কেন্দ্রগী গৃহ অমসুং কোওপরেসন মন্ত্রী, শ্রী অমিত শাহনা সেন্ত্রেল আর্মদ পুলিস ফোর্সশিং (সি.এ.পি.এফ.শিং) অমসুং নেস্নেল সেক্যুরিতী গার্দ (এন.এস.জি)দা পোস্তিং পীরিবা আই.পি.এস. ওফিসরশিংগী ওইবা ঙসি নই দিল্লীদা পাঙথোকপা চিন্তন শিবিরদা ময়াই তাংবল লৌখ্রে। কেন্দ্রগী গৃহ রাজ্য মন্ত্রী, শ্রী অজয় কুমার মিশ্রা অমসুং শ্রী নিশিথ প্রমানিক, কেন্দ্রগী হোম সেক্রেতরী, দিরেক্তর, ইন্তেলিজেন্স ব্যুরো অমসুং গৃহ মন্ত্রালয়গীগী মকোক থোংবা ওফিসিএলশিংনা চিন্তন শিবির অসিদা শরুক য়াখি।

চিন্তন শিবির অসিদা বোর্দর সেক্যুরিতী, কেপাসিতী বিল্দিং, মখা থাবা ওফিসরশিং লমজিংবীবা, পুলিস-পব্লিক্কী মরীশিং, সোসিএল মেদিয়া অমসুং লো এনফোর্সমেন্ত, কেন্দ্র অমসুং রাজ্যগী হীরমশিং, মিসন রিক্রুৎমেন্ত, আয়ুশ্মান সি.এ.পি.এফ. মোনিতর তৌবা, ত্রেনিং, সি.এ.পি.এফ. ই-আৱাজ পোর্তেল, ইনফ্রাস্ত্রচর প্রোজেক্তশিং মোনিতর তৌবা, য়াইফ থৌরাং, এক্সপরিয়েন্স শিয়র তৌবা অমসুং খ্বাইদগী ফবা প্রেক্তিসশিং অসিগুম্বা ফোর্সশিংগা মরী লৈনবা তোঙান-তোঙানবা হীরমশিংগী মতাংদা খন্নখি। মসিগা লোয়ননা ওপন সেসন অসিদা সেন্ত্রেল আর্মদ পুলিস ফোর্সশিংগা মরী লৈনবা তোঙান-তোঙানবা হীরমশিংদা কেন্দ্রগী গৃহ মন্ত্রীদা সজেসনশিং পীখি।

মহাক্কী ৱারোলদা কেন্দ্রগী গৃহ মন্ত্রীনা হায়খি মদুদি লৈবাক অমা চাউখৎনবগীদমক অফবা লো অমসুং ওর্দর য়াম্না মরু ওই, মসি মপাঙ্গল কনবা পুলিস এদমিনিস্ত্রেসন অমগী খুত্থাংদা খক্তা ফংবা ঙমগনি। প্রধান মন্ত্রী শ্রী নরেন্দ্র মোদীগী লুচিং মখাদা ভারত সরকারনা পুলিস এদমিনিস্ত্রেসন সিস্তেম মপাঙ্গল কনখৎহন্নবা মতম চুপ্পদা খোঙথাংশিং লৌখৎতুনা লাকখি অমসুং মসিবু পিপল-ওরিয়েন্তেদ ওইহন্দুনা মীচম মীয়ামগীদমক শাফবা ওইহনবগা লোয়ননা মীয়ামগী অনীংবশিংসু থুংহল্লি।

অমিত শাহনা হায়খি ঐখোয়গী সেন্ত্রেল আর্মদ ফোর্সশিংনা ইন্তর্নেল লো এন্দ ওর্দর ঙাক্তুনা কান্নবা মওংদা শরুক তম্মি, ঙমখৈশিং ঙাকশেল্লি, নিয়ম চুম্না জেনরেল ইলেক্সনশিং পাঙথোকহল্লি, খুদোংথিবা থোকপা মতমদা মী কনবা অমসুং তেংবাং পীবগী থবক তৌরি, অমসুং স্ত্রেতেজিকেল্লী মরু ওইবা ইন্সতিত্যুসনশিং অমসুং মোনুমেন্তশিং লৈবাক শিনবা থুংবদা ঙাকশেল্লি। মহাক্না হায়খি সি.এ.পি.এফ. পর্সনেলনা মখোয়গী থৌদাংশিংগীদমক কত্থোকপা অমসুং মীৎনা শীংনা লৈবনা মরম ওইদুনা লৈবাক্কী মীচম প্রজাশিংনা শাফনা লৈরি অমসুং শান্তি ওইনা তুম্বা ফংলি। শ্রী শাহনা হায়খি নাকল অমরোমদা পুলিস এদমিনিস্ত্রেসন অমসুং আর্মদ পুলিস ফোর্সশিংনা মীচম মীয়ামগী অনীংনবশিং থুংহন্নবা হোৎনখি অমদি অমরোমদনা সরকারনা পুলিস অমদি সি.এ.পি.এফ. পর্সনেল অমসুং মখোয়গী ইমুং-মনুংশিংগী য়াইফনবা মখোয়দা খুদোংচাবা মতিক চানা পীরি মসিনা অপনবা লৈতনা মখোয়গী থৌদাংশিং পাঙথোকপা ঙমহল্লি।

কেন্দ্রগী গৃহ মন্ত্রীনা হায়খি সি.এ.পি.এফ. পর্সনেলগী য়াইফবা হায়বা অসিদা মোদী সরকারনা মতম চুপ্পদা মরু ওইবা মীৎয়েং চংদুনা লাকখি অমসুং প্রধান মন্ত্রী শ্রী নরেন্দ্র মোদীনা লুচিং মখাদা সরকারনা জৱানশিংগী য়াইফনবা খোঙথাং কয়ামরুম লৌখৎখি। কেন্দ্রগী গৃহ মন্ত্রীনা ইন্তর্নেল সেক্যুরিতী চেৎশিনহনবদা সেন্ত্রেল আর্মদ পুলিস ফোর্সশিংগী থৌদাংবু থাগৎখি। ইনফিলত্রেসন তৌবা অমসুং দ্রগ অমদি খুৎলাইশিং ললোনবা থিংনবা ঙমখৈদা অকনবা চেকশিল-থৌরাং লৌখৎপা মথৌ তাই হায়না অকনবা ৱাফম থমখি।

শ্রী শাহনা হায়খি সি.এ.পি.এফ. পুম্নমক তোখাই-তোখাইবা লমদা তাই অমসুং থৌদাং লৈ অদুবু মখোয়গী সমস্যাশিং অমসুং সোল্যুসনশিং অসিদি চপ মান্নৈ মসি পোজিতিব এপ্রোচকা লোয়ননা থবক পাইখৎপা মথৌ তাই।

শ্রী অমিত শাহনা হায়খি প্রধান মন্ত্রী শ্রী নরেন্দ্র মোদীগী লমজিং মখাদা ভাইব্রেন্ত ভিলেজ প্রোগ্রাম হৌদোকখি অমসুং ঙমখৈগী মফমশিংদা থবক্কী খুদোংচাবশিং পীখি। ঙমখৈশিংদা সেক্যুরিতীগীদমক ঙমখৈদা লৈরিবা খুঙ্গং অমসুং মখোয়গী খুঞ্জা খুদিংমক্কা লোয়ননা মরী থম্বা অমসুং পাউ ফাওনবা অসি য়াম্না মরু ওই, সি.এ.পি.এফ. পুম্নমক্না লোকেল প্রদক্তশিং প্রমোৎ তৌগদবনি, মসিনা ঙমখৈগী মফমশিংদা থবক্কী খুদোংচাবশিং হেনগৎহনগনি অমসুং মাইগ্রেসন থিংবা ঙমগনি। মহাক্না হায়খি লৈবাক্কী য়ুনিতী, ইন্তিগ্রিতূ অমসুং ইন্তর্নেল সেক্যুরিতীগী থৌদাং অসি আই.পি.এস. ওফিসরশিংগী ৱাশক্তা য়াওখি অমসুং ঙমখৈশিংগী সেক্যুরিতী অসি জিলাগী লো অমসুং ওর্দর অমদি লোকেল এদমিনিস্ত্রেসনগা লোয়ননা কোওর্দিনেসন পীনরবা খক্তদা ঙাকপা ঙমগনি।

কেন্দ্রগী গৃহ মন্ত্রীনা জৱানশিংগী য়াইফনবা থবক তৌবা, শান্ন-খোৎনবা থৌগৎপা অমসুং মখোয়গী ইমুংশিংগীদমক সেন্সিতিব এপ্রোচ পাইখৎপা মথৌ তাই, অমসুং সি.এ.পি.এফ. পুম্নমক্তা নেস্নেল লেবেল স্পোর্তস তীমশিং শেম্নবসু ফোঙদোকখি। মহাক্না হায়খি জৱানশিংনা নুমিৎ খুদিংগী শান্ন-খোৎনবগীদমক য়ামদ্রবদা পুং অমা কাইথোক্কদবনি, মসিনা মখোয়গী ফিজিকেল অমসুং মেন্তেল হেল্থ ফগৎহনবা খক্তা নত্তনা মখোয়গী মমা লৈবাক্কী লৈনরিবা মরী চেৎশিনহনগনি। শ্রী শাহনা হায়খি মদুদি আই.পি.এস. ওফিসরশিংনা জৱানশিংগা লোয়ননা অফবা মরী থমগদবনি অমসুং জৱানশিং অসিগী মথক্তা মখোয়গী ইমুং-মনুংশিংবুসু য়েংশিনবীগদবনি।

শ্রী অমিত শাহনা হায়খি মোসী সরকারগী আয়ুশ্মান সি.এ.পি.এফ. স্কিম অসি জৱান খুদিংমক পুন্সি শাংনা অমসুং হকচাং ফনা থম্নবা স্কিম অমনি অমসুং সি.এ.পি.এফ. পুম্নমক্না স্কিমশিং অসিদা শোইবা য়াওহন্দনবা জৱানশিংদগী সজেসনশিং লৌগদবনি। শ্রী শাহনা সি.এ.পি.এফ. হোস্পিতাল পুম্নমক্তা মীচম প্রজাদা লেম্নবা লায়েংনবগীদমক শিল-লাংনবসু হায়খি।

মহাক্না হায়খি জৱান খুদিংমক্না মখোয়গী য়ুমদা উ-পাম্বী ৫ থাগদবনি মসিনা অকোইববু শেংদোকপা খক্তা নত্তনা মহৌশাগীদমক জৱানশিংগী পুক্নিং ৱাখলদা ইথিল পোকহনবা হেনগৎহনগনি।

কেন্দ্রগী গৃহ মন্ত্রীনা সি.এ.পি.এফ.শিংগী শারিবা য়ুমশিং অসি চহি অসিগী নবেম্বরদা এলোৎ তৌনবা পাউতাক পীখি, মথংগী থা অনিদা ই-আৱাজ পোর্তেলগী খুত্থাংদা তুংদা য়ুমশিংগী এলোৎমেন্ত তৌনবসু পাউতাক পীখি। শ্রী অমিত শাহনা সি.এ.পি.এফ.শিংদা নন-জেনরেল দ্যুতী পোস্ত পুম্নমক মেনশিন্নবা, থা অমগী মনুংদা থবক লৌবগী থৌওংদা লৈরিবা অপনবা খুদিংমক লৌথৌক্নবা পাউতাক পীখ্রে। কেন্দ্রগী গৃহ মন্ত্রীনা জৱানশিংগী মরক্তা চনানগী মরু ওইবা খঙহনবগা লোয়ননা মখোয়গী দাইৎতা য়ামদ্রবদা শ্রী অন্নাগী চাদা ৩০ য়াওহনবা মথৌ তাই হায়না অকনবা ৱাফম থমখি।

শ্রী অমিত শাহনা হায়খি মদুদি চিন্তন শিবিরশিং অসি ফোর্স পুম্নমক্তা থবক তৌরিবা ইন্দিয়ন পুলিস সর্ভিসকীদমক মখোয়গী এক্সপরিয়েন্সশিং শিয়র তৌনবা অমসুং মাংদা লৈরিবা শীংনবশিংগী সোল্যুসনশিং পুথোক্তুনা তুংগীদমক লালোংশিং য়াৎনবা মরু ওইবা ফম্পাক অমা ওইরি।

***