கடலோர நீர்வாழ் உயிரின வளர்ப்பு ஆணையம் (திருத்த) மசோதா, 2023 நாடாளுமன்றத்தின் இரு அவைகளிலும் நிறைவேற்றப்பட்டது.  லட்சக்கணக்கான சிறு, குறு நீர்வாழ் உயிரின வளர்ப்பு விவசாயிகள் பல நிறுவனங்களிடமிருந்து அனுமதிகளைப் பெறுவதற்கான  தேவையைத் தவிர்க்க இந்த மசோதா பெரிதும் உதவும்.

கடலோர ஒழுங்குமுறை மண்டலத்தின் (சி.ஆர்.இசட்) வளர்ச்சியற்ற பகுதிக்குள் குஞ்சு பொரிப்பகங்கள், குஞ்சுகள் பெருக்க மையங்கள், நியூக்ளியஸ் இனப்பெருக்க மையங்கள் போன்ற நீர்வாழ் உயிரின வளர்ப்பு அலகுகளை நிறுவுவதற்கு கடலோர நீர்வாழ் உயிரின ஆணைய (சி.ஏ.ஏ) சட்டத்தின் கீழ் குறிப்பிட்ட விலக்கு வழங்கப்பட்டுள்ளது.

பதிவு செய்யாமல் கடலோர நீர்வாழ் உயிரின வளர்ப்பை மேற்கொண்டால் 3 ஆண்டுகள் வரை சிறைத்தண்டனை விதிக்க முதன்மை சட்டத்தில் வகைசெய்யப்பட்டுள்ளது. இது சிவில் தன்மை கொண்ட குற்றத்திற்கு மிகவும் கடுமையான தண்டனையாகத் தெரிகிறது.  எனவே இந்தத் திருத்த மசோதா சிவில் மீறல்களை குற்றமற்றதாக்கும் கோட்பாட்டிற்கு ஏற்ப அபராதம் போன்ற பொருத்தமான நடைமுறைகளாக  மாற்றுகிறது.

இந்தச் சட்டத்திருத்த மசோதா கடலோர நீர்வாழ் உயிரின வளர்ப்பின் அனைத்து நடவடிக்கைகளையும்  சட்டத்தின் வரம்பிற்குள் முழுமையாக உள்ளடக்குவதற்கும், பண்ணை மற்றும் கடலோர நீர்வாழ் உயிரின வளர்ப்பின் பிற பிரிவுகளுக்கு இடையில் முதன்மை சட்டத்தில் நிலவும் தெளிவற்ற தன்மையை நீக்குவதற்கும் கொண்டுவரப்பட்டுள்ளது. இதன் மூலம் கடலோர நீர்வாழ் உயிரின வளர்ப்பு நடவடிக்கைகள் எதுவும் இச்சட்டத்தின் வரம்பிலிருந்து விலக்கி வைக்கப்படாமல், சுற்றுச்சூழலுக்கு கேடு விளைவிக்காத வகையில் செயல்படுவதை உறுதி செய்ய முடியும்.

2005 ஆம் ஆண்டில், கடலோர நீர்வாழ் உயிரின வளர்ப்பு நடவடிக்கை அடிப்படையில் இறால் வளர்ப்பாக இருந்தது. தற்போது கடற்பாசி வளர்ப்பு,  அலங்கார மீன் வளர்ப்பு, முத்து சிப்பி வளர்ப்பு போன்ற சுற்றுச்சூழலுக்கு உகந்த கடலோர நீர்வாழ் உயிரின வளர்ப்பின் புதிய வடிவங்களாக உள்ளன. இச்செயல்பாடுகள் கடற்கரையோர மீனவ சமுதாயங்களுக்கு குறிப்பாக மீனவப் பெண்களுக்கு பெருமளவு வருமானத்தை ஈட்டித் தரவும், பெருமளவிலான வேலைவாய்ப்புகளை உருவாக்கவும் வல்லவை. எனவே, அவற்றை கடலோர நீர்வாழ் உயிரின வளர்ப்பு ஆணையச் சட்ட வரம்பிற்குள் கொண்டு வருவதன் மூலம் ஊக்குவிக்கப்படும்.

கடலோர நீர்வாழ் உயிரின வளர்ப்பு ஆணையத்தின் சில செயல்பாட்டு நடைமுறைகளை செம்மைப்படுத்துவதன் மூலம் கடலோர நீர்வாழ் உயிரின வளர்ப்பில் தொழில் செய்வதை எளிதாக்க அரசு உத்தேசித்துள்ளது. தற்போதைய திருத்தம், செயல்பாட்டின் உரிமை அல்லது அளவுகளில் மாற்றங்கள் ஏற்பட்டால் பதிவு சான்றிதழில் மாற்றங்களைச் செய்வதற்கும், சிதைவு, சேதம் அல்லது சான்றிதழ் இழப்பு போன்றவற்றின் போது புதிய சான்றிதழை வழங்குவதற்கும் வழிவகுக்கிறது. முதன்மைச் சட்டத்தில் இல்லாத கூட்டுக் கட்டணத்துடன் பதிவைப் புதுப்பிக்க விண்ணப்பிப்பதில் ஏற்படும் காலதாமதத்தை மன்னிக்கவும் இச்சட்டம் வழிவகை செய்கிறது.

இச்சட்டத்தின் கீழ் கடமைகளைத் திறம்பட நிறைவேற்றுவதற்கு நிபுணர்கள், பங்குதாரர்கள் மற்றும் மக்கள் பிரதிநிதிகளைக் கொண்ட குழுக்களை நியமிக்க அதிகார சபைக்கு இந்த திருத்தங்கள் வெளிப்படையாக அதிகாரமளிக்கின்றன.

கடலோர நீர்வாழ் உயிரின வளர்ப்பின் வெற்றிக்கு நோய்த் தடுப்பு முக்கியம். எனவே, கடலோர நீர்வாழ் உயிரின வளர்ப்பில் பயன்படுத்துவதற்காக மரபணு மாற்றப்பட்ட மற்றும் நோயற்ற குஞ்சுகளை  உருவாக்கும் வசதிகளை நிறுவ அரசு உத்தேசித்துள்ளது. கடல்நீரை நேரடியாகப் பயன்படுத்தும் பகுதிகளில் மட்டுமே குஞ்சு பொரிப்பகங்கள், குஞ்சுகள் இருப்பு பெருக்க மையங்கள் மற்றும் தனித்த இனப்பெருக்க மையங்களை நிறுவ முடியும். அதே நேரத்தில்,கடலோர நீர்வாழ் உயிரின வளர்ப்பில் நுண்ணுயிர் எதிர்ப்பிகள் மற்றும் மருந்தியல் ரீதியாக செயலில் உள்ள பொருட்களின் பயன்பாட்டைத் தடுக்கவும் இந்தச் சட்டத்தில் வெளிப்படையான ஏற்பாடுகளைச் செய்ய  அரசு உத்தேசித்துள்ளது.

சட்டத்தில் பொருத்தமான விதிகளை அறிமுகப்படுத்துவதன் மூலம், நீர்வாழ் உயிரின வளர்ப்புப் பகுதிகளை வரைபடமாக்குதல், மண்டலமாக்குதல் போன்ற உலகளாவிய சிறந்த நடைமுறைகளை அறிமுகப்படுத்த அரசு உத்தேசித்துள்ளது. சிறந்த நீர்வாழ் உயிரின வளர்ப்பு நடைமுறைகள், தர உத்தரவாதம், பாதுகாப்பான நீர்வாழ் உயிரின வளர்ப்புப் பொருட்கள் மற்றும் சுற்றுச்சூழல் பாதுகாப்பின் முக்கிய கொள்கைகளை நீர்த்துப்போகச் செய்யாமல் வணிகம் செய்வதை எளிதாக்குதல் போன்றவை மேற்கொள்ளப்படும். இவை கடலோர நீர்வாழ் உயிரின வளர்ப்புத் துறையில் உற்பத்தி மற்றும் உற்பத்தித்திறன், கண்டுபிடிப்பு, அதிகரித்த போட்டித்திறன், தொழில்முனைவு ஆகியவற்றை நிலையாக ஊக்குவிக்கும்; கடலோர நீர்வாழ் உயிரின வளர்ப்புத் துறையில் வருமானம் மற்றும் வேலைவாய்ப்பில் நிலையான உயர்வுக்கு வழிவகுக்கும்.

கடலோர நீர்வாழ் உயிரின வளர்ப்பு தொடர்பான நடவடிக்கைகளை சிறப்பாக ஒழுங்குபடுத்த கடலோர நீர்வாழ் உயிரின வளர்ப்பு ஆணையத்திற்கு அதிகாரம் அளிப்பதற்கான புதிய ஏற்பாடுகள் இந்த திருத்த மசோதாவில் உள்ளன. மேலும்  கடலோர நீர்வாழ் உயிரின வளர்ப்பு அலகுகளில் இருந்து வெளியேற்றப்படும் கழிவுகளுக்குத் தரநிலைகளை நிர்ணயிக்க அல்லது ஏற்றுக்கொள்வதற்கு இது வழிவகுக்கிறது.

தொழில்நுட்பம் மற்றும் வளர்ப்பு நடைமுறைகளின் மேம்பாடுகளால், இறால் வளர்ப்பின் மாசுபடுத்தும் திறன் கணிசமாகக் குறைந்துள்ளது. கடலோர நீர்வாழ் உயிரின வளர்ப்பு ஆணையச் சட்டம் 2005-ன்   திருத்தங்கள் மூலம் இனங்களின் பல்வகைப்படுத்தல், பரப்பளவு விரிவாக்கம் ஆகியவற்றின் வடிவத்தில் இத்துறை இப்போது அடுத்த பெரிய பாய்ச்சலை மேற்கொள்ளத் தயாராக உள்ளது.

பின்னணி வண்ணம்:

கடலோர நீர்வாழ் உயிரின வளர்ப்பு ஆணையச்  சட்டம், 2005 ஆம் ஆண்டில் கடலோர சுற்றுச்சூழலைப் பாதுகாக்கும் நோக்கத்துடன் இயற்றப்பட்டது. இப்போது அதில் திருத்தம் செய்யப்பட்டிருப்பதன் மூலம் லட்சக்கணக்கான  வேலைவாய்ப்புகள், சுயதொழில் வாய்ப்புகள், மீன் விவசாயிகளுக்கு வருவாய்  அதிகரிப்பு, வணிகங்களின் வளர்ச்சி,  துடிப்பான நீர்வாழ் உயிரின வளர்ப்பு ஆதரவுத் தொழிலை உருவாக்குதல் உள்ளிட்ட நீர்வாழ் உயிரின வளர்ப்பில் தொழில்முனைவு ஆகியவை சாத்தியமாகும்.

கடந்த 9 ஆண்டுகளில், நாட்டின் இறால் உற்பத்தி 2013-14 ஆம் ஆண்டில் 3.22 லட்சம் டன்னிலிருந்து 2022-23 ஆம் ஆண்டில் 11.84 லட்சம் டன்னாக (தற்காலிக புள்ளிவிவரங்கள்) 267% அதிகரித்துள்ளது. இந்தியாவின் கடல் உணவு ஏற்றுமதி 2013-14 ஆம் ஆண்டில் ரூ.30,213 கோடியிலிருந்து 2022-23 ஆம் ஆண்டில் ரூ.63,969 கோடியாக இரட்டிப்பாகியுள்ளது. 2013-14 ஆம் ஆண்டில் ரூ.19,368 கோடியாக இருந்த இறால் ஏற்றுமதி 2022-23 ஆம் ஆண்டில் ரூ.43,135 கோடியாக 123% அதிகரித்து இரு மடங்காக அதிகரித்துள்ளது. உண்மையில், ஆந்திரா, குஜராத், ஒடிசா,  தமிழ்நாடு ஆகிய மாநிலங்கள் கடலோர நீர்வாழ் உயிரின வளர்ப்பு, இறால் உற்பத்தி மற்றும் ஏற்றுமதியின் வளர்ச்சிக்கு கணிசமான பங்களிப்பை செய்துள்ளன.

முதன்மைச் சட்டம் குறிப்பாக கடலோர நீர்வாழ் உயிரின வளர்ப்பை சி.ஆர்.இசட் அறிவிப்பின் வரம்பிலிருந்து விலக்கியிருந்தாலும், 1991 ஆம் ஆண்டின் சி.ஆர்.இசட் அறிவிக்கை சட்ட நிறுவனங்கள் மற்றும் நீதிமன்றங்களால் குறிப்பிடப்பட்டதால் அதற்கு நேர்மாறாக தெளிவற்ற தன்மைகளும் விளக்கங்களும் உள்ளன. மேலும், கடலோர ஒழுங்குமுறை மண்டலத்தின் (சி.ஆர்.இசட்) "வளர்ச்சியற்ற மண்டலத்திற்குள்" கடலோர நீர்வாழ் உயிரின வளர்ப்பைத் தடைசெய்யும் முதன்மைச் சட்டத்தின் பிரிவு 13 (8) குஞ்சு பொரிப்பகங்களுக்கும் பொருந்தும் என்று தவறாகப் புரிந்து கொள்ளப்பட்டுள்ளது.

எனவே, இந்தச் சட்டத்தை முற்போக்கானதாக மாற்றவும், ஒழுங்குமுறை சுமையைக் குறைக்கவும்,  தெளிவற்றத் தன்மைகளை நீக்கி, கடலோர நீர்வாழ் உயிரின வளர்ப்பு ஆணைய சட்டத்தின் சில விதிகளில் திருத்தம் செய்ய வேண்டும் என்று நீர்வாழ் உயிரின வளர்ப்பு விவசாயிகளும் பங்குதாரர்களும் கோரிக்கை விடுத்தனர்.

***