مرکزی وزیر داخلہ اور تعاون کے وزیر جناب امت شاہ نے آج بھونیشور میں منعقدہ  ایک میٹنگ کے دوران  اوڈیشہ میں ڈیزاسٹر مینجمنٹ اور بائیں بازو کی انتہا پسندی (ایل ڈبلیو ای) کا جائزہ لیا۔ اوڈیشہ کے وزیر اعلی جناب نوین پٹنائک، مرکزی داخلہ سکریٹری اور وزارت داخلہ اور ریاستی حکومت کے سینئر افسران نے میٹنگ میں شرکت کی۔

وزیر داخلہ نے آفات سے نمٹنے کے لیے ریاستی پہل  کا خیرمقدم کیا، جو کہ ہندوستان کو آفات سے محفوظ بنانے کےلیے وزیر اعظم جناب نریندر مودی کے ویژن کے عین مطابق ہے۔ جناب امت شاہ نے ریاستی حکومت کو آفات سے بچنے کی اوڈیشہ کی کوششوں میں مرکزی حکومت کی تمام مطلوبہ مدد فراہم کرانےکی  یقین دہانی کرائی۔

جناب امت شاہ نے آفات سے نمٹنے کے لیے ریاست کی تیاریوں کی ستائش کی، جس نے 1999 کے سوپر سائیکلون کے بعد ڈیزاسٹر مینجمنٹ میں خاطر خواہ پیش رفت کی ہے۔ انہوں نے مشورہ دیا کہ ریاست میں آپدا متر  اور آفات سے نمٹنے والوں کو قدرتی آفات سے نمٹنے، خاص طور پر بغیر کسی انتباہ کے پیش آنے والی  کیمیائی اور جوہری آفات اور ان آفات سے نمٹنے کی ہمہ جہت ٹریننگ دی جانی چاہئے ۔ وزیر داخلہ نے یہ بھی تجویز کیا کہ ہوم گارڈز کے رضاکاروں کو مضبوط کیا جائے اور انہیں آفات سے نمٹنے کی تربیت دی جائے۔ مزید یہ کہ ریاست میں قائم کثیر مقصدی سائیکلون پناہ گاہوں کی دیکھ بھال کو یقینی بنانے کے لیے بجٹ ہیڈ سے باقاعدہ فنڈنگ فراہم کی جانی چاہیے۔

مرکزی وزیر داخلہ اور تعاون کے وزیر نے اس بات پر زور دیا کہ ریاستی انتظامیہ کو چاہیے کہ وہ ایس او پی کو اپنائے اور بجلی گرنے، گرمی کی لہر اور جنگل کی آگ سے جان بچانے کے لیے مناسب تیاری اور تخفیف کی کوشش کرے۔ انہوں نے آفات کے دوران جانوروں کی حفاظت پر توجہ دینے پر بھی زور دیا۔ وزیر داخلہ نے بالاسور ٹرین حادثہ کے دوران بہترین ردعمل فراہم کرنے کے لئے ریاستی حکومت کا شکریہ ادا کیا اور گاؤں کی سطح کے رضاکاروں اور ریاستی انتظامیہ کی پوری مشینری کی کوششوں کی  ستائش کی۔

مرکزی وزیر داخلہ نے بائیں بازو کی انتہا پسندی سے متعلق ریاستی حکومت کی کوششوں کی ستائش کی اور مرکزی حکومت کی کوششوں کی تکمیل کے لیے ایل ڈبلیو ای سے متاثرہ علاقوں میں بنیادی ڈھانچے کی ترقی میں سرمایہ کاری کرنے کا مشورہ دیا۔  انہوں نے متاثرہ علاقوں میں سڑکوں اور مواصلاتی نیٹ ورک کو مضبوط بنانے، خاص طور پر تمام دیہاتوں کو انٹرنیٹ سے جوڑنے میں ہر ممکن تعاون کا یقین دلایا۔ 

مرکزی وزیر داخلہ نے کہا کہ ہمیں ان تمام مسائل کو حل کرنا چاہئے جو کنیکٹوٹی، تعلیم اور روزگار کی عدم موجودگی سمیت  ایل ڈبلیو ای کی ترقی میں اہم کردار ادا کرتے ہیں ۔ ریاست کو پی ڈی ایس دکانوں کے قیام، سڑکوں کی تعمیر اور ایل ڈبلیو ای سے متاثرہ علاقوں میں بجلی کی فراہمی کے لیے فنڈ مختص کرنے پر بھی غور کرنا چاہیے۔

۔۔۔۔۔۔۔۔۔۔۔۔۔۔۔۔۔۔۔۔۔

(ش ح ۔ رض  ۔ ج ا  (

8001