“ దేశాన్ని ఎప్పుడూ ముందు ఉంచండి, ఇది ఐచ్ఛికం కాదు, ఇది అనివార్యం కాదు, ఇదొక్కటే మార్గం, మనమందరం దేశానికి రుణపడి ఉండాలి.” న్యూఢిల్లీలో ఈ రోజు అఖిల భారత వైద్య శాస్త్రాల సంస్థ -ఎయిమ్స్ - 48వ స్నాతకోత్సవంలో భారత ఉపరాష్ట్రపతి శ్రీ జగదీప్ ధన్కర్ స్నాతకోపన్యాసం చేస్తూ ఈ విషయం తెలిపారు.  కేంద్ర ఆరోగ్య, కుటుంబ సంక్షేమ శాఖ మంత్రి డాక్టర్ మన్సుఖ్ మాండవీయ, కేంద్ర ఆరోగ్య, కుటుంబ సంక్షేమ శాఖ సహాయ మంత్రి శ్రీ ఎస్పీ సింగ్ బఘేల్ కూడా స్నాతకోత్సవానికి హాజరయ్యారు. 

ఉపరాష్ట్రపతి తన ప్రసంగంలో, "ఈ ప్రతిష్ఠాత్మక సంస్థ నుండి ఆరోగ్య రంగంలో అడుగు పెట్టే వారు ‘ఆరోగ్యకరమైన శరీరం మన అన్ని సద్గుణాల వాహనం‘ అనే ఎయిమ్స్ నినాదంలో ప్రతిబింబించే సందేశాన్ని తప్పక  తీసుకువెళతారు” అన్నారు. లైఫ్ టైమ్ అచీవ్ మెంట్ అవార్డును అందుకుంటున్న ఆరుగురు రిటైర్డ్ అధ్యాపకులకు ఉపరాష్ట్రపతి శుభాకాంక్షలు తెలుపుతూ, వారి జీవితం, కృషి ఈ రోజు గ్రాడ్యుయేషన్ చేస్తున్న విద్యార్థులకు స్ఫూర్తిదాయకమని అన్నారు.

ఈరోజు డిగ్రీలు తీసుకుంటున్న విద్యార్థులకు ఉపరాష్ట్రపతి శుభాకాంక్షలు తెలియచేస్తూ, "మీకు, ఈ రోజు మీరు గర్వించ దగేలా చేసిన మీ తల్లిదండ్రులకు, ఒక సంస్థకు వెన్నెముక అయిన అధ్యాపకులు, సిబ్బందికి అభినందనలు” అన్నారు. ఆరోగ్య సంరక్షణలో అత్యుత్తమ పర్యావరణ వ్యవస్థను సృష్టించడానికి ఎయిమ్స్ నిబద్ధతను ఉపరాష్ట్రపతి ప్రశంసించారు, "ఢిల్లీ, ఖరగ్‌పూర్‌లోని ఐ ఐ టి లు, దేశంలోని , విదేశాలలోని అనేక ఇతర సంస్థలతో ఎయిమ్స్ భాగస్వామ్యాన్ని ఏర్పరచుకోవడం సంతోషదాయకంగా ఉంది" అన్నారు. 

మూడేళ్ల తర్వాత జరుగుతున్న స్నాతకోత్సవం కోవిడ్ మహమ్మారిని గుర్తు చేస్తోందని ఉపరాష్ట్రపతి వ్యాఖ్యానించారు. “మానవాళిలో ఆరో వంతు జనాభాకు నిలయమైన భారత్ కోవిడ్ ముప్పును ఎంత విజయవంతంగా ఎదుర్కొందో, ఎంత విజయవంతంగా కట్టడి చేసిందో ఈ స్వల్ప సమయం ప్రపంచానికి తెలియజేసింది. దీనికి ప్రధాన కారణం ఆరోగ్య యోధుల కృషి. ప్రధాని దార్శనికత, ఆయన వినూత్న వ్యూహం, దాని నిర్విఘ్నమైన అమలు ప్రజల అపరిమితమైన భాగస్వామ్యాన్ని సాధించాయి” అన్నారు. ప్రపంచవ్యాప్తంగా కరోనా మహమ్మారిని ఎదుర్కోవడంలో భారతదేశం చేస్తున్న ప్రయత్నాలను వివరిస్తూ, "మహమ్మారి మానవాళికి విసిరిన సవాలు వసుధైక కుటుంబ పురాతన నాగరిక విలువలను ప్రపంచానికి తెలియజేసింది” అని పేర్కొన్నారు. “ జీ-20 నినాదం 'వన్ ఎర్త్ వన్ ఫ్యామిలీ వన్ ఫ్యూచర్' మన నాగరికత సారాంశానికి ఖచ్చితమైనది.  కోవిడ్ మహమ్మారిని సమర్థంగా ఎదుర్కొంటూనే వ్యాక్సిన్ మైత్రి కింద కొవాగ్జిన్ ను అందుబాటులోకి తీసుకురావడం ద్వారా 100కు పైగా దేశాలకు మద్దతు ఇవ్వడం మనందరికీ గర్వకారణం” అన్నారు. 

స్వచ్ఛభారత్ మిషన్ (ఎస్ బిఎమ్) తో సహా ఆరోగ్య సంరక్షణలో యూనివర్సల్ పాలసీ ఇనిషియేటివ్ విజయాన్ని ఉపరాష్ట్రపతి ప్రస్తావించారు. “ఎస్ బి ఎమ్  ఘన విజయం పౌరులకు, ప్రత్యేకంగా మహిళలకు గౌరవంతో సాధికారత ఇవ్వడమే కాకుండా, సమాజ ఆరోగ్యాన్ని కూడా పెంపొందిస్తుంది” అన్నారు. అంతర్జాతీయ యోగా దినోత్సవాన్ని పురస్కరించుకుని ప్రపంచానికి భారత్ ఇచ్చిన కానుక యోగా అని ధన్కర్ అన్నారు. ఈ వేడుక ప్రపంచవ్యాప్తంగా వ్యక్తుల ఆరోగ్యం , శ్రేయస్సులో సానుకూల పరివర్తనకు నాంది పలికిందని పేర్కొన్నారు. ప్రత్యేక ఆయుష్ మంత్రిత్వ శాఖ ఏర్పాటు సమగ్ర ఆరోగ్య సంరక్షణ పరిష్కారాల కోసం సాంప్రదాయ ఆధునిక పద్ధతులను సమ్మిళితం చేయడం, శ్రేయస్సు కోసం సమగ్ర విధానాలకు అంకితభావాన్ని సూచిస్తుందని ఉపరాష్ట్రపతి అన్నారు.

సమాజంలో ఆరోగ్య సంరక్షణ ప్రదాతల పాత్రను శ్రీ ధన్కర్ నొక్కి చెప్పారు, "జీవితంలో ప్రతిదాన్ని పునర్నిర్మించవచ్చు - భార్య, రాజ్యం, స్నేహితుడు, సంపద. కానీ శరీరం ఒక మినహాయింపుగా, భర్తీ చేయలేని , అమూల్యమైనదిగా నిలుస్తుంది, సమాజంలో ఆరోగ్య సంరక్షణ ప్రదాతలు పోషించే పాత్ర భర్తీ చేయలేనిది. సంస్కృత మంత్రంలో నిక్షిప్తమైన కాలాతీత జ్ఞానం నుండి గ్రహించి, "సర్వే భవంతు సుఖినాహ్, సర్వే సంతు నిరామాయ" - "అందరూ సంతోషంగా ఉండాలి. అందరూ అనారోగ్యం నుంచి విముక్తులు కావాలి‘‘ అంటూ ఉపరాష్ట్రపతి తన ప్రసంగాన్ని ముగించారు.

డాక్టర్ మన్సుఖ్ మాండవీయ విద్యార్థులను అభినందిస్తూ, "డిగ్రీ పొందిన వారికి ఈ రోజు చాలా ముఖ్యమైన రోజు, ఎందుకంటే వారు జీవితంలో ఒక ఇన్నింగ్స్ పూర్తి చేశారు. వారి జీవితంలో కొత్త అధ్యాయాన్ని ప్రారంభిస్తున్నారు" అని అన్నారు. విద్యార్థుల జీవితంలో వచ్చిన మార్పును ఆయనప్రస్తావిస్తూ,  "మీరు మార్పు అంచున ఉన్నారు, ఎందుకంటే ఇప్పుడు మీరు మీ విద్యలో నేర్చుకున్నవన్నీ ఆచరణలో పెట్టగలుగుతారు, మీరు ఎక్కడికి వెళ్ళాలని నిర్ణయించుకున్నా, దేశం మిమ్మల్ని ఆశతో చూస్తుందని గుర్తుంచుకోండి, ఆరోగ్య సంరక్షణను మరింత అందుబాటులో,  చౌకగా చేయడానికి మీరు ఈ వేదికను ఉపయోగిస్తారు" అని అన్నారు. “రెండేళ్ల తర్వాత ఎయిమ్స్ 50వ స్నాతకోత్సవం జరుపుకోబోతోందని, ఎయిమ్స్ 50వ స్నాతకోత్సవం సందర్భంగా ఈ ప్రతిష్టాత్మక సంస్థకు చెందిన వైద్యులందరినీ వారు ప్రపంచంలో ఎక్కడ ఉన్నా సన్మానిద్దాం” అన్నారు. 

ఆరోగ్యం కూడా అభివృద్ధిలో ఒక రూపమని, దేశ పౌరులు ఆరోగ్యంగా ఉంటేనే దేశం సుభిక్షంగా ఉంటుందని మంత్రి పేర్కొన్నారు. 2014లో 48,000గా ఉన్న మెడికల్ కాలేజీల సంఖ్య ఇప్పుడు రెట్టింపై 1,07,000కు పెరిగిందన్నారు. ఆరోగ్య సంరక్షణలో అంతరాలను పూడ్చడానికి, దేశంలో మరింత స్థితిస్థాపక ఆరోగ్య సంరక్షణ వ్యవస్థను సృష్టించడానికి భారతదేశంలోని 750 జిల్లాల్లో రూ .64000 కోట్లు పెట్టుబడి పెడుతున్నామని డాక్టర్ మాండవీయ చెప్పారు. 

విద్యార్థులు తమ దేశానికి సేవ చేయాలనే సంకల్పం తీసుకోవడానికి, ప్రతిరోజూ ఆ తీర్మానం నుండి ప్రేరణ పొందడానికి ఇదొక్కటే మార్గం. ఈ విద్యార్థుల విద్యలో వారి తల్లిదండ్రులు, ఫ్యాకల్టీ హెడ్ పోషించిన పాత్రకు డాక్టర్ మాండవీయ కృతజ్ఞతలు తెలిపారు.

స్నాతకోత్సవంలో లోక్ సభ సభ్యుడు రమేశ్ బిధురి, ఎ ఐఐఎంఎస్ డైరెక్టర్ డాక్టర్ ఎం.శ్రీనివాస్, ఎయిమ్స్, కేంద్ర ఆరోగ్య మంత్రిత్వ శాఖ ఉన్నతాధికారులు పాల్గొన్నారు.  

****