল’ তরাম্না ওক্নবা তোঙান-তোঙানবা মফমশিংদা কেম্পেনশিং পাঙথোকপনা মহাক্না খুঙ্গংশিং লুনানবদা VBSYগী কান্নবা অদু উবা ফংখি। “ভারত অসি হৌজিক খাম্বা ঙমলরোই অমসুং চোকথবা লৈররোই। ভারতকী মীয়াম্না চাউখৎপা লৈবাক অমা ওইহন্নবা ৱারেপ লৌখি” হায়না মহাক্না মখা তাখি। মহাক্না হন্দক্তা লোইশিনখিবা হরাও কুহ্মৈগী পন্থাদা ‘ভোকেল ফোর লোকেল’দা শাহৌ পীখিবা অদুসু পনখি।

শ্রী নরেন্দ্র মোদীনা হায়খি মদুদি সরকারনা প্রজাশিংগী তঙাই ফদবশিং মশক খঙদোক্কদবনি অমসুং মখোয়গী হকশিং মখোয়দা ফংহনগদবনি। মসি নেচরেল জস্তিসনি, মসি সোসিএল জস্তিসনি। এপ্রোচ অসিনা মরম ওইরগা অনৌবা এস্পিরেসন থোরকখি অমসুং প্রজা করোর কয়াবু থওইবীদবগী ৱাখল্লোন অদু মাংহনখি। “মোদীগী গরেন্তীনা অতোপ্পশিংদগী থাজবা মাংলকপা মফমদগী হৌরি” হায়না শ্রী মোদীনা ফোঙদোকখি। চাউখৎপা ভারত অমগী ফিরেপ অসি মোদী নত্ত্রগা সরকার অমা হেক্তগী নত্তে মসিদি চাউখৎপগ লম্বেলদা মীপুম খুদিংমক পুশিন্নবা ফিরেপ অমনি হায়না প্রধান মন্ত্রীনা ফোঙদোকখি। মহাক্না হায়খি মদুদি বিক্ষিৎ ভারত সঙ্কল্প য়াত্রানা সরকারগী স্কিমশিং অমসুং কান্নবশিং ফংহৌদ্রবশিংদা য়ৌহন্নবা পান্দম থম্মি। মহাক্না নহারোলদা মাই ভারত ভোল্যুন্তীয়র্সতা রেজিস্তর তৌনবা অমসুং মাই ভারত কেম্পন য়াওশিন্নবা হায়খ্রে। VBSY হৌখিবগী মতাংদা পল্লদুনা হায় মদুদি মসি ‘বিক্ষিৎ ভারত’কী অমৃত য়ুম্বী মরিদা য়ুম্ফম ওই হায়রদুনা প্রধান মন্ত্রীনা ভারতকী নারী শক্তি, য়ুবা শক্তি, লৌমীশিং অমসুং ভারতকী লায়রবা ইমুং মনুংশিংবু নীংশিংখি অমসুং হায়খি মদুদি মখোয় মরি অসিনা খুমাং চাউশিল্লবা মতমদা ভারত অসি চাউখৎপা লৈবাক অমা ওইবা ঙমগনি। শ্রী মোদীনা হায়খি মদুদি সরকারনা হীংবগী থাক ফগৎহন্নবা অমসুং লায়রবা ইমুং মনুংশিংদগী লায়রবা মুথৎনবা, নহারোলদা থবক পীনবা অমসুং ইশানা ইশাদা থবক পীজনবা খুদোংচাবশিং ফংহন্নবা, ভারতকী নুপীশিং শক্তি পীনবা মখোয়গী সমস্যাশিং কোকহন্দুনা অমসুং ভারতকী লৌমীশিংগী ইনকম অমসুং তৌবা ঙম্বশিং হেনগৎহন্দুনা সরকারনা খোঙথাংশিং পাইখৎলি। লায়রবা, নুপীশিং, লৌমীশিং অমসুং নহারোলগী সমস্যাশিং মপুং ফানা কোকহনদ্রিবা ফাওবা ঐহাক্না পোত্থদুনা লৈথোক্লোই” হায়না পি.এম. মোদীনা ফোঙদোকখি। মহাক্না হায়খি মদুদি সেল্ফ-হেল্প গ্রুপশিংগী খুত্থাংদা নুপীশিংবু মরোমদোম লেপচবা ঙমহন্নবা হৌজিক চত্থরিবা কেম্পেন অসি দ্রোন দীদীনা মপাঙ্গল কনখৎহল্লগনি অমসুং অহেনবা শেন্থোক লৈনবা পাম্বৈ পীরগনি। মসিগা লোয়ননা লৈবাক্কী লৌমীশিংনা য়াম্না তাবা মমলদা দ্রোনশিংগুম্বা মোদর্ন তেক্নোলোজী মখোয়গী মখুৎনা পাইবা ফংলগনি মসিনা মতম, হীদাক-লাংথক অমসুং হারশিং সেব তৌবা ঙম্লগনি।

10,000শুবা জন ঔশাধি কেন্দ্র শঙ্গাবদা শ্রী মোদীনা হায়খি মদুদি মসিনা লায়রবা অমসুং মিদ্দল ক্লাসশিংগীদমক অহোংবা  মমলশিংদা হীদাক-লাংথক লৈনবগী কেন্দ্র অমা ওইরি। “জন ঔশাধি কেন্দ্রশিং অসি হৌজিক ‘মোদীগী মেদিসিন শোপ’ হায়না খঙনরে হায়না প্রধান মন্ত্রীনা মখা তাখি অমসুং প্রজাশিংবু মখোয়গী মীনুংশিগীদমক থাগৎপা ফোঙদোকখি। মহাক্না হায় মদুদি অসিগুম্বা কেন্দ্রশিংদা হীদাক মখল 2000 রোম চাদা 80দগী 90 তাদুনা ফংহল্লি। মহাক্না জন ঔশাধি কেন্দ্রশিংগী মশিং 10,000দগী 25,000দা হেনগৎহন্নবা প্রোগ্রাম হৌদোকখিবগীদমক প্রজাশিংদা মরু ওইনা নুপীশিংদা নুংঙাইবা ফোঙদোকখি। মহাক্না পি.এম. গরীব কল্যান অন্ন য়োজনা অসিসু চহি 5গা শাংদোকখিবদা নুংঙাইবা ফোঙদোকখি। “মোদীগী গরেন্তী হায়বদি নীংবা থুংহনবগী গরেন্তী হায়বনি” হায়না মহাক্না মখা তাখি। ৱারোল পীবা লোইশিনবদা প্রধান মন্ত্রীনা অপুনবা সরকারগী মেছিনরী অমসুং সরকারগী কর্মচারীশিংনা অপুনবা কেম্পেন অসি পাইখৎপগী মরু ওইবা অদু থমখি। মহাক্না চহি খরগী মমাংদা মাইপাকপা ঙমখিবা গ্রাম স্বারাজ অভিয়ান নীংশিংখি অমসুং হায়খি মদুদি কেম্পেন অসি বেনিফিসরীশিংদা স্কিম তরেৎ য়ৌহন্দুনা লৈবাক্কী খুঙ্গং লিশিং 60দা তাঙ্কক অনি থোক্না চত্থখি। “এস্পিরেস্নেল দিস্ত্রিক্তশিংদা লৈরিবা খুঙ্গং লিশিং কয়া মসিদা য়াওহনখি” হায়না মহাক্না মখা তাখি। মহাক্না লৈবাক অমদি খুন্নাইগী শেবা তৌনবা কেম্পেন অসিদা য়াওরিবা সরকারগী মীহুৎশিংগী খোঙথাংশিং থাগৎখি। “পুকচেল শেংনা খোঙফম চেৎনা লেপ্পীয়ু, খুঙ্গং খুদিংমক য়ৌশিনবীয়ু। বিক্ষিৎ ভারত সঙ্কল্প য়াত্রা অসি সবকা প্রয়াস খক্তা মপুং ফাহনবা ঙমগনি” হায়না ফোঙদোক্লদুনা শ্রী মোদীনা ৱা ঙাংবা লোইশিনখি।

ঘাজিয়াবাদতগী থৌরম অসিদা শরুক য়াখিবা কেন্দ্র মন্ত্রী শ্রী নরেন্দ্র সিংহ তোমরনা হায়খি মদুদি নীংতম্বা ফংলবা মতুংদা লৈবাক অসিদা প্রধান মন্ত্রী কয়া লাকখ্রে অমসুং লৈবাক অসিবু মাংদা পুখৎনবা হোৎনখি অদুবু শ্রী মোদীনা 2014দা প্রধান মন্ত্রী ওইরবা মতুংদা মহাকপু লৈবাক অসি মাংদা পুখৎপগী, ত্রান্সপরেন্সী পুরকপা অমসুং লায়রবগী অৱাবা খঙবীবগীদমক থাগৎনখি। মহৌশানা সরকারশিংনা থৌরাংশিং তৌই অমসুং লাউথোকই অদুবু ইমপ্লিমেন্ত তৌবদা মথৌ তাবা মীৎয়েং চংদে। নাকল অমরোমদা প্রধান মন্ত্রী শ্রী মোদীনা স্কিমশিং হৌদোকখি অমসুং চাদা 100 ইমপ্লিমেন্ত তৌনবা কন্না হোৎনবা অসিনদা মহাক্কী সেন্সিতিবিতী তাক্লি। বিক্ষিৎ ভারত সঙ্কল্প য়াত্রা অসি মসিগী খুদম অমনি। প্রোগ্রাম অসি শুপ্নগী কান্নবশিং বেনিফিসরীশিংদা ফংহনবা খক্তা ওইদে। প্রধান মন্ত্রীনা লৈবাক অসিবু 2047ফাওবদা চাউখৎপা ভারত অমদা ওন্থোক্নবা মঙলান শাগৎলি। মসি অচৌবা অমসুং পুম্নমক কোনশিনবা কেম্পেন অমনি। করিগুম্বা লৈবাক্কী প্রজা খুদিংমক অমসুং খুন্নাইগী মীয়ামনা কেম্পেন অসিগা লোয়ননা খুৎশম্নবা তারবা অমসুং মাংদা চংশিল্লবদি ঐখোয়গী লৈবাক্কী তুংলমচৎতা মালেমগী মেপ্তা খ্বাইদগী ফবা অমা ওইনা ভারতনা লেপচবা ঙমগনি। বিক্ষিৎ ভারত সঙ্কল্প য়াত্রা পাঙথোক্নবা গারী লিশিং 3রোম শেম শাখ্রে মসিনা নুমিৎ খুদিং খুঙ্গং লিশীং তরুক্তা চৎকনি। নবেম্বরদগী হৌখিবা য়াত্রা অসি জনুৱারী 26 ফাওবা মখা চত্থগনি।

শ্রী নরেন্দ্র সিংহ তোমরনা হায়খি মদুদি প্রধান মন্ত্রীনা লায়রবগী হিংবগী থাক্তা অহোংবশিং পুরক্নবা শেমখিবা স্কিমশিং অসিনা মীয়ামদা অমসুং ইলিজিবল ওইবা মীওইশিংদা মখোয়গী কান্নবশিং ফংহন্নবা হোৎনদুনা য়াত্রা অসিগী খুত্থাংদা খোঙথাংশিং লৌখৎপা পাম্মি। চাউখৎ লমজেলদা প্রধান মন্ত্রী শোত্থরবা জিলাশিং কনখৎতুনা মখোয়বু এস্পিরেস্নেল দিস্ত্রিক্তশিং হায়না মমিং থোনখি, মসিনা মখোয়না অতোপ্পশিংগা লম্বা তৌবা ঙমহনগনি। ত্রাইবেলশিংদা জস্তিস অমসুং বেসিক ফেসিলিতীশিং ফংহন্নবা স্কিম অসি হৌদোকখি।  প্রধান মন্ত্রী শ্রী মোদীনা মহাক্না গ্রাসরুৎ লেবেলদা হায়খিবা খুদিংমক ইমপ্লিমেন্ত তৌনবা হোৎনরি। ওগস্ত 15দা পীখিবা মহাক্কী ৱারোলদা মহাক্না হায়খি মদুদি সরকারনা খুঙ্গং চাউখৎ-থৌরাং অমসুং লৌউ-শিংউগী সেক্তরশিংদা তেক্নোলোজী থৌগৎকনি অমসুং নুপীশিংদা দ্রোন লিশিং 15 পীখি। দ্রোন দীদীগী খুত্থাংদা নুপীদা শক্তি পীগনি, মখোয়না আত্মনির্ভর ওইবা ঙমগনি, থবক পীদুনা মখোয়গী পুন্সি মহিং ফগৎহনগনি। মসিগী মথক্তা লৌউ-শিংউদা দ্রোনশিং শীজিন্নবা হেনগৎলকপনা লৌউ-শিংউ ফগৎহলক্কনি। ঙসি মসি প্রধান মন্ত্রীনা হৌদোক্লি। ওগস্ত 15দা মহাক্না হায়খি মদুদি লৈবাক অসিদা জন ঔশাধি কেন্দ্র লিশিং তরা হাংদোক্কনি। ঙসি দিওগরদা 10,000শুবা কেন্দ্র শঙ্গাখিবগা লোয়ননা জন ঔশাধি কেন্দ্রগী মশিং অসি লিশিং 25দা হেনগৎহল্লগনি। মীপুম খুদিংমক্না খঙই মদুদি জন ঔশাধি কেন্দ্রদা মহৌশানা কৈথেলদা লুপা 100দা ফংবা হীদাকশিং অসি শরুক তঙ্খাই তানা ফংই, হীদাক খরদি শুপ্নগী লুপা 10দা ফংই। মসি হৌদোকখিবদগী হৌনা মীচম মীয়ামনা হীদাকশিংদা তৌবা চাদিং অসি লুপা লাখ কয়া হন্থহনবা ঙমখি অমসুং মীয়ামদা শেনফম অসি অতোপ্পা মরমশিংদা ওইনা শীজিন্নরি। করিগুম্বা লৈবাক অসিদা জন ঔশাধি কেন্দ্র লিশিং 25 হেন্না লৈরবদি ইরৈবাকচাশিংনা অফবা ফেসিলিতীশিং ফংগনি অমসুং মসিদগী মখোয়না কান্নবা ফংগনি।

শ্রী তোমরনা হায়খি মদুদি ইচল-ইচে করোর 10না লৈবাক অসিদা লৈবা সেল্ফ-হেল্প গ্রুপ লিশিং 90গা লোয়ননা থবক তৌরি। মখোয়গী পুন্সিদা অহোংবশিং পুরকপা খক্তা নত্তনা সোসিএল সর্ভিস অমসুং খুঙ্গংশিং চাউখৎহনবদা মরু ওইনা শরুক তম্মি। মখোয়গী তৌবা ঙম্বা হেনগৎহন্নবা অমসুং মখোয়গী পুন্সি মহিং ফগৎহন্নবা দ্রোন দীদী প্রোগ্রামগী ৱাখল্লোন অসি য়াম্না ফজৈ। লৌবুকশিংদা য়ুরিয়া, DAP, অমসুং তিল হীদাক চাইবা মতমদা মসিনা হকশেলদা শোকহললি। অমসুং ওভর অমসুং অন্দর-স্প্রিংগুম্বা ইমবেলেন্স খরা মফম খরদা থেংনগনি অদুবু দ্রোনশিং শীজিন্নবা হেনগৎলকপা মতমদ হকশেলদা শোকহনবা হন্থরক্কনি অমসুং হার চংবা হন্থরক্কনি। নেনো য়ুরিয়া অমসুং নেনো DAP অসি অলতর্নেতিবশিং ওইনা শীজিন্নবসু হেনগৎলক্কনি। কেন্দ্রগী মন্ত্রী শ্রী তোমরনা হায়খি মদুদি প্রধান মন্ত্রীগী লুচিং মখাদা কিসান সম্মান নিধিগী খুত্থাংদা লৈবাক্কী লৌমী করোর 11গী একাউন্তশিংদা লুপা করোর লাখ 2.80 হেন্না ইনস্তোলমেন্ত 15 থোক্না পীখ্রে। উজ্জ্বলা স্কিমগী খুত্থাংদা ইচল-ইচে করোর 9 হেনবদা লেম্না LPG সাইলিন্দরশিং পীনবা থবক পাইখৎখি। পি.এম. গরীব কল্যান অন্ন য়োজনাগী খুত্থাংদা লৈবাক্কী মীওই করোর 80 হেনবদা লেম্না চেং-হৱাই পীনবা থবক পাইখৎলি, মসি মালেমগী খ্বাইদগী চাউবা প্রোগ্রাম ওইরি। প্রধান মন্ত্রী শ্রী মোদীগী লুচিং মখাদা ভারতনা আত্মনির্ভর ওইরি অমসুং মালেমদগী লৌবগী মহুৎ মখোয়দা ওইনা পীরগনি। মালেমগী অচৌবা শরুক অমনা ঙসি ভারত্তা মতেং নীরক্লি।

*******

(Release ID: 1981402) Visitor Counter : 51