ঙসি হায়দ্রবাত্তা সাইন্স অমসুং তেক্নোলোজিগী রাজ্য মন্ত্রী(মনিংতম্বা); পি.এম.ও, পর্সোনেল, পব্লিক গ্রিভান্সেস, পেন্সন্স, এতোমিক ইনর্জি অমসুং স্পেসকী রাজ্য মন্ত্রী দোক্তর জিতেন্দ্র সিংহনা হায়খি প্রধান মন্ত্রী শ্রী নরেন্দ্র মোদীনা স্পেস সেক্তর “মনিংতমহনবা” অসিনা স্তার্দঅপ মশিং হেনগৎহল্লে, মসিগী ফল ওইনা, শুপ্নগী চহি ৪গী তেল্লবা মতম অমগী মনুংদা, স্পেস স্তার্দঅপ মশিং দিজিত অমদগী মশিং ১৫০দা হেনগৎলে, “স্কাইরুত” গুম্বা হান্নগী স্তার্দঅপ খর মাইপাক্লবা ওন্ত্রেপ্রেনিউয়রশিং ওইরে।

প্রাইভেদ সেক্তরদা ভারতকী খ্বাইদগী চাউবা রোক্কেত ফেক্তরি ওইরিবা হায়দ্রবাত্তা লৈবা ইসক্বার ফিত ৬০,০০০গী স্কাইরুতকী নৌনা লিংখৎপা মফম অমা য়েংবা চৎপদা, দোক্তর জিতেন্দ্রনা হায়খি স্কাইরুত অসি ভারতকী অঙকপা হৈথোই-শিংথোইবা অমসুং সাইন্সকী লমদা খুমাংচাউশিনবগী খুদম অমা ওইবতা নত্তনা প্রধান মন্ত্রী নরেন্দ্র মোদী লাক্ত্রিঙৈদা চহি কয়া অচৌবা খুদোংচাবা অমা তুমদুনা লৈরম্লে হায়না মসিনা ঐখোয় খুদিংমক্তা পাউজেল অমা পীরি অমসুং মমাংঙৈগী অরিবা চৎনবীশিং অদু থাদোক্লে অমসুং ভারতকী স্পেস সেক্তর পব্লিক প্রাইভেদ পার্তনরশিপ(পিপিপি)গীদমক হাংদোক্লে।

চহি অহুমগী মমাঙদা লনাই কাংবু স্পেস সেক্তরদা চঙবা য়াহল্লবা মতুংদা হৌখিবা চহিদা শ্রীহরিকোতাদা লৈবা ইসরো স্পেস স্তেসন্দগী লনাই রোক্কেত অমা থাগৎপা অহানবা স্পেস স্তার্দঅপ “স্কাইরুত এরোস্পেস”না ওইরে। আই.আই.তিগী গ্রেজুয়েত অনি, পৱান অমসুং ভারতনা লুচিংদুনা, খ্বাইদগী নৌবা তেক্নোলোজিগা লোয়ননা মখোয়না ভারতকী খ্বাইদগী চাউবা রোক্কেত শানবা মফম অমা শেমগৎলে। মসিদা দরকারগী মতুংইন্না মমল হোংবা রোক্কেত শাবা ঙমগনি।

অমৃতকাল অমসুং “India@2047” গী প্রধান মন্ত্রীগী মঙলান পল্লদুনা, দোক্তর জিতেন্দ্রনা হায়খি স্পেস সেক্তর য়াওনা থিদোক্ত্রিবা সেক্তরশিং থিদোকপা অসিনা ভারতকী শেন্মিৎলোনগী মগুন হেনগৎহনগনি। মীৎয়েং অসিদগী, নিংতম্লবা ভারতনা লৈবাক অসিগী ১০০শুবা নিংতম্বা নুমিৎ পাংথোকপদা স্পেস ইকোনোমিনা লৈবাক্কী শেন্মিৎলোন্দা শিংথাবা য়ানা মতেং পাংগনি অমসুং মালেমদা মাঙজিল থাবা লৈবাক অমা ওইবা ঙমগনি।

মহাক্না হায়খি হৌখিবা চহি ৯দা লৈবাক অসি সাইন্স অমসুং তেক্নোলোজিগী হিরম খুদিংমক্তা য়াংনা খুমাঙচাউশিল্লে, মসিগীদমক প্রধান মন্ত্রী শ্রী নরেন্দ্র মোদীগী মশক থোকপা লুচিংবা থাগৎলি।

স্কাইরুত অসি মফম অমদা খুদোংচাবা খুদিংমক লৈরবা ভারতকী খ্বাইদগী চাউবা লনাই রোক্কেত শাফম অমনি।

ভারতকী প্রাইভেদ স্পেস সেক্তরগী অনৌবা মাইপাকপা অমদা য়ুনিয়ন মিনিস্তর দোক্তর জিতেন্দ্র সিংহনা স্কাইরুতকী বিক্রম-১ রোক্কেত মাইখুম হাংদোকখ্রে। শিংথানিঙাই ওইবা অওনবা অমদা ২০২০দা লনাই কাংবু স্পেস সেক্তরদা চঙনবা লৈবাক অসিনা য়াবা পীবদগী, বিক্রম-১ অসি অতোপ্পা ভারতকী অহানবা অমা ওইরে।

দোক্তর জিতেন্দ্র সিংহনা হায়খি স্কাইরুত মাইপাকপা অসিনা, মরুওইনা স্পেস, বাইওতেক, লৌউ-শিংউ অমসুং ইনর্জি য়াওনা অনৌবা সেক্তরশিংদা মখোয় মশাগী স্তার্দঅপ ভেঞ্চরশিং লিংখৎনবা ভারতকী মশিং য়াম্লবা হৈথোই-শিংথোইরবা নহারোলশিংদা থৌনা অমা পীরগনি। ভারতকী সাইন্স, তেক্নোলোজি অমসুং ইন্নোবেসনগী তৌবা ঙম্বশিং মালেমদা মশক খঙহনবদা প্রধান মন্ত্রী মোদীনা ভারতকী শক্তি ফুদোকহল্লে অমসুং ঐখোয়গী স্তার্দঅপশিং হেন্না তান্নরে।

দোক্তর জিতেন্দ্র সিংহনা হায়খি ইসরোগী অহানবা চিয়ারমেন অমসুং ভারতকী স্পেস প্রোগ্রামগী মপা দোক্তর বিক্রম সরাভাইনা মতম পুম্নমক্তা লৈবাক্কী থবক্তা ইসরোনা মরুওইবা থৌদাং অমা লৌনবা তকশিনখি অমসুং প্রধান মন্ত্রী মোদীনা লুচিংবা চহি ৯গী সরকার মনুংদা, অনৌবা থিদোক্নবা অমসুং অনৌবা থবকশিং পাংথোক্নবা ভারতকী নহারোলশিংগী হৈথোই-শিংথোইবনা ঙাইদুনা লৈরি। ভারতকী স্পেস মিসনশিং অসি মমল হোংনবা, মীওইবগী লৌশিংদা য়ুম্ফম ওইনবা দিজাইন তৌরে। সাইন্সকী লমদা থিজিনবদা সরকার অমসুং লনাই হেন্না পুন্না চৎমিন্ননবা অনুসন্ধান নেসনেল রিছার্স ফাউন্দেসন্না লম্বী শেম্লগনি অমসুং অনৌবা হিরমশিংদা অনৌবা থিজিনবশিংদা মাংজিল থাদুনা ঐখোয় চাউখৎলবা লৈবাক খরগী কাংলুপ মনুংদা য়াওহল্লগনি।

দোক্তর জিতেন্দ্রনা হায়খি হৌখিবা চহি ৫দা লুপা করোর ৫০,০০০ শেনফম অমা চাদিং তৌনবা এন.আর.এফ বজেতনা পান্দম থম্লি, মসিগীমনুংদা লুপা করোর ৩৬,০০০ গী অচৌবা শরুক অমা, চাদা ৭০ হেনবগী শরুক সরকার নত্তবা কাংবুদগী, উদোগ অমসুং মীওইবা খুন্নাইগী মতেং পাংবা মীওইশিং, লৈবাক মনুং অমসুং মপান্দগী লাক্কনি।

*****