U Vice President, u Jagdeep Dhankhar u la ong mynta ka sngi ba ka synshar paidbah ka dei shaphang ka jingiakren, ka jingiamir jingmut bad ka jingiatai nia, bad u la ong ba ka jingpynkulmar kam iadei bad ki jingngeit ha ka synshar paidbah. U la ong ruh ba u sngewkhia ba la pynkylla atiar ia ka jingpynkulmar ha ki iing dorbar thaw ain kiba dei ban treikam man ka sngi baroh shi sngi ban pynthikna ia ka hok jong ki briew.

U Dhankhar u la kyntu ia baroh ban leh ia kaba donkam ban pynneh ia ki jingngeit ha ka synshar paidbah ha kaba u la ong ba kam don kano kano ka daw ban ong ba ka Parliament kam lah ban treikam man ka sekon. U la ong ba kane ka la ktah bha ia ki briew jong ka ri ha kaba u la ong, “Haba ka don ka jingktah ia ka Parliament ha kano kano ka sngi, ym lah ban don ka Question Hour. Ka Question Hour ka dei ka rukom treikam ban wanrah ia ka jingbahkhlieh bad ka jingshai ha ka jingsynshar. Ka Sorkar ka hap ban ai jubab ia man ki jingkylli. Kane ka iarap bha ia ka sorkar. Ka jingbym don ka question hour ka dei ka bym lah long haba ngi peit ia ki jingngeit ha ka synshar paidbah bad ka jingsynshar kaba bha.”

Ha ka jingai jingkren ha ka Convocation ha ka jingdap 100 snem ka Jamia Millia Islamia ha Vigyan Bhawan mynta ka sngi, u Vice President u la ong ba ka jingiapher jingmut ka long shi bynta ka synshar paidbah, hynrei ka jingpynkylla ia ka jingiapher jingmut sha ka jingkulmar ka long ka jingtim na ka bynta ka synshar paidbah. U Dhankhar u la ong ba ka jingpyrshah kam dei ban long ka jingpynphai kylla, bad u la ai jingmut ba ka lynti shakhmat ka dei tang ka jingiamir jingmut bad ka jingiakren.

U la ong ba ka ri ka la pynkylla ialade na ka jingdon ha ka thup ‘Fragile Five’ ha ka ioh ka kot sha ka thup jong ki ‘Top Five’ ha ka ioh ka kot hapdeng ki ri mynta bad u la ong ba ryngkat bad ka jingkiew shaphrang jong ka India, kin don ki jingeh. “Ka jingiaid shakhmat kam lah ban long kaba baroh ki sngewtynnad. Ki don ki kynhun kiba don ki jingthmu kiba sniew kiba kwah ban pynbudnam bad pyntlot ia ki kam bad ki jingshisha kum ka jingkiew shaphrang,” u la ong da kaba kyntu ia ki samla ba kin shim ia ki sienjam ban pynduh jait ia kine ki kynhun.

U la kren shaphang katto katne ki skulbah nabar ri ha kaba u la ong ba kine ki la kylla sha ki jaka ba pynbun ki jingkren pyrshah ia ka India ki bym don nongrim. U la ong ba kine ki skulbah ki pyndonkam ia ki samla pule bad ki nonghikai jong ngi na ka bynta ki jingthmu jong ki bad u la kyntu ia ki samla pule ba kin long kiba twad jingmut ba bniah haba ki shem ia kum kine. “Ka long kaba sngewlyngngoh ba ki briew kiba don ha ki kam ban ai jingshakri ia ka ri, mar sien duh ia kine ki kam, ki klet ia ki jingkylla kiba bha kiba la wan ha kane ka ri jong ngi. Nga kyntu ia phi ki samla jong ka ri ba phin pynduh jait ia kum kine ki khana pyrshah ia ka India. Ym dei ban shah ban pynsaphriang ia kine ki khana bym don nongrim,” u la ong.

U Dhankhar u la ong ba ka jingshai ha ki kam bad ka jingbahkhlieh ki dei ki kam ba peit bniah kane ka Sorkar mynta bad u la ong ba ka jingbam sap, ki briew kiba mushlia ha ki kam bad ki nongpynksan ialade kim don jaka shuh mynta. “Namar kane, kito kiba don bynta ha ka jingbam sap ki la iatylli hapoh kawei ka kynhun. Ki la pyndonkam ia baroh ki bor ban riehtngen bad phet,” u la ong da kaba bynrap ba “ki jingiakhih ha ki lynti syngkien ban ialeh pyrshah ia ka ain kim dei ka dak jong ka jingsynshar bad ka synshar paidbah kaba bha.”

U VP u la ong ruh ba ka jingbamsap ka ktah ia ka roi ka par bad ki lad kiba ryntih ia baroh bad u la ong ba “baroh ki lad ban phet ki nongpynkhein ia ki ain bad kiba iadon bynta ha ka jingbamsap ki dei kiba la pynduh.”

U Vice President u la kitbok kitrwiang ia ki samla kiba la iaid mynta sha ka bynta kaba thymmai ha ka jingim jong ki bad u la ong ba ka long kaba donkam ia ki ba kin long ki nongsaindur thymmai bad ki nongseng kam lajong khnang ba kin long ki nongai kam, ym ki nongwad kam.

U la ong ba kam iarap ia ka ri ban peit ia ka jingiohnong da kaba klet ia ka jingkiew ka ioh ka kot bad u la kyntu ia ki samla ba kin phaikhmat sha ka jingkiew ka ioh ka kot jong ka ri

U Vice President u la ban jur halor ki jngjop ha ka pule puthi bad u la ai jingmut ban pyniasoh ia ka pule puthi bad ka jingkiew ka imlang sahlang khnang ba ka jingnang jingstad kan pyndep ia la ka kamram. “Ka jingpynkupbor ia ki briew ka dei ka bynta kaba kongsan jong ka jingtei ia ka ri. Ki samla mynta ki dei ban pynkup bor ialade ym lyngba ka jingbuaid ha ki kam sain pyrthei hynrei lyngba ka jingpyntbit ialade,” u la ong.

U la ai jingiaroh ia ka NEP-2020 kaba plie shibun ki lad bad kaba wanrah ia ka jingkmen ha ka jingioh jingnang jingstad. U VP u la ong ba u ngeit skhem ba kane ka polisi kan wanrah ia ka jingkylla kaba khraw. U la ong ba kin don katto katne ki bynta jong ka ri kiba dang hap ban pdiang ia kane ka polisi bad u la ong ba u kyrmen ba baroh kin ioh ia ki jingmyntoi ba kane ka polisi kan wanrah.

U la ong ba baroh ki briew jong ka ri ki don bynta ha ki jingdon jingem jong ka ri da kaba bynrap ba dei ban don ka jingryntih ia ka jingsam ia kine ki jingdon jingem. “To ngin bud ia ka rukom treikam ha kaba ka jingpyndonkam ia ki jingdon jingem kan long kaba iaid ryntih, katkum ka jingdonkam bad ym katkum ka jingdon pisa katto katne ngut ki briew” u la ong.

U Dharmendra Pradhan, Myntri Sorkar Pdeng ba dei khmih ia ki tnat Pule Puthi bad Skill Development & Entrepreneurship, u Prof. Najma Akhtar, Vice-Chancellor, Jamia Millia Islamia University, ki nonghikai, ki samla pule bad kiwei kiwei ki heh ki hain ki la iadon lang ha kane ka sngi.

Ki dur –

*****