ওগস্ত ২২, ২০২২দা ভারত সরকার অমসুং কোলিএসন ফোর দিজাস্তর রিসিলিয়েন্ত ইনফ্রাস্ত্রকচর (সি দি আর আই)গী মরক্তা খুৎয়েক পীনখিবা হেদক্বার্তরস এগ্রিমেন্ত (ঐচ ক্বিউ এ)

শেমদোকপা প্রধান মন্ত্রী শ্রী নরেন্দ্র মোদীনা কেন্দ্রগী মন্ত্রীমন্দলনা অয়াবা পীরে।

সেপ্তেম্বর ২৩, ২০১৯দা নিউ য়োর্কতা য়ুনাইতেদ নেসন্স ক্লাইমেত এক্সন সম্মিৎ মনুংদা প্রধান মন্ত্রী শ্রী নরেন্দ্র মোদীনা সি.দি.আর.আই হৌদোকখি। মসি ভারত সরকারনা হৌদোকপা মালেমগী অচৌবা থবক অমনি অমসুং অইং-অশাগী খল হোংলকপা অমসুং অমাং-অতা থোক্তনবা থবকশিংগী মতাংদা মালেমগী লুচিংবা অমা ওইনবা ভারতনা হোৎনবা অদু উবা ফংলে।

সি.দি.আর.আই লিংখৎপা অমসুং নিউ দিল্লিদা মসিগী সেক্রেতরিয়েত লৈনবা ওগস্ত ২৮, ২০১৯দা মন্ত্রীমন্দলনা অয়াবা পীখ্রে অমসুং চহি ৫, ২০১৯-২০ দগী ২০২৩-২৪ ফাওবা সি.দি.আর.আইদা লুপা করোর ৪৮০গী শেনফম পীনবা ভারত সরকারনা অয়াবা পীখ্রে।

মখা তারকপদা, সি.দি.আর.আই অসি মালেমগী লুপ অমা ওইনা শক খঙনবা অমসুং য়ু.এন (পি এন্দ আই) এক্ত, ১৯৪৭গী সেক্সন-৩গী মখাদা খুদোংচাবশিং পীনবা হেদক্বার্তরস এগ্রিমেন্ত (ঐচ ক্বিউ এ) খুৎয়েক পীননবা জুন ২৯, ২০২২দা মন্ত্রীমন্দলনা অয়াবা পীখ্রে।

মন্ত্রীমন্দলগী ৱারেপ মতুংইন্না, ওগস্ত ২২, ২০২২দা ভারত সরকার অমসুং সি.দি.আর.আইগী মরক্তা হেদক্বার্তরস এগ্রিমেন্ত (ঐচ ক্বিউ এ) খুৎয়েক পীনখি।

সি.দি.আর.আই অসি লৈবাকশিংগী সরকারশিং, য়ু.এন এজেন্সিশিং, লৈবাক কয়াগী বেঙ্কশিং অমসুং শেন-থুমগী থবকশিং, প্রাইভেদ সেক্তর, মহৈলোয়শঙশিংগী মালেমগী অপুনবা লুপ অমনি অমসুং মসিনা তুংকোইনা চৎনবা য়াগদবা মহৌশাগী অকোয়বগী ফিবম অমা শেমগৎনবা ক্লাইমেত অমসুং অমাং-অতা ঙাকথোকপা ঙম্বা ইনফ্রাস্ত্রকচর সিস্তেমশিং শেমগৎনবা পান্দম থম্লি।

মসি হৌদোকপদগী, লৈবাক ৩১, মালেমগী লুপ ৬ অমসুং লনাই লুপ ২ সি.দি.আর.আইগী মেম্বরশিং ওইরে। শেন-থুম চাউখৎলবা লৈবাকশিং, চাউখৎলক্লিবা লৈবাকশিং অমসুং অইং-অশাগী খল হোংলকপদা খুদোংথিনিঙাই ওইবা লৈবাক কয়া মসিগী মেম্বর ওইরক্লি।

ভারত সরকার অমসুং সি.দি.আর.আইগী মরক্ত খুৎয়েক পীনখ্রবা হেদক্বার্তরস এগ্রিমেন্ত (ঐচ ক্বিউ এ) শেমদোকপা অসিনা য়ু.এন (পি এন্দ আই) এক্ত, ১৯৪৭গী সেক্সন-৩গী মখাদা সি.দি.আর.আই অসি মনিং তম্বা অমসুং মালেমগী আইনগী লুপ অমা ওইনা মালেমগী থাক্তা মসিগী থবকশিং পাংথোকপা ঙম্লগনি।

********