কেন্দ্রগী স্পোর্তস মন্ত্রী অনুরাগ সিংহ থাকুরনা ঙসি এসিয়ান গেম্সদগী মখোয়গী কম্পিতিসনশিং লোইশিন্দুনা ভারত্তা হল্লকখ্রবা এথেলেৎশিংবু তরাম্না ওকখ্রে। থৌরম অসি নই দিল্লীগী কন্সতিত্যুসন ক্লব ওফ ইন্দিয়াদা পাংথোকখি।

মন্ত্রীনা শুতিং, রোলিং অমসুং নুপীগী ক্রিকেৎ তিমদগী অপুনবা এথেলেৎ 27 তরাম্না ওকখি। হরমনপ্রীৎ কৌরনা লুচিংবা নুপীগী ক্রিকেৎ তিমনা এসিয়ান গেম্সতা পুৱারী ওইরবা শনাগী মেদল অমা লৌরকখি, অদুগা রোলিংদগী অপুনবা মেদল 5 (সিলভর 2, ব্রোঞ্জ 3) লৌরকখি। হৌজিক ফাওবদা মেদল অয়াম্বা শুতিংদগী লাক্লি, মদুদা ঐখোয়গী রাইফল, শোতগন অমসুং পিস্তোল তিমনা মেদল 13 (গোল্দ 4, সিলভর 4 অমসুং ব্রোঞ্জ 5) লৌরকখি।

এসিয়ান গেম্সতা মখোয়গী থোইদোক হেন্দোকপা পর্ফোমেন্সকীদমক মন্ত্রীনা এথেলেৎশিংবু থাগৎপা ফোংদোকখি। মন্ত্রীনা হায়খি, “ঐহাক্না এথেলেৎ অমসুং কোচ পুম্নমকপু থাগৎপা ফোংদোকচরি। মায় পাকপা অসিগীদমক মখোয় চহি কয়া হোৎনখি। অদোম্না উবা ফংলে মদুদি পুৱারী শেম্লিবা রোৱরশিং অসি ইশিংগী অৱাৎপা লৈবা মফমশিংদগী ওইরবসু ৱাতর স্পোর্তস ইভেন্তদা মখোয়না মেদলশিং পুরক্লি। ঐখোয়না ইক্বেস্ত্রিয়ানদসু শনাগী মেদল ফংখি।”

শ্রী থাকুরনা হায়খি, “শুতিংদা ঐখোয়না ঐখোয়গী স্পিরিৎ অমসুং রেসিলিয়েন্স উরে। শনাগী মেদল লৌরকপদা নত্তনা নুপীগী 50m রাইফল 3P ইভেন্তদা ৱার্ল্দ রেকোর্দ স্কোর অমসু রেজিস্তার তৌখিবা তোপ্স এথেলেৎ সিফ্ত কৌর সমরাদগী 10m এয়র রাইফলদা শনাগী মেদল লৌরকখিবা খেলো ইন্দিয়া এথেলেৎ রুদ্রান্স পতিল ফাওবা ঐখোয়গী শুতর পুম্নমক্না থোইদোক হেন্দোকপা পর্ফোমেন্স পীখি।”

শগোলশেল নুমিৎতা পাংথোকখিবা থৌরম অসিদা য়ুথ এফিয়ার্স অমসুং স্পোর্তস, স্পোর্তস ওথোরিতী ওফ ইন্দিয়াগী ওফিসিয়েলশিংগা লোয়ননা এথেলেৎশিংগী ইমুং মনুং অমসুং মরূপশিংনা শরুক য়াখি।  

***