Ka Cabinet Committee on Economic Affairs (CCEA) ba khlieh da u Myntri Rangbah Duh, u Narendra Modi mynta ka sngi ka la ai jingmynjur ia ka song ba kyrpang jong ki skhim ba saindur thymmai na ka bynta ki nongrep ha ka jingmang tyngka kaba T.3,70,128.7 klur. Kine ki skhim ki dei na ka bynta ka bha ka miat jong ki nongrep da kaba kyntiew ia ka kam rep kaba iaineh. Kine ki sienjam kin kyntiew ia ka ioh ka kot jong ki nongrep, pynkhlain ia ki rukom rep tynrai rep organic, khyllie im ia ka jingseisoh jong ka khyndew bad pynthikna ka jingshngain ha ka bam.

Ka CCEA ka la ai jingmynjur ia ka jingbteng jong ka skhim Urea Subsidy ban pynthikna ba ki nongrep ki ioh ia ka urea ha ka dor T 242/ 45 kg ia ka shi borni kaba kynthup lang ia ki khajna bad ki bai sop neem. Na kane ka song ba la kdew halor, T. 3,68,676.7 klur ka dei na ka bynta ka urea subsidy ha ki lai snem (2022-23 to 2024-25). Kane ka lait na ka Nutrient Based Subsidy kaba la ioh jingmynjur dang shen kaba T. 38,000 klur na ka bynta ka samoi Kharif ha u snem 2023-24. Ki nongrep kim donkam ban lut shuh shuh ban thied urea, bad kane kan hap pynjem ia ki jinglut jingsep jong ki. Mynta, ka dor jong u urea ka long T.242 ia shi borni ba 45 kg u urea (kaba lait na ka bai sop neem bad ka khajna), katba ka dor kaba shisha ka long kumba T. 2200. Kane ka skhim ka dei kaba bei tyngka pura da ka Sorkar India lyngba ka jingkyrshan ka mang tyngka. Ka jingbteng jong ka skhim Urea Subsidy kan pynbun ruh ia ka jingshna hapoh ri ia u urea khnang ba ngin lah ban pyndap ia ki jingdonkam.

Namar ki jingkylla ha ka jingiadei hapdeng ki ri bad ka jingkiew dor ki mar, ka dor jong ki sboh ka dei kaba la kiew bun bun shah ha baroh kawei ka pyrthei ha kine ki snem ba la dep. Hynrei ka Sorkar India ka la iada ia ki nongrep jong ka ri na ka jingkiewdor ki sboh da kaba kyntiew ia ka subsidy na ka bynta ki sboh. Ha ka jingpyrshang jong ka ban ai jingiada ia ki nongrep, ka Sorkar India ka la kyntiew ia ka subsidy na ka bynta ki sboh na ka T. 73,067 klur ha u 2014-15 sha ka T. 2,54,799 klur ha u 2022-23.

La pynkhlain ia ki kam kiba iadei bad ka Nano Urea

Shuwa u snem 2025-26, yn sdang pyntreikam ia phra tylli ki Nano urea plant kiba lah ban pynmih 44 klur bilor kiba kot sha ka 195 LMT u urea. Ki sboh Nano ki pyllait ia ki jingpynkhlain ha ka rukom kaba lah ban pyniaid bha bad kane ka wanrah ia ka jingpyndonkam kaba kham bha ia kine ki jingpynkhlain bad ki pynduna ruh ia ka jinglut jingsep jong ki nongrep. Ka jingpyndonkam ia ka Nano Urea ka la wanrah ia ka jingkiew ha ka jinglah pynmih mar bam.

Ka ri ka don ha ka lynti ban long Atmanirbhar ha u Urea shuwa u 2025-26

Ka jingseng thymmai bad jingkhyllie im ia 6 tylli ki jaka pynmih urea ha Chambal Ferti ltd. - Kota Rajasthan, Matix ltd. Panagarh West Bengal, Ramagundam-Telangana, Gorakhpur-UP, Sindri-Jharkhand bad Barauni-Bihar naduh u 2018 ka la iarap ia ka ri ba kan long atmanirbhar ha kaba iadei bad ka jingpynmih bad jingpynbiang ia u urea. Ka jingpynmih urea ha ka ri ka la kiew na ka 225 LMT ha u 2014-15, sha ka 250 LMT ha u 2021-22. Ha u 2022-23, ka jinglah pynmih urea ka la kiew sha ka 284 LMT. Kine baroh ha ryngkat ki jaka pynmih Nano Urea kan pynduna ia ka jingshaniah jong ngi ha ka jingthied nabar ri ia u urea bad kan pynlong ia ngi kiba lah ban pyndap ia ki jingdonkam shuwa u snem 2025- 26.

PM Programme for Restoration, Awareness Generation, Nourishment and Amelioration of Mother – Earth (PMPRANAM)

Ka mei mariang ka dei kaba la pynbiang bun ki tyllong na ka bynta ki briew. Ka long kaba donkam ban phai biang sha ki rukom rep tynrai bad ka jingkyntiew ia ka jingpyndonkam ia ki dawai sboh ha ka rukom kaba ryntih bad kaba lah ban kyrshan. Ka jingkyntiew ia ki rukom rep tynrai, rep organic, kiwei kiwei ki jait sboh, ki jingsaindur thymmai kum ki sboh Nano bad sboh bio ka lah ban iarap ha ka jingkhyllie im biang ia ka jingseisoh ka mei mariang. Kumta la pynbna ha ka mang tyngka ba yn sdang ia ka “PM Programme for Restoration, Awareness Generation, Nourishment and Amelioration of Mother – Earth (PMPRANAM)” ban ai jingmyntoi ia ki Jylla / Union Territory ba kin kyntiew ia kiwei kiwei ki sboh bad ka jingpyndonkam ia ki dawai sboh kaba don ka jingbahkhlieh.

T. 1451.84 klur ka dei kaba la ioh jingmynjur na ka bynta ka Market Development Assistance (MDA) ban kyntiew ia ki Sboh Organic na ki Gobardhan Plant

Ka song ba la ioh jingmynjur mynta ka sngi ka kynthup ruh ia ka rukom ai jingmyntoi na ka bynta ka jingkhyllie im, ka jingpynsboh, bad ka jingpynbha ia ka mei mariang. Ka skhim Market Development Assistance (MDA) kaba T 1500 ia man ka MT ban ai jingkyrshan ia ki sboh organic lyngba ki Fermented Organic Manures (FOM)/Liquid FOM/Phosphate Rich Organic Manures (PROM) kiba pynmih kum ki jingtam na ki Bio- gas Plant/Compressed Biogas (CBG) Plant ka dei kaba dang sdang hapoh ka kam GOBARdhan.

Kine ki jait sboh ki dei ban don ki kyrteng Bharat Brand FOM, LFOM bad PROM. Ha kawei ka liang, kane kan pynbeit ia ka jingeh ha ka jingpyndonkam ia ki mar kiba tam na ki kam rep bad ki jingeh kiba mih na ka jingthang Parali, bad kan iarap ruh ban pynkhuid ia ka mariang bad wanrah jingshngain jong ka mariang ha ryngkat ka jingwanrah sa kawei ka lad kamai ia ki nongrep. Ki nongrep kin ioh ia ki sboh organic (FOM/LFOM/ PROM) ha ka dor kaba jem.

Kane ka sienjam kan plie lad ia ka jingpyntreikam ia ka jingpynbna ha ka mang tyngka ia ka jingsdang 500 tylli ki jaka pynmih spah na ki mar ba tam hapoh ka skhim GOBARdhan ban pyntyllun shuh shuh ia ka ioh ka kot da kaba kyntiew ia ka jinglah pyntreikam ia kine ki BG/CBG plant.

Ka jingkyntiew ia ki rukom rep tynrai kum ki rukom rep ba lah ban iaineh ka la wanrah ia ka jingkhyllie im biang ia ka jingseisoh jong ka khyndew bad ka jingpynduna ia ka jinglut jingsep jong ki nongrep. 425 tylli ki KVK (Krishi Vigyan Kendra) ki la pyni ia ki rukom rep tynrai bad ki la pynlong 6,777 tylli ki prokram ai jingtip ha kaba la iashim bynta 6.80 lak ki nongrep. La pynbiang ruh ia ki rukom ai jinghikai ha ki rukom rep tynrai ia ki prokram BSc bad MSc bad ia kane yn pyntreikam ha ka samoi ai jingpule kaba sdang ha u Naitung- Nailar 2023.

Ka jingwanrah ia u urea ba sop Sulphur (Urea Gold); ban pyndap ia ka jingduna sulphur ha ka khyndew bad pynduna ka jinglut jingsep jong ki nongrep

Sa kawei ka sienjam ha kane ka song ka dei ka jingwanrah nyngkong ha ka ri ia u urea ba sop sulphur. Une u dei uba kham jem dor bad uba kham treikam ban ia u urea ba sop neem ba pyndonkam mynta. Kane kan pynbeit ia ka jingduna sulphur ha ka khyndew hapoh ka ri. Kan pynduna ruh ia ka jinglut jingsep jong ki nongrep bad kyntiew ia ka kamai kajih jong ki nongrep lyngba ka jingkiew ka jinglah pynmih mar rep.

Poi ki Pradhan Mantri Kisan Samruddhi Kendra (PMKSK) sha ka shi lak

Kumba shi lak tylli ki Pradhan Mantri Kisan Samruddhi Kendra (PMKSK) ki la don ha ka ri. na ka bynta ka jingsuk jong ki nongrep, ia ki jingdonkam ha ki kam rep la pynbiang ha kawei ka jaka ban pynbiang ia ki jingdonkam jong ki nongrep.

Ki jingmyntoi:

Kine ki skhim ba la ioh jingmynjur kin iarap ha ka jingpyndonkam ia ki sboh dawai ha ka rukom ba don jingbahkhlieh bad kane kan pynduna ia ka jinglut jingsep jong ki nongrep. Ka jingkyntiew ia ki rukom rep tynrai, rep organic, kiwei kiwei ki jait sboh kum ki sboh Nano bad ki sboh organic kan iarap ha ka jingkhyllie im biang ia ka jingseisoh jong ka mei mariang.

1. 1. Ka jingbha shuh shuh jong ka khyndew ka wanrah ruh ia ka jingkiew jong ki jingpynkhlain bad ka mariang kaba shngain namar ka jingduna ka jingpynjaboh ia ka mariang. Ka mariang kaba khuid bad kaba shngain ka wanrah ia ka koit ka khiah jong ki briew.
   2. Ka jingpyndonkam kham bha ia ki mar ba tam na ki kam rep kum ki parali kan pynbeit ia ka jingeh kaba mih ha ka jingpynjaboh ia ka lyer bad kan kyntiew ia ka jingkhuid jingsuba, ka mariang bad ka jingpynkylla spah ia ki mar ba tam.
   3. Ki nongrep kin ioh shuh shuh ia ki jingmyntoi – Kim donkam ban pynlut shuh shuh na ka bynta u urea namar u bteng ban don ha ki dor kiba jem. Ki sboh organic (FOM/ PROM) kin don ha ka dor kaba biang. Lyngba u Nano urea bad ka jingduna ka jingpyndonkam ia ki dawai sboh bad ka jingkiew ka jingpyndonkam ki sboh organic, ka jinglut jingsep jong ki nongrep kan hiar. Ka jinglut jingsep kaba duna ha ryngkat ka khyndew kaba seisoh bad ka um kaba khuid kan kyntiew ia ki jingmih na ki kam rep. Ki nongrep kin ioh ia ki jingiohnong kiba kham bun na ki mar rep jong ki.

******