হৌখিবা চহি খরা অসিদা সর্ভিস লৈবগী মতাংদা গবর্নমেন্ত ই-মার্কেতপ্লেস (GeM)না মশক থোক্না খুমাং চাউশিল্লে। GeM, ভারতক্কী মকোক থোংলিবা লৈঙাক্কী প্রোক্যুরমেন্তকী ওনলাইনগী ফম্বাক অসিনা লৈঙাক্না লৈবগী মতাংদা হেন্না মওং মরিল তানবা অমসুং মনুং মপান ফাওনা উননবা অমসুং লৈবগী থবক থৌরমশিং স্ত্রীম্লাইন তৌনবা হোৎনখিবা থৌরাং অসিদা ত্রাঞ্জেক্সন ভেল্যু মশক থোক্না হেনগৎলক্লে।

GeMগী সর্ভিস লৈবগী মতাংদা মশক থোক্না খুমাং চাউশিল্লকপা অসি হান্নদি ফিভম অসি ওইরমদে। হৌখিবা চহি অনি অহুম অসিদা, ত্রাঞ্জেক্সন ভেল্যু অসি শেনবা চহি ২০-২১ দা লুপা করোর ৮,৫০৫ ওইরম্বদগী শেনবা চহি ২২-২৩দা লুপা করোর ৬৫,৯৫৭ য়ৌনা কারে। সর্ভিস সেক্তরদা GeM গী গ্রোস মর্চেদাইজ ভেল্যুদা মপুং ওইনা হেনগৎলে, শেনবা চহি ২১-২২ দা ২৩% লৈরম্বদগী চৎলিবা শেনবা চহি অসিদা ৪৭% য়ৌনা কারে। GeM না চৎলিবা শেনবা চহি অসিদা লুপা করোর ১.৫ য়ৌনবগী পান্দম থম্লি।

মসিগুম্বা মমাংদা লৈখিদ্রিবা মায় পাকপা অসি তোঙান-তোঙানবা সেক্তরশিংদা লৈরিবা মকোক থোংবা লৈঙাক্কী বাইয়রশিংনা মশক থোক্না শরুক য়াবনা ফংবা ঙম্বনি। কোল ইন্দিয়া লিমিতেদ, NTPC লিমিতেদ, ওইল এন্দ নেচরেল গ্যাস কোর্পোরেসন লিমিতেদ, অমসুং ভারত পেত্রোলিয় কোর্পোরেসন লিমিতেদকুম্বা মকোক থোংবা সেন্ত্রেল পব্লিক সেক্তর এন্তর্প্রাইজ (CPSE) শিংনা GeM বু মখোয়গী সর্ভিসকী পোৎচৈ লৈবগী তঙাইফদবশিংদা শীজিনৈ। মসিগী মথক্তা, গুজরাত, উত্তর প্রদেশ, দিল্লী, উত্তরাখন্দ অমসুং পঞ্জাবকুম্বা রাজ্য অমসুং য়ুনিয়ন তেরিতোরিশিংনা GeM বু মখোয়গী সর্ভিস লৈবগী ফম্বাক অমা ওইনা শীজিন্নরি।

GeM না তোঙান-তোঙানবা কাংলুপশিংদা পাক চাউরবা সর্ভিসশিং শীজিন্নরিঃ

মেনপাৱর আউৎসোর্সিং সর্ভিসঃ শেনবা চহি ২২-২৩ দা মেনপাৱর সর্ভিস ৱাইনবগীদমক চাউরাক্না ৪০,০০০ কন্ত্রেক্ত লৌখি, মসিনা অপুনবা ওইনা কন্ত্রেক্ত ভেল্যু লুপা করোর ১৪,০০০ হেনখি।

গারী ৱাইবগী সর্ভিসঃ শেনবা চহি ২২-২৩ দা গারী ৱাইনবগী সর্ভিসকীদমক চাউরাক্না ৩০,০০০ কন্ত্রেক্ত লৌখি, মসিনা অপুনবা ওইনা কন্ত্রেক্ত ভেল্যু লুপা করোর ২,৯০০ হেনখি।

পুথোক-পুশিন তৌবা, চত্থোক চৎশিন অমসুং অতৈ মাইনিং সর্ভিসঃ কোল ইন্দিয়া লিমিতেদ অমসুং NTPC লিমিতেদনা মতীক চাবা ওর্দর ভেল্যুগা লোইননা মশীং থীঙমদ্রবা ওর্দর কয়া লৌখি। চাউরাক্না ওর্দর ১৭৫ কোল ইন্দিয়া লিমিতেদকী সবসিদিয়রীনা লৌখি। হেন্দলিং, পুথোক পুশিন অমসুং মাইনিং এক্তিবিতীগী ওইনা ল্পা করোর ২৪,৫৫৮ কী অপুনবা ওর্দর ভেল্যু লৌখি।

ইন্সুরেন্স সর্ভিসঃ GeM না ইন্সুরেন্স সর্ভিস হাপচিন্ননবা সর্ভিস ওফরিংগী অচৌবা পোর্তফোলিও অদুসু চাউথোকখ্রে। IRDA না এপ্রুব তৌরবা ইন্সুরেন্স কম্পেনিশিংবু ব্রোকর অমসুং এজেন্তশিংগুম্বা ইন্তর্মেদিয়রিসিং য়াওদনা ইন্সুরেন্স কবর হকথেংননা য়োন্ননবা GeM না খঙহনখিবনা সর্ভিস ওফরিং অসি অখন্ননা কান্নৈ। ইকুই কুইদনা, গুজরাত সরকারনা প্রধান মন্ত্রী জন আরোগ্য য়োজনাগী মখাদা য়ুমথোঙ লাখ ৬২ রোমদা হকশেলগী ইন্সুরেন্স পীননবগীদমক্তা লুপা করোর ২৩০২ গী গ্রুপ মেদিক্লেম ইন্সুরেন্স অমা ওর্দর তৌখ্রে।

IT সর্ভিসঃ মরু ওইবা বেঙ্কিং সোল্যুসনশিং অমসুং দিজিতেল হেলথকেয়র সোল্যুসনশিং য়াওনা অরুবা IT সর্ভিসশিং ফঙননবা মখল কয়াগী মরু ওইরবা ওর্গনাইজেসনশিং অমসুং মন্ত্রালয়শিংনা IT সর্ভিসকীদমক্তা GeM শিজিন্নখ্রে।

লোকেল কেমিস্ত ইম্পেনেলমেন্তঃ সেন্ত্রেল গোভর্নমেন্ত হেলথ স্কিম (সি.জি.ঐচ.এস.) না লৈবাক্কী মফম কয়াদা লৈরিবা মেদিকেল সেন্তরশিংদা কেমিস্তশিংবু ইম্পেনেল্লিং তৌরবা মতুংদা চাওরাক্না লুপা করোর ১০৩৮ গী ওর্দরশিং থাংগৎখ্রে।

মেদিকেল সর্ভিসঃ হৌজিক ফাওবদা লুপা করোর ১১০০ হেনবগী হেলথকেয়র মেনপৱর   ৱাইনবা কোন্ত্রেকশিং থাংগৎখ্রে। হেলথকেয়র সেনিতেসন সর্ভিস, এম্বুলেন্স সর্ভিস, হেলথকেয়র কিচন অমসুং দাইদরী সর্ভিসশিংনচিংবা অতোপ্পা মেদিকেল সর্ভিস কয়া GeM দা ফংলি।

জল জীভন মিসন, মিসন কর্ময়োগী, স্বচ্ছ ভারত অভিয়ান, অমসুং শকশম অঙ্গনৱাদি অমসুং পোশন ২.০ স্কিম য়াওনা GeMনা হায়রিবা স্কিমশিং অসিবু থবক ওইনা ওন্থোক্নবা চুন্নবা সর্ভিসশিং শেমদুনা লৈঙাক্কী স্কিম কয়া অমা থবক ওইনা পায়খৎপদা মতেং পাংলি।

 GeMনা মখাগীশিং অসিগুম্বা অখন্নবা সর্ভিস ওর্দরশিং ফংহল্লিঃ

চার্তর্দ এয়র্ক্রাফ ৱাইবাঃ দিফেন্স মন্ত্রালয়না তোঙান-তোঙানবা লম্বীশিং লেহ, শ্রীনগর, অন্দমান অমসুং নিকোবারদগীনা মফমশিং অসিদা পাইনবগীদমক লুপা করোর ১৪২ মুক্কী ভেল্যু ওর্দর তৌনবা চার্তর্দ এয়র্ক্রাফ ৮৩০ ৱাইখি।

এয়র ইন্তর্নেস্নেল লোজিস্তিক্স সর্ভিসঃ ম্যুনিসন্স ইন্দিয়া লিমিতেদনা ঙাকশেল মন্ত্রালয়গী মখাদা, ইন্তর্নেস্নেল লোজিস্তিক্সকীদমক্তা চাউরাক্না ২৪,০০০kg গী IMO ক্লাস-১ দেঞ্জরস গুদশিং স্বিদেন্দগী ভারত্তা চাউরাক্না লুপা করোর ৩ গী এজেন্সী অমা ৱাইখ্রে।

দ্রোন এস এ সর্ভিসঃ সর্ভে ওফ ইন্দিয়া অমসুং কোল ইন্দিয়া লিমিতেদনা দ্রোন এস এ সর্ভিস (DaaS) পু সর্ভেয়িং অমসুং এরিএল মেপিংগুম্বা মখল কয়াগী এপ্লিকেসনশিংগীদক্তা শিজিন্নখ্রে।

হাই ভেল্যু মেদিকেল ইক্বিপমেন্ত, মার্কেত রিসর্চ/ সর্ভে, এজামিনেসন সর্ভিস, সাইবর সেক্যুরিতী সর্ভিস, ইভেন্তশিংগীদমক্তা AV/VR সর্ভিস ৱাইবনচিংবা সর্ভিস কেতেগোরিশিংগী মখাদা GeM না অতোপ্পা মখল কয়াগী অখন্নবা সর্ভিস ওফরিংশিংসু ফংহল্লি।

GeM না মখাগী অসিগুম্লবা এরিয়াশিং অসিদা হাই-ভেল্যু সর্ভিস বিদশিং পীরিঃ

ATM ৱাইবা, শিজিন্নবা অমসুং চলাইবাঃ বিদ ভেল্যু করোর কয়া কয়া য়ৌবা, স্তেত বেঙ্ক ওফ ইন্দিয়া, পঞ্জাব নেস্নেল বেঙ্ক, অমসুং বেঙ্ক ওফ বরোদানা ATM লিশিং কয়াগী সপ্লাই, ইন্সতোলেসন, শিজিন্নবা, অমসুং চলাইবগী বিদশিং ফোংখ্রে। খুদম ওইনা, SBI গী চহি ৭ কী ATM ১৩,৫০০ গী সপ্লাই, ইন্সতোলেসন, শিজিন্নবা অমসুং চলাইবগী বিদ অসি লুপা করোর ৭০০০ ওইখি।

এনর্জী ওদিত সর্ভিসঃ রেলৱে মন্ত্রালয়য়না তুং কোইনা চৎপা য়াবা বিল্দিং, ইক্বিপমেন্ত অমসুং এপ্লাইএন্সকী এনর্জী ইফিসিএন্সী, পাৱর ক্বালিতী রেস্তোরেসন, কেপাসিতী বিল্দিং অমসুং এৱেয়রনেসকী এনর্জী ইফিসিএন্সী পোলিসী অমা ফোংখ্রে। বিল্দিংশিংগী ইনভেস্তমেন্ত গ্রেদ এনর্জী ওদিতকীদমক বিদ কয়া অমা পুখৎখি।

GIS সর্ভে – দ্রোন মেপিংঃ সাইন্স অমসুং তেক্নোলোজী মন্ত্রালয়গী মখাদা সর্ভে ওব ইন্দিয়ানা হরিয়ানা রাজ্যগীদমক দ্রোন ইমেজ শীজিন্নদুনা চাউরাক্না স্ক্বার কিলোমিতর ৩০০০০ মুক্কী লম কোনবা য়াবা GIS মেপ্পিং তৌনবগীদমক এজেন্সী অমা ৱাইনবগীদমক বিদ অমা ফোংখি।

মসিগী মথক্তা, ৱেয়রহাউজিং সর্ভিস, IT সর্ভিস, ভেসেল ৱাইবা, হেন্দলিং, ত্রান্সপোর্ত অমসুং অতৈ মাইনিং সর্ভিসশিংগী কাংলুপতা লৈবা সর্ভিসশিংগীদমক অৱাংবা ভেল্যুগী বিদ কয়া অমা তৌরি।  

***

(Release ID: 1974447) Visitor Counter : 93