ভারতনা জি-২০গী প্রসিদেন্ত ওইবগী মখাদা, অমৃত কালদা নুপীশিংদা শক্তি পীবগী প্রধান মন্ত্রী শ্রী নরেন্দ্র মোদীগী মঙলান অদু শেন্মিৎলোল অমসুং খুন্নাইগী হিরম খুদিংমক্তা উবা ফংলে। মঙলান অসিদা শেমগৎতুনা, ভারতনা জি-২০গী প্রসিদেন্ত ওইবা অসি অহানবা ওইনা নুপীশিং চাউখৎহনবদগী নুপীশিংনা লমজিংবা চাউখৎপদা মীৎয়েং থম্লে।

নুপী-নুপা থোং মান্নবা, নুপীদা শক্তি পীবা অমসুং নুপীনা লমজিংবা চাউখৎপগী পুৱারি ওইনা মাইপাকপা অমদা, গান্ধীনগরদা ওগস্ত ২- ওগস্ত ৪,২০২৩ দা পাংথোকখিবা নুপীদা শক্তি পীবগী জি-২০ মিনিস্তরশিংগী মীফমদা লৌখিবা ৱারেপ জি-২০ নিউ দিল্লি লিদরস দিক্লারেসন ২০২৩গী চিয়ারগী ৱারোলদা য়াওরে।

জি-২০ নিউ দিল্লি লিদরস দিক্লারেসন ২০২৩ না শেন-থুম অমসুং খুন্নাইগী শক্তি পীবা হেনগৎহনবা, নুপীশিং দিজিতেলগী খেন্নবশিং হন্থহনবা, নুপীশিং শরুক য়াহনবা ক্লাইমেত এক্সন অমসুং নু্পীশিং চীঞ্জাক, মচি ওইবা চীঞ্জাক অমসুং নুংঙাই-য়াইফবা ফংহনবদা মীৎয়েং থম্লে।

ব্রাজিলনা জি-২০গী প্রসিদেন্ত ওইদুনা পাংথোক্কদবা অহানবা মীফমদা জি-২০ নুপী মিনিস্তরশিং শৌগৎনবা নুপীশিংদা শক্তি পীনবা ৱার্কিং গ্রুপ অমা শেম্নবা জি-২০ লুচিংবশিংনা য়ানখ্রে। জি-২০ লুচিংবশিংনা পীরিবা থাজবশিং অসি ভারতকী প্রধান মন্ত্রীনা নুপীশিং য়াইফনবা জি-২০ লৈবাকশিংদা মতেং পাংলিবা অসিদা মমি তারে।

 ‘নুপী-নুপা থোং মান্নবা অমসুং নুপীশিং অমসুং নুপীমচাশিং শক্তি পীনবা, ভারতনা অপুনবা ওইনা অমসুং কৎথোকপগা লোয়ননা পায়খৎলকপা থবকশিং জি-২০ নিউ দিল্লি লিদরস দিক্লারেসন ২০২৩গা হৌজিক অচেৎপা মফম অমা কনবা ঙম্লে। মসি জি-২০ লুচিংবশিং, দেলিগেদশিং, ৱাঙাংলোয়শিং অমসুং জি-২০ লৈবাকশিংগী মীহুৎশিং অমসুং গেস্ত লৈবাকশিংগী থৱায় য়াওবা অমসুং শৌগৎপা য়াওদনা ওইথোক্লোই। ভারতনা প্রসিদেন্ত ওইবগী মখাদা জি-২০ লৈবাকশিং অমসুং গেস্ত লৈবাকশিং হায়বদি আর্জেন্তিনা, অস্ত্রেলিয়া, ব্রাজিল,  কনাদা, য়ুরোপিয়ান য়ুনিয়ন, ফ্রান্স, জর্মনি, ইন্দোনেসিয়া, ইতালি, জপান, মেক্সিকো, কোরিয়া, সাউদি অরাবিয়া, খা অফ্রিকা, তুর্কিয়ে,  য়ু.কে, য়ু.এস.এ, বাংলাদেস, মাউরিসিয়স, নেদরলেন্দস, নাইজেরিয়া, শিঙ্গাপুর, স্পেন, ওমান অমসুং য়ু.এ.ই, দব্লিউ-২০ ইঙ্গেজমেন্ত গ্রুপ, ইমপৱার ইনিসিয়েতিপ অমসুং মিনিস্তরিয়েল কনফরেন্স ওন ৱুমেন ইমপৱারমেন্ত(এম সি দব্লিউ ই) হায়রিবা থবকশিং অসি পাংথোকপদা মপুংফানা শরুক য়াখি।

জি-২০ নিউ দিল্লি লিদরস দিক্লারেসন ২০২৩ দা অচৌবা মফম অমা কন্নবা মখোয়গী থৌদাংশিং পাংথোকখিবগীদমক ৱুমেন অমসুং চাইল্দ দিবলপমেন্ত মিনিস্ত্রিনা ৱুমেন-২০গী মেম্বরশিং অমসুং জি-২০ ইমপৱারগী মেম্বরশিং থাগৎপা ফোঙদোকখ্রে। নুপী-নুপা থোং মান্নবগী মতাংদা মরুওইবা মীৎয়েং থমদুনা হকথেংননা মালেমগী মীফম ৬ অমসুং ভর্চুএল মীফম ৮৬ পাংথোক্তুনা, ভারতনা জি-২০গী প্রসিদেন্ত ওইবা অসি নুপীশিংদা শক্তি পীনবগী থবক চাউখৎনবা মৈরা অমা ওইরে। ৱুমেন-২০ অমসুং জি-২০ ইমপৱারগী মীফমশিং দোক্তর সঙ্গিতা রেদ্দি( জোইন্ত মেনেজিং দিরেক্তর-এপ্পোলো হোস্পিতালস গ্রুপ) অমসুং দোক্তর সন্ধয় পুরেচা( শঙ্গিৎ নাতক একাদেমি ফংলবী)না লুচিংদুনা পাংথোকখি। তোঙান তোঙানবা মালেমগী থৌরমশিং অমসুং একজিবিসনশিং পাংথোকপদা শরুক য়াখিবা রাজ্য সরকারশিং, কেন্দ্রগী মিনিস্ত্রিশিং, নিফ, য়ু.এন ৱুমেন, এফ.আই.সি.সি.আই, সি.আই.আই অমসুং মিনিস্ত্রিগা লোয়ননা থবক তৌমিন্নখিবশিং থাগৎখি।

মালেমগী থাক্তা পাংথোকখিবা মীফমশিংদা শীনবা একজিবিসনশিংদা মখোয়গী পোৎথোকশিং, হৈশিংবা অমসুং থবকশিং উৎখিবা খুৎহৈবশিং, ক্রাফপর্সনশিং অমসুং নুপীশিং, নুপী ওন্ত্রেপ্রেনিউয়রশিং মিনিস্ত্রিনা থম্মোয় শেংনা থাগৎপা ফোঙদোক্লি।

প্রধান মন্ত্রী নরেন্দ্র মোদীগী লমজিং মখাদা জি-২০ অসি মীয়াম্না প্রসিদেন্ত ওইবা ঙমহল্লে অমসুং মীয়াম শরুক য়াদুনা ভারতকী জি-২০গী প্রসিদেন্ত ওইবা অসি মশক থোকপা অমা ওইরে। ৱাল্কথোনশিংদগী হৌরগা মীয়াম তিনবা ফাওবদা জনভাগিদারিগী খুৎথাংদা তোঙান-তোঙানবা থবকশিং মীওই ৩০০,০০০ হেন্না শরুক য়াখি। নুপীশিংনা লমজিংবা চাউখৎপা  উৎখিবা থৌরমশিং অমসুং নুপী লুচিংবশিং, খুৎহৈবশিং, সেল্ফ হেল্প গ্রুপশিং, এস.এম.ইশিং, কোর্পোরেতশিং, ললোন-ইতিকশিং অমসুং রাজ্যশিংনা থৱায় য়াওনা শরুক য়াদুনা ভারতনা জি-২০গী প্রসিদেন্ত ওইবা অসি তশেংনা মীয়ামগী থৌরম অমা ওইহনখ্রে।

*****