নুপীমচাশিং অমসুং নুপীশিং হন্থনা য়েংবা অসি কোকহন্নবা ভারতনা পায়খৎলিবা থবকশিং অমুক হন্না নিংশিংনবা হেল্থ অমসুং ফেমিলি ৱেলফিয়ারগী য়ুনিয়ন মিনিস্তর দোক্তর মনসুখ মন্দাবিয়ানা লুচিংদুনা সেন্ত্রেল সুপরভাইজরি বোর্দ(সি এস বি)গী ২৯শুবা মীফম ওক্তোবর ১৮,২০২৩ দা পাংথোকখ্রে। লৈবাক অসিদা অঙাং অমা পোক্ত্রিঙৈদা নুপা নত্ত্রগা নুপীনি হায়না মাঙজৌননা খঙদোক্লবা মতুংদা নুপীমচাশিং মাঙহনবগী থবক অসিনা মরম ওইদুনা চাইল্দ সেক্স রেসিও(সি এস আর) অমসুং সেক্স রেসিও এদ বার্থ(এস আর বি) হন্থরক্লিবা অসিগী মতাংদা মীফম অদুদা মরুওইনা খন্নখি।

মীফম অদুদা য়ুনিয়ন মিনিস্তরনা হায়খি নুপা-নুপী থোং মান্ননা লৈনবা হিরমদা লৈবাক অসি খুমাঙ চাউশিল্লে। ২০২০গী সেম্পল রেজিস্ত্রেসন সর্ভ(এস আর এস) রিপোর্ত মতুংইন্না, শিংথাবা য়ানা এস.আর.বি ফগৎলে। ২০১৭-১৯ দা ৯০৪ পোকপদগী ২০১৮-২০২০ দা ৯০৭ পোক্তুনা সেক্স রেসিওদা পোইন্ত অহুম ফগৎলে। সর্ভে পাংথোকখিবা রাজ্য ২২গী মনুংদা রাজ্য ১২গী ফিবম ফগৎলে, রাজ্যশিং অসিদা প্রি-কন্সেপসন এন্দ প্রি-নেতেল দাইগ্নোস্তিক তেক্নিকস(রিগুলেসন এন্দ প্রিভেন্সন ওফ মিসয়ুজ) এক্ত,১৯৯৪ অমসুং বেতি বচাউ বেতি পরাউ স্কিম মাইপাক্না পায়খৎলে। ২০১৫দা জেন্দর গেপ পোইন্ত মঙা ওইরম্বদগী ২০২০দা পোইন্ত অনি হন্থরে হায়না খ্বাইদগী নৌবা এস.আর.এস রিপোর্তনা হায়রি। রাজ্য ১০ দা জেন্দর গেপকী ফিবম য়াম্না ফগৎলে, নুপীশিং হিংবগী চাং য়াম্না ৱাংলে।

দোক্তর মন্দাবিয়ানা হায়খি অনৌবা তেক্নোলোজিশিং হায়বদি আই.ভি.এ, নন-ইনভেসিপ প্রিনেতেল তেস্ত(এন আই পি তি) অমসুং অপীকপা দাইগ্নোস্তিক খুৎলায়শিংনা নুপা নত্ত্রগা নুপী মশক খঙদোকপদা লাইহনবদগী অচৌবা শিংনবশিং ওইরক্লে। হায়রিবা তেক্নোলোজিশিং অসি মেদিকেলগী লমদা কান্নবা লৈজরবসু, মসি লান্না শীজিন্নবা য়াই অমসুং নুপা-নুপী থোং মান্নদবা হেনগৎহল্লে।

প্রি-কন্সেপসন এন্দ প্রি-নেতেল দাইগ্নোস্তিক তেক্নিকস(রিগুলেসন এন্দ প্রিভেন্সন ওফ মিসয়ুজ) এক্ত,১৯৯৪ গী মখাদা, নুপা-নুপী মশক খঙদোক্নবা মেদিকেল তেক্নোলোজিশিং লান্নবা শীজিন্নবা থিংনবা দাইত্ব কেন্দ্র সরকারনা লৌরে। এক্ত অসি চৎহন্নবাঅমসুং লৈবাক অসিদা অঙাং নুপীমচাশিং অফবা ফিবম অমা শেমগৎনবা সি.এস.বি মেম্বরশিংনা অমুক হন্না থাজবা পীরে। কনাগুম্বা অমনা মরাল লৈজদবা দোক্তরশিং অৱাবা পীনবা এক্ত অসি শীজিন্নরোইদবনি।

হরিয়ানা, রাজস্থান অমসুং তমিল নাদু রাজ্যশিংদা পায়খৎলিবা থবকশিং থাগৎলদুনা দোক্তর মন্দাবিয়ানা হায়খি নুপা-নুপী মশক খঙদোকপা থিংনবা স্তিং ওপরেসনশিং অমসুং ইনফোর্মর স্কিমশিং য়াওনা মখোয়না পায়খৎলিবা অনৌবা লাল্লোংশিং অসি থাগৎনিঙাইনি। অতোপ্পা রাজ্যশিং অমসুং য়ু.তিশিংনা থবক অসি পায়খৎকদবনি অমসুং মরুওইবা ৱাফম অসিদা মতেং পাংগদবনি।

মহাক্না হায়খি রাজ্যশিং অমসুং য়ু.তিশিংনা এক্ত অসি মপুংফানা চৎহন্নবা পুক্নিং থৌগৎনবা নেসনেল হেল্থ মিসনগী মখাদা শেন্থং পীনবা থবক পায়খৎপা হৌরে। রাজ্য অমসুং জিলা থাকশিংদা প্রি-নেতেল দাইগ্নোস্তিক তেক্নিকস(পি এন দি তি) সেলশিং লিংখৎনবা শেন্থং পীগনি। মসিগী মথক্তা, হিরম অসিগা মরী লৈনবা থবকশিংগী ইনফোর্মেসন, ইজুকেসন অমসুং কম্মুনিকেসন(আই ই সি) থবকশিংগী মতেং পীগনি।

য়ুনিয়ন হেল্থ সেক্রেতরি, শ্রী সুধান্স পন্তনা হায়খি নুপীমচাশিং অমসুং নপীশিং নুংঙাই য়াইফনবা অমসুং হকশিং ফংহন্নবা কেন্দ্র সরকারনা মাঙজিল থাদুনা থবক পায়খৎলি।

মিনিস্ত্রিগী এদিসনেল সেক্রেতরি অমসুং এম.দি(এন ঐচ এম), শ্রীমতি এল.এস চাংসান্না হায়খি কেন্দ্র সরকারনা আইন অমা শেমদুনা নুপা-নুপী মশক খঙদোক্নবা মেদিকেল তেক্নিকশিং লান্নবা শীজিন্নবা থিংনবা য়ুনিয়ন হেল্থ মিনিস্ত্রিনা থবক পায়খৎলি। জুলাই ২০২৩ ফাওবদা, এক্ত অসিগী মখাদা মার্চ ২০১৫দা কেস ২০৪৮ রিপোর্ত তৌরকপদা কেস ৩৫৬৩দা হেনগৎলে। হায়রিবা মতম অসিগী মনুংদা এক্ত অসিগী মখাদা চৈরাক ফংবা মশিং ২৭১দগী ৭১৩দা হেনগৎলে। মরী লৈনবা স্তেৎ মেদিকেল কাউন্সিলশিংনা মরাল লৈরবা দোক্তর ১৪৫ সস্পেন্দ তৌখ্রে। আইন অসি মপাঙ্গল কনখৎহন্না, এক্ত অসিগী মখাদা মিনিস্ত্রিনা রুল ১১ এমেন্দমেন্ত তৌরে।

লৈবাক অসিদা নুপীমচাশিং হিংনবা অমসুং নুংঙাই য়াইফনবা অপুনবা ওইনা থবক পায়খৎনবা মীফম অদু লোইশিল্লকপদা য়ুনিয়ন মিনিস্তরনা অপীল তৌখি। মখোয়গী শীনফম মনুংদা ফত্তবা থবক তৌবা মীওইশিং মশক খঙদোক্তুনা চাইল্দ সেক্স রেসিও অমসুং সেক্স রেসিও এদ বার্থ হন্থরক্লিবা অসি থেংন্নবা মরুওইবা থৌদাং অমা লৌনবা মেদিকেলগী লমদা লৈরবা মীওইশিংদা তকশিনখি। নুপীশিং তাথি-তাওইনা তৌবা অমসুং নুপা-নুপী থোং মান্নবা থম্নবা থবক পায়খৎনা সি.এস.বি মীফম্না অমতা ওইনা য়ানখি।

ভারত্তা নুপীশিং অমসুং নুপীমচাশিং য়াইফনবা, নুপা-নুপী থোং মান্নবা অমসুং নুপীমচাশিং হিংবা, ঙাক-শেন্নবা অমসুং চাউখৎনবা কেন্দ্র সরকারনা চোকথবা লৈতনা পায়খৎলিবা থবকশিংগী মমি হায়রিবা মাইপাকপশিং অসিদা মমি তারে।

******