गोंय/मुंबई, 26 नोव्‍हेंबर 2023

 

54व्या भारतीय आंतरराष्ट्रीय चित्रपट महोत्सवात (इफ्फी) आयसीएफटी-युनेस्को गांधी पदक 2023 खातीर वेंचून काडिल्ल्या, संवसारभरांतल्या धा चित्रपटांचें, 5 वांगड्याच्या जूरीन परिक्षण केलां, अशें गोंयांत 54व्या इफ्फीत घेतिल्ले पत्रकार परिशदेंत आयसीएफटी-युनेस्कोचे उपाध्यक्ष सर्ज मिशेल हांणी जाहीर केलें.

अंदूं निवड प्रक्रियेच्या निकषांचेर उलयतना, जूरी वांगडी रिझवान अहमद हांणी म्हळे, कि “आयसीएफटी-युनेस्को ह्या सिनेमांत शांतीकाय, भावपण आनी संस्कृताय सांबाळपा खातीर शिक्षणाचें माध्यम म्हणून पळयता, आनी देखून ह्या निकषांचो विचार करून निर्णय प्रक्रिया पुराय जाल्ली”. पुरस्कारा खातीर वेंचून काडिल्लो चित्रपट विविधताय आशिल्ल्या प्रेक्षकांमुखार वतलो आनी तो फकत इफ्फीतल्या प्रेक्षकां मेरेन मर्यादीत उरचो ना, अशें रिजवान अहमद हांणी सांगलें. “चित्रपटांचें भौपदरी कथन आनी संवसारभरांतल्या वेगवेगळ्या संस्कृतायांचें प्रतिनिधीत्व मतींत घेवन, तांची निवड जाता”, अशेंय तांणी सांगलें.

आयसीएफटीचो आयएफएफआय कडेन संबंद आशिल्ल्या प्रस्नाक जाप दितना, जूरी समन्वयक आनी पीसीआय संचालक – आयसीएफटी युवा शाखा, युआन हुन हांणी सांगलें, की भारतांत फिल्म निर्माते, प्रतिभा आनी फिल्म बाजारपेठ मोठ्या प्रमाणात आसा.

हेर आंतरराष्ट्रीय चित्रपट महोत्सवां कडेन आयसीएफटीच्या सहकार्याच्या तुळेंत आयसीएफटी-युनेस्को गांधी पदकाची भारता कडेन आशिल्ली खाशेली प्रासंगिकता हे विशींच्या प्रस्नाक जाप दितना तिणें सांगलें, कि “आयसीएफटी-युनेस्कोचो भारता कडेन एक खाशेलो संबंद आसा, कारण गांधीजींच्या शांतताय आनी एकठांयपणाच्या मुल्यांक भारतात आपलें घर मेळटा”.

आयसीएफटी समाजीक उदरगत आनी शांतीकाय संस्कृताय वाडोवपी उच्च दर्ज्याच्या ऑडियो-व्हिज्युअल माध्यमांक प्रोत्साहन दिवपा वांगडाच, पायरेसी आड झुजपाकय आदार दिता, अशें आयसीएफटी युनेस्कोचे भारताचे प्रतिनिधी मनोज कदम हांणी सांगलें.

आयसीएफटी पॅरिस आनी युनेस्को हांणी स्थापन केल्लें आयसीएफटी-युनेस्को गांधी पदक, हें महात्मा गांधीच्या शांतीकाय, अहिंसा, करुणा आनी एकठांयपणाच्या दृश्टीकोनाचें सगळ्यांत बरें सादरीकरण करपी चित्रपटांक, इफ्फीत वर्सुकी भौमानित करतात. 2015 वर्सा सुरू जाल्लो हो पुरस्कार, ह्या मुल्यांचो आस्पाव करपी चित्रपटांचो उत्सव मनयला.

पत्रकार परिशद हांगा पळयात :

 

* * *

PIB Mumbai | S.Jan/M.Prabhugaonkar/D.Rane

(Release ID: 1980112) Visitor Counter : 111